| Library / Tipiṭaka / ತಿಪಿಟಕ • Tipiṭaka / ಪಞ್ಚಪಕರಣ-ಅಟ್ಠಕಥಾ • Pañcapakaraṇa-aṭṭhakathā |
೧೦. ವಿಪಾಕೋ ವಿಪಾಕಧಮ್ಮಧಮ್ಮೋತಿಕಥಾವಣ್ಣನಾ
10. Vipāko vipākadhammadhammotikathāvaṇṇanā
೫೦೧. ಇದಾನಿ ವಿಪಾಕೋ ವಿಪಾಕಧಮ್ಮಧಮ್ಮೋತಿಕಥಾ ನಾಮ ಹೋತಿ। ತತ್ಥ ಯಸ್ಮಾ ವಿಪಾಕೋ ವಿಪಾಕಸ್ಸ ಅಞ್ಞಮಞ್ಞಾದಿಪಚ್ಚಯವಸೇನ ಪಚ್ಚಯೋ ಹೋತಿ, ತಸ್ಮಾ ವಿಪಾಕೋಪಿ ವಿಪಾಕಧಮ್ಮಧಮ್ಮೋತಿ ಯೇಸಂ ಲದ್ಧಿ, ಸೇಯ್ಯಥಾಪಿ ಅನ್ಧಕಾನಂ; ತೇ ಸನ್ಧಾಯ ಪುಚ್ಛಾ ಸಕವಾದಿಸ್ಸ, ಪಟಿಞ್ಞಾ ಇತರಸ್ಸ। ತಸ್ಸ ವಿಪಾಕೋತಿ ತಸ್ಸ ವಿಪಾಕಧಮ್ಮಧಮ್ಮಸ್ಸ ವಿಪಾಕಸ್ಸ ಯೋ ವಿಪಾಕೋ, ಸೋಪಿ ತೇ ವಿಪಾಕಧಮ್ಮಧಮ್ಮೋ ಹೋತೀತಿ ಪುಚ್ಛತಿ। ಇತರೋ ಆಯತಿಂ ವಿಪಾಕದಾನಾಭಾವಂ ಸನ್ಧಾಯ ಪಟಿಕ್ಖಿಪತಿ। ದುತಿಯಂ ಪುಟ್ಠೋ ತಪ್ಪಚ್ಚಯಾಪಿ ಅಞ್ಞಸ್ಸ ವಿಪಾಕಸ್ಸ ಉಪ್ಪತ್ತಿಂ ಸನ್ಧಾಯ ಪಟಿಜಾನಾತಿ। ಏವಂ ಸನ್ತೇ ಪನಸ್ಸ ಕುಸಲಾಕುಸಲಸ್ಸ ವಿಯ ತಸ್ಸಾಪಿ ವಿಪಾಕಸ್ಸ ವಿಪಾಕೋ, ತಸ್ಸಾಪಿ ವಿಪಾಕೋತಿ ವಟ್ಟಾನುಪಚ್ಛೇದೋ ಆಪಜ್ಜತೀತಿ ಪುಟ್ಠೋ ಸಮಯವಿರೋಧಭಯೇನ ಪಟಿಕ್ಖಿಪತಿ।
501. Idāni vipāko vipākadhammadhammotikathā nāma hoti. Tattha yasmā vipāko vipākassa aññamaññādipaccayavasena paccayo hoti, tasmā vipākopi vipākadhammadhammoti yesaṃ laddhi, seyyathāpi andhakānaṃ; te sandhāya pucchā sakavādissa, paṭiññā itarassa. Tassa vipākoti tassa vipākadhammadhammassa vipākassa yo vipāko, sopi te vipākadhammadhammo hotīti pucchati. Itaro āyatiṃ vipākadānābhāvaṃ sandhāya paṭikkhipati. Dutiyaṃ puṭṭho tappaccayāpi aññassa vipākassa uppattiṃ sandhāya paṭijānāti. Evaṃ sante panassa kusalākusalassa viya tassāpi vipākassa vipāko, tassāpi vipākoti vaṭṭānupacchedo āpajjatīti puṭṭho samayavirodhabhayena paṭikkhipati.
ವಿಪಾಕೋತಿ ವಾತಿಆದಿಮ್ಹಿ ವಚನಸಾಧನೇ ಪನ ಯದಿ ವಿಪಾಕಸ್ಸ ವಿಪಾಕಧಮ್ಮಧಮ್ಮೇನ ಏಕತ್ಥತಾ ಭವೇಯ್ಯ, ಕುಸಲಾಕುಸಲಬ್ಯಾಕತಾನಂ ಏಕತ್ಥತಂ ಆಪಜ್ಜೇಯ್ಯಾತಿ ಪಟಿಕ್ಖಿಪತಿ। ವಿಪಾಕೋ ಚ ವಿಪಾಕಧಮ್ಮಧಮ್ಮೋ ಚಾತಿ ಏತ್ಥ ಅಯಂ ಅಧಿಪ್ಪಾಯೋ – ಸೋ ಹಿ ಚತೂಸು ವಿಪಾಕಕ್ಖನ್ಧೇಸು ಏಕೇಕಂ ಅಞ್ಞಮಞ್ಞಪಚ್ಚಯಾದೀಸು ಪಚ್ಚಯಟ್ಠೇನ ವಿಪಾಕಧಮ್ಮಧಮ್ಮತಂ ಪಚ್ಚಯುಪ್ಪನ್ನಟ್ಠೇನ ಚ ವಿಪಾಕಂ ಮಞ್ಞಮಾನೋ ‘‘ವಿಪಾಕೋ ವಿಪಾಕಧಮ್ಮಧಮ್ಮೋ’’ತಿ ಪುಟ್ಠೋ ಆಮನ್ತಾತಿ ಪಟಿಜಾನಾತಿ। ಅಥ ನಂ ಸಕವಾದೀ ‘‘ಯಸ್ಮಾ ತಯಾ ಏಕಕ್ಖಣೇ ಚತೂಸು ಖನ್ಧೇಸು ವಿಪಾಕೋ ವಿಪಾಕಧಮ್ಮಧಮ್ಮೋಪಿ ಅನುಞ್ಞಾತೋ, ತಸ್ಮಾ ತೇಸಂ ಸಹಗತಾದಿಭಾವೋ ಆಪಜ್ಜತೀ’’ತಿ ಚೋದೇತುಂ ಏವಮಾಹ। ಇತರೋ ಕುಸಲಾಕುಸಲಸಙ್ಖಾತಂ ವಿಪಾಕಧಮ್ಮಧಮ್ಮಂ ಸನ್ಧಾಯ ಪಟಿಕ್ಖಿಪತಿ। ತಞ್ಞೇವ ಅಕುಸಲನ್ತಿ ಯದಿ ತೇ ವಿಪಾಕೋ ವಿಪಾಕಧಮ್ಮಧಮ್ಮೋ, ಯೋ ಅಕುಸಲವಿಪಾಕೋ, ಸೋ ಅಕುಸಲಂ ಆಪಜ್ಜತಿ। ಕಸ್ಮಾ? ವಿಪಾಕಧಮ್ಮಧಮ್ಮೇನ ಏಕತ್ತಾ। ತಞ್ಞೇವ ಕುಸಲನ್ತಿಆದೀಸುಪಿ ಏಸೇವ ನಯೋ।
Vipākoti vātiādimhi vacanasādhane pana yadi vipākassa vipākadhammadhammena ekatthatā bhaveyya, kusalākusalabyākatānaṃ ekatthataṃ āpajjeyyāti paṭikkhipati. Vipāko ca vipākadhammadhammo cāti ettha ayaṃ adhippāyo – so hi catūsu vipākakkhandhesu ekekaṃ aññamaññapaccayādīsu paccayaṭṭhena vipākadhammadhammataṃ paccayuppannaṭṭhena ca vipākaṃ maññamāno ‘‘vipāko vipākadhammadhammo’’ti puṭṭho āmantāti paṭijānāti. Atha naṃ sakavādī ‘‘yasmā tayā ekakkhaṇe catūsu khandhesu vipāko vipākadhammadhammopi anuññāto, tasmā tesaṃ sahagatādibhāvo āpajjatī’’ti codetuṃ evamāha. Itaro kusalākusalasaṅkhātaṃ vipākadhammadhammaṃ sandhāya paṭikkhipati. Taññeva akusalanti yadi te vipāko vipākadhammadhammo, yo akusalavipāko, so akusalaṃ āpajjati. Kasmā? Vipākadhammadhammena ekattā. Taññeva kusalantiādīsupi eseva nayo.
೫೦೨. ಅಞ್ಞಮಞ್ಞಪಚ್ಚಯಾತಿ ಇದಂ ಸಹಜಾತಾನಂ ಪಚ್ಚಯಮತ್ತವಸೇನ ವುತ್ತಂ, ತಸ್ಮಾ ಅಸಾಧಕಂ। ಮಹಾಭೂತಾನಮ್ಪಿ ಚ ಅಞ್ಞಮಞ್ಞಪಚ್ಚಯತಾ ವುತ್ತಾ, ನ ಚ ತಾನಿ ವಿಪಾಕಾನಿ, ನ ಚ ವಿಪಾಕಧಮ್ಮಧಮ್ಮಾನೀತಿ।
502. Aññamaññapaccayāti idaṃ sahajātānaṃ paccayamattavasena vuttaṃ, tasmā asādhakaṃ. Mahābhūtānampi ca aññamaññapaccayatā vuttā, na ca tāni vipākāni, na ca vipākadhammadhammānīti.
ವಿಪಾಕೋ ವಿಪಾಕಧಮ್ಮಧಮ್ಮೋತಿಕಥಾವಣ್ಣನಾ।
Vipāko vipākadhammadhammotikathāvaṇṇanā.
ಸತ್ತಮೋ ವಗ್ಗೋ।
Sattamo vaggo.
Related texts:
ತಿಪಿಟಕ (ಮೂಲ) • Tipiṭaka (Mūla) / ಅಭಿಧಮ್ಮಪಿಟಕ • Abhidhammapiṭaka / ಕಥಾವತ್ಥುಪಾಳಿ • Kathāvatthupāḷi / (೭೨) ೧೦. ವಿಪಾಕೋ ವಿಪಾಕಧಮ್ಮಧಮ್ಮೋತಿಕಥಾ • (72) 10. Vipāko vipākadhammadhammotikathā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಮೂಲಟೀಕಾ • Pañcapakaraṇa-mūlaṭīkā / ೧೦. ವಿಪಾಕೋವಿಪಾಕಧಮ್ಮಧಮ್ಮೋತಿಕಥಾವಣ್ಣನಾ • 10. Vipākovipākadhammadhammotikathāvaṇṇanā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಅನುಟೀಕಾ • Pañcapakaraṇa-anuṭīkā / ೧೦. ವಿಪಾಕೋವಿಪಾಕಧಮ್ಮಧಮ್ಮೋತಿಕಥಾವಣ್ಣನಾ • 10. Vipākovipākadhammadhammotikathāvaṇṇanā
