| Library / Tipiṭaka / তিপিটক • Tipiṭaka / ধম্মসঙ্গণী-অনুটীকা • Dhammasaṅgaṇī-anuṭīkā |
ৰিপাকুদ্ধারকথাৰণ্ণনা
Vipākuddhārakathāvaṇṇanā
যতো তিহেতুকাদিকম্মতো। যস্মিঞ্চ ঠানেতি পটিসন্ধিআদিট্ঠানে, সুগতিদুগ্গতিযং ৰা। তিহেতুকতো দুহেতুকং অনিচ্ছন্তো পটিসন্ধিন্তি অধিপ্পাযো। পৰত্তিৰিপাকং পন তিহেতুকতো দুহেতুকম্পি ইচ্ছতি এৰ। তথা হি ৰক্খতি অট্ঠকথাযং ‘‘যং পুরিমায হেতুকিত্তনলদ্ধিযা ন যুজ্জতী’’তি (ধ॰ স॰ অট্ঠ॰ ৪৯৮)।
Yato tihetukādikammato. Yasmiñca ṭhāneti paṭisandhiādiṭṭhāne, sugatiduggatiyaṃ vā. Tihetukato duhetukaṃ anicchanto paṭisandhinti adhippāyo. Pavattivipākaṃ pana tihetukato duhetukampi icchati eva. Tathā hi vakkhati aṭṭhakathāyaṃ ‘‘yaṃ purimāya hetukittanaladdhiyā na yujjatī’’ti (dha. sa. aṭṭha. 498).
যে ‘‘তস্সেৰ কম্মস্স ৰিপাকাৰসেসেনা’’তি, ‘‘একপুপ্ফং যজিত্ৰান, অসীতি কপ্পকোটিযো (থেরগা॰ ৯৬)। দুগ্গতিং নাভিজানামী’’তি (অপ॰ থের ২.৪৬.৬৪) চ এৰমাদিৰচনস্স অধিপ্পাযং অজানন্তা ‘‘কিং নু খো একেনপি কম্মেন অনেকা পটিসন্ধি হোতী’’তি, ‘‘দিস্ৰা কুমারং সতপুঞ্ঞলক্খণ’’ন্তিআদিৰচনস্স (দী॰ নি॰ ৩.২০৫) অত্থং অসল্লক্খেত্ৰা ‘‘কিন্নু খো নানাকম্মেহি একা পটিসন্ধি হোতী’’তি সংসযপক্খন্দা, তেসং বীজঙ্কুরোপমায ‘‘একস্মা একা, অনেকস্মা চ অনেকা পটিসন্ধি হোতী’’তি ৰিনিচ্ছিতত্তা কম্মপটিসন্ধিৰৰত্থানতো সাকেতপঞ্হে ৰিপাকুদ্ধারকথায উস্সদকিত্তনগহণস্স সম্বন্ধং আহ ‘‘কম্মৰসেন…পে॰… দস্সেতু’’ন্তি। পটিসন্ধিজনককম্মৰসেন পটিসন্ধিৰিপাকো এৰ অলোভলোভাদিগুণদোসাতিরেকভাৰহেতূতি অত্থো দট্ঠব্বো। তথা হি ৰুত্তং ‘‘সো তেন কম্মেন দিন্নপটিসন্ধিৰসেন নিব্বত্তো লুদ্ধো হোতী’’তিআদি। এত্থ চ লোভৰসেন, দোস, মোহ , লোভদোস, লোভমোহ, দোসমোহ, লোভদোসমোহৰসেনাতি তযো এককা, তযো দ্ৰিকা, একো তিকোতি লোভাদিদস্সনৰসেন অকুসলপক্খেযেৰ সত্ত ৰারা। তথা কুসলপক্খে অলোভাদিদস্সনৰসেনাতি চুদ্দস ৰারা লব্ভন্তি।
Ye ‘‘tasseva kammassa vipākāvasesenā’’ti, ‘‘ekapupphaṃ yajitvāna, asīti kappakoṭiyo (theragā. 96). Duggatiṃ nābhijānāmī’’ti (apa. thera 2.46.64) ca evamādivacanassa adhippāyaṃ ajānantā ‘‘kiṃ nu kho ekenapi kammena anekā paṭisandhi hotī’’ti, ‘‘disvā kumāraṃ satapuññalakkhaṇa’’ntiādivacanassa (dī. ni. 3.205) atthaṃ asallakkhetvā ‘‘kinnu kho nānākammehi ekā paṭisandhi hotī’’ti saṃsayapakkhandā, tesaṃ bījaṅkuropamāya ‘‘ekasmā ekā, anekasmā ca anekā paṭisandhi hotī’’ti vinicchitattā kammapaṭisandhivavatthānato sāketapañhe vipākuddhārakathāya ussadakittanagahaṇassa sambandhaṃ āha ‘‘kammavasena…pe… dassetu’’nti. Paṭisandhijanakakammavasena paṭisandhivipāko eva alobhalobhādiguṇadosātirekabhāvahetūti attho daṭṭhabbo. Tathā hi vuttaṃ ‘‘so tena kammena dinnapaṭisandhivasena nibbatto luddho hotī’’tiādi. Ettha ca lobhavasena, dosa, moha , lobhadosa, lobhamoha, dosamoha, lobhadosamohavasenāti tayo ekakā, tayo dvikā, eko tikoti lobhādidassanavasena akusalapakkheyeva satta vārā. Tathā kusalapakkhe alobhādidassanavasenāti cuddasa vārā labbhanti.
তত্থ ‘‘অলোভদোসামোহা, অলোভাদোসমোহা, অলোভদোসামোহা বলৰন্তো’’তি আগতেহি কুসলপক্খে ততিযদুতিযপঠমৰারেহি দোসুস্সদমোহুস্সদদোসমোহুস্সদৰারা গহিতা। তথা অকুসলপক্খে ‘‘লোভাদোসমোহা, লোভদোসামোহা, লোভাদোসামোহা বলৰন্তো’’তি আগতেহি ততিযদুতিযপঠমৰারেহি অদোসুস্সদঅমোহুস্সদঅদোসামোহুস্সদৰারা গহিতাযেৰাতি অকুসলকুসলপক্খে তযো তযো ৰারে অন্তোগধে কত্ৰা অট্ঠেৰ ৰারা দস্সিতা। যে পন উভযেসং ৰোমিস্সতাৰসেনেৰ লোভালোভুস্সদৰারাদযো অপরে একূনপঞ্ঞাস ৰারা দস্সেতব্বা, তে অসম্ভৰতো এৰ ন দস্সিতা। ন হি একস্মিং সন্তানে অন্তরেন অৰত্থন্তরং লোভো বলৰা অলোভো চাতি যুজ্জতি। পটিপক্খতোযেৰ হি এতেসং বলৰদুব্বলভাৰো, সহজাতধম্মতো ৰা। তেসু লোভস্স তাৰ পটিপক্খতো অলোভেন অনভিভূততায বলৰভাৰো, তথা দোসমোহানং অদোসামোহেহি। অলোভাদীনং পন লোভাদিঅভিভৰনতো সব্বেসঞ্চ সমানজাতিযং সমভিভূয পৰত্তিৰসেনেৰ সহজাতধম্মতো বলৰভাৰো। তেন ৰুত্তং অট্ঠকথাযং ‘‘লোভো বলৰা, অলোভো মন্দো, অদোসামোহা বলৰন্তো, দোসমোহা মন্দা’’তি। সো চ তেসং মন্দবলৰভাৰো পুরিমূপনিস্সযতো আসযস্স পরিভাৰিততায ৰেদিতব্বো। এত্থ চ পঠমদুতিযেহি, সত্তমপঠমেহি ৰা ৰারেহি তিহেতুককম্মতো পটিসন্ধিপৰত্তিৰসেন তিহেতুকৰিপাকো, ইতরেহি তিহেতুকদুহেতুককম্মতো যথাসম্ভৰং পটিসন্ধিপৰত্তিৰসেন দুহেতুকাহেতুকৰিপাকা দস্সিতাতি অযম্পি ৰিসেসো ৰেদিতব্বো।
Tattha ‘‘alobhadosāmohā, alobhādosamohā, alobhadosāmohā balavanto’’ti āgatehi kusalapakkhe tatiyadutiyapaṭhamavārehi dosussadamohussadadosamohussadavārā gahitā. Tathā akusalapakkhe ‘‘lobhādosamohā, lobhadosāmohā, lobhādosāmohā balavanto’’ti āgatehi tatiyadutiyapaṭhamavārehi adosussadaamohussadaadosāmohussadavārā gahitāyevāti akusalakusalapakkhe tayo tayo vāre antogadhe katvā aṭṭheva vārā dassitā. Ye pana ubhayesaṃ vomissatāvaseneva lobhālobhussadavārādayo apare ekūnapaññāsa vārā dassetabbā, te asambhavato eva na dassitā. Na hi ekasmiṃ santāne antarena avatthantaraṃ lobho balavā alobho cāti yujjati. Paṭipakkhatoyeva hi etesaṃ balavadubbalabhāvo, sahajātadhammato vā. Tesu lobhassa tāva paṭipakkhato alobhena anabhibhūtatāya balavabhāvo, tathā dosamohānaṃ adosāmohehi. Alobhādīnaṃ pana lobhādiabhibhavanato sabbesañca samānajātiyaṃ samabhibhūya pavattivaseneva sahajātadhammato balavabhāvo. Tena vuttaṃ aṭṭhakathāyaṃ ‘‘lobho balavā, alobho mando, adosāmohā balavanto, dosamohā mandā’’ti. So ca tesaṃ mandabalavabhāvo purimūpanissayato āsayassa paribhāvitatāya veditabbo. Ettha ca paṭhamadutiyehi, sattamapaṭhamehi vā vārehi tihetukakammato paṭisandhipavattivasena tihetukavipāko, itarehi tihetukaduhetukakammato yathāsambhavaṃ paṭisandhipavattivasena duhetukāhetukavipākā dassitāti ayampi viseso veditabbo.
ইধাতি ৰিপাকুদ্ধারমাতিকাযং। তেন হেতুকিত্তনং ৰিসেসেতি। জচ্চন্ধাদিৰিপত্তিনিমিত্তং মোহো, সব্বাকুসলং ৰা। যং পন ৰুত্তন্তি সম্বন্ধো। তেন পটিসম্ভিদামগ্গৰচনেন। গতিসম্পত্তিযা সতি ঞাণসম্পযুত্তে পটিসন্ধিম্হি নিপ্ফাদেতব্বে। অঞ্ঞত্থাতি নিকন্তিপটিসন্ধিক্খণেসু। কম্মসরিক্খকোতি ইধ সাতিসযো সরিক্খভাৰো অধিপ্পেতোতি দট্ঠব্বো। ইতরথা তিহেতুকদুহেতুকাপি অঞ্ঞমঞ্ঞং সরিক্খাযেৰাতি দস্সিতমেতন্তি। চক্খুৰিঞ্ঞাণাদীনীতি এত্থ পঞ্চৰিঞ্ঞাণানি ৰিয অপুব্বনিস্সযপৰত্তিনী ৰিজাননৰিসেসরহিতা চ মনোধাতু ইট্ঠাদিভাগগ্গহণে ন সমত্থাতি ‘‘পাকটাযেৰা’’তি ন ৰুত্তা, আদি-সদ্দেন ৰা সঙ্গহিতা। তদারম্মণপচ্চযসব্বজৰনৰতাতি তদারম্মণস্স পচ্চযভূতসকলজৰনপ্পৰত্তিসহিতেন। যং সন্ধায ‘‘ইধ পরিপক্কত্তা আযতনান’’ন্তি ৰুত্তং। অঞ্ঞকালেতি অবুদ্ধিপৰত্তিকালে।
Idhāti vipākuddhāramātikāyaṃ. Tena hetukittanaṃ viseseti. Jaccandhādivipattinimittaṃ moho, sabbākusalaṃ vā. Yaṃ pana vuttanti sambandho. Tena paṭisambhidāmaggavacanena. Gatisampattiyā sati ñāṇasampayutte paṭisandhimhi nipphādetabbe. Aññatthāti nikantipaṭisandhikkhaṇesu. Kammasarikkhakoti idha sātisayo sarikkhabhāvo adhippetoti daṭṭhabbo. Itarathā tihetukaduhetukāpi aññamaññaṃ sarikkhāyevāti dassitametanti. Cakkhuviññāṇādīnīti ettha pañcaviññāṇāni viya apubbanissayapavattinī vijānanavisesarahitā ca manodhātu iṭṭhādibhāgaggahaṇe na samatthāti ‘‘pākaṭāyevā’’ti na vuttā, ādi-saddena vā saṅgahitā. Tadārammaṇapaccayasabbajavanavatāti tadārammaṇassa paccayabhūtasakalajavanappavattisahitena. Yaṃ sandhāya ‘‘idha paripakkattā āyatanāna’’nti vuttaṃ. Aññakāleti abuddhipavattikāle.
অনুলোমেতি ধম্মানুলোমে। আসেৰনপচ্চযাতি আসেৰনভূতা পচ্চযা। ন মগ্গে অমগ্গপচ্চযে । সোপি মোঘৰারো লব্ভেয্যাতি যদি ৰোট্ঠব্বনম্পি আসেৰনপচ্চযো সিযা, যথা ‘‘সুখায ৰেদনায সম্পযুত্তং ধম্মং পটিচ্চ সুখায ৰেদনায সম্পযুত্তো ধম্মো উপ্পজ্জতি আসেৰনপচ্চযা ন (পট্ঠা॰ ১.২.৩) মগ্গপচ্চযা’’তি (পট্ঠা॰ ১.২.১৪) অনুলোমপচ্চনীযে, পচ্চনীযানুলোমে চ ‘‘সুখা…পে॰… ন মগ্গপচ্চযা আসেৰনপচ্চযা’’তি চ ৰুত্তং হসিতুপ্পাদচিত্তৰসেন, এৰং ৰোট্ঠব্বনৰসেন ‘‘অদুক্খমসুখায ৰেদনায সম্পযুত্তং ধম্মং পটিচ্চা’’তিআদিনা পুব্বে ৰুত্তনযেন পাঠো সিযা, তথা চ সতি ৰারদ্ৰযৰসেন গণনাযং ‘‘আসেৰনপচ্চযা ন মগ্গে দ্ৰে। ন মগ্গপচ্চযা আসেৰনে দ্ৰে’’তি চ ৰত্তব্বং সিযা, ন পন ৰুত্তং, তস্মা ন লব্ভেয্যাযং মোঘৰারোতি অধিপ্পাযো।
Anulometi dhammānulome. Āsevanapaccayāti āsevanabhūtā paccayā. Na magge amaggapaccaye . Sopi moghavāro labbheyyāti yadi voṭṭhabbanampi āsevanapaccayo siyā, yathā ‘‘sukhāya vedanāya sampayuttaṃ dhammaṃ paṭicca sukhāya vedanāya sampayutto dhammo uppajjati āsevanapaccayā na (paṭṭhā. 1.2.3) maggapaccayā’’ti (paṭṭhā. 1.2.14) anulomapaccanīye, paccanīyānulome ca ‘‘sukhā…pe… na maggapaccayā āsevanapaccayā’’ti ca vuttaṃ hasituppādacittavasena, evaṃ voṭṭhabbanavasena ‘‘adukkhamasukhāya vedanāya sampayuttaṃ dhammaṃ paṭiccā’’tiādinā pubbe vuttanayena pāṭho siyā, tathā ca sati vāradvayavasena gaṇanāyaṃ ‘‘āsevanapaccayā na magge dve. Na maggapaccayā āsevane dve’’ti ca vattabbaṃ siyā, na pana vuttaṃ, tasmā na labbheyyāyaṃ moghavāroti adhippāyo.
ৰোট্ঠব্বনম্পি যদি আসেৰনপচ্চযো সিযা, দুতিযমোঘৰারে অত্তনো ৰিয ততিযচতুত্থৰারেসুপি সিযা, তথা সতি অত্তনাপি কুসলাকুসলানং সিযা। ন হি…পে॰… অৰুত্তো অত্থি ‘‘পুরিমা পুরিমা কুসলা ধম্মা’’তিআদিনা অনৰসেসতো ৰুত্তত্তা। ৰোট্ঠব্বনস্স…পে॰… অৰুত্তো ‘‘অব্যাকতো ধম্মো কুসলস্স ধম্মস্স আসেৰনপচ্চযেন পচ্চযো। অকুসলস্স…পে॰… পচ্চযো’’তি ৰচনাভাৰতো। ন কেৰলং অৰুত্তো, অথ খো কুসলং…পে॰… পটিক্খিত্তোৰ। অথাপি সিযাতিআদি মগ্গসোধনত্থমেৰ ৰুচ্চতি। সমানৰেদনানং এৰ আসেৰনপচ্চযভাৰস্স দস্সনতো ‘‘অসমানৰেদনানং ৰসেনা’’তি ৰুত্তং। এৰং ‘‘আসেৰন পচ্চযেন পচ্চযো’’তিপি ৰত্তব্বং সিযা, সমানৰেদনাৰসেনাতি অধিপ্পাযো। অভিন্নজাতিকস্স চাতি চ-সদ্দো অভিন্নৰেদনস্স চাতি সম্পিণ্ডনত্থো। ৰেদনাত্তিকেপি ৰোট্ঠব্বনস্স আসেৰনপচ্চযত্তস্স অভাৰাতি যোজনা। কুসলত্তিকাদীসু যথাদস্সিতপাল়িপ্পদেসেসুপীতি সম্পিণ্ডনত্থো পি-সদ্দো। গণনায কারণভূতায গণনায নিদ্ধারিযমানায সতি গণনায ৰা অব্ভন্তরে। দুতিযো মোঘৰারো ৰীমংসিতব্বোতি আসেৰনপচ্চযত্তাভাৰা জৰনট্ঠানে ঠাতুং ন যুজ্জতি। ন হি ৰিনা আসেৰনং জৰনপ্পৰত্তি অত্থীতি অধিপ্পাযো।
Voṭṭhabbanampi yadi āsevanapaccayo siyā, dutiyamoghavāre attano viya tatiyacatutthavāresupi siyā, tathā sati attanāpi kusalākusalānaṃ siyā. Na hi…pe… avutto atthi ‘‘purimā purimā kusalā dhammā’’tiādinā anavasesato vuttattā. Voṭṭhabbanassa…pe… avutto ‘‘abyākato dhammo kusalassa dhammassa āsevanapaccayena paccayo. Akusalassa…pe… paccayo’’ti vacanābhāvato. Na kevalaṃ avutto, atha kho kusalaṃ…pe… paṭikkhittova. Athāpi siyātiādi maggasodhanatthameva vuccati. Samānavedanānaṃ eva āsevanapaccayabhāvassa dassanato ‘‘asamānavedanānaṃ vasenā’’ti vuttaṃ. Evaṃ ‘‘āsevana paccayena paccayo’’tipi vattabbaṃ siyā, samānavedanāvasenāti adhippāyo. Abhinnajātikassa cāti ca-saddo abhinnavedanassa cāti sampiṇḍanattho. Vedanāttikepi voṭṭhabbanassa āsevanapaccayattassa abhāvāti yojanā. Kusalattikādīsu yathādassitapāḷippadesesupīti sampiṇḍanattho pi-saddo. Gaṇanāya kāraṇabhūtāya gaṇanāya niddhāriyamānāya sati gaṇanāya vā abbhantare. Dutiyo moghavāro vīmaṃsitabboti āsevanapaccayattābhāvā javanaṭṭhāne ṭhātuṃ na yujjati. Na hi vinā āsevanaṃ javanappavatti atthīti adhippāyo.
অপিচেত্থ ‘‘যং জৰনভাৰপ্পত্তং, তং ছিন্নমূলকরুক্খপুপ্ফং ৰিযা’’তি (ধ॰ স॰ অট্ঠ॰ ৫৬৬) ৰক্খমানত্তা অনুপচ্ছিন্নভৰমূলানং পৰত্তমানস্স ৰোট্ঠব্বনস্স কিরিযভাৰো ন সিযা, ৰুত্তো চ ‘‘যস্মিং সমযে মনোৰিঞ্ঞাণধাতু উপ্পন্না হোতি কিরিযা নেৰ কুসলা নাকুসলা ন চ কম্মৰিপাকা উপেক্খাসহগতা’’তি, তস্মা ‘‘জৰনট্ঠানে ঠত্ৰাতি জৰনস্স উপ্পজ্জনট্ঠানে দ্ৰিক্খত্তুং পৰত্তিত্ৰা, ন জৰনভাৰেনা’’তি, ‘‘আসেৰনং লভিত্ৰাতি চ আসেৰনং ৰিয আসেৰন’’ন্তি ৰুচ্চমানে ন কোচি ৰিরোধো, ৰিপ্ফারিকস্স পন সতো দ্ৰিক্খত্তুং পৰত্তিযেৰেত্থ আসেৰনসদিসতা। ৰিপ্ফারিকতায হি ৰিঞ্ঞত্তিসমুট্ঠাপকত্তঞ্চস্স ৰুচ্চতি। ৰিপ্ফারিকম্পি জৰনং ৰিয অনেকক্খত্তুং অপ্পৰত্তিযা দুব্বলত্তা ন নিপ্পরিযাযতো আসেৰনপচ্চযভাৰেন পৰত্তেয্যাতি ন ইমস্স পাঠে আসেৰনত্থং ৰুত্তং, অট্ঠকথাযং পন পরিযাযতো ৰুত্তং যথা ‘‘ফলচিত্তেসু মগ্গঙ্গং মগ্গপরিযাপন্ন’’ন্তি। অযমেত্থ অত্তনোমতি। অযম্পি পোরাণকেহি অসংৰণ্ণিতত্তা সাধুকং উপপরিক্খিতব্বো।
Apicettha ‘‘yaṃ javanabhāvappattaṃ, taṃ chinnamūlakarukkhapupphaṃ viyā’’ti (dha. sa. aṭṭha. 566) vakkhamānattā anupacchinnabhavamūlānaṃ pavattamānassa voṭṭhabbanassa kiriyabhāvo na siyā, vutto ca ‘‘yasmiṃ samaye manoviññāṇadhātu uppannā hoti kiriyā neva kusalā nākusalā na ca kammavipākā upekkhāsahagatā’’ti, tasmā ‘‘javanaṭṭhāne ṭhatvāti javanassa uppajjanaṭṭhāne dvikkhattuṃ pavattitvā, na javanabhāvenā’’ti, ‘‘āsevanaṃ labhitvāti ca āsevanaṃ viya āsevana’’nti vuccamāne na koci virodho, vipphārikassa pana sato dvikkhattuṃ pavattiyevettha āsevanasadisatā. Vipphārikatāya hi viññattisamuṭṭhāpakattañcassa vuccati. Vipphārikampi javanaṃ viya anekakkhattuṃ appavattiyā dubbalattā na nippariyāyato āsevanapaccayabhāvena pavatteyyāti na imassa pāṭhe āsevanatthaṃ vuttaṃ, aṭṭhakathāyaṃ pana pariyāyato vuttaṃ yathā ‘‘phalacittesu maggaṅgaṃ maggapariyāpanna’’nti. Ayamettha attanomati. Ayampi porāṇakehi asaṃvaṇṇitattā sādhukaṃ upaparikkhitabbo.
এৰঞ্চ কত্ৰাতি ৰোট্ঠব্বনাৰজ্জনানং অনত্থন্তরভাৰতো ‘‘আৰজ্জনা’’ইচ্চেৰ ৰুত্তং, ৰোট্ঠব্বনট্ঠানেপীতি অধিপ্পাযো। তস্মাতি যস্মা ৰোট্ঠব্বনং আৰজ্জনাযেৰ অত্থতো উপেক্খাসহগতাহেতুককিরিযমনোৰিঞ্ঞাণধাতুভাৰতো, তস্মা। তং আৰজ্জনা ৰিয সতি উপ্পত্তিযং কামাৰচরকুসলাকুসলকিরিযজৰনানং একন্ততো অনন্তরপচ্চযভাৰেনেৰ ৰত্তেয্য, নো অঞ্ঞথাতি অধিপ্পাযেন ‘‘ৰোট্ঠব্বনতো’’তিআদিমাহ। চতুন্নন্তি মুঞ্ছামরণাসন্নৰেলাদীসু মন্দীভূতৰেগতায চত্তারিপি জৰনানি উপ্পজ্জেয্যুন্তি অধিপ্পাযেন ৰুত্তং। অযমেতস্স সভাৰোতি আরম্মণমুখেনপি চিত্তনিযামংযেৰ দস্সেতি। যদিপি ‘‘জৰনাপারিপূরিযা…পে॰… যুত্তো’’তি ৰুত্তং, ‘‘আৰজ্জনাদীনং পচ্চযো ভৰিতুং ন সক্কোতী’’তি পন ৰুত্তত্তা চিত্তপ্পৰত্তিৰসেন পঠমমোঘৰারতো এতস্স ন কোচি ৰিসেসো। তেনেৰাহ ‘‘অযম্পি…পে॰… রেতব্বো’’তি। পটিসন্ধিচিত্তেযেৰ পৰত্তিযং ‘‘ভৰঙ্গ’’ন্তি ৰুচ্চমানে ন তস্স হেতুৰসেন ভেদোতি ‘‘সহেতুকং ভৰঙ্গং অহেতুকস্স ভৰঙ্গস্স অনন্তরপচ্চযেন পচ্চযো’’তি (পট্ঠা॰ ৩.১.১০২) ন সক্কা ৰত্তুং, ৰুত্তঞ্চ, তস্মা সহেতুকং ভৰঙ্গন্তি তদারম্মণং ৰুত্তন্তি ৰিঞ্ঞাযতি।
Evañca katvāti voṭṭhabbanāvajjanānaṃ anatthantarabhāvato ‘‘āvajjanā’’icceva vuttaṃ, voṭṭhabbanaṭṭhānepīti adhippāyo. Tasmāti yasmā voṭṭhabbanaṃ āvajjanāyeva atthato upekkhāsahagatāhetukakiriyamanoviññāṇadhātubhāvato, tasmā. Taṃ āvajjanā viya sati uppattiyaṃ kāmāvacarakusalākusalakiriyajavanānaṃ ekantato anantarapaccayabhāveneva vatteyya, no aññathāti adhippāyena ‘‘voṭṭhabbanato’’tiādimāha. Catunnanti muñchāmaraṇāsannavelādīsu mandībhūtavegatāya cattāripi javanāni uppajjeyyunti adhippāyena vuttaṃ. Ayametassa sabhāvoti ārammaṇamukhenapi cittaniyāmaṃyeva dasseti. Yadipi ‘‘javanāpāripūriyā…pe… yutto’’ti vuttaṃ, ‘‘āvajjanādīnaṃ paccayo bhavituṃ na sakkotī’’ti pana vuttattā cittappavattivasena paṭhamamoghavārato etassa na koci viseso. Tenevāha ‘‘ayampi…pe… retabbo’’ti. Paṭisandhicitteyeva pavattiyaṃ ‘‘bhavaṅga’’nti vuccamāne na tassa hetuvasena bhedoti ‘‘sahetukaṃ bhavaṅgaṃ ahetukassa bhavaṅgassa anantarapaccayena paccayo’’ti (paṭṭhā. 3.1.102) na sakkā vattuṃ, vuttañca, tasmā sahetukaṃ bhavaṅganti tadārammaṇaṃ vuttanti viññāyati.
সভাৰকিচ্চেহি অত্তনো ফলস্স পচ্চযভাৰো, সভাৰকিচ্চানং ৰা ফলভূতানং পচ্চযভাৰো সভাৰকিচ্চপচ্চযভাৰো। অপ্পটিসিদ্ধং দট্ঠব্বন্তি ‘‘দুহেতুকসোমনস্সসহগতঅসঙ্খারিকজৰনাৰসানে এৰা’’তি ইমস্স অত্থস্স অনধিপ্পেতত্তা। যথা চ অহেতুকদুহেতুকপটিসন্ধিকানং তিহেতুকজৰনাৰসানে অহেতুকদুহেতুকতদারম্মণং অপ্পটিসিদ্ধং, এৰং তিহেতুকপটিসন্ধিকস্স তিহেতুকজৰনানন্তরং দুহেতুকতদারম্মণং, দুহেতুকপটিসন্ধিকস্স চ দুহেতুকানন্তরং অহেতুকতদারম্মণং অপ্পটিসিদ্ধং দট্ঠব্বং। ‘‘তিহেতুককম্মং তিহেতুকম্পি দুহেতুকম্পি অহেতুকম্পি ৰিপাকং দেতী’’তি (ধ॰ স॰ অট্ঠ॰ ৪৯৮) হি ৰুত্তং। পরিপুণ্ণৰিপাকস্সাতি ইমিনাপি তিহেতুকজৰনতো যথাৰুত্ততদারম্মণস্স অপ্পটিসিদ্ধংযেৰ সাধেতি। ন হি পচ্চযন্তরসামগ্গিযা অসতি তদারম্মণং সব্বং অৰিপচ্চন্তং কম্মং পরিপুণ্ণৰিপাকং হোতীতি। মুখনিদস্সনমত্তমেৰ যথাৰুত্ততদারম্মণপ্পৰত্তিযা অৰিভাৰিতত্তা। তিহেতুকাদিকম্মস্স হি উক্কট্ঠস্স তিহেতুককম্মস্স সোল়স, ইতরস্স দ্ৰাদস, উক্কট্ঠস্সেৰ দুহেতুককম্মস্স দ্ৰাদস, ইতরস্স অট্ঠাতি এৰং সোল়সৰিপাকচিত্তাদীনি যোজেতব্বানি। তস্মাতি যস্মা পরিপুণ্ণৰিপাকস্স পটিসন্ধিজনককম্মস্স ৰসেন ৰিপাকৰিভাৰনায মুখনিদস্সনমত্তমেৰেতং, তস্মা।
Sabhāvakiccehi attano phalassa paccayabhāvo, sabhāvakiccānaṃ vā phalabhūtānaṃ paccayabhāvo sabhāvakiccapaccayabhāvo. Appaṭisiddhaṃ daṭṭhabbanti ‘‘duhetukasomanassasahagataasaṅkhārikajavanāvasāne evā’’ti imassa atthassa anadhippetattā. Yathā ca ahetukaduhetukapaṭisandhikānaṃ tihetukajavanāvasāne ahetukaduhetukatadārammaṇaṃ appaṭisiddhaṃ, evaṃ tihetukapaṭisandhikassa tihetukajavanānantaraṃ duhetukatadārammaṇaṃ, duhetukapaṭisandhikassa ca duhetukānantaraṃ ahetukatadārammaṇaṃ appaṭisiddhaṃ daṭṭhabbaṃ. ‘‘Tihetukakammaṃ tihetukampi duhetukampi ahetukampi vipākaṃ detī’’ti (dha. sa. aṭṭha. 498) hi vuttaṃ. Paripuṇṇavipākassāti imināpi tihetukajavanato yathāvuttatadārammaṇassa appaṭisiddhaṃyeva sādheti. Na hi paccayantarasāmaggiyā asati tadārammaṇaṃ sabbaṃ avipaccantaṃ kammaṃ paripuṇṇavipākaṃ hotīti. Mukhanidassanamattameva yathāvuttatadārammaṇappavattiyā avibhāvitattā. Tihetukādikammassa hi ukkaṭṭhassa tihetukakammassa soḷasa, itarassa dvādasa, ukkaṭṭhasseva duhetukakammassa dvādasa, itarassa aṭṭhāti evaṃ soḷasavipākacittādīni yojetabbāni. Tasmāti yasmā paripuṇṇavipākassa paṭisandhijanakakammassa vasena vipākavibhāvanāya mukhanidassanamattamevetaṃ, tasmā.
এৰঞ্চ কত্ৰাতি নানাকম্মতো তদারম্মণুপ্পত্তিযং ইতো অঞ্ঞথাপি সম্ভৰতোতি অত্থো। ‘‘উপেক্খা…পে॰… উপ্পজ্জতী’’তি এত্থ কেন কিচ্চেন উপ্পজ্জতীতি? তদারম্মণকিচ্চং তাৰ ন হোতি জৰনারম্মণস্স অনালম্বণতো, নাপি সন্তীরণকিচ্চং তথা অপ্পৰত্তনতো, পটিসন্ধিচুতীসু ৰত্তব্বমেৰ নত্থি, পারিসেসতো ভৰঙ্গকিচ্চন্তি যুত্তং সিযা। ন হি পটিসন্ধিভূতংযেৰ চিত্তং ‘‘ভৰঙ্গ’’ন্তি ৰুচ্চতীতি।
Evañca katvāti nānākammato tadārammaṇuppattiyaṃ ito aññathāpi sambhavatoti attho. ‘‘Upekkhā…pe… uppajjatī’’ti ettha kena kiccena uppajjatīti? Tadārammaṇakiccaṃ tāva na hoti javanārammaṇassa anālambaṇato, nāpi santīraṇakiccaṃ tathā appavattanato, paṭisandhicutīsu vattabbameva natthi, pārisesato bhavaṅgakiccanti yuttaṃ siyā. Na hi paṭisandhibhūtaṃyeva cittaṃ ‘‘bhavaṅga’’nti vuccatīti.
তন্নিন্নন্তি আপাথগতৰিসযনিন্নং আৰজ্জনন্তি সম্বন্ধো। অঞ্ঞস্স ৰিয পঠমজ্ঝানাদিকস্স ৰিয। এতস্সপি সাৰজ্জনতায ভৰিতব্বন্তি অধিপ্পাযো। অতদত্থাতি এত্থ তং-সদ্দেন নিরোধং পচ্চামসতি। উপ্পত্তিযাতি উপ্পত্তিতো। তন্তি নেৰসঞ্ঞানাসঞ্ঞাযতনং। তস্স নিরোধস্স। তথা চ উপ্পজ্জতীতি ‘‘অনন্তরপচ্চযো হোতী’’তি পদস্স অত্থং ৰিৰরতি। যথাৰুত্তা ৰুত্তপ্পকারা। ৰোদানং দুতিযমগ্গাদীনং পুরেচারিকঞাণং। এতেসন্তি অরিযমগ্গচিত্তমগ্গানন্তরফলচিত্তানং। এতস্সাতি যথাৰুত্তৰিপাকচিত্তস্স।
Tanninnanti āpāthagatavisayaninnaṃ āvajjananti sambandho. Aññassa viya paṭhamajjhānādikassa viya. Etassapi sāvajjanatāya bhavitabbanti adhippāyo. Atadatthāti ettha taṃ-saddena nirodhaṃ paccāmasati. Uppattiyāti uppattito. Tanti nevasaññānāsaññāyatanaṃ. Tassa nirodhassa. Tathā ca uppajjatīti ‘‘anantarapaccayo hotī’’ti padassa atthaṃ vivarati. Yathāvuttā vuttappakārā. Vodānaṃ dutiyamaggādīnaṃ purecārikañāṇaṃ. Etesanti ariyamaggacittamaggānantaraphalacittānaṃ. Etassāti yathāvuttavipākacittassa.
উপনিস্সযতো তস্সেৰ চক্খুৰিঞ্ঞাণাদিৰিপাকস্স দস্সনত্থং চক্খাদীনং দস্সনাদিঅত্থতো দস্সনাদিফলতো, দস্সনাদিপ্পযোজনতো ৰা। পুরিমচিত্তানি আৰজ্জনাদীনি। ৰত্থন্তররহিতত্তে দস্সেতব্বে ৰত্থন্তরে ৰিয আরম্মণন্তরেপি ন ৰত্ততীতি ‘‘ৰত্থারম্মণন্তররহিত’’ন্তি ৰুত্তং।
Upanissayato tasseva cakkhuviññāṇādivipākassa dassanatthaṃ cakkhādīnaṃ dassanādiatthato dassanādiphalato, dassanādippayojanato vā. Purimacittāni āvajjanādīni. Vatthantararahitatte dassetabbe vatthantare viya ārammaṇantarepi na vattatīti ‘‘vatthārammaṇantararahita’’nti vuttaṃ.
যদি ৰিপাকেন কম্মসরিক্খেনেৰ ভৰিতব্বং, এৰং সতি ইমস্মিং ৰারে অহেতুকৰিপাকানং অসম্ভৰো এৰ সিযা তেসং অকম্মসরিক্খকত্তাতি ইমমত্থং মনসি কত্ৰা আহ ‘‘অহেতুকানং পনা’’তি। অভিনিপাতমত্তন্তি পঞ্চন্নং ৰিঞ্ঞাণানং কিচ্চমাহ। তে হি আপাথগতেসু রূপাদীসু অভিনিপাতনমত্তেনেৰ ৰত্তন্তি। আদি-সদ্দেন সম্পটিচ্ছনাদীনি সঙ্গণ্হাতি। কুসলেসু কুসলাকুসলকিরিযেসুপি ৰা ৰিজ্জমানা সসঙ্খারিকাসঙ্খারিকতা অঞ্ঞমঞ্ঞং অসরিক্খত্তা পহানাৰট্ঠানতো চ ৰিরুদ্ধা ৰিযাতি ৰিপাকেসু সা তদনুকূলা সিযা, সা পন মূলাভাৰেন ন সুপ্পতিট্ঠিতানং সৰিসযাভিনিপতনমত্তাদিৰুত্তীনং নত্থীতি ৰুত্তং ‘‘ন সসঙ্খারিকৰিরুদ্ধো’’তিআদি। উভযেনপি তেসং নিব্বত্তিং অনুজানাতি যথা ‘‘কটত্তারূপান’’ন্তি অধিপ্পাযো। ‘‘ৰিপাকধম্মধম্মো ৰিপাকস্স ধম্মস্স আরম্মণপচ্চযেন পচ্চযো। ৰিপাকধম্মধম্মে খন্ধে অনিচ্চতো দুক্খতো অনত্ততো ৰিপস্সতি, অস্সাদেতি অভিনন্দতি, তং আরব্ভ রাগো উপ্পজ্জতি, দোমনস্সং উপ্পজ্জতি, কুসলাকুসলে নিরুদ্ধে’’তিআদিনা (পট্ঠা॰ ১.৩.৯৩) ৰিপাকত্তিকে ৰিয সিযা কুসলত্তিকেপি পাল়ীতি কত্ৰা ‘‘কুসলত্তিকে চা’’তিআদি ৰুত্তং। তত্থ হি ‘‘কুসলো ধম্মো অব্যাকতস্স ধম্মস্স আরম্মণপচ্চযেন পচ্চযো’’তি উদ্দিসিত্ৰা ‘‘সেক্খা ৰা পুথুজ্জনা ৰা কুসলং অনিচ্চতো দুক্খতো অনত্ততো ৰিপস্সন্তি, কুসলে নিরুদ্ধে ৰিপাকো তদারম্মণতা উপ্পজ্জতি, কুসলং অস্সাদেতি অভিনন্দতি, তং আরব্ভ রাগো উপ্পজ্জতি, দিট্ঠি, ৰিচিকিচ্ছা, উদ্ধচ্চং, দোমনস্সং উপ্পজ্জতি, অকুসলে নিরুদ্ধে ৰিপাকো তদারম্মণতা উপ্পজ্জতী’’তি ৰুত্তং। অৰিজ্জমানত্তা এৰ অৰচনন্তি অধিপ্পাযেন তত্থ যুত্তিং দস্সেতি ‘‘ৰিপ্ফারিকঞ্হী’’তিআদিনা।
Yadi vipākena kammasarikkheneva bhavitabbaṃ, evaṃ sati imasmiṃ vāre ahetukavipākānaṃ asambhavo eva siyā tesaṃ akammasarikkhakattāti imamatthaṃ manasi katvā āha ‘‘ahetukānaṃ panā’’ti. Abhinipātamattanti pañcannaṃ viññāṇānaṃ kiccamāha. Te hi āpāthagatesu rūpādīsu abhinipātanamatteneva vattanti. Ādi-saddena sampaṭicchanādīni saṅgaṇhāti. Kusalesu kusalākusalakiriyesupi vā vijjamānā sasaṅkhārikāsaṅkhārikatā aññamaññaṃ asarikkhattā pahānāvaṭṭhānato ca viruddhā viyāti vipākesu sā tadanukūlā siyā, sā pana mūlābhāvena na suppatiṭṭhitānaṃ savisayābhinipatanamattādivuttīnaṃ natthīti vuttaṃ ‘‘na sasaṅkhārikaviruddho’’tiādi. Ubhayenapi tesaṃ nibbattiṃ anujānāti yathā ‘‘kaṭattārūpāna’’nti adhippāyo. ‘‘Vipākadhammadhammo vipākassa dhammassa ārammaṇapaccayena paccayo. Vipākadhammadhamme khandhe aniccato dukkhato anattato vipassati, assādeti abhinandati, taṃ ārabbha rāgo uppajjati, domanassaṃ uppajjati, kusalākusale niruddhe’’tiādinā (paṭṭhā. 1.3.93) vipākattike viya siyā kusalattikepi pāḷīti katvā ‘‘kusalattike cā’’tiādi vuttaṃ. Tattha hi ‘‘kusalo dhammo abyākatassa dhammassa ārammaṇapaccayena paccayo’’ti uddisitvā ‘‘sekkhā vā puthujjanā vā kusalaṃ aniccato dukkhato anattato vipassanti, kusale niruddhe vipāko tadārammaṇatā uppajjati, kusalaṃ assādeti abhinandati, taṃ ārabbha rāgo uppajjati, diṭṭhi, vicikicchā, uddhaccaṃ, domanassaṃ uppajjati, akusale niruddhe vipāko tadārammaṇatā uppajjatī’’ti vuttaṃ. Avijjamānattā eva avacananti adhippāyena tattha yuttiṃ dasseti ‘‘vipphārikañhī’’tiādinā.
এত্থ কেচি ‘‘ছল়ঙ্গুপেক্খাৰতোপি কিরিযমযচিত্ততায কিরিযজৰনস্স ৰিপ্ফারিককিরিযভাৰো ন সক্কা নিসেধেতুন্তি নিদস্সনভাৰেন পণ্ণপুটমুপনীতং অসমানং। কিরিযজৰনানন্তরং তদারম্মণাভাৰস্স পাল়িযং অৰচনম্পি অকারণং লব্ভমানস্সপি কত্থচি কেনচি অধিপ্পাযেন অৰচনতো। তথা হি ধম্মসঙ্গহে অকুসলনিদ্দেসে লব্ভমানোপি অধিপতি ন ৰুত্তো, তস্মা কিরিযজৰনানন্তরং তদারম্মণাভাৰো ৰীমংসিতব্বো’’তি ৰদন্তি। সতিপি কিরিযমযত্তে সব্বত্থ তাদিভাৰপ্পত্তানং খীণাসৰানং জৰনচিত্তং ন ইতরেসং ৰিয ৰিপ্ফারিকং, সন্তসভাৰতায পন সন্নিসিন্নরসং সিযাতি তস্স পণ্ণপুটং দস্সিতং। ধম্মসঙ্গহে অকুসলনিদ্দেসে অধিপতিনো ৰিয পট্ঠানে কিরিযজৰনানন্তরং তদারম্মণস্স লব্ভমানস্স অৰচনে ন কিঞ্চি কারণং দিস্সতি। তথা হি ৰুত্তং তত্থ অট্ঠকথাযং ‘‘হেট্ঠা দস্সিতনযত্তা’’তি (ধ॰ স॰ অট্ঠ॰ ৪২৯)। ন চেত্থ দস্সিতনযত্তাতি সক্কা ৰত্তুং ৰিপাকধম্মধম্মেহি কুসলাকুসলেহি অতংসভাৰানং নযদস্সনস্স অযুজ্জমানকত্তা। অপিচ তত্থ ৰীমংসায কেসুচি সব্বেসঞ্চ অধিপতীনং অভাৰতো একরসং দেসনং দস্সেতুং ‘‘উদ্ধটো’’তি চ সক্কা ৰত্তুং, ইধ পন ন তাদিসং অৰচনে কারণং লব্ভতীতি ‘‘অৰচনে কারণং নত্থী’’তি ৰুত্তং।
Ettha keci ‘‘chaḷaṅgupekkhāvatopi kiriyamayacittatāya kiriyajavanassa vipphārikakiriyabhāvo na sakkā nisedhetunti nidassanabhāvena paṇṇapuṭamupanītaṃ asamānaṃ. Kiriyajavanānantaraṃ tadārammaṇābhāvassa pāḷiyaṃ avacanampi akāraṇaṃ labbhamānassapi katthaci kenaci adhippāyena avacanato. Tathā hi dhammasaṅgahe akusalaniddese labbhamānopi adhipati na vutto, tasmā kiriyajavanānantaraṃ tadārammaṇābhāvo vīmaṃsitabbo’’ti vadanti. Satipi kiriyamayatte sabbattha tādibhāvappattānaṃ khīṇāsavānaṃ javanacittaṃ na itaresaṃ viya vipphārikaṃ, santasabhāvatāya pana sannisinnarasaṃ siyāti tassa paṇṇapuṭaṃ dassitaṃ. Dhammasaṅgahe akusalaniddese adhipatino viya paṭṭhāne kiriyajavanānantaraṃ tadārammaṇassa labbhamānassa avacane na kiñci kāraṇaṃ dissati. Tathā hi vuttaṃ tattha aṭṭhakathāyaṃ ‘‘heṭṭhā dassitanayattā’’ti (dha. sa. aṭṭha. 429). Na cettha dassitanayattāti sakkā vattuṃ vipākadhammadhammehi kusalākusalehi ataṃsabhāvānaṃ nayadassanassa ayujjamānakattā. Apica tattha vīmaṃsāya kesuci sabbesañca adhipatīnaṃ abhāvato ekarasaṃ desanaṃ dassetuṃ ‘‘uddhaṭo’’ti ca sakkā vattuṃ, idha pana na tādisaṃ avacane kāraṇaṃ labbhatīti ‘‘avacane kāraṇaṃ natthī’’ti vuttaṃ.
অধিপ্পাযেনাতি অকুসলানন্তরং সহেতুকতদারম্মণং নত্থীতি তস্স থেরস্স মতিমত্তন্তি দস্সেতি। ‘‘কুসলাকুসলে নিরুদ্ধে সহেতুকো ৰিপাকো তদারম্মণতা উপ্পজ্জতী’’তি (পট্ঠা॰ ৩.১.৯৮) ৰচনতো পন অকুসলানন্তরং সহেতুকতদারম্মণম্পি ৰিজ্জতিযেৰাতি উপ্পত্তিং ৰদন্তস্স যুত্তগ্গহণৰসেনাতি অধিপ্পাযো।
Adhippāyenāti akusalānantaraṃ sahetukatadārammaṇaṃ natthīti tassa therassa matimattanti dasseti. ‘‘Kusalākusale niruddhe sahetuko vipāko tadārammaṇatā uppajjatī’’ti (paṭṭhā. 3.1.98) vacanato pana akusalānantaraṃ sahetukatadārammaṇampi vijjatiyevāti uppattiṃ vadantassa yuttaggahaṇavasenāti adhippāyo.
ন এত্থ কারণং দিস্সতীতি এতেন তিহেতুকজৰনানন্তরং তিৰিধম্পি তদারম্মণং যুত্তন্তি দস্সেতি। যেন অধিপ্পাযেনাতি পঠমথেরেন তাৰ একেন কম্মুনা অনেকতদারম্মণং নিব্বত্তমানং কম্মৰিসেসাভাৰা তংতংজৰনসঙ্খাতপচ্চযৰিসেসেন ৰিসিট্ঠং হোতীতি ইমিনা অধিপ্পাযেন জৰনৰসেন তদারম্মণস্স সসঙ্খারাদিৰিধানং ৰুত্তং, ৰিপাকেন নাম কম্মসরিক্খেন ভৰিতব্বং, ন কম্মৰিরুদ্ধসভাৰেন। অঞ্ঞথা অনিট্ঠপ্পসঙ্গো সিযাতি এৰমধিপ্পাযেন দুতিযত্থেরো কম্মৰসেনেৰ তদারম্মণৰিসেসং আহ। ঞাণস্স জচ্চন্ধাদিদুগ্গতিৰিপত্তিনিমিত্তপটিপক্খতা ৰিয সুগতিৰিপত্তিনিমিত্তপটিপক্খতাপি সিযাতি মঞ্ঞমানো ততিযত্থেরো ‘‘তিহেতুককম্মতো দুহেতুকপটিসন্ধিম্পি নানুজানাতী’’তি ইমিনা নযেন তেসু ৰাদেসু অধিপ্পাযাৰিরোধৰসেন যুত্তং গহেতব্বং। মহাপকরণে আগতপাল়িযাতি ‘‘সহেতুকো ধম্মো অহেতুকস্স ধম্মস্স অনন্তরপচ্চযেন পচ্চযো’’তি (পট্ঠা॰ ৩.১.১০২) ইমস্স ৰিভঙ্গে ‘‘সহেতুকং ভৰঙ্গং অহেতুকস্স ভৰঙ্গস্স অনন্তরপচ্চযেন পচ্চযো, সহেতুকা খন্ধা ৰুট্ঠানস্স অনন্তরপচ্চযেন পচ্চযো’’তি এৰমাদিনা পট্ঠানে সহেতুকদুকাদীসু আগতপাল়িযাতি অত্থো।
Na ettha kāraṇaṃ dissatīti etena tihetukajavanānantaraṃ tividhampi tadārammaṇaṃ yuttanti dasseti. Yena adhippāyenāti paṭhamatherena tāva ekena kammunā anekatadārammaṇaṃ nibbattamānaṃ kammavisesābhāvā taṃtaṃjavanasaṅkhātapaccayavisesena visiṭṭhaṃ hotīti iminā adhippāyena javanavasena tadārammaṇassa sasaṅkhārādividhānaṃ vuttaṃ, vipākena nāma kammasarikkhena bhavitabbaṃ, na kammaviruddhasabhāvena. Aññathā aniṭṭhappasaṅgo siyāti evamadhippāyena dutiyatthero kammavaseneva tadārammaṇavisesaṃ āha. Ñāṇassa jaccandhādiduggativipattinimittapaṭipakkhatā viya sugativipattinimittapaṭipakkhatāpi siyāti maññamāno tatiyatthero ‘‘tihetukakammato duhetukapaṭisandhimpi nānujānātī’’ti iminā nayena tesu vādesu adhippāyāvirodhavasena yuttaṃ gahetabbaṃ. Mahāpakaraṇe āgatapāḷiyāti ‘‘sahetuko dhammo ahetukassa dhammassa anantarapaccayena paccayo’’ti (paṭṭhā. 3.1.102) imassa vibhaṅge ‘‘sahetukaṃ bhavaṅgaṃ ahetukassa bhavaṅgassa anantarapaccayena paccayo, sahetukā khandhā vuṭṭhānassa anantarapaccayena paccayo’’ti evamādinā paṭṭhāne sahetukadukādīsu āgatapāḷiyāti attho.
কামাৰচরকুসলৰিপাকৰণ্ণনা নিট্ঠিতা।
Kāmāvacarakusalavipākavaṇṇanā niṭṭhitā.
