| Library / Tipiṭaka / តិបិដក • Tipiṭaka / កថាវត្ថុបាឡិ • Kathāvatthupāḷi |
៧. សត្តមវគ្គោ
7. Sattamavaggo
(៧២) ១០. វិបាកោ វិបាកធម្មធម្មោតិកថា
(72) 10. Vipāko vipākadhammadhammotikathā
៥០១. វិបាកោ វិបាកធម្មធម្មោតិ? អាមន្តា។ តស្ស វិបាកោ វិបាកធម្មធម្មោតិ? ន ហេវំ វត្តព្ពេ…បេ.… តស្ស វិបាកោ វិបាកធម្មធម្មោតិ? អាមន្តា។ តស្ស តស្សេវ នត្ថិ ទុក្ខស្ស អន្តកិរិយា នត្ថិ វដ្ដុបច្ឆេទោ នត្ថិ អនុបាទាបរិនិព្ពានន្តិ? ន ហេវំ វត្តព្ពេ…បេ.…។
501. Vipāko vipākadhammadhammoti? Āmantā. Tassa vipāko vipākadhammadhammoti? Na hevaṃ vattabbe…pe… tassa vipāko vipākadhammadhammoti? Āmantā. Tassa tasseva natthi dukkhassa antakiriyā natthi vaṭṭupacchedo natthi anupādāparinibbānanti? Na hevaṃ vattabbe…pe….
វិបាកោ វិបាកធម្មធម្មោតិ? អាមន្តា។ វិបាកោតិ វា វិបាកធម្មធម្មោតិ វា វិបាកធម្មធម្មោតិ វា វិបាកោតិ វា ឯសេសេ ឯកដ្ឋេ សមេ សមភាគេ តជ្ជាតេតិ? ន ហេវំ វត្តព្ពេ…បេ.…។
Vipāko vipākadhammadhammoti? Āmantā. Vipākoti vā vipākadhammadhammoti vā vipākadhammadhammoti vā vipākoti vā esese ekaṭṭhe same samabhāge tajjāteti? Na hevaṃ vattabbe…pe….
វិបាកោ វិបាកធម្មធម្មោតិ? អាមន្តា។ វិបាកោ ច វិបាកធម្មធម្មោ ច វិបាកធម្មធម្មោ ច វិបាកោ ច សហគតា សហជាតា សំសដ្ឋា សម្បយុត្តា ឯកុប្បាទា ឯកនិរោធា ឯកវត្ថុកា ឯការម្មណាតិ? ន ហេវំ វត្តព្ពេ…បេ.…។
Vipāko vipākadhammadhammoti? Āmantā. Vipāko ca vipākadhammadhammo ca vipākadhammadhammo ca vipāko ca sahagatā sahajātā saṃsaṭṭhā sampayuttā ekuppādā ekanirodhā ekavatthukā ekārammaṇāti? Na hevaṃ vattabbe…pe….
វិបាកោ វិបាកធម្មធម្មោតិ? អាមន្តា។ តញ្ញេវ អកុសលំ សោ អកុសលស្ស វិបាកោ, តញ្ញេវ កុសលំ សោ កុសលស្ស វិបាកោតិ? ន ហេវំ វត្តព្ពេ…បេ.…។
Vipāko vipākadhammadhammoti? Āmantā. Taññeva akusalaṃ so akusalassa vipāko, taññeva kusalaṃ so kusalassa vipākoti? Na hevaṃ vattabbe…pe….
វិបាកោ វិបាកធម្មធម្មោតិ? អាមន្តា។ យេនេវ ចិត្តេន បាណំ ហនតិ តេនេវ ចិត្តេន និរយេ បច្ចតិ, យេនេវ ចិត្តេន ទានំ ទេតិ តេនេវ ចិត្តេន សគ្គេ មោទតីតិ? ន ហេវំ វត្តព្ពេ…បេ.…។
Vipāko vipākadhammadhammoti? Āmantā. Yeneva cittena pāṇaṃ hanati teneva cittena niraye paccati, yeneva cittena dānaṃ deti teneva cittena sagge modatīti? Na hevaṃ vattabbe…pe….
៥០២. ន វត្តព្ពំ – ‘‘វិបាកោ វិបាកធម្មធម្មោ’’តិ? អាមន្តា។ ននុ វិបាកា ចត្តារោ ខន្ធា អរូបិនោ អញ្ញមញ្ញបច្ចយាតិ? អាមន្តា។ ហញ្ចិ វិបាកា ចត្តារោ ខន្ធា អរូបិនោ អញ្ញមញ្ញបច្ចយា, តេន វត រេ វត្តព្ពេ – ‘‘វិបាកោ វិបាកធម្មធម្មោ’’តិ។
502. Na vattabbaṃ – ‘‘vipāko vipākadhammadhammo’’ti? Āmantā. Nanu vipākā cattāro khandhā arūpino aññamaññapaccayāti? Āmantā. Hañci vipākā cattāro khandhā arūpino aññamaññapaccayā, tena vata re vattabbe – ‘‘vipāko vipākadhammadhammo’’ti.
វិបាកោ វិបាកធម្មធម្មោតិកថា និដ្ឋិតា។
Vipāko vipākadhammadhammotikathā niṭṭhitā.
សត្តមវគ្គោ។
Sattamavaggo.
តស្សុទ្ទានំ –
Tassuddānaṃ –
សង្គហោ , សម្បយុត្តោ, ចេតសិកោ ធម្មោ, ចេតសិកំ ទានំ, បរិភោគមយំ បុញ្ញំ វឌ្ឍតិ, ឥតោ ទិន្នេន តត្ថ យាបេន្តិ, បថវី កម្មវិបាកោ, ជរាមរណំ វិបាកោ, នត្ថិ អរិយធម្មវិបាកោ, វិបាកោ វិបាកធម្មធម្មោតិ។
Saṅgaho , sampayutto, cetasiko dhammo, cetasikaṃ dānaṃ, paribhogamayaṃ puññaṃ vaḍḍhati, ito dinnena tattha yāpenti, pathavī kammavipāko, jarāmaraṇaṃ vipāko, natthi ariyadhammavipāko, vipāko vipākadhammadhammoti.
Related texts:
អដ្ឋកថា • Aṭṭhakathā / អភិធម្មបិដក (អដ្ឋកថា) • Abhidhammapiṭaka (aṭṭhakathā) / បញ្ចបករណ-អដ្ឋកថា • Pañcapakaraṇa-aṭṭhakathā / ១០. វិបាកោ វិបាកធម្មធម្មោតិកថាវណ្ណនា • 10. Vipāko vipākadhammadhammotikathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-មូលដីកា • Pañcapakaraṇa-mūlaṭīkā / ១០. វិបាកោវិបាកធម្មធម្មោតិកថាវណ្ណនា • 10. Vipākovipākadhammadhammotikathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-អនុដីកា • Pañcapakaraṇa-anuṭīkā / ១០. វិបាកោវិបាកធម្មធម្មោតិកថាវណ្ណនា • 10. Vipākovipākadhammadhammotikathāvaṇṇanā
