| Library / Tipiṭaka / तिपिटक • Tipiṭaka / कथावत्थुपाळि • Kathāvatthupāḷi |
७. सत्तमवग्गो
7. Sattamavaggo
(७२) १०. विपाको विपाकधम्मधम्मोतिकथा
(72) 10. Vipāko vipākadhammadhammotikathā
५०१. विपाको विपाकधम्मधम्मोति? आमन्ता। तस्स विपाको विपाकधम्मधम्मोति? न हेवं वत्तब्बे…पे॰… तस्स विपाको विपाकधम्मधम्मोति? आमन्ता। तस्स तस्सेव नत्थि दुक्खस्स अन्तकिरिया नत्थि वट्टुपच्छेदो नत्थि अनुपादापरिनिब्बानन्ति? न हेवं वत्तब्बे…पे॰…।
501. Vipāko vipākadhammadhammoti? Āmantā. Tassa vipāko vipākadhammadhammoti? Na hevaṃ vattabbe…pe… tassa vipāko vipākadhammadhammoti? Āmantā. Tassa tasseva natthi dukkhassa antakiriyā natthi vaṭṭupacchedo natthi anupādāparinibbānanti? Na hevaṃ vattabbe…pe….
विपाको विपाकधम्मधम्मोति? आमन्ता। विपाकोति वा विपाकधम्मधम्मोति वा विपाकधम्मधम्मोति वा विपाकोति वा एसेसे एकट्ठे समे समभागे तज्जातेति? न हेवं वत्तब्बे…पे॰…।
Vipāko vipākadhammadhammoti? Āmantā. Vipākoti vā vipākadhammadhammoti vā vipākadhammadhammoti vā vipākoti vā esese ekaṭṭhe same samabhāge tajjāteti? Na hevaṃ vattabbe…pe….
विपाको विपाकधम्मधम्मोति? आमन्ता। विपाको च विपाकधम्मधम्मो च विपाकधम्मधम्मो च विपाको च सहगता सहजाता संसट्ठा सम्पयुत्ता एकुप्पादा एकनिरोधा एकवत्थुका एकारम्मणाति? न हेवं वत्तब्बे…पे॰…।
Vipāko vipākadhammadhammoti? Āmantā. Vipāko ca vipākadhammadhammo ca vipākadhammadhammo ca vipāko ca sahagatā sahajātā saṃsaṭṭhā sampayuttā ekuppādā ekanirodhā ekavatthukā ekārammaṇāti? Na hevaṃ vattabbe…pe….
विपाको विपाकधम्मधम्मोति? आमन्ता। तञ्ञेव अकुसलं सो अकुसलस्स विपाको, तञ्ञेव कुसलं सो कुसलस्स विपाकोति? न हेवं वत्तब्बे…पे॰…।
Vipāko vipākadhammadhammoti? Āmantā. Taññeva akusalaṃ so akusalassa vipāko, taññeva kusalaṃ so kusalassa vipākoti? Na hevaṃ vattabbe…pe….
विपाको विपाकधम्मधम्मोति? आमन्ता। येनेव चित्तेन पाणं हनति तेनेव चित्तेन निरये पच्चति, येनेव चित्तेन दानं देति तेनेव चित्तेन सग्गे मोदतीति? न हेवं वत्तब्बे…पे॰…।
Vipāko vipākadhammadhammoti? Āmantā. Yeneva cittena pāṇaṃ hanati teneva cittena niraye paccati, yeneva cittena dānaṃ deti teneva cittena sagge modatīti? Na hevaṃ vattabbe…pe….
५०२. न वत्तब्बं – ‘‘विपाको विपाकधम्मधम्मो’’ति? आमन्ता। ननु विपाका चत्तारो खन्धा अरूपिनो अञ्ञमञ्ञपच्चयाति? आमन्ता। हञ्चि विपाका चत्तारो खन्धा अरूपिनो अञ्ञमञ्ञपच्चया, तेन वत रे वत्तब्बे – ‘‘विपाको विपाकधम्मधम्मो’’ति।
502. Na vattabbaṃ – ‘‘vipāko vipākadhammadhammo’’ti? Āmantā. Nanu vipākā cattāro khandhā arūpino aññamaññapaccayāti? Āmantā. Hañci vipākā cattāro khandhā arūpino aññamaññapaccayā, tena vata re vattabbe – ‘‘vipāko vipākadhammadhammo’’ti.
विपाको विपाकधम्मधम्मोतिकथा निट्ठिता।
Vipāko vipākadhammadhammotikathā niṭṭhitā.
सत्तमवग्गो।
Sattamavaggo.
तस्सुद्दानं –
Tassuddānaṃ –
सङ्गहो , सम्पयुत्तो, चेतसिको धम्मो, चेतसिकं दानं, परिभोगमयं पुञ्ञं वड्ढति, इतो दिन्नेन तत्थ यापेन्ति, पथवी कम्मविपाको, जरामरणं विपाको, नत्थि अरियधम्मविपाको, विपाको विपाकधम्मधम्मोति।
Saṅgaho , sampayutto, cetasiko dhammo, cetasikaṃ dānaṃ, paribhogamayaṃ puññaṃ vaḍḍhati, ito dinnena tattha yāpenti, pathavī kammavipāko, jarāmaraṇaṃ vipāko, natthi ariyadhammavipāko, vipāko vipākadhammadhammoti.
Related texts:
अट्ठकथा • Aṭṭhakathā / अभिधम्मपिटक (अट्ठकथा) • Abhidhammapiṭaka (aṭṭhakathā) / पञ्चपकरण-अट्ठकथा • Pañcapakaraṇa-aṭṭhakathā / १०. विपाको विपाकधम्मधम्मोतिकथावण्णना • 10. Vipāko vipākadhammadhammotikathāvaṇṇanā
टीका • Tīkā / अभिधम्मपिटक (टीका) • Abhidhammapiṭaka (ṭīkā) / पञ्चपकरण-मूलटीका • Pañcapakaraṇa-mūlaṭīkā / १०. विपाकोविपाकधम्मधम्मोतिकथावण्णना • 10. Vipākovipākadhammadhammotikathāvaṇṇanā
टीका • Tīkā / अभिधम्मपिटक (टीका) • Abhidhammapiṭaka (ṭīkā) / पञ्चपकरण-अनुटीका • Pañcapakaraṇa-anuṭīkā / १०. विपाकोविपाकधम्मधम्मोतिकथावण्णना • 10. Vipākovipākadhammadhammotikathāvaṇṇanā
