| Library / Tipiṭaka / তিপিটক • Tipiṭaka / পঞ্চপকরণ-অট্ঠকথা • Pañcapakaraṇa-aṭṭhakathā |
৩. ৰিপাকত্তিকৰণ্ণনা
3. Vipākattikavaṇṇanā
১-২৩. ৰিপাকত্তিকে ৰিপাকং ধম্মং পটিচ্চ ৰিপাকো ধম্মো উপ্পজ্জতি হেতুপচ্চযাতি যে হেতুপচ্চযে তেরস ৰারা ৰুত্তা, তে সঙ্খিপিত্ৰা গণনায দস্সেতুং হেতুযা তেরসাতি ৰুত্তং। আরম্মণে পঞ্চাতিআদীসুপি এসেৰ নযো। এৰমেত্থ তেরস পঞ্চ নৰ সত্ত তীণি দ্ৰেতি ছ গণনপরিচ্ছেদা, তেসং ৰসেন পচ্চযসংসন্দনে হেট্ঠা ৰুত্তনযেনেৰ গণনা ৰেদিতব্বা।
1-23. Vipākattike vipākaṃ dhammaṃ paṭicca vipāko dhammo uppajjati hetupaccayāti ye hetupaccaye terasa vārā vuttā, te saṅkhipitvā gaṇanāya dassetuṃ hetuyā terasāti vuttaṃ. Ārammaṇe pañcātiādīsupi eseva nayo. Evamettha terasa pañca nava satta tīṇi dveti cha gaṇanaparicchedā, tesaṃ vasena paccayasaṃsandane heṭṭhā vuttanayeneva gaṇanā veditabbā.
২৪-৫২. পচ্চনীযেপি ৰিপাকং ধম্মং পটিচ্চ ৰিপাকো ধম্মো উপ্পজ্জতি নহেতুপচ্চযাতি যে নহেতুপচ্চযে দস ৰারা ৰুত্তা, তে সঙ্খিপিত্ৰা গণনায দস্সেতুং নহেতুযা দসাতি ৰুত্তং। ন আরম্মণে পঞ্চাতিআদীসুপি এসেৰ নযো। এৰমেত্থ দস পঞ্চ তেরস দ্ৰাদস দ্ৰে একং নৰ তীণীতি অট্ঠ গণনপরিচ্ছেদা, তেসং ৰসেন পচ্চযসংসন্দনে হেট্ঠা ৰুত্তনযেনেৰ ৰিত্থারতো গণনা ৰেদিতব্বা। পাল়ি পন সঙ্খিত্তা, এতেসঞ্ঞেৰ পন লদ্ধগণনরপরিচ্ছেদানং ৰারানং ৰসেন সংসন্দিত্ৰা অনুলোমপচ্চনীযং পচ্চনীযানুলোমঞ্চ ৰেদিতব্বং।
24-52. Paccanīyepi vipākaṃ dhammaṃ paṭicca vipāko dhammo uppajjati nahetupaccayāti ye nahetupaccaye dasa vārā vuttā, te saṅkhipitvā gaṇanāya dassetuṃ nahetuyā dasāti vuttaṃ. Na ārammaṇe pañcātiādīsupi eseva nayo. Evamettha dasa pañca terasa dvādasa dve ekaṃ nava tīṇīti aṭṭha gaṇanaparicchedā, tesaṃ vasena paccayasaṃsandane heṭṭhā vuttanayeneva vitthārato gaṇanā veditabbā. Pāḷi pana saṅkhittā, etesaññeva pana laddhagaṇanaraparicchedānaṃ vārānaṃ vasena saṃsanditvā anulomapaccanīyaṃ paccanīyānulomañca veditabbaṃ.
সহজাতৰারো ইমিনাৰ একগতিকো। পচ্চযনিস্সযসংসট্ঠসম্পযুত্তৰারা যথাপাল়িমেৰ নিয্যন্তি।
Sahajātavāro imināva ekagatiko. Paccayanissayasaṃsaṭṭhasampayuttavārā yathāpāḷimeva niyyanti.
৯২. পঞ্হাৰারে কুসলাকুসলে নিরুদ্ধেতি এতস্মিং ৰিপস্সনাৰসেন পৰত্তে কুসলে সারজ্জনাদিৰসেন পৰত্তে অকুসলে চ নিরুদ্ধে। ৰিপাকো তদারম্মণতা উপ্পজ্জতীতি কামাৰচরৰিপাকো তদারম্মণতায উপ্পজ্জতি। যে পন ‘‘ৰিপস্সনাজৰনানং ৰিচিকিচ্ছুদ্ধচ্চানঞ্চ পরিযোসানে তদারম্মণং নত্থী’’তি ৰদন্তি, তে ইমায তন্তিযা পটিসেধেতব্বা। আকাসানঞ্চাযতনকুসলং ৰিঞ্ঞাণঞ্চাযতনস্স কিরিযস্স আরম্মণপচ্চযেন পচ্চযোতি অরহত্তং পত্ৰা অসমাপন্নপুব্বা সমাপত্তিযো পটিলোমতো সমাপজ্জন্তস্স ৰসেনেতং ৰুত্তং। ইমিনা উপাযেন সব্বৰিস্সজ্জনেসু সাধুকং পাল়িং উপপরিক্খিত্ৰা অত্থো ৰেদিতব্বো।
92. Pañhāvāre kusalākusale niruddheti etasmiṃ vipassanāvasena pavatte kusale sārajjanādivasena pavatte akusale ca niruddhe. Vipāko tadārammaṇatā uppajjatīti kāmāvacaravipāko tadārammaṇatāya uppajjati. Ye pana ‘‘vipassanājavanānaṃ vicikicchuddhaccānañca pariyosāne tadārammaṇaṃ natthī’’ti vadanti, te imāya tantiyā paṭisedhetabbā. Ākāsānañcāyatanakusalaṃ viññāṇañcāyatanassa kiriyassa ārammaṇapaccayena paccayoti arahattaṃ patvā asamāpannapubbā samāpattiyo paṭilomato samāpajjantassa vasenetaṃ vuttaṃ. Iminā upāyena sabbavissajjanesu sādhukaṃ pāḷiṃ upaparikkhitvā attho veditabbo.
১২০. হেতুযা সত্ত, আরম্মণে নৰ, অধিপতিযা দসাতিআদীসুপি সহজাতাধিপতিৰসেন আরম্মণাধিপতিৰসেন সহজাতনিস্সযৰসেন পুরেজাতনিস্সযৰসেন অনন্তরূপনিস্সযৰসেন আরম্মণূপনিস্সযৰসেন পকতূপনিস্সযৰসেন সহজাতৰিপ্পযুত্তৰসেন পুরেজাতপচ্ছাজাতৰিপ্পযুত্তৰসেনাতি যত্থ যত্থ যথা যথা যত্তকানি ৰিস্সজ্জনানি লব্ভন্তি, তত্থ তত্থ তথা তথা তানি সব্বানি সল্লক্খেতব্বানি। তথা পচ্চনীযাদীসু অনুলোমৰসেন ৰারুদ্ধরণং, অনুলোমতো লদ্ধৰারানং পচ্চনীযতো গণনা, পচ্চযসংসন্দনং, অনুলোমপচ্চনীযে পচ্চনীযানুলোমে চ সুদ্ধিকেসু চেৰ সংসন্দনৰসেন চ পৰত্তেসু হেতুমূলকাদীসু লব্ভমানৰারগণনা, অলব্ভমানানং অলব্ভমানতাতি সব্বং হেট্ঠা ৰুত্তনযেনেৰ ৰেদিতব্বং।
120. Hetuyā satta, ārammaṇe nava, adhipatiyā dasātiādīsupi sahajātādhipativasena ārammaṇādhipativasena sahajātanissayavasena purejātanissayavasena anantarūpanissayavasena ārammaṇūpanissayavasena pakatūpanissayavasena sahajātavippayuttavasena purejātapacchājātavippayuttavasenāti yattha yattha yathā yathā yattakāni vissajjanāni labbhanti, tattha tattha tathā tathā tāni sabbāni sallakkhetabbāni. Tathā paccanīyādīsu anulomavasena vāruddharaṇaṃ, anulomato laddhavārānaṃ paccanīyato gaṇanā, paccayasaṃsandanaṃ, anulomapaccanīye paccanīyānulome ca suddhikesu ceva saṃsandanavasena ca pavattesu hetumūlakādīsu labbhamānavāragaṇanā, alabbhamānānaṃ alabbhamānatāti sabbaṃ heṭṭhā vuttanayeneva veditabbaṃ.
যথা চেত্থ, এৰং ইতো পরেসুপি তিকদুকেসু। পট্ঠানপকরণঞ্হি পাল়িতোৰ অনন্তং অপরিমাণং। তস্স পদপটিপাটিযা অত্থং ৰণ্ণযিস্সামীতি পটিপন্নস্স অতিদীঘাযুকস্সাপি আযু নপ্পহোতি। ন চস্স একদেসং ৰণ্ণেত্ৰা সেসম্হি নযতো দস্সিযমানে ন সক্কা অত্থো জানিতুং, তস্মা ইতো পরং এত্তকম্পি অৰত্ৰা সেসেসু তিকদুকেসু হেট্ঠা অৰুত্তপ্পকারত্তা যং যং অৰস্সং ৰত্তব্বং, তং তদেৰ ৰক্খাম। যং পন অৰত্ৰা গমিস্সাম, তং পাল়িনযেনেৰ ৰেদিতব্বন্তি।
Yathā cettha, evaṃ ito paresupi tikadukesu. Paṭṭhānapakaraṇañhi pāḷitova anantaṃ aparimāṇaṃ. Tassa padapaṭipāṭiyā atthaṃ vaṇṇayissāmīti paṭipannassa atidīghāyukassāpi āyu nappahoti. Na cassa ekadesaṃ vaṇṇetvā sesamhi nayato dassiyamāne na sakkā attho jānituṃ, tasmā ito paraṃ ettakampi avatvā sesesu tikadukesu heṭṭhā avuttappakārattā yaṃ yaṃ avassaṃ vattabbaṃ, taṃ tadeva vakkhāma. Yaṃ pana avatvā gamissāma, taṃ pāḷinayeneva veditabbanti.
ৰিপাকত্তিকৰণ্ণনা।
Vipākattikavaṇṇanā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / পট্ঠানপাল়ি • Paṭṭhānapāḷi / ৩. ৰিপাকত্তিকং • 3. Vipākattikaṃ
