| Library / Tipiṭaka / තිපිටක • Tipiṭaka / කථාවත්‌ථුපාළි • Kathāvatthupāḷi |
7. සත්‌තමවග්‌ගො
7. Sattamavaggo
(72) 10. විපාකො විපාකධම්‌මධම්‌මොතිකථා
(72) 10. Vipāko vipākadhammadhammotikathā
501. විපාකො විපාකධම්‌මධම්‌මොති? ආමන්‌තා. තස්‌ස විපාකො විපාකධම්‌මධම්‌මොති? න හෙවං වත්‌තබ්‌බෙ…පෙ.… තස්‌ස විපාකො විපාකධම්‌මධම්‌මොති? ආමන්‌තා. තස්‌ස තස්‌සෙව නත්‌ථි දුක්‌ඛස්‌ස අන්‌තකිරියා නත්‌ථි වට්‌ටුපච්‌ඡෙදො නත්‌ථි අනුපාදාපරිනිබ්‌බානන්‌ති? න හෙවං වත්‌තබ්‌බෙ…පෙ.….
501. Vipāko vipākadhammadhammoti? Āmantā. Tassa vipāko vipākadhammadhammoti? Na hevaṃ vattabbe…pe… tassa vipāko vipākadhammadhammoti? Āmantā. Tassa tasseva natthi dukkhassa antakiriyā natthi vaṭṭupacchedo natthi anupādāparinibbānanti? Na hevaṃ vattabbe…pe….
විපාකො විපාකධම්‌මධම්‌මොති? ආමන්‌තා. විපාකොති වා විපාකධම්‌මධම්‌මොති වා විපාකධම්‌මධම්‌මොති වා විපාකොති වා එසෙසෙ එකට්‌ඨෙ සමෙ සමභාගෙ තජ්‌ජාතෙති? න හෙවං වත්‌තබ්‌බෙ…පෙ.….
Vipāko vipākadhammadhammoti? Āmantā. Vipākoti vā vipākadhammadhammoti vā vipākadhammadhammoti vā vipākoti vā esese ekaṭṭhe same samabhāge tajjāteti? Na hevaṃ vattabbe…pe….
විපාකො විපාකධම්‌මධම්‌මොති? ආමන්‌තා. විපාකො ච විපාකධම්‌මධම්‌මො ච විපාකධම්‌මධම්‌මො ච විපාකො ච සහගතා සහජාතා සංසට්‌ඨා සම්‌පයුත්‌තා එකුප්‌පාදා එකනිරොධා එකවත්‌ථුකා එකාරම්‌මණාති? න හෙවං වත්‌තබ්‌බෙ…පෙ.….
Vipāko vipākadhammadhammoti? Āmantā. Vipāko ca vipākadhammadhammo ca vipākadhammadhammo ca vipāko ca sahagatā sahajātā saṃsaṭṭhā sampayuttā ekuppādā ekanirodhā ekavatthukā ekārammaṇāti? Na hevaṃ vattabbe…pe….
විපාකො විපාකධම්‌මධම්‌මොති? ආමන්‌තා. තඤ්‌ඤෙව අකුසලං සො අකුසලස්‌ස විපාකො, තඤ්‌ඤෙව කුසලං සො කුසලස්‌ස විපාකොති? න හෙවං වත්‌තබ්‌බෙ…පෙ.….
Vipāko vipākadhammadhammoti? Āmantā. Taññeva akusalaṃ so akusalassa vipāko, taññeva kusalaṃ so kusalassa vipākoti? Na hevaṃ vattabbe…pe….
විපාකො විපාකධම්‌මධම්‌මොති? ආමන්‌තා. යෙනෙව චිත්‌තෙන පාණං හනති තෙනෙව චිත්‌තෙන නිරයෙ පච්‌චති, යෙනෙව චිත්‌තෙන දානං දෙති තෙනෙව චිත්‌තෙන සග්‌ගෙ මොදතීති? න හෙවං වත්‌තබ්‌බෙ…පෙ.….
Vipāko vipākadhammadhammoti? Āmantā. Yeneva cittena pāṇaṃ hanati teneva cittena niraye paccati, yeneva cittena dānaṃ deti teneva cittena sagge modatīti? Na hevaṃ vattabbe…pe….
502. න වත්‌තබ්‌බං – ‘‘විපාකො විපාකධම්‌මධම්‌මො’’ති? ආමන්‌තා. නනු විපාකා චත්‌තාරො ඛන්‌ධා අරූපිනො අඤ්‌ඤමඤ්‌ඤපච්‌චයාති? ආමන්‌තා. හඤ්‌චි විපාකා චත්‌තාරො ඛන්‌ධා අරූපිනො අඤ්‌ඤමඤ්‌ඤපච්‌චයා, තෙන වත රෙ වත්‌තබ්‌බෙ – ‘‘විපාකො විපාකධම්‌මධම්‌මො’’ති.
502. Na vattabbaṃ – ‘‘vipāko vipākadhammadhammo’’ti? Āmantā. Nanu vipākā cattāro khandhā arūpino aññamaññapaccayāti? Āmantā. Hañci vipākā cattāro khandhā arūpino aññamaññapaccayā, tena vata re vattabbe – ‘‘vipāko vipākadhammadhammo’’ti.
විපාකො විපාකධම්‌මධම්‌මොතිකථා නිට්‌ඨිතා.
Vipāko vipākadhammadhammotikathā niṭṭhitā.
සත්‌තමවග්‌ගො.
Sattamavaggo.
තස්‌සුද්‌දානං –
Tassuddānaṃ –
සඞ්‌ගහො , සම්‌පයුත්‌තො, චෙතසිකො ධම්‌මො, චෙතසිකං දානං, පරිභොගමයං පුඤ්‌ඤං වඩ්‌ඪති, ඉතො දින්‌නෙන තත්‌ථ යාපෙන්‌ති, පථවී කම්‌මවිපාකො, ජරාමරණං විපාකො, නත්‌ථි අරියධම්‌මවිපාකො, විපාකො විපාකධම්‌මධම්‌මොති.
Saṅgaho , sampayutto, cetasiko dhammo, cetasikaṃ dānaṃ, paribhogamayaṃ puññaṃ vaḍḍhati, ito dinnena tattha yāpenti, pathavī kammavipāko, jarāmaraṇaṃ vipāko, natthi ariyadhammavipāko, vipāko vipākadhammadhammoti.
Related texts:
අට්‌ඨකථා • Aṭṭhakathā / අභිධම්‌මපිටක (අට්‌ඨකථා) • Abhidhammapiṭaka (aṭṭhakathā) / පඤ්‌චපකරණ-අට්‌ඨකථා • Pañcapakaraṇa-aṭṭhakathā / 10. විපාකො විපාකධම්‌මධම්‌මොතිකථාවණ්‌ණනා • 10. Vipāko vipākadhammadhammotikathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-මූලටීකා • Pañcapakaraṇa-mūlaṭīkā / 10. විපාකොවිපාකධම්‌මධම්‌මොතිකථාවණ්‌ණනා • 10. Vipākovipākadhammadhammotikathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-අනුටීකා • Pañcapakaraṇa-anuṭīkā / 10. විපාකොවිපාකධම්‌මධම්‌මොතිකථාවණ්‌ණනා • 10. Vipākovipākadhammadhammotikathāvaṇṇanā
