| Library / Tipiṭaka / তিপিটক • Tipiṭaka / ধম্মসঙ্গণী-মূলটীকা • Dhammasaṅgaṇī-mūlaṭīkā |
ৰিপাকুদ্ধারকথাৰণ্ণনা
Vipākuddhārakathāvaṇṇanā
যতো যত্তকো চ ৰিপাকো হোতি, যস্মিঞ্চ ঠানে ৰিপচ্চতি, তং দস্সেতুং ৰিপাকুদ্ধারকথা আরদ্ধা। এত্থেৰাতি একায চেতনায কম্মে আযূহিতেযেৰ। দুহেতুকপটিসন্ধিৰসেন দ্ৰাদসকমগ্গোপি হোতি , দ্ৰাদসকপ্পকারোপীতি অত্থো। অহেতুকপটিসন্ধিৰসেন অহেতুকট্ঠকম্পি। অসঙ্খারিকসসঙ্খারিকানং সসঙ্খারিকঅসঙ্খারিকৰিপাকসঙ্করং অনিচ্ছন্তো দুতিযত্থেরো ‘‘দ্ৰাদসা’’তিআদিমাহ। পুরিমস্স হি পচ্চযতোসসঙ্খারিকঅসঙ্খারিকভাৰো, ইতরেসং কম্মতো। ততিযো তিহেতুকতো দুহেতুকম্পি অনিচ্ছন্তো ‘‘দসা’’তিআদিমাহ।
Yato yattako ca vipāko hoti, yasmiñca ṭhāne vipaccati, taṃ dassetuṃ vipākuddhārakathā āraddhā. Etthevāti ekāya cetanāya kamme āyūhiteyeva. Duhetukapaṭisandhivasena dvādasakamaggopi hoti , dvādasakappakāropīti attho. Ahetukapaṭisandhivasena ahetukaṭṭhakampi. Asaṅkhārikasasaṅkhārikānaṃ sasaṅkhārikaasaṅkhārikavipākasaṅkaraṃ anicchanto dutiyatthero ‘‘dvādasā’’tiādimāha. Purimassa hi paccayatosasaṅkhārikaasaṅkhārikabhāvo, itaresaṃ kammato. Tatiyo tihetukato duhetukampi anicchanto ‘‘dasā’’tiādimāha.
ইমস্মিং ৰিপাকুদ্ধারট্ঠানে কম্মপটিসন্ধিৰৰত্থানত্থং সাকেতপঞ্হং গণ্হিংসু। কম্মৰসেন ৰিপাকস্স তংতংগুণদোসুস্সদনিমিত্ততং দস্সেতুং উস্সদকিত্তনং গণ্হিংসু। হেতুকিত্তনং ইধ পঠমত্থেরস্স অধিপ্পাযেন ৰুত্তং। দুতিযত্থেরৰাদাদীসু ৰিসেসং তত্থ তত্থেৰ ৰক্খামি। ঞাণস্স জচ্চন্ধাদিৰিপত্তিনিমিত্তপটিপক্খভাৰতো তিহেতুকং অতিদুব্বলম্পি সমানং পটিসন্ধিং আকড্ঢন্তং দুহেতুকং আকড্ঢেয্যাতি ‘‘অহেতুকা ন হোতী’’তি আহ। যং পন পটিসম্ভিদামগ্গে সুগতিযং জচ্চন্ধবধিরাদিৰিপত্তিযা অহেতুকউপপত্তিং ৰজ্জেত্ৰা গতিসম্পত্তিযা সহেতুকোপপত্তিং দস্সেন্তেন ‘‘গতিসম্পত্তিযা ঞাণসম্পযুত্তে কতমেসং অট্ঠন্নং হেতূনং পচ্চযা উপপত্তি হোতি’’চ্চেৰ (পটি॰ ম॰ ১.২৩২) ৰুত্তং। তেন ঞাণৰিপ্পযুত্তেন কম্মুনা ঞাণসম্পযুত্তপটিসন্ধি ন হোতীতি দীপিতং হোতি। অঞ্ঞথা ‘‘সত্তন্নং হেতূনং পচ্চযা উপপত্তি হোতী’’তি ইদম্পি ৰুচ্চেয্য। তথা হি ‘‘গতিসম্পত্তিযা ঞাণসম্পযুত্তে কতমেসং অট্ঠন্নং হেতূনং পচ্চযা উপপত্তি হোতি? কুসলস্স কম্মস্স জৰনক্খণে তযো হেতূ কুসলা তস্মিং খণে জাতচেতনায সহজাতপচ্চযা হোন্তি। তেন ৰুচ্চতি কুসলমূলপচ্চযাপি সঙ্খারা। নিকন্তিক্খণে দ্ৰে হেতূ অকুসলা তস্মিং খণে জাতচেতনায সহজাতপচ্চযা হোন্তি। তেন ৰুচ্চতি অকুসলমূলপচ্চযাপি সঙ্খারা। পটিসন্ধিক্খণে তযো হেতূ অব্যাকতা তস্মিং খণে জাতচেতনায সহজাতপচ্চযা হোন্তি। তেন ৰুচ্চতি নামরূপপচ্চযাপি ৰিঞ্ঞাণং, ৰিঞ্ঞাণপচ্চযাপি নামরূপ’’ন্তি ৰিস্সজ্জিতং ঞাণসম্পযুত্তোপপত্তিযং।
Imasmiṃ vipākuddhāraṭṭhāne kammapaṭisandhivavatthānatthaṃ sāketapañhaṃ gaṇhiṃsu. Kammavasena vipākassa taṃtaṃguṇadosussadanimittataṃ dassetuṃ ussadakittanaṃ gaṇhiṃsu. Hetukittanaṃ idha paṭhamattherassa adhippāyena vuttaṃ. Dutiyattheravādādīsu visesaṃ tattha tattheva vakkhāmi. Ñāṇassa jaccandhādivipattinimittapaṭipakkhabhāvato tihetukaṃ atidubbalampi samānaṃ paṭisandhiṃ ākaḍḍhantaṃ duhetukaṃ ākaḍḍheyyāti ‘‘ahetukā na hotī’’ti āha. Yaṃ pana paṭisambhidāmagge sugatiyaṃ jaccandhabadhirādivipattiyā ahetukaupapattiṃ vajjetvā gatisampattiyā sahetukopapattiṃ dassentena ‘‘gatisampattiyā ñāṇasampayutte katamesaṃ aṭṭhannaṃ hetūnaṃ paccayā upapatti hoti’’cceva (paṭi. ma. 1.232) vuttaṃ. Tena ñāṇavippayuttena kammunā ñāṇasampayuttapaṭisandhi na hotīti dīpitaṃ hoti. Aññathā ‘‘sattannaṃ hetūnaṃ paccayā upapatti hotī’’ti idampi vucceyya. Tathā hi ‘‘gatisampattiyā ñāṇasampayutte katamesaṃ aṭṭhannaṃ hetūnaṃ paccayā upapatti hoti? Kusalassa kammassa javanakkhaṇe tayo hetū kusalā tasmiṃ khaṇe jātacetanāya sahajātapaccayā honti. Tena vuccati kusalamūlapaccayāpi saṅkhārā. Nikantikkhaṇe dve hetū akusalā tasmiṃ khaṇe jātacetanāya sahajātapaccayā honti. Tena vuccati akusalamūlapaccayāpi saṅkhārā. Paṭisandhikkhaṇe tayo hetū abyākatā tasmiṃ khaṇe jātacetanāya sahajātapaccayā honti. Tena vuccati nāmarūpapaccayāpi viññāṇaṃ, viññāṇapaccayāpi nāmarūpa’’nti vissajjitaṃ ñāṇasampayuttopapattiyaṃ.
এৰং ঞাণৰিপ্পযুত্ততো ঞাণসম্পযুত্তুপপত্তিযা চ ৰিজ্জমানায ‘‘গতিসম্পত্তিযা ঞাণসম্পযুত্তে কতমেসং সত্তন্নং হেতূনং পচ্চযা উপপত্তি হোতি? কুসলস্স কম্মস্স জৰনক্খণে দ্ৰে হেতূ কুসলা’’তি ৰত্ৰা অঞ্ঞত্থ চ পুব্বে ৰুত্তনযেনেৰ সক্কা ৰিস্সজ্জনং কাতুন্তি। যথা পন ‘‘ঞাণসম্পযুত্তে সত্তন্নং হেতূনং পচ্চযা’’তি অৰচনতো ঞাণৰিপ্পযুত্ততো ঞাণসম্পযুত্তা পটিসন্ধি ন হোতি, এৰং ‘‘গতিসম্পত্তিযা ঞাণৰিপ্পযুত্তে ছন্নং হেতূনং পচ্চযা উপপত্তি হোতি’’চ্চেৰ (পটি॰ ম॰ ১.২৩৩) ৰত্ৰা ‘‘সত্তন্নং হেতূনং পচ্চযা’’তি অৰচনতো ঞাণসম্পযুত্ততো ঞাণৰিপ্পযুত্তাপি পটিসন্ধি ন হোতীতি আপন্নং। এত্থাপি হি ন ন সক্কা কম্মনিকন্তিক্খণেসু তযো চ দ্ৰে চ হেতূ যোজেত্ৰা পটিসন্ধিক্খণে দ্ৰে যোজেতুন্তি। ইমস্স পন থেরস্স অযমধিপ্পাযো সিযা ‘‘কম্মসরিক্খকৰিপাকদস্সনৰসেন ইধ পাঠো সাৰসেসো কথিতো’’তি। ‘‘ঞাণসম্পযুত্তে অট্ঠন্নং হেতূনং পচ্চযা’’তি এত্থাপি পাঠস্স সাৰসেসতাপত্তীতি চে? ন, দুব্বলস্স দুহেতুককম্মস্স ঞাণসম্পযুত্তৰিপাকদানে অসমত্থত্তা। তিহেতুকস্স পন অহেতুকৰিপচ্চনে ৰিয দুহেতুকৰিপচ্চনেপি নত্থি সমত্থতাৰিঘাতোতি। আরম্মণেন ৰেদনা পরিৰত্তেতব্বাতি সন্তীরণতদারম্মণে সন্ধায ৰুত্তং। ৰিভাগগ্গহণসমত্থতাভাৰতো হি চক্খুৰিঞ্ঞাণাদীনি ইট্ঠইট্ঠমজ্ঝত্তেসু উপেক্খাসহগতানেৰ হোন্তি, কাযৰিঞ্ঞাণঞ্চ সুখসহগতমেৰ পটিঘট্টনাৰিসেসেনাতি।
Evaṃ ñāṇavippayuttato ñāṇasampayuttupapattiyā ca vijjamānāya ‘‘gatisampattiyā ñāṇasampayutte katamesaṃ sattannaṃ hetūnaṃ paccayā upapatti hoti? Kusalassa kammassa javanakkhaṇe dve hetū kusalā’’ti vatvā aññattha ca pubbe vuttanayeneva sakkā vissajjanaṃ kātunti. Yathā pana ‘‘ñāṇasampayutte sattannaṃ hetūnaṃ paccayā’’ti avacanato ñāṇavippayuttato ñāṇasampayuttā paṭisandhi na hoti, evaṃ ‘‘gatisampattiyā ñāṇavippayutte channaṃ hetūnaṃ paccayā upapatti hoti’’cceva (paṭi. ma. 1.233) vatvā ‘‘sattannaṃ hetūnaṃ paccayā’’ti avacanato ñāṇasampayuttato ñāṇavippayuttāpi paṭisandhi na hotīti āpannaṃ. Etthāpi hi na na sakkā kammanikantikkhaṇesu tayo ca dve ca hetū yojetvā paṭisandhikkhaṇe dve yojetunti. Imassa pana therassa ayamadhippāyo siyā ‘‘kammasarikkhakavipākadassanavasena idha pāṭho sāvaseso kathito’’ti. ‘‘Ñāṇasampayutte aṭṭhannaṃ hetūnaṃ paccayā’’ti etthāpi pāṭhassa sāvasesatāpattīti ce? Na, dubbalassa duhetukakammassa ñāṇasampayuttavipākadāne asamatthattā. Tihetukassa pana ahetukavipaccane viya duhetukavipaccanepi natthi samatthatāvighātoti. Ārammaṇena vedanā parivattetabbāti santīraṇatadārammaṇe sandhāya vuttaṃ. Vibhāgaggahaṇasamatthatābhāvato hi cakkhuviññāṇādīni iṭṭhaiṭṭhamajjhattesu upekkhāsahagatāneva honti, kāyaviññāṇañca sukhasahagatameva paṭighaṭṭanāvisesenāti.
ৰিসেসৰতা কালেন তদারম্মণপচ্চযসব্বজৰনৰতা ৰিপাকপ্পৰত্তিং দস্সেতুং ‘‘সংৰরাসংৰরে…পে॰… উপগতস্সা’’তি ৰুত্তং অঞ্ঞকালে পঞ্চৰিঞ্ঞাণাদিপরিপুণ্ণৰিপাকপ্পৰত্তিঅভাৰা। কক্কটক…পে॰… ভৰঙ্গোতরণন্তি এতেন ইদং দস্সেতি – কেদারে পূরেত্ৰা নদীপৰেসনমগ্গভূতং মাতিকং অপ্পৰিসিত্ৰা কক্কটকমগ্গাদিনা অমগ্গেন নদীওতরণং ৰিয চিত্তস্স জৰিত্ৰা ভৰঙ্গপ্পৰেসনমগ্গভূতে তদারম্মণে অনুপ্পন্নে মগ্গেন ৰিনা ভৰঙ্গোতরণন্তি।
Visesavatā kālena tadārammaṇapaccayasabbajavanavatā vipākappavattiṃ dassetuṃ ‘‘saṃvarāsaṃvare…pe… upagatassā’’ti vuttaṃ aññakāle pañcaviññāṇādiparipuṇṇavipākappavattiabhāvā. Kakkaṭaka…pe… bhavaṅgotaraṇanti etena idaṃ dasseti – kedāre pūretvā nadīpavesanamaggabhūtaṃ mātikaṃ appavisitvā kakkaṭakamaggādinā amaggena nadīotaraṇaṃ viya cittassa javitvā bhavaṅgappavesanamaggabhūte tadārammaṇe anuppanne maggena vinā bhavaṅgotaraṇanti.
এতেসু তীসু মোঘৰারেসু দুতিযো উপপরিক্খিত্ৰা গহেতব্বো। যদি হি অনুলোমে ৰেদনাত্তিকে পটিচ্চৰারাদীসু ‘‘আসেৰনপচ্চযা ন মগ্গে দ্ৰে’’তি ‘‘ন মগ্গপচ্চযা আসেৰনে দ্ৰে’’তি চ ৰুত্তং সিযা, সোপি মোঘৰারো লব্ভেয্য। যদি পন ৰোট্ঠব্বনম্পি আসেৰনপচ্চযো সিযা, কুসলাকুসলানম্পি সিযা। ন হি আসেৰনপচ্চযং লদ্ধুং যুত্তস্স আসেৰনপচ্চযভাৰী ধম্মো আসেৰনপচ্চযোতি অৰুত্তো অত্থি। ৰোট্ঠব্বনস্স পন কুসলাকুসলানং আসেৰনপচ্চযভাৰো অৰুত্তো। ‘‘কুসলং ধম্মং পটিচ্চ কুসলো ধম্মো উপ্পজ্জতি নাসেৰনপচ্চযা। অকুসলং ধম্মং…পে॰… নাসেৰনপচ্চযা’’তি (পট্ঠা॰ ১.১.৯৩) ৰচনতো পটিক্খিত্তোৰ। অথাপি সিযা ‘‘অসমানৰেদনানং ৰসেন এৰং ৰুত্ত’’ন্তি, এৰমপি যথা ‘‘আৰজ্জনা কুসলানং খন্ধানং অকুসলানং খন্ধানং অনন্তরপচ্চযেন পচ্চযো’’তি (পট্ঠা॰ ১.১.৪১৭) ৰুত্তং, এৰং ‘‘আসেৰনপচ্চযেন পচ্চযোতি’’পি ৰত্তব্বং সিযা, জাতিভেদা ন ৰুত্তন্তি চে? ভূমিভিন্নস্স কামাৰচরস্স রূপাৰচরাদীনং আসেৰনপচ্চযভাৰো ৰিয জাতিভিন্নস্সপি ভৰেয্যাতি ৰত্তব্বো এৰ সিযা। অভিন্নজাতিকস্স চ ৰসেন যথা ‘‘আৰজ্জনা সহেতুকানং খন্ধানং অনন্তরপচ্চযেন পচ্চযো’’তি ৰুত্তং, এৰং ‘‘আসেৰনপচ্চযেন পচ্চযো’’তিপি ৰত্তব্বং সিযা, ন তু ৰুত্তং। তস্মা ৰেদনাত্তিকেপি সঙ্খিত্তায গণনায ‘‘আসেৰনপচ্চযা ন মগ্গে একং, ন মগ্গপচ্চযা আসেৰনে এক’’ন্তি এৰং গণনায নিদ্ধারিযমানায ৰোট্ঠব্বনস্স আসেৰনপচ্চযত্তস্স অভাৰা যথাৰুত্তপ্পকারো দুতিযো মোঘৰারো ৰীমংসিতব্বো।
Etesu tīsu moghavāresu dutiyo upaparikkhitvā gahetabbo. Yadi hi anulome vedanāttike paṭiccavārādīsu ‘‘āsevanapaccayā na magge dve’’ti ‘‘na maggapaccayā āsevane dve’’ti ca vuttaṃ siyā, sopi moghavāro labbheyya. Yadi pana voṭṭhabbanampi āsevanapaccayo siyā, kusalākusalānampi siyā. Na hi āsevanapaccayaṃ laddhuṃ yuttassa āsevanapaccayabhāvī dhammo āsevanapaccayoti avutto atthi. Voṭṭhabbanassa pana kusalākusalānaṃ āsevanapaccayabhāvo avutto. ‘‘Kusalaṃ dhammaṃ paṭicca kusalo dhammo uppajjati nāsevanapaccayā. Akusalaṃ dhammaṃ…pe… nāsevanapaccayā’’ti (paṭṭhā. 1.1.93) vacanato paṭikkhittova. Athāpi siyā ‘‘asamānavedanānaṃ vasena evaṃ vutta’’nti, evamapi yathā ‘‘āvajjanā kusalānaṃ khandhānaṃ akusalānaṃ khandhānaṃ anantarapaccayena paccayo’’ti (paṭṭhā. 1.1.417) vuttaṃ, evaṃ ‘‘āsevanapaccayena paccayoti’’pi vattabbaṃ siyā, jātibhedā na vuttanti ce? Bhūmibhinnassa kāmāvacarassa rūpāvacarādīnaṃ āsevanapaccayabhāvo viya jātibhinnassapi bhaveyyāti vattabbo eva siyā. Abhinnajātikassa ca vasena yathā ‘‘āvajjanā sahetukānaṃ khandhānaṃ anantarapaccayena paccayo’’ti vuttaṃ, evaṃ ‘‘āsevanapaccayena paccayo’’tipi vattabbaṃ siyā, na tu vuttaṃ. Tasmā vedanāttikepi saṅkhittāya gaṇanāya ‘‘āsevanapaccayā na magge ekaṃ, na maggapaccayā āsevane eka’’nti evaṃ gaṇanāya niddhāriyamānāya voṭṭhabbanassa āsevanapaccayattassa abhāvā yathāvuttappakāro dutiyo moghavāro vīmaṃsitabbo.
ৰোট্ঠব্বনং পন ৰীথিৰিপাকসন্ততিযা আৰট্টনতো আৰজ্জনা, ততো ৰিসদিসস্স জৰনস্স করণতো মনসিকারো চ। এৰঞ্চ কত্ৰা পট্ঠানে ‘‘ৰোট্ঠব্বনং কুসলানং খন্ধানং অনন্তরপচ্চযেন পচ্চযো’’তিআদি ন ৰুত্তং, ‘‘আৰজ্জনা’’ইচ্চেৰ ৰুত্তং। তস্মা ৰোট্ঠব্বনতো চতুন্নং ৰা পঞ্চন্নং ৰা জৰনানং আরম্মণপুরেজাতং ভৰিতুং অসক্কোন্তং রূপাদিআৰজ্জনাদীনং পচ্চযো ভৰিতুং ন সক্কোতি, অযমেতস্স সভাৰোতি জৰনাপারিপূরিযা দুতিযো মোঘৰারো দস্সেতুং যুত্তো সিযা, অযম্পি অট্ঠকথাযং অনাগতত্তা সুট্ঠু ৰিচারেতব্বো। ভৰঙ্গস্স জৰনানুবন্ধনভূতত্তা ‘‘তদারম্মণং ভৰঙ্গ’’ন্তি ৰুত্তং। পট্ঠানে (পট্ঠা॰ ৩.১.১০২) চ ৰুত্তং ‘‘সহেতুকং ভৰঙ্গং অহেতুকস্স ভৰঙ্গস্স অনন্তরপচ্চযেন পচ্চযো’’তি, ‘‘অহেতুকং ভৰঙ্গং সহেতুকস্স ভৰঙ্গস্স অনন্তরপচ্চযেন পচ্চযো’’তি চ। কুসলাকুসলানং সুখদুক্খৰিপাকমত্তো ৰিপাকো ন ইট্ঠানিট্ঠানং ৰিভাগং করোতি, জৰনং পন রজ্জনৰিরজ্জনাদিৰসেন ইট্ঠানিট্ঠৰিভাগং করোতীতি ‘‘আরম্মণরসং জৰনমেৰ অনুভৰতী’’তি ৰুত্তং।
Voṭṭhabbanaṃ pana vīthivipākasantatiyā āvaṭṭanato āvajjanā, tato visadisassa javanassa karaṇato manasikāro ca. Evañca katvā paṭṭhāne ‘‘voṭṭhabbanaṃ kusalānaṃ khandhānaṃ anantarapaccayena paccayo’’tiādi na vuttaṃ, ‘‘āvajjanā’’icceva vuttaṃ. Tasmā voṭṭhabbanato catunnaṃ vā pañcannaṃ vā javanānaṃ ārammaṇapurejātaṃ bhavituṃ asakkontaṃ rūpādiāvajjanādīnaṃ paccayo bhavituṃ na sakkoti, ayametassa sabhāvoti javanāpāripūriyā dutiyo moghavāro dassetuṃ yutto siyā, ayampi aṭṭhakathāyaṃ anāgatattā suṭṭhu vicāretabbo. Bhavaṅgassa javanānubandhanabhūtattā ‘‘tadārammaṇaṃ bhavaṅga’’nti vuttaṃ. Paṭṭhāne (paṭṭhā. 3.1.102) ca vuttaṃ ‘‘sahetukaṃ bhavaṅgaṃ ahetukassa bhavaṅgassa anantarapaccayena paccayo’’ti, ‘‘ahetukaṃ bhavaṅgaṃ sahetukassa bhavaṅgassa anantarapaccayena paccayo’’ti ca. Kusalākusalānaṃ sukhadukkhavipākamatto vipāko na iṭṭhāniṭṭhānaṃ vibhāgaṃ karoti, javanaṃ pana rajjanavirajjanādivasena iṭṭhāniṭṭhavibhāgaṃ karotīti ‘‘ārammaṇarasaṃ javanameva anubhavatī’’ti vuttaṃ.
অৰিজ্জমানে কারকে কথং আৰজ্জনাদিভাৰেন পৰত্তি হোতীতি তং দস্সেতুং পঞ্চৰিধং নিযামং নাম গণ্হিংসু। নিযামো চ ধম্মানং সভাৰকিচ্চপচ্চযভাৰৰিসেসোৰ। তংতংসদিসফলদানন্তি তস্স তস্স অত্তনো অনুরূপফলস্স দানং। সদিসৰিপাকদানন্তি চ অনুরূপৰিপাকদানন্তি অত্থো। ইদং ৰত্থুন্তি একৰচননিদ্দেসো একগাথাৰত্থুভাৰেন কতো। জগতিপ্পদেসোতি যথাৰুত্ততো অঞ্ঞোপি লোকপ্পদেসো। কালগতিউপধিপযোগপটিবাল়্হঞ্হি পাপং ন ৰিপচ্চেয্য, ন পদেসপটিবাল়্হন্তি। সব্বঞ্ঞুতঞ্ঞাণপদট্ঠানপটিসন্ধিযাদিধম্মানং নিযামো দসসহস্সিকম্পনপচ্চযভাৰো ধম্মনিযামো। অযং ইধ অধিপ্পেতোতি এতেন নিযামৰসেন আৰজ্জনাদিভাৰো, ন কারকৰসেনাতি এতমত্থং দস্সেতি।
Avijjamāne kārake kathaṃ āvajjanādibhāvena pavatti hotīti taṃ dassetuṃ pañcavidhaṃ niyāmaṃ nāma gaṇhiṃsu. Niyāmo ca dhammānaṃ sabhāvakiccapaccayabhāvavisesova. Taṃtaṃsadisaphaladānanti tassa tassa attano anurūpaphalassa dānaṃ. Sadisavipākadānanti ca anurūpavipākadānanti attho. Idaṃ vatthunti ekavacananiddeso ekagāthāvatthubhāvena kato. Jagatippadesoti yathāvuttato aññopi lokappadeso. Kālagatiupadhipayogapaṭibāḷhañhi pāpaṃ na vipacceyya, na padesapaṭibāḷhanti. Sabbaññutaññāṇapadaṭṭhānapaṭisandhiyādidhammānaṃ niyāmo dasasahassikampanapaccayabhāvo dhammaniyāmo. Ayaṃ idha adhippetoti etena niyāmavasena āvajjanādibhāvo, na kārakavasenāti etamatthaṃ dasseti.
ইমস্মিং ঠানেতি সোল়সৰিপাককথাঠানে। দ্ৰাদসহি ৰাহেতব্বা নাল়িযন্তোপমা ন দ্ৰাদসন্নং চিত্তানং একস্মিং দ্ৰারে একারম্মণে সহ কিচ্চকরণৰসেন ৰুত্তা, অথ খো দ্ৰাদসন্নং একস্মিং দ্ৰারে সকিচ্চকরণমত্তৰসেন। অহেতুকপটিসন্ধিজনকসদিসজৰনানন্তরং অহেতুকতদারম্মণং দস্সেন্তো ‘‘চতুন্নং পন দুহেতুককুসলচিত্তানং অঞ্ঞতরজৰনস্স…পে॰… পতিট্ঠাতী’’তি আহ। অহেতুকপটিসন্ধিকস্স পন তিহেতুকজৰনে জৰিতে পটিসন্ধিদাযকেন কম্মেন অহেতুকস্স তদারম্মণস্স নিব্বত্তি ন পটিসেধিতা। এৰং দুহেতুকপটিসন্ধিকস্সপি তিহেতুকানন্তরং দুহেতুকতদারম্মণং অপ্পটিসিদ্ধং দট্ঠব্বং। পরিপুণ্ণৰিপাকস্স চ পটিসন্ধিজনককম্মস্স ৰসেনাযং ৰিপাকৰিভাৰনা তস্সা মুখনিদস্সনমত্তমেৰাতি পৰত্তিৰিপাকস্স চ একস্স তিহেতুকাদিকম্মস্স সোল়সৰিপাকচিত্তাদীনি ৰুত্তনযেন যোজেতব্বানি। তস্মা যেন কেনচি কম্মুনা একেন অনেকং তদারম্মণং পৰত্তমানং কম্মৰিসেসাভাৰা যেসং তং অনুবন্ধভূতং, তেসং জৰনসঙ্খাতানং পচ্চযানং ৰিসেসেন ৰিসিট্ঠং হোতীতি জৰনেনাযং তদারম্মণনিযামো ৰুত্তো, ন নানাকম্মুনা নিব্বত্তমানস্স ৰসেন। এৰঞ্চ কত্ৰা পট্ঠানে (পট্ঠা॰ ৩.১.৯৮) ‘‘সহেতুকে খন্ধে অনিচ্চতো দুক্খতো অনত্ততো ৰিপস্সতি। কুসলাকুসলে নিরুদ্ধে অহেতুকো ৰিপাকো তদারম্মণতা উপ্পজ্জতী’’তি ঞাণানন্তরং অহেতুকতদারম্মণং, ‘‘কুসলাকুসলে নিরুদ্ধে সহেতুকো ৰিপাকো তদারম্মণতা উপ্পজ্জতী’’তি অকুসলানন্তরঞ্চ সহেতুকতদারম্মণং ৰুত্তং, ন চ ‘‘তং এতেন থেরেন অদস্সিত’’ন্তি কত্ৰা তস্স পটিসেধো কতো হোতীতি।
Imasmiṃ ṭhāneti soḷasavipākakathāṭhāne. Dvādasahi vāhetabbā nāḷiyantopamā na dvādasannaṃ cittānaṃ ekasmiṃ dvāre ekārammaṇe saha kiccakaraṇavasena vuttā, atha kho dvādasannaṃ ekasmiṃ dvāre sakiccakaraṇamattavasena. Ahetukapaṭisandhijanakasadisajavanānantaraṃ ahetukatadārammaṇaṃ dassento ‘‘catunnaṃ pana duhetukakusalacittānaṃ aññatarajavanassa…pe… patiṭṭhātī’’ti āha. Ahetukapaṭisandhikassa pana tihetukajavane javite paṭisandhidāyakena kammena ahetukassa tadārammaṇassa nibbatti na paṭisedhitā. Evaṃ duhetukapaṭisandhikassapi tihetukānantaraṃ duhetukatadārammaṇaṃ appaṭisiddhaṃ daṭṭhabbaṃ. Paripuṇṇavipākassa ca paṭisandhijanakakammassa vasenāyaṃ vipākavibhāvanā tassā mukhanidassanamattamevāti pavattivipākassa ca ekassa tihetukādikammassa soḷasavipākacittādīni vuttanayena yojetabbāni. Tasmā yena kenaci kammunā ekena anekaṃ tadārammaṇaṃ pavattamānaṃ kammavisesābhāvā yesaṃ taṃ anubandhabhūtaṃ, tesaṃ javanasaṅkhātānaṃ paccayānaṃ visesena visiṭṭhaṃ hotīti javanenāyaṃ tadārammaṇaniyāmo vutto, na nānākammunā nibbattamānassa vasena. Evañca katvā paṭṭhāne (paṭṭhā. 3.1.98) ‘‘sahetuke khandhe aniccato dukkhato anattato vipassati. Kusalākusale niruddhe ahetuko vipāko tadārammaṇatā uppajjatī’’ti ñāṇānantaraṃ ahetukatadārammaṇaṃ, ‘‘kusalākusale niruddhe sahetuko vipāko tadārammaṇatā uppajjatī’’ti akusalānantarañca sahetukatadārammaṇaṃ vuttaṃ, na ca ‘‘taṃ etena therena adassita’’nti katvā tassa paṭisedho kato hotīti.
যং পন জৰনেন…পে॰… তং কুসলং সন্ধায ৰুত্তন্তি ইদং কুসলস্স ৰিয অকুসলস্স সদিসো ৰিপাকো নত্থীতি কত্ৰা ৰুত্তং। সসঙ্খারিকাসঙ্খারিকনিযমনং পন সন্ধায তস্মিং ৰুত্তে অকুসলেপি ন তং ন যুজ্জতীতি। অট্ঠানমেতন্তি ইদং নিযমিতাদিৰসেন যোনিসো অযোনিসো ৰা আৰট্টিতে অযোনিসো যোনিসো ৰা ৰৰত্থাপনস্স অভাৰং সন্ধায ৰুত্তং।
Yaṃpana javanena…pe… taṃ kusalaṃ sandhāya vuttanti idaṃ kusalassa viya akusalassa sadiso vipāko natthīti katvā vuttaṃ. Sasaṅkhārikāsaṅkhārikaniyamanaṃ pana sandhāya tasmiṃ vutte akusalepi na taṃ na yujjatīti. Aṭṭhānametanti idaṃ niyamitādivasena yoniso ayoniso vā āvaṭṭite ayoniso yoniso vā vavatthāpanassa abhāvaṃ sandhāya vuttaṃ.
পটিসিদ্ধন্তি অৰচনমেৰ পটিসেধোতি কত্ৰা ৰুত্তং। কামতণ্হানিব্বত্তেন কম্মুনা মহগ্গতলোকুত্তরানুভৰনৰিপাকো ন হোতীতি তত্থ তদারম্মণাভাৰো ৰেদিতব্বো। আপাথগতে ৰিসযে তন্নিন্নং ভৰঙ্গং আৰজ্জনং উপ্পাদেতীতি আৰজ্জনং ৰিসযে নিন্নত্তা উপ্পজ্জতি। ভৰঙ্গং পন সব্বদা সৰিসযে নিন্নমেৰাতি ৰিসযন্তরৰিঞ্ঞাণস্স পচ্চযো হুত্ৰাপি তদভাৰা ৰিনা আৰজ্জনেন সৰিসযে নিন্নত্তাৰ উপ্পজ্জতি। চিণ্ণত্তাতি আৰজ্জনেন ৰিনা বহুলং উপ্পন্নপুব্বত্তা। সমুদাচারত্তাতি আপাথগতে ৰিসযে পটিসন্ধিৰিসযে চ বহুলং উপ্পাদিতপুব্বত্তা। চিণ্ণত্তাতি ৰা পুগ্গলেন আসেৰিতভাৰো ৰুত্তো। সমুদাচারত্তাতি সযং বহুলং পৰত্তভাৰো। নিরোধস্স অনন্তরপচ্চযং নেৰসঞ্ঞানাসঞ্ঞাযতনন্তি ইদং তদনন্তরমেৰ নিরোধফুসনং সন্ধায ৰুত্তং, ন অরূপক্খন্ধানং ৰিয নিরোধস্স অনন্তরপচ্চযভাৰং। নেৰসঞ্ঞানাসঞ্ঞাযতনং পন কিঞ্চি পরিকম্মেন ৰিনা উপ্পজ্জমানং নত্থি। পরিকম্মাৰজ্জনমেৰ তস্স আৰজ্জনন্তি অঞ্ঞস্স ৰিয এতস্সপি সাৰজ্জনতায ভৰিতব্বং।
Paṭisiddhanti avacanameva paṭisedhoti katvā vuttaṃ. Kāmataṇhānibbattena kammunā mahaggatalokuttarānubhavanavipāko na hotīti tattha tadārammaṇābhāvo veditabbo. Āpāthagate visaye tanninnaṃ bhavaṅgaṃ āvajjanaṃ uppādetīti āvajjanaṃ visaye ninnattā uppajjati. Bhavaṅgaṃ pana sabbadā savisaye ninnamevāti visayantaraviññāṇassa paccayo hutvāpi tadabhāvā vinā āvajjanena savisaye ninnattāva uppajjati. Ciṇṇattāti āvajjanena vinā bahulaṃ uppannapubbattā. Samudācārattāti āpāthagate visaye paṭisandhivisaye ca bahulaṃ uppāditapubbattā. Ciṇṇattāti vā puggalena āsevitabhāvo vutto. Samudācārattāti sayaṃ bahulaṃ pavattabhāvo. Nirodhassa anantarapaccayaṃ nevasaññānāsaññāyatananti idaṃ tadanantarameva nirodhaphusanaṃ sandhāya vuttaṃ, na arūpakkhandhānaṃ viya nirodhassa anantarapaccayabhāvaṃ. Nevasaññānāsaññāyatanaṃ pana kiñci parikammena vinā uppajjamānaṃ natthi. Parikammāvajjanameva tassa āvajjananti aññassa viya etassapi sāvajjanatāya bhavitabbaṃ.
অযং পনেত্থাধিপ্পাযো দট্ঠব্বো – নেৰসঞ্ঞানাসঞ্ঞাযতনস্স ন নিরোধস্স অনন্তরপচ্চযভাৰে নিন্নাদিতা অঞ্ঞত্থ দিট্ঠা অতদত্থপরিকম্মভাৰে চ উপ্পত্তিযা, অথ চ তং তস্স অনন্তরপচ্চযো হোতি, তথা চ উপ্পজ্জতি। এৰং যথাৰুত্তা মনোৰিঞ্ঞাণধাতু অসতিপি নিরাৰজ্জনুপ্পত্তিযং নিন্নাদিভাৰে নিরাৰজ্জনা উপ্পজ্জতীতি। এৰঞ্চ কত্ৰা ‘‘অরিযমগ্গচিত্তং মগ্গানন্তরানি ফলচিত্তানী’’তি ইদং ৰুত্তং। যদি হি নিব্বানারম্মণাৰজ্জনাভাৰং সন্ধাযেতং ৰুত্তং সিযা, গোত্রভুৰোদানানি নিদস্সনানি সিযুং তেহেৰ এতেসং নিরাৰজ্জনতাসিদ্ধিতো। ফলসমাপত্তিকালে চ ‘‘পরিত্তারম্মণং মহগ্গতারম্মণং অনুলোমং ফলসমাপত্তিযা অনন্তরপচ্চযেন পচ্চযো’’তি ৰচনতো সমানারম্মণাৰজ্জনরহিতত্তা ‘‘মগ্গানন্তরানি ফলচিত্তানী’’তি এৰং ফলসমাপত্তিচিত্তানি ন ৰজ্জেতব্বানি সিযুং, গোত্রভুৰোদানানি পন যদিপি নিব্বানে চিণ্ণানি সমুদাচারানি চ ন হোন্তি, আরম্মণন্তরে চিণ্ণসমুদাচারানেৰ। ফলসমাপত্তিচিত্তানি চ মগ্গৰীথিতো উদ্ধং তদত্থপরিকম্মসব্ভাৰাতি তেসং গহণং ন কতং, অনুলোমানন্তরঞ্চ ফলসমাপত্তিচিত্তং চিণ্ণং সমুদাচারং, ন নেৰসঞ্ঞানাসঞ্ঞাযতনানন্তরং মগ্গানন্তরস্স ৰিয তদত্থপরিকম্মাভাৰাতি ‘‘নিরোধা ৰুট্ঠহন্তস্সা’’তি তঞ্চ নিদস্সনং। আরম্মণেন পন ৰিনা নুপ্পজ্জতীতি ইদং এতস্স মহগ্গতারম্মণত্তাভাৰা পুচ্ছং কারেত্ৰা আরম্মণনিদ্ধারণত্থং ৰুত্তং।
Ayaṃ panetthādhippāyo daṭṭhabbo – nevasaññānāsaññāyatanassa na nirodhassa anantarapaccayabhāve ninnāditā aññattha diṭṭhā atadatthaparikammabhāve ca uppattiyā, atha ca taṃ tassa anantarapaccayo hoti, tathā ca uppajjati. Evaṃ yathāvuttā manoviññāṇadhātu asatipi nirāvajjanuppattiyaṃ ninnādibhāve nirāvajjanā uppajjatīti. Evañca katvā ‘‘ariyamaggacittaṃ maggānantarāni phalacittānī’’ti idaṃ vuttaṃ. Yadi hi nibbānārammaṇāvajjanābhāvaṃ sandhāyetaṃ vuttaṃ siyā, gotrabhuvodānāni nidassanāni siyuṃ teheva etesaṃ nirāvajjanatāsiddhito. Phalasamāpattikāle ca ‘‘parittārammaṇaṃ mahaggatārammaṇaṃ anulomaṃ phalasamāpattiyā anantarapaccayena paccayo’’ti vacanato samānārammaṇāvajjanarahitattā ‘‘maggānantarāni phalacittānī’’ti evaṃ phalasamāpatticittāni na vajjetabbāni siyuṃ, gotrabhuvodānāni pana yadipi nibbāne ciṇṇāni samudācārāni ca na honti, ārammaṇantare ciṇṇasamudācārāneva. Phalasamāpatticittāni ca maggavīthito uddhaṃ tadatthaparikammasabbhāvāti tesaṃ gahaṇaṃ na kataṃ, anulomānantarañca phalasamāpatticittaṃ ciṇṇaṃ samudācāraṃ, na nevasaññānāsaññāyatanānantaraṃ maggānantarassa viya tadatthaparikammābhāvāti ‘‘nirodhā vuṭṭhahantassā’’ti tañca nidassanaṃ. Ārammaṇena pana vinā nuppajjatīti idaṃ etassa mahaggatārammaṇattābhāvā pucchaṃ kāretvā ārammaṇaniddhāraṇatthaṃ vuttaṃ.
তত্থাতি ৰিপাককথাযং। জচ্চন্ধপীঠসপ্পিউপমানিদস্সনং ৰিপাকস্স নিস্সযেন ৰিনা অপ্পৰত্তিদস্সনত্থং। ৰিসযগ্গাহোতি ইদং চক্খাদীনং সৰিসযগ্গহণেন চক্খুৰিঞ্ঞাণাদিৰিপাকস্স দস্সনত্থং ৰুত্তং। উপনিস্সযতো চক্খাদীনং দস্সনাদিঅত্থতো চ তস্সেৰ ৰিপাকস্স দস্সনত্থং ‘‘উপনিস্সযমত্থসো’’তি ৰুত্তং। হদযৰত্থুমেৰাতি যথা পুরিমচিত্তানি হদযৰত্থুনিস্সিতানি চ পসাদৰত্থুঅনুগতানি চ অঞ্ঞারম্মণানি হোন্তি, ন এৰং ভৰঙ্গং, তং পনেতং ৰত্থারম্মণন্তররহিতং কেৰলং হদযৰত্থুমেৰ নিস্সায পৰত্ততীতি ৰুত্তং হোতি। হদযরূপৰত্থুকন্তি ইধাপি অঞ্ঞৰত্থানুগতন্তি অধিপ্পাযো ৰেদিতব্বো। মক্কটকস্স হি সুত্তারোহণং ৰিয পসাদৰত্থুকং চিত্তং, সুত্তেন গমনাদীনি ৰিয তদনুগতানি সেসচিত্তানীতি। সুত্তঘট্টনমক্কটকচলনানি ৰিয পসাদঘট্টনভৰঙ্গচলনানি সহ হোন্তীতি দীপনতো ‘‘একেকং…পে॰… আগচ্ছতী’’তিপি দীপেতি।
Tatthāti vipākakathāyaṃ. Jaccandhapīṭhasappiupamānidassanaṃ vipākassa nissayena vinā appavattidassanatthaṃ. Visayaggāhoti idaṃ cakkhādīnaṃ savisayaggahaṇena cakkhuviññāṇādivipākassa dassanatthaṃ vuttaṃ. Upanissayato cakkhādīnaṃ dassanādiatthato ca tasseva vipākassa dassanatthaṃ ‘‘upanissayamatthaso’’ti vuttaṃ. Hadayavatthumevāti yathā purimacittāni hadayavatthunissitāni ca pasādavatthuanugatāni ca aññārammaṇāni honti, na evaṃ bhavaṅgaṃ, taṃ panetaṃ vatthārammaṇantararahitaṃ kevalaṃ hadayavatthumeva nissāya pavattatīti vuttaṃ hoti. Hadayarūpavatthukanti idhāpi aññavatthānugatanti adhippāyo veditabbo. Makkaṭakassa hi suttārohaṇaṃ viya pasādavatthukaṃ cittaṃ, suttena gamanādīni viya tadanugatāni sesacittānīti. Suttaghaṭṭanamakkaṭakacalanāni viya pasādaghaṭṭanabhavaṅgacalanāni saha hontīti dīpanato ‘‘ekekaṃ…pe… āgacchatī’’tipi dīpeti.
ভৰঙ্গস্স আৰট্টিতকালোতি ইদং দোৰারিকসদিসানং চক্খুৰিঞ্ঞাণাদীনং পাদপরিমজ্জকসদিসস্স আৰজ্জনস্স সঞ্ঞাদানসদিসো অনন্তরপচ্চযভাৰো এৰ ভৰঙ্গাৰট্টনন্তি কত্ৰা ৰুত্তং। ৰিপাকমনোধাতুআদীনং অদিস্ৰাৰ সম্পটিচ্ছনাদিকরণং গাল়্হগ্গহণমত্তপুথুলচতুরস্সভাৰৰিজাননমত্তকহাপণভাৰৰিজাননমত্তকম্মোপনযনমত্তসামঞ্ঞৰসেন ৰুত্তং, ন গাল়্হগ্গাহকাদীনং কহাপণদস্সনস্স অভাৰো তংসমানভাৰো চ সম্পটিচ্ছনাদীনং অধিপ্পেতোতি ৰেদিতব্বো।
Bhavaṅgassa āvaṭṭitakāloti idaṃ dovārikasadisānaṃ cakkhuviññāṇādīnaṃ pādaparimajjakasadisassa āvajjanassa saññādānasadiso anantarapaccayabhāvo eva bhavaṅgāvaṭṭananti katvā vuttaṃ. Vipākamanodhātuādīnaṃ adisvāva sampaṭicchanādikaraṇaṃ gāḷhaggahaṇamattaputhulacaturassabhāvavijānanamattakahāpaṇabhāvavijānanamattakammopanayanamattasāmaññavasena vuttaṃ, na gāḷhaggāhakādīnaṃ kahāpaṇadassanassa abhāvo taṃsamānabhāvo ca sampaṭicchanādīnaṃ adhippetoti veditabbo.
পণ্ডরং এতন্তি পণ্ডররূপদস্সনসামঞ্ঞতো চক্খুৰিঞ্ঞাণমেৰ দস্সনকিচ্চং সাধেতীতি দীপনং ৰেদিতব্বং। এৰং সোতদ্ৰারাদীসুপি যোজেতব্বং সৰনাদিৰসেন। সন্তাপনৰসেন গুল়সীলো গুল়প্পযোজনো ৰা গোল়িযকো। উপনিস্সযতোতি ন উপনিস্সযপচ্চযং সন্ধায ৰুত্তং। যস্মিং পন অসতি যো ন হোতি, সো ইধ ‘‘উপনিস্সযো’’তি অধিপ্পেতো। আলোকসন্নিস্সিতন্তি ইদম্পি আলোকে সতি সব্ভাৰং সন্ধায ৰুত্তং, ন উপনিস্সযপচ্চযতং। মন্দথামগতং নাম কিরিযচিত্তস্স পচ্চযভাৰং অনুপগন্ত্ৰা সযমেৰ পৰত্তমানং।
Paṇḍaraṃetanti paṇḍararūpadassanasāmaññato cakkhuviññāṇameva dassanakiccaṃ sādhetīti dīpanaṃ veditabbaṃ. Evaṃ sotadvārādīsupi yojetabbaṃ savanādivasena. Santāpanavasena guḷasīlo guḷappayojano vā goḷiyako. Upanissayatoti na upanissayapaccayaṃ sandhāya vuttaṃ. Yasmiṃ pana asati yo na hoti, so idha ‘‘upanissayo’’ti adhippeto. Ālokasannissitanti idampi āloke sati sabbhāvaṃ sandhāya vuttaṃ, na upanissayapaccayataṃ. Mandathāmagataṃ nāma kiriyacittassa paccayabhāvaṃ anupagantvā sayameva pavattamānaṃ.
অসঙ্খারিকসসঙ্খারিকেসু দোসং দিস্ৰাতি ন কম্মস্স ৰিরুদ্ধসভাৰেন ৰিপাকেন ভৰিতব্বন্তি অসঙ্খারিককম্মস্স সসঙ্খারিকৰিপাকেসু, সসঙ্খারিককম্মস্স চ অসঙ্খারিকৰিপাকেসু দোসং দিস্ৰা। অহেতুকানং পন রূপাদীসু অভিনিপাতমত্তাদিকিচ্চানং ন সসঙ্খারিকৰিরুদ্ধো সভাৰোতি অসঙ্খারিকতা নত্থি, অসঙ্খারিকৰিরুদ্ধসভাৰাভাৰা নাপি সসঙ্খারিকতাতি উভযাৰিরোধা উভযেনপি তেসং নিব্বত্তিং অনুজানাতি। চিত্তনিযামন্তি তদারম্মণনিযামং। কিরিযতো পঞ্চাতি ইমেসং…পে॰… পতিট্ঠাতীতি কিরিযজৰনানন্তরঞ্চ তদারম্মণং ৰুত্তং। পট্ঠানে (পট্ঠা॰ ১.৩.৯৪) পন ‘‘কুসলাকুসলে নিরুদ্ধে ৰিপাকো তদারম্মণতা উপ্পজ্জতী’’তি ৰিপাকধম্মধম্মানমেৰ অনন্তরা তদারম্মণং ৰুত্তং। কুসলত্তিকে চ ‘‘সেক্খা ৰা পুথুজ্জনা ৰা কুসলং অনিচ্চতো’’তিআদিনা (পট্ঠা॰ ১.১.৪০৬) কুসলাকুসলজৰনমেৰ ৰত্ৰা তদনন্তরং তদারম্মণং ৰুত্তং, ন অব্যাকতানন্তরং, ন চ কত্থচি কিরিযানন্তরং তদারম্মণস্স ৰুত্তট্ঠানং দিস্সতি। ৰিজ্জমানে চ তস্মিং অৰচনে কারণং নত্থি, তস্মা উপপরিক্খিতব্বো এসো থেরৰাদো। ৰিপ্ফারিকঞ্হি জৰনং নাৰং ৰিয নদীসোতো ভৰঙ্গং অনুবন্ধতীতি যুত্তং, ন পন ছল়ঙ্গুপেক্খৰতো সন্তৰুত্তিং কিরিযজৰনং পণ্ণপুটং ৰিয নদীসোতোতি।
Asaṅkhārikasasaṅkhārikesudosaṃ disvāti na kammassa viruddhasabhāvena vipākena bhavitabbanti asaṅkhārikakammassa sasaṅkhārikavipākesu, sasaṅkhārikakammassa ca asaṅkhārikavipākesu dosaṃ disvā. Ahetukānaṃ pana rūpādīsu abhinipātamattādikiccānaṃ na sasaṅkhārikaviruddho sabhāvoti asaṅkhārikatā natthi, asaṅkhārikaviruddhasabhāvābhāvā nāpi sasaṅkhārikatāti ubhayāvirodhā ubhayenapi tesaṃ nibbattiṃ anujānāti. Cittaniyāmanti tadārammaṇaniyāmaṃ. Kiriyato pañcāti imesaṃ…pe… patiṭṭhātīti kiriyajavanānantarañca tadārammaṇaṃ vuttaṃ. Paṭṭhāne (paṭṭhā. 1.3.94) pana ‘‘kusalākusale niruddhe vipāko tadārammaṇatā uppajjatī’’ti vipākadhammadhammānameva anantarā tadārammaṇaṃ vuttaṃ. Kusalattike ca ‘‘sekkhā vā puthujjanā vā kusalaṃ aniccato’’tiādinā (paṭṭhā. 1.1.406) kusalākusalajavanameva vatvā tadanantaraṃ tadārammaṇaṃ vuttaṃ, na abyākatānantaraṃ, na ca katthaci kiriyānantaraṃ tadārammaṇassa vuttaṭṭhānaṃ dissati. Vijjamāne ca tasmiṃ avacane kāraṇaṃ natthi, tasmā upaparikkhitabbo eso theravādo. Vipphārikañhi javanaṃ nāvaṃ viya nadīsoto bhavaṅgaṃ anubandhatīti yuttaṃ, na pana chaḷaṅgupekkhavato santavuttiṃ kiriyajavanaṃ paṇṇapuṭaṃ viya nadīsototi.
পিণ্ডজৰনং জৰতীতি কুসলাকুসলকিরিযজৰনানি পিণ্ডেত্ৰা কথিতানীতি তথা কথিতানি জৰনানি পিণ্ডিতানি ৰিয ৰুত্তানি, একস্মিং ৰা তদারম্মণে পিণ্ডেত্ৰা দস্সিতানি হুত্ৰা জৰিতানেৰ ৰুত্তানি। ইমঞ্চ পন পিণ্ডজৰনং ৰদন্তেন অকুসলতো চত্তারিযেৰ উপেক্খাসহগতানি গহেত্ৰা দ্ৰাদসুপেক্খাসহগতজৰনানি পিণ্ডিতানি ৰিয ৰুত্তানি। পট্ঠানে পন ‘‘কুসলং অস্সাদেতি অভিনন্দতি, তং আরব্ভ রাগো উপ্পজ্জতি। দিট্ঠি, ৰিচিকিচ্ছা , উদ্ধচ্চং, দোমনস্সং উপ্পজ্জতি। অকুসলে নিরুদ্ধে ৰিপাকো তদারম্মণতা উপ্পজ্জতী’’তি ৰুত্তত্তা ইতরানি দ্ৰে ইট্ঠারম্মণে পৰত্তৰিচিকিচ্ছুদ্ধচ্চসহগতানিপি কুসলৰিপাকে তদারম্মণে পিণ্ডেতব্বানি সিযুং। তেসং পন অনন্তরং অহেতুকৰিপাকেনেৰ তদারম্মণেন ভৰিতব্বং, সো চ সন্তীরণভাৰেনেৰ গহিতোতি অপুব্বং গহেতব্বং নত্থি। অহেতুকে চ পিণ্ডেতব্বং নারহন্তীতি অধিপ্পাযেন ন পিণ্ডেতীতি।
Piṇḍajavanaṃ javatīti kusalākusalakiriyajavanāni piṇḍetvā kathitānīti tathā kathitāni javanāni piṇḍitāni viya vuttāni, ekasmiṃ vā tadārammaṇe piṇḍetvā dassitāni hutvā javitāneva vuttāni. Imañca pana piṇḍajavanaṃ vadantena akusalato cattāriyeva upekkhāsahagatāni gahetvā dvādasupekkhāsahagatajavanāni piṇḍitāni viya vuttāni. Paṭṭhāne pana ‘‘kusalaṃ assādeti abhinandati, taṃ ārabbha rāgo uppajjati. Diṭṭhi, vicikicchā , uddhaccaṃ, domanassaṃ uppajjati. Akusale niruddhe vipāko tadārammaṇatā uppajjatī’’ti vuttattā itarāni dve iṭṭhārammaṇe pavattavicikicchuddhaccasahagatānipi kusalavipāke tadārammaṇe piṇḍetabbāni siyuṃ. Tesaṃ pana anantaraṃ ahetukavipākeneva tadārammaṇena bhavitabbaṃ, so ca santīraṇabhāveneva gahitoti apubbaṃ gahetabbaṃ natthi. Ahetuke ca piṇḍetabbaṃ nārahantīti adhippāyena na piṇḍetīti.
তিহেতুকজৰনাৰসানে পনেত্থাতি এতস্মিং দুতিযৰাদে তিহেতুকজৰনাৰসানে তিহেতুকতদারম্মণং যুত্তন্তি দস্সেতুং যুত্তং ৰদতি জৰনসমানত্তা, নালব্ভমানত্তা অঞ্ঞস্স। পঠমত্থেরেন অকুসলানন্তরং ৰুত্তস্স অহেতুকতদারম্মণস্স, কুসলানন্তরং ৰুত্তস্স চ সহেতুকতদারম্মণস্স অকুসলানন্তরং উপ্পত্তিং ৰদন্তস্স হি পটিসন্ধিজনকং তিহেতুককম্মং দুহেতুকাহেতুকং ৰিপাকং জনযন্তম্পি তিহেতুকজৰনানন্তরং ন জনেতীতি ন এত্থ কারণং দিস্সতীতি এৰং যুত্তং গহেতব্বং অৰুত্তম্পীতি অধিপ্পাযো। অথ ৰা তস্মিং তস্মিং থেরৰাদে যেন অধিপ্পাযেন সসঙ্খারাসঙ্খারৰিধানাদি ৰুত্তং, তং তেনেৰ অধিপ্পাযেন যুত্তং গহেতব্বং, ন অধিপ্পাযন্তরং অধিপ্পাযন্তরেন আলোল়েতব্বন্তি অত্থো। হেতুসদিসমেৰাতি জনককম্মহেতুসদিসমেৰ। মহাপকরণে আৰি ভৰিস্সতীতি মহাপকরণে আগতপাল়িযা পাকটং উপ্পত্তিৰিধানং আৰি ভৰিস্সতীতি অধিপ্পাযেন ৰদতি।
Tihetukajavanāvasāne panetthāti etasmiṃ dutiyavāde tihetukajavanāvasāne tihetukatadārammaṇaṃ yuttanti dassetuṃ yuttaṃ vadati javanasamānattā, nālabbhamānattā aññassa. Paṭhamattherena akusalānantaraṃ vuttassa ahetukatadārammaṇassa, kusalānantaraṃ vuttassa ca sahetukatadārammaṇassa akusalānantaraṃ uppattiṃ vadantassa hi paṭisandhijanakaṃ tihetukakammaṃ duhetukāhetukaṃ vipākaṃ janayantampi tihetukajavanānantaraṃ na janetīti na ettha kāraṇaṃ dissatīti evaṃ yuttaṃ gahetabbaṃ avuttampīti adhippāyo. Atha vā tasmiṃ tasmiṃ theravāde yena adhippāyena sasaṅkhārāsaṅkhāravidhānādi vuttaṃ, taṃ teneva adhippāyena yuttaṃ gahetabbaṃ, na adhippāyantaraṃ adhippāyantarena āloḷetabbanti attho. Hetusadisamevāti janakakammahetusadisameva. Mahāpakaraṇe āvi bhavissatīti mahāpakaraṇe āgatapāḷiyā pākaṭaṃ uppattividhānaṃ āvi bhavissatīti adhippāyena vadati.
কামাৰচরকুসলৰিপাককথাৰণ্ণনা নিট্ঠিতা।
Kāmāvacarakusalavipākakathāvaṇṇanā niṭṭhitā.
