| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
14. விபாகபச்சயனித்³தே³ஸவண்ணனா
14. Vipākapaccayaniddesavaṇṇanā
14. விபாகபச்சயனித்³தே³ஸே விபாகா சத்தாரோ க²ந்தா⁴தி யஸ்மா கம்மஸமுட்டா²னாபி ரூபா விபாகா ந ஹொந்தி, தஸ்மா ‘‘விபாகா’’தி வத்வா ‘‘சத்தாரோ க²ந்தா⁴’’தி வுத்தங். ஏவங் அயங் பாளி அரூபத⁴ம்மானஞ்ஞேவ விபாகபச்சயவஸேன ஆக³தா. பஞ்ஹாவாரே பன ‘‘விபாகாப்³யாகதோ ஏகோ க²ந்தோ⁴ திண்ணங் க²ந்தா⁴னங் சித்தஸமுட்டா²னானஞ்ச ரூபானங் விபாகபச்சயேன பச்சயோ. படிஸந்தி⁴க்க²ணே விபாகாப்³யாகதோ ஏகோ க²ந்தோ⁴ திண்ணன்னங் க²ந்தா⁴னங் கடத்தா ச ரூபானங் விபாகபச்சயேன பச்சயோ’’தி ஆக³தத்தா சித்தஸமுட்டா²னகம்மஸமுட்டா²னரூபானம்பி விபாகபச்சயோ லப்³ப⁴தி. இத⁴ பன ஸாவஸேஸவஸேன தே³ஸனா கதாதி அயங் தாவெத்த² பாளிவண்ணனா. அயங் பன விபாகபச்சயோ விபாகபா⁴வேன ஜாதிதோ ஏகவிதோ⁴, பூ⁴மிபே⁴த³தோ காமாவசராதி³வஸேன சதுதா⁴ பி⁴ஜ்ஜதீதி ஏவமெத்த² நானப்பகாரபே⁴த³தோ விஞ்ஞாதப்³போ³ வினிச்ச²யோ.
14. Vipākapaccayaniddese vipākā cattāro khandhāti yasmā kammasamuṭṭhānāpi rūpā vipākā na honti, tasmā ‘‘vipākā’’ti vatvā ‘‘cattāro khandhā’’ti vuttaṃ. Evaṃ ayaṃ pāḷi arūpadhammānaññeva vipākapaccayavasena āgatā. Pañhāvāre pana ‘‘vipākābyākato eko khandho tiṇṇaṃ khandhānaṃ cittasamuṭṭhānānañca rūpānaṃ vipākapaccayena paccayo. Paṭisandhikkhaṇe vipākābyākato eko khandho tiṇṇannaṃ khandhānaṃ kaṭattā ca rūpānaṃ vipākapaccayena paccayo’’ti āgatattā cittasamuṭṭhānakammasamuṭṭhānarūpānampi vipākapaccayo labbhati. Idha pana sāvasesavasena desanā katāti ayaṃ tāvettha pāḷivaṇṇanā. Ayaṃ pana vipākapaccayo vipākabhāvena jātito ekavidho, bhūmibhedato kāmāvacarādivasena catudhā bhijjatīti evamettha nānappakārabhedato viññātabbo vinicchayo.
ஏவங் பி⁴ன்னே பனெத்த² காமாவசரரூபாவசரவிபாகோ அத்தனா ஸம்பயுத்தத⁴ம்மானங் பவத்தே சித்தஸமுட்டா²னரூபானங் படிஸந்தி⁴யங் கடத்தாரூபானஞ்ச விபாகபச்சயோ ஹோதி. அரூபாவசரவிபாகோ ஸம்பயுத்தத⁴ம்மானஞ்ஞேவ. லோகுத்தரவிபாகோ பஞ்சவோகாரே ஸம்பயுத்தத⁴ம்மானஞ்சேவ சித்தஸமுட்டா²னரூபஸ்ஸ ச, சதுவோகாரே ஸம்பயுத்தக்க²ந்தா⁴னஞ்ஞேவ விபாகபச்சயோ ஹோதீதி ஏவமெத்த² பச்சயுப்பன்னதோபி விஞ்ஞாதப்³போ³ வினிச்ச²யோதி.
Evaṃ bhinne panettha kāmāvacararūpāvacaravipāko attanā sampayuttadhammānaṃ pavatte cittasamuṭṭhānarūpānaṃ paṭisandhiyaṃ kaṭattārūpānañca vipākapaccayo hoti. Arūpāvacaravipāko sampayuttadhammānaññeva. Lokuttaravipāko pañcavokāre sampayuttadhammānañceva cittasamuṭṭhānarūpassa ca, catuvokāre sampayuttakkhandhānaññeva vipākapaccayo hotīti evamettha paccayuppannatopi viññātabbo vinicchayoti.
விபாகபச்சயனித்³தே³ஸவண்ணனா.
Vipākapaccayaniddesavaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / பட்டா²னபாளி • Paṭṭhānapāḷi / (2) பச்சயனித்³தே³ஸோ • (2) Paccayaniddeso
