| Library / Tipiṭaka / ཏིཔིཊཀ • Tipiṭaka / དྷམྨསངྒཎཱི-མཱུལཊཱིཀཱ • Dhammasaṅgaṇī-mūlaṭīkā |
ཝིཔཱཀུདྡྷཱརཀཐཱཝཎྞནཱ
Vipākuddhārakathāvaṇṇanā
ཡཏོ ཡཏྟཀོ ཙ ཝིཔཱཀོ ཧོཏི, ཡསྨིཉྩ ཋཱནེ ཝིཔཙྩཏི, ཏཾ དསྶེཏུཾ ཝིཔཱཀུདྡྷཱརཀཐཱ ཨཱརདྡྷཱ། ཨེཏྠེཝཱཏི ཨེཀཱཡ ཙེཏནཱཡ ཀམྨེ ཨཱཡཱུཧིཏེཡེཝ། དུཧེཏུཀཔཊིསནྡྷིཝསེན དྭཱདསཀམགྒོཔི ཧོཏི , དྭཱདསཀཔྤཀཱརོཔཱིཏི ཨཏྠོ། ཨཧེཏུཀཔཊིསནྡྷིཝསེན ཨཧེཏུཀཊྛཀམྤི། ཨསངྑཱརིཀསསངྑཱརིཀཱནཾ སསངྑཱརིཀཨསངྑཱརིཀཝིཔཱཀསངྐརཾ ཨནིཙྪནྟོ དུཏིཡཏྠེརོ ‘‘དྭཱདསཱ’’ཏིཨཱདིམཱཧ། པུརིམསྶ ཧི པཙྩཡཏོསསངྑཱརིཀཨསངྑཱརིཀབྷཱཝོ, ཨིཏརེསཾ ཀམྨཏོ། ཏཏིཡོ ཏིཧེཏུཀཏོ དུཧེཏུཀམྤི ཨནིཙྪནྟོ ‘‘དསཱ’’ཏིཨཱདིམཱཧ།
Yato yattako ca vipāko hoti, yasmiñca ṭhāne vipaccati, taṃ dassetuṃ vipākuddhārakathā āraddhā. Etthevāti ekāya cetanāya kamme āyūhiteyeva. Duhetukapaṭisandhivasena dvādasakamaggopi hoti , dvādasakappakāropīti attho. Ahetukapaṭisandhivasena ahetukaṭṭhakampi. Asaṅkhārikasasaṅkhārikānaṃ sasaṅkhārikaasaṅkhārikavipākasaṅkaraṃ anicchanto dutiyatthero ‘‘dvādasā’’tiādimāha. Purimassa hi paccayatosasaṅkhārikaasaṅkhārikabhāvo, itaresaṃ kammato. Tatiyo tihetukato duhetukampi anicchanto ‘‘dasā’’tiādimāha.
ཨིམསྨིཾ ཝིཔཱཀུདྡྷཱརཊྛཱནེ ཀམྨཔཊིསནྡྷིཝཝཏྠཱནཏྠཾ སཱཀེཏཔཉྷཾ གཎྷིཾསུ། ཀམྨཝསེན ཝིཔཱཀསྶ ཏཾཏཾགུཎདོསུསྶདནིམིཏྟཏཾ དསྶེཏུཾ ཨུསྶདཀིཏྟནཾ གཎྷིཾསུ། ཧེཏུཀིཏྟནཾ ཨིདྷ པཋམཏྠེརསྶ ཨདྷིཔྤཱཡེན ཝུཏྟཾ། དུཏིཡཏྠེརཝཱདཱདཱིསུ ཝིསེསཾ ཏཏྠ ཏཏྠེཝ ཝཀྑཱམི། ཉཱཎསྶ ཛཙྩནྡྷཱདིཝིཔཏྟིནིམིཏྟཔཊིཔཀྑབྷཱཝཏོ ཏིཧེཏུཀཾ ཨཏིདུབྦལམྤི སམཱནཾ པཊིསནྡྷིཾ ཨཱཀཌྜྷནྟཾ དུཧེཏུཀཾ ཨཱཀཌྜྷེཡྻཱཏི ‘‘ཨཧེཏུཀཱ ན ཧོཏཱི’’ཏི ཨཱཧ། ཡཾ པན པཊིསམྦྷིདཱམགྒེ སུགཏིཡཾ ཛཙྩནྡྷབདྷིརཱདིཝིཔཏྟིཡཱ ཨཧེཏུཀཨུཔཔཏྟིཾ ཝཛྫེཏྭཱ གཏིསམྤཏྟིཡཱ སཧེཏུཀོཔཔཏྟིཾ དསྶེནྟེན ‘‘གཏིསམྤཏྟིཡཱ ཉཱཎསམྤཡུཏྟེ ཀཏམེསཾ ཨཊྛནྣཾ ཧེཏཱུནཾ པཙྩཡཱ ཨུཔཔཏྟི ཧོཏི’’ཙྩེཝ (པཊི॰ མ॰ ༡.༢༣༢) ཝུཏྟཾ། ཏེན ཉཱཎཝིཔྤཡུཏྟེན ཀམྨུནཱ ཉཱཎསམྤཡུཏྟཔཊིསནྡྷི ན ཧོཏཱིཏི དཱིཔིཏཾ ཧོཏི། ཨཉྙཐཱ ‘‘སཏྟནྣཾ ཧེཏཱུནཾ པཙྩཡཱ ཨུཔཔཏྟི ཧོཏཱི’’ཏི ཨིདམྤི ཝུཙྩེཡྻ། ཏཐཱ ཧི ‘‘གཏིསམྤཏྟིཡཱ ཉཱཎསམྤཡུཏྟེ ཀཏམེསཾ ཨཊྛནྣཾ ཧེཏཱུནཾ པཙྩཡཱ ཨུཔཔཏྟི ཧོཏི? ཀུསལསྶ ཀམྨསྶ ཛཝནཀྑཎེ ཏཡོ ཧེཏཱུ ཀུསལཱ ཏསྨིཾ ཁཎེ ཛཱཏཙེཏནཱཡ སཧཛཱཏཔཙྩཡཱ ཧོནྟི། ཏེན ཝུཙྩཏི ཀུསལམཱུལཔཙྩཡཱཔི སངྑཱརཱ། ནིཀནྟིཀྑཎེ དྭེ ཧེཏཱུ ཨཀུསལཱ ཏསྨིཾ ཁཎེ ཛཱཏཙེཏནཱཡ སཧཛཱཏཔཙྩཡཱ ཧོནྟི། ཏེན ཝུཙྩཏི ཨཀུསལམཱུལཔཙྩཡཱཔི སངྑཱརཱ། པཊིསནྡྷིཀྑཎེ ཏཡོ ཧེཏཱུ ཨབྱཱཀཏཱ ཏསྨིཾ ཁཎེ ཛཱཏཙེཏནཱཡ སཧཛཱཏཔཙྩཡཱ ཧོནྟི། ཏེན ཝུཙྩཏི ནཱམརཱུཔཔཙྩཡཱཔི ཝིཉྙཱཎཾ, ཝིཉྙཱཎཔཙྩཡཱཔི ནཱམརཱུཔ’’ནྟི ཝིསྶཛྫིཏཾ ཉཱཎསམྤཡུཏྟོཔཔཏྟིཡཾ།
Imasmiṃ vipākuddhāraṭṭhāne kammapaṭisandhivavatthānatthaṃ sāketapañhaṃ gaṇhiṃsu. Kammavasena vipākassa taṃtaṃguṇadosussadanimittataṃ dassetuṃ ussadakittanaṃ gaṇhiṃsu. Hetukittanaṃ idha paṭhamattherassa adhippāyena vuttaṃ. Dutiyattheravādādīsu visesaṃ tattha tattheva vakkhāmi. Ñāṇassa jaccandhādivipattinimittapaṭipakkhabhāvato tihetukaṃ atidubbalampi samānaṃ paṭisandhiṃ ākaḍḍhantaṃ duhetukaṃ ākaḍḍheyyāti ‘‘ahetukā na hotī’’ti āha. Yaṃ pana paṭisambhidāmagge sugatiyaṃ jaccandhabadhirādivipattiyā ahetukaupapattiṃ vajjetvā gatisampattiyā sahetukopapattiṃ dassentena ‘‘gatisampattiyā ñāṇasampayutte katamesaṃ aṭṭhannaṃ hetūnaṃ paccayā upapatti hoti’’cceva (paṭi. ma. 1.232) vuttaṃ. Tena ñāṇavippayuttena kammunā ñāṇasampayuttapaṭisandhi na hotīti dīpitaṃ hoti. Aññathā ‘‘sattannaṃ hetūnaṃ paccayā upapatti hotī’’ti idampi vucceyya. Tathā hi ‘‘gatisampattiyā ñāṇasampayutte katamesaṃ aṭṭhannaṃ hetūnaṃ paccayā upapatti hoti? Kusalassa kammassa javanakkhaṇe tayo hetū kusalā tasmiṃ khaṇe jātacetanāya sahajātapaccayā honti. Tena vuccati kusalamūlapaccayāpi saṅkhārā. Nikantikkhaṇe dve hetū akusalā tasmiṃ khaṇe jātacetanāya sahajātapaccayā honti. Tena vuccati akusalamūlapaccayāpi saṅkhārā. Paṭisandhikkhaṇe tayo hetū abyākatā tasmiṃ khaṇe jātacetanāya sahajātapaccayā honti. Tena vuccati nāmarūpapaccayāpi viññāṇaṃ, viññāṇapaccayāpi nāmarūpa’’nti vissajjitaṃ ñāṇasampayuttopapattiyaṃ.
ཨེཝཾ ཉཱཎཝིཔྤཡུཏྟཏོ ཉཱཎསམྤཡུཏྟུཔཔཏྟིཡཱ ཙ ཝིཛྫམཱནཱཡ ‘‘གཏིསམྤཏྟིཡཱ ཉཱཎསམྤཡུཏྟེ ཀཏམེསཾ སཏྟནྣཾ ཧེཏཱུནཾ པཙྩཡཱ ཨུཔཔཏྟི ཧོཏི? ཀུསལསྶ ཀམྨསྶ ཛཝནཀྑཎེ དྭེ ཧེཏཱུ ཀུསལཱ’’ཏི ཝཏྭཱ ཨཉྙཏྠ ཙ པུབྦེ ཝུཏྟནཡེནེཝ སཀྐཱ ཝིསྶཛྫནཾ ཀཱཏུནྟི། ཡཐཱ པན ‘‘ཉཱཎསམྤཡུཏྟེ སཏྟནྣཾ ཧེཏཱུནཾ པཙྩཡཱ’’ཏི ཨཝཙནཏོ ཉཱཎཝིཔྤཡུཏྟཏོ ཉཱཎསམྤཡུཏྟཱ པཊིསནྡྷི ན ཧོཏི, ཨེཝཾ ‘‘གཏིསམྤཏྟིཡཱ ཉཱཎཝིཔྤཡུཏྟེ ཚནྣཾ ཧེཏཱུནཾ པཙྩཡཱ ཨུཔཔཏྟི ཧོཏི’’ཙྩེཝ (པཊི॰ མ॰ ༡.༢༣༣) ཝཏྭཱ ‘‘སཏྟནྣཾ ཧེཏཱུནཾ པཙྩཡཱ’’ཏི ཨཝཙནཏོ ཉཱཎསམྤཡུཏྟཏོ ཉཱཎཝིཔྤཡུཏྟཱཔི པཊིསནྡྷི ན ཧོཏཱིཏི ཨཱཔནྣཾ། ཨེཏྠཱཔི ཧི ན ན སཀྐཱ ཀམྨནིཀནྟིཀྑཎེསུ ཏཡོ ཙ དྭེ ཙ ཧེཏཱུ ཡོཛེཏྭཱ པཊིསནྡྷིཀྑཎེ དྭེ ཡོཛེཏུནྟི། ཨིམསྶ པན ཐེརསྶ ཨཡམདྷིཔྤཱཡོ སིཡཱ ‘‘ཀམྨསརིཀྑཀཝིཔཱཀདསྶནཝསེན ཨིདྷ པཱཋོ སཱཝསེསོ ཀཐིཏོ’’ཏི། ‘‘ཉཱཎསམྤཡུཏྟེ ཨཊྛནྣཾ ཧེཏཱུནཾ པཙྩཡཱ’’ཏི ཨེཏྠཱཔི པཱཋསྶ སཱཝསེསཏཱཔཏྟཱིཏི ཙེ? ན, དུབྦལསྶ དུཧེཏུཀཀམྨསྶ ཉཱཎསམྤཡུཏྟཝིཔཱཀདཱནེ ཨསམཏྠཏྟཱ། ཏིཧེཏུཀསྶ པན ཨཧེཏུཀཝིཔཙྩནེ ཝིཡ དུཧེཏུཀཝིཔཙྩནེཔི ནཏྠི སམཏྠཏཱཝིགྷཱཏོཏི། ཨཱརམྨཎེན ཝེདནཱ པརིཝཏྟེཏབྦཱཏི སནྟཱིརཎཏདཱརམྨཎེ སནྡྷཱཡ ཝུཏྟཾ། ཝིབྷཱགགྒཧཎསམཏྠཏཱབྷཱཝཏོ ཧི ཙཀྑུཝིཉྙཱཎཱདཱིནི ཨིཊྛཨིཊྛམཛ྄ཛྷཏྟེསུ ཨུཔེཀྑཱསཧགཏཱནེཝ ཧོནྟི, ཀཱཡཝིཉྙཱཎཉྩ སུཁསཧགཏམེཝ པཊིགྷཊྚནཱཝིསེསེནཱཏི།
Evaṃ ñāṇavippayuttato ñāṇasampayuttupapattiyā ca vijjamānāya ‘‘gatisampattiyā ñāṇasampayutte katamesaṃ sattannaṃ hetūnaṃ paccayā upapatti hoti? Kusalassa kammassa javanakkhaṇe dve hetū kusalā’’ti vatvā aññattha ca pubbe vuttanayeneva sakkā vissajjanaṃ kātunti. Yathā pana ‘‘ñāṇasampayutte sattannaṃ hetūnaṃ paccayā’’ti avacanato ñāṇavippayuttato ñāṇasampayuttā paṭisandhi na hoti, evaṃ ‘‘gatisampattiyā ñāṇavippayutte channaṃ hetūnaṃ paccayā upapatti hoti’’cceva (paṭi. ma. 1.233) vatvā ‘‘sattannaṃ hetūnaṃ paccayā’’ti avacanato ñāṇasampayuttato ñāṇavippayuttāpi paṭisandhi na hotīti āpannaṃ. Etthāpi hi na na sakkā kammanikantikkhaṇesu tayo ca dve ca hetū yojetvā paṭisandhikkhaṇe dve yojetunti. Imassa pana therassa ayamadhippāyo siyā ‘‘kammasarikkhakavipākadassanavasena idha pāṭho sāvaseso kathito’’ti. ‘‘Ñāṇasampayutte aṭṭhannaṃ hetūnaṃ paccayā’’ti etthāpi pāṭhassa sāvasesatāpattīti ce? Na, dubbalassa duhetukakammassa ñāṇasampayuttavipākadāne asamatthattā. Tihetukassa pana ahetukavipaccane viya duhetukavipaccanepi natthi samatthatāvighātoti. Ārammaṇena vedanā parivattetabbāti santīraṇatadārammaṇe sandhāya vuttaṃ. Vibhāgaggahaṇasamatthatābhāvato hi cakkhuviññāṇādīni iṭṭhaiṭṭhamajjhattesu upekkhāsahagatāneva honti, kāyaviññāṇañca sukhasahagatameva paṭighaṭṭanāvisesenāti.
ཝིསེསཝཏཱ ཀཱལེན ཏདཱརམྨཎཔཙྩཡསབྦཛཝནཝཏཱ ཝིཔཱཀཔྤཝཏྟིཾ དསྶེཏུཾ ‘‘སཾཝརཱསཾཝརེ…པེ॰… ཨུཔགཏསྶཱ’’ཏི ཝུཏྟཾ ཨཉྙཀཱལེ པཉྩཝིཉྙཱཎཱདིཔརིཔུཎྞཝིཔཱཀཔྤཝཏྟིཨབྷཱཝཱ། ཀཀྐཊཀ…པེ॰… བྷཝངྒོཏརཎནྟི ཨེཏེན ཨིདཾ དསྶེཏི – ཀེདཱརེ པཱུརེཏྭཱ ནདཱིཔཝེསནམགྒབྷཱུཏཾ མཱཏིཀཾ ཨཔྤཝིསིཏྭཱ ཀཀྐཊཀམགྒཱདིནཱ ཨམགྒེན ནདཱིཨོཏརཎཾ ཝིཡ ཙིཏྟསྶ ཛཝིཏྭཱ བྷཝངྒཔྤཝེསནམགྒབྷཱུཏེ ཏདཱརམྨཎེ ཨནུཔྤནྣེ མགྒེན ཝིནཱ བྷཝངྒོཏརཎནྟི།
Visesavatā kālena tadārammaṇapaccayasabbajavanavatā vipākappavattiṃ dassetuṃ ‘‘saṃvarāsaṃvare…pe… upagatassā’’ti vuttaṃ aññakāle pañcaviññāṇādiparipuṇṇavipākappavattiabhāvā. Kakkaṭaka…pe… bhavaṅgotaraṇanti etena idaṃ dasseti – kedāre pūretvā nadīpavesanamaggabhūtaṃ mātikaṃ appavisitvā kakkaṭakamaggādinā amaggena nadīotaraṇaṃ viya cittassa javitvā bhavaṅgappavesanamaggabhūte tadārammaṇe anuppanne maggena vinā bhavaṅgotaraṇanti.
ཨེཏེསུ ཏཱིསུ མོགྷཝཱརེསུ དུཏིཡོ ཨུཔཔརིཀྑིཏྭཱ གཧེཏབྦོ། ཡདི ཧི ཨནུལོམེ ཝེདནཱཏྟིཀེ པཊིཙྩཝཱརཱདཱིསུ ‘‘ཨཱསེཝནཔཙྩཡཱ ན མགྒེ དྭེ’’ཏི ‘‘ན མགྒཔཙྩཡཱ ཨཱསེཝནེ དྭེ’’ཏི ཙ ཝུཏྟཾ སིཡཱ, སོཔི མོགྷཝཱརོ ལབྦྷེཡྻ། ཡདི པན ཝོཊྛབྦནམྤི ཨཱསེཝནཔཙྩཡོ སིཡཱ, ཀུསལཱཀུསལཱནམྤི སིཡཱ། ན ཧི ཨཱསེཝནཔཙྩཡཾ ལདྡྷུཾ ཡུཏྟསྶ ཨཱསེཝནཔཙྩཡབྷཱཝཱི དྷམྨོ ཨཱསེཝནཔཙྩཡོཏི ཨཝུཏྟོ ཨཏྠི། ཝོཊྛབྦནསྶ པན ཀུསལཱཀུསལཱནཾ ཨཱསེཝནཔཙྩཡབྷཱཝོ ཨཝུཏྟོ། ‘‘ཀུསལཾ དྷམྨཾ པཊིཙྩ ཀུསལོ དྷམྨོ ཨུཔྤཛྫཏི ནཱསེཝནཔཙྩཡཱ། ཨཀུསལཾ དྷམྨཾ…པེ॰… ནཱསེཝནཔཙྩཡཱ’’ཏི (པཊྛཱ॰ ༡.༡.༩༣) ཝཙནཏོ པཊིཀྑིཏྟོཝ། ཨཐཱཔི སིཡཱ ‘‘ཨསམཱནཝེདནཱནཾ ཝསེན ཨེཝཾ ཝུཏྟ’’ནྟི, ཨེཝམཔི ཡཐཱ ‘‘ཨཱཝཛྫནཱ ཀུསལཱནཾ ཁནྡྷཱནཾ ཨཀུསལཱནཾ ཁནྡྷཱནཾ ཨནནྟརཔཙྩཡེན པཙྩཡོ’’ཏི (པཊྛཱ॰ ༡.༡.༤༡༧) ཝུཏྟཾ, ཨེཝཾ ‘‘ཨཱསེཝནཔཙྩཡེན པཙྩཡོཏི’’པི ཝཏྟབྦཾ སིཡཱ, ཛཱཏིབྷེདཱ ན ཝུཏྟནྟི ཙེ? བྷཱུམིབྷིནྣསྶ ཀཱམཱཝཙརསྶ རཱུཔཱཝཙརཱདཱིནཾ ཨཱསེཝནཔཙྩཡབྷཱཝོ ཝིཡ ཛཱཏིབྷིནྣསྶཔི བྷཝེཡྻཱཏི ཝཏྟབྦོ ཨེཝ སིཡཱ། ཨབྷིནྣཛཱཏིཀསྶ ཙ ཝསེན ཡཐཱ ‘‘ཨཱཝཛྫནཱ སཧེཏུཀཱནཾ ཁནྡྷཱནཾ ཨནནྟརཔཙྩཡེན པཙྩཡོ’’ཏི ཝུཏྟཾ, ཨེཝཾ ‘‘ཨཱསེཝནཔཙྩཡེན པཙྩཡོ’’ཏིཔི ཝཏྟབྦཾ སིཡཱ, ན ཏུ ཝུཏྟཾ། ཏསྨཱ ཝེདནཱཏྟིཀེཔི སངྑིཏྟཱཡ གཎནཱཡ ‘‘ཨཱསེཝནཔཙྩཡཱ ན མགྒེ ཨེཀཾ, ན མགྒཔཙྩཡཱ ཨཱསེཝནེ ཨེཀ’’ནྟི ཨེཝཾ གཎནཱཡ ནིདྡྷཱརིཡམཱནཱཡ ཝོཊྛབྦནསྶ ཨཱསེཝནཔཙྩཡཏྟསྶ ཨབྷཱཝཱ ཡཐཱཝུཏྟཔྤཀཱརོ དུཏིཡོ མོགྷཝཱརོ ཝཱིམཾསིཏབྦོ།
Etesu tīsu moghavāresu dutiyo upaparikkhitvā gahetabbo. Yadi hi anulome vedanāttike paṭiccavārādīsu ‘‘āsevanapaccayā na magge dve’’ti ‘‘na maggapaccayā āsevane dve’’ti ca vuttaṃ siyā, sopi moghavāro labbheyya. Yadi pana voṭṭhabbanampi āsevanapaccayo siyā, kusalākusalānampi siyā. Na hi āsevanapaccayaṃ laddhuṃ yuttassa āsevanapaccayabhāvī dhammo āsevanapaccayoti avutto atthi. Voṭṭhabbanassa pana kusalākusalānaṃ āsevanapaccayabhāvo avutto. ‘‘Kusalaṃ dhammaṃ paṭicca kusalo dhammo uppajjati nāsevanapaccayā. Akusalaṃ dhammaṃ…pe… nāsevanapaccayā’’ti (paṭṭhā. 1.1.93) vacanato paṭikkhittova. Athāpi siyā ‘‘asamānavedanānaṃ vasena evaṃ vutta’’nti, evamapi yathā ‘‘āvajjanā kusalānaṃ khandhānaṃ akusalānaṃ khandhānaṃ anantarapaccayena paccayo’’ti (paṭṭhā. 1.1.417) vuttaṃ, evaṃ ‘‘āsevanapaccayena paccayoti’’pi vattabbaṃ siyā, jātibhedā na vuttanti ce? Bhūmibhinnassa kāmāvacarassa rūpāvacarādīnaṃ āsevanapaccayabhāvo viya jātibhinnassapi bhaveyyāti vattabbo eva siyā. Abhinnajātikassa ca vasena yathā ‘‘āvajjanā sahetukānaṃ khandhānaṃ anantarapaccayena paccayo’’ti vuttaṃ, evaṃ ‘‘āsevanapaccayena paccayo’’tipi vattabbaṃ siyā, na tu vuttaṃ. Tasmā vedanāttikepi saṅkhittāya gaṇanāya ‘‘āsevanapaccayā na magge ekaṃ, na maggapaccayā āsevane eka’’nti evaṃ gaṇanāya niddhāriyamānāya voṭṭhabbanassa āsevanapaccayattassa abhāvā yathāvuttappakāro dutiyo moghavāro vīmaṃsitabbo.
ཝོཊྛབྦནཾ པན ཝཱིཐིཝིཔཱཀསནྟཏིཡཱ ཨཱཝཊྚནཏོ ཨཱཝཛྫནཱ, ཏཏོ ཝིསདིསསྶ ཛཝནསྶ ཀརཎཏོ མནསིཀཱརོ ཙ། ཨེཝཉྩ ཀཏྭཱ པཊྛཱནེ ‘‘ཝོཊྛབྦནཾ ཀུསལཱནཾ ཁནྡྷཱནཾ ཨནནྟརཔཙྩཡེན པཙྩཡོ’’ཏིཨཱདི ན ཝུཏྟཾ, ‘‘ཨཱཝཛྫནཱ’’ཨིཙྩེཝ ཝུཏྟཾ། ཏསྨཱ ཝོཊྛབྦནཏོ ཙཏུནྣཾ ཝཱ པཉྩནྣཾ ཝཱ ཛཝནཱནཾ ཨཱརམྨཎཔུརེཛཱཏཾ བྷཝིཏུཾ ཨསཀྐོནྟཾ རཱུཔཱདིཨཱཝཛྫནཱདཱིནཾ པཙྩཡོ བྷཝིཏུཾ ན སཀྐོཏི, ཨཡམེཏསྶ སབྷཱཝོཏི ཛཝནཱཔཱརིཔཱུརིཡཱ དུཏིཡོ མོགྷཝཱརོ དསྶེཏུཾ ཡུཏྟོ སིཡཱ, ཨཡམྤི ཨཊྛཀཐཱཡཾ ཨནཱགཏཏྟཱ སུཊྛུ ཝིཙཱརེཏབྦོ། བྷཝངྒསྶ ཛཝནཱནུབནྡྷནབྷཱུཏཏྟཱ ‘‘ཏདཱརམྨཎཾ བྷཝངྒ’’ནྟི ཝུཏྟཾ། པཊྛཱནེ (པཊྛཱ॰ ༣.༡.༡༠༢) ཙ ཝུཏྟཾ ‘‘སཧེཏུཀཾ བྷཝངྒཾ ཨཧེཏུཀསྶ བྷཝངྒསྶ ཨནནྟརཔཙྩཡེན པཙྩཡོ’’ཏི, ‘‘ཨཧེཏུཀཾ བྷཝངྒཾ སཧེཏུཀསྶ བྷཝངྒསྶ ཨནནྟརཔཙྩཡེན པཙྩཡོ’’ཏི ཙ། ཀུསལཱཀུསལཱནཾ སུཁདུཀྑཝིཔཱཀམཏྟོ ཝིཔཱཀོ ན ཨིཊྛཱནིཊྛཱནཾ ཝིབྷཱགཾ ཀརོཏི, ཛཝནཾ པན རཛྫནཝིརཛྫནཱདིཝསེན ཨིཊྛཱནིཊྛཝིབྷཱགཾ ཀརོཏཱིཏི ‘‘ཨཱརམྨཎརསཾ ཛཝནམེཝ ཨནུབྷཝཏཱི’’ཏི ཝུཏྟཾ།
Voṭṭhabbanaṃ pana vīthivipākasantatiyā āvaṭṭanato āvajjanā, tato visadisassa javanassa karaṇato manasikāro ca. Evañca katvā paṭṭhāne ‘‘voṭṭhabbanaṃ kusalānaṃ khandhānaṃ anantarapaccayena paccayo’’tiādi na vuttaṃ, ‘‘āvajjanā’’icceva vuttaṃ. Tasmā voṭṭhabbanato catunnaṃ vā pañcannaṃ vā javanānaṃ ārammaṇapurejātaṃ bhavituṃ asakkontaṃ rūpādiāvajjanādīnaṃ paccayo bhavituṃ na sakkoti, ayametassa sabhāvoti javanāpāripūriyā dutiyo moghavāro dassetuṃ yutto siyā, ayampi aṭṭhakathāyaṃ anāgatattā suṭṭhu vicāretabbo. Bhavaṅgassa javanānubandhanabhūtattā ‘‘tadārammaṇaṃ bhavaṅga’’nti vuttaṃ. Paṭṭhāne (paṭṭhā. 3.1.102) ca vuttaṃ ‘‘sahetukaṃ bhavaṅgaṃ ahetukassa bhavaṅgassa anantarapaccayena paccayo’’ti, ‘‘ahetukaṃ bhavaṅgaṃ sahetukassa bhavaṅgassa anantarapaccayena paccayo’’ti ca. Kusalākusalānaṃ sukhadukkhavipākamatto vipāko na iṭṭhāniṭṭhānaṃ vibhāgaṃ karoti, javanaṃ pana rajjanavirajjanādivasena iṭṭhāniṭṭhavibhāgaṃ karotīti ‘‘ārammaṇarasaṃ javanameva anubhavatī’’ti vuttaṃ.
ཨཝིཛྫམཱནེ ཀཱརཀེ ཀཐཾ ཨཱཝཛྫནཱདིབྷཱཝེན པཝཏྟི ཧོཏཱིཏི ཏཾ དསྶེཏུཾ པཉྩཝིདྷཾ ནིཡཱམཾ ནཱམ གཎྷིཾསུ། ནིཡཱམོ ཙ དྷམྨཱནཾ སབྷཱཝཀིཙྩཔཙྩཡབྷཱཝཝིསེསོཝ། ཏཾཏཾསདིསཕལདཱནནྟི ཏསྶ ཏསྶ ཨཏྟནོ ཨནུརཱུཔཕལསྶ དཱནཾ། སདིསཝིཔཱཀདཱནནྟི ཙ ཨནུརཱུཔཝིཔཱཀདཱནནྟི ཨཏྠོ། ཨིདཾ ཝཏྠུནྟི ཨེཀཝཙནནིདྡེསོ ཨེཀགཱཐཱཝཏྠུབྷཱཝེན ཀཏོ། ཛགཏིཔྤདེསོཏི ཡཐཱཝུཏྟཏོ ཨཉྙོཔི ལོཀཔྤདེསོ། ཀཱལགཏིཨུཔདྷིཔཡོགཔཊིབཱལ༹ྷཉྷི པཱཔཾ ན ཝིཔཙྩེཡྻ, ན པདེསཔཊིབཱལ༹ྷནྟི། སབྦཉྙུཏཉྙཱཎཔདཊྛཱནཔཊིསནྡྷིཡཱདིདྷམྨཱནཾ ནིཡཱམོ དསསཧསྶིཀམྤནཔཙྩཡབྷཱཝོ དྷམྨནིཡཱམོ། ཨཡཾ ཨིདྷ ཨདྷིཔྤེཏོཏི ཨེཏེན ནིཡཱམཝསེན ཨཱཝཛྫནཱདིབྷཱཝོ, ན ཀཱརཀཝསེནཱཏི ཨེཏམཏྠཾ དསྶེཏི།
Avijjamāne kārake kathaṃ āvajjanādibhāvena pavatti hotīti taṃ dassetuṃ pañcavidhaṃ niyāmaṃ nāma gaṇhiṃsu. Niyāmo ca dhammānaṃ sabhāvakiccapaccayabhāvavisesova. Taṃtaṃsadisaphaladānanti tassa tassa attano anurūpaphalassa dānaṃ. Sadisavipākadānanti ca anurūpavipākadānanti attho. Idaṃ vatthunti ekavacananiddeso ekagāthāvatthubhāvena kato. Jagatippadesoti yathāvuttato aññopi lokappadeso. Kālagatiupadhipayogapaṭibāḷhañhi pāpaṃ na vipacceyya, na padesapaṭibāḷhanti. Sabbaññutaññāṇapadaṭṭhānapaṭisandhiyādidhammānaṃ niyāmo dasasahassikampanapaccayabhāvo dhammaniyāmo. Ayaṃ idha adhippetoti etena niyāmavasena āvajjanādibhāvo, na kārakavasenāti etamatthaṃ dasseti.
ཨིམསྨིཾ ཋཱནེཏི སོལ༹སཝིཔཱཀཀཐཱཋཱནེ། དྭཱདསཧི ཝཱཧེཏབྦཱ ནཱལི༹ཡནྟོཔམཱ ན དྭཱདསནྣཾ ཙིཏྟཱནཾ ཨེཀསྨིཾ དྭཱརེ ཨེཀཱརམྨཎེ སཧ ཀིཙྩཀརཎཝསེན ཝུཏྟཱ, ཨཐ ཁོ དྭཱདསནྣཾ ཨེཀསྨིཾ དྭཱརེ སཀིཙྩཀརཎམཏྟཝསེན། ཨཧེཏུཀཔཊིསནྡྷིཛནཀསདིསཛཝནཱནནྟརཾ ཨཧེཏུཀཏདཱརམྨཎཾ དསྶེནྟོ ‘‘ཙཏུནྣཾ པན དུཧེཏུཀཀུསལཙིཏྟཱནཾ ཨཉྙཏརཛཝནསྶ…པེ॰… པཏིཊྛཱཏཱི’’ཏི ཨཱཧ། ཨཧེཏུཀཔཊིསནྡྷིཀསྶ པན ཏིཧེཏུཀཛཝནེ ཛཝིཏེ པཊིསནྡྷིདཱཡཀེན ཀམྨེན ཨཧེཏུཀསྶ ཏདཱརམྨཎསྶ ནིབྦཏྟི ན པཊིསེདྷིཏཱ། ཨེཝཾ དུཧེཏུཀཔཊིསནྡྷིཀསྶཔི ཏིཧེཏུཀཱནནྟརཾ དུཧེཏུཀཏདཱརམྨཎཾ ཨཔྤཊིསིདྡྷཾ དཊྛབྦཾ། པརིཔུཎྞཝིཔཱཀསྶ ཙ པཊིསནྡྷིཛནཀཀམྨསྶ ཝསེནཱཡཾ ཝིཔཱཀཝིབྷཱཝནཱ ཏསྶཱ མུཁནིདསྶནམཏྟམེཝཱཏི པཝཏྟིཝིཔཱཀསྶ ཙ ཨེཀསྶ ཏིཧེཏུཀཱདིཀམྨསྶ སོལ༹སཝིཔཱཀཙིཏྟཱདཱིནི ཝུཏྟནཡེན ཡོཛེཏབྦཱནི། ཏསྨཱ ཡེན ཀེནཙི ཀམྨུནཱ ཨེཀེན ཨནེཀཾ ཏདཱརམྨཎཾ པཝཏྟམཱནཾ ཀམྨཝིསེསཱབྷཱཝཱ ཡེསཾ ཏཾ ཨནུབནྡྷབྷཱུཏཾ, ཏེསཾ ཛཝནསངྑཱཏཱནཾ པཙྩཡཱནཾ ཝིསེསེན ཝིསིཊྛཾ ཧོཏཱིཏི ཛཝནེནཱཡཾ ཏདཱརམྨཎནིཡཱམོ ཝུཏྟོ, ན ནཱནཱཀམྨུནཱ ནིབྦཏྟམཱནསྶ ཝསེན། ཨེཝཉྩ ཀཏྭཱ པཊྛཱནེ (པཊྛཱ॰ ༣.༡.༩༨) ‘‘སཧེཏུཀེ ཁནྡྷེ ཨནིཙྩཏོ དུཀྑཏོ ཨནཏྟཏོ ཝིཔསྶཏི། ཀུསལཱཀུསལེ ནིརུདྡྷེ ཨཧེཏུཀོ ཝིཔཱཀོ ཏདཱརམྨཎཏཱ ཨུཔྤཛྫཏཱི’’ཏི ཉཱཎཱནནྟརཾ ཨཧེཏུཀཏདཱརམྨཎཾ, ‘‘ཀུསལཱཀུསལེ ནིརུདྡྷེ སཧེཏུཀོ ཝིཔཱཀོ ཏདཱརམྨཎཏཱ ཨུཔྤཛྫཏཱི’’ཏི ཨཀུསལཱནནྟརཉྩ སཧེཏུཀཏདཱརམྨཎཾ ཝུཏྟཾ, ན ཙ ‘‘ཏཾ ཨེཏེན ཐེརེན ཨདསྶིཏ’’ནྟི ཀཏྭཱ ཏསྶ པཊིསེདྷོ ཀཏོ ཧོཏཱིཏི།
Imasmiṃ ṭhāneti soḷasavipākakathāṭhāne. Dvādasahi vāhetabbā nāḷiyantopamā na dvādasannaṃ cittānaṃ ekasmiṃ dvāre ekārammaṇe saha kiccakaraṇavasena vuttā, atha kho dvādasannaṃ ekasmiṃ dvāre sakiccakaraṇamattavasena. Ahetukapaṭisandhijanakasadisajavanānantaraṃ ahetukatadārammaṇaṃ dassento ‘‘catunnaṃ pana duhetukakusalacittānaṃ aññatarajavanassa…pe… patiṭṭhātī’’ti āha. Ahetukapaṭisandhikassa pana tihetukajavane javite paṭisandhidāyakena kammena ahetukassa tadārammaṇassa nibbatti na paṭisedhitā. Evaṃ duhetukapaṭisandhikassapi tihetukānantaraṃ duhetukatadārammaṇaṃ appaṭisiddhaṃ daṭṭhabbaṃ. Paripuṇṇavipākassa ca paṭisandhijanakakammassa vasenāyaṃ vipākavibhāvanā tassā mukhanidassanamattamevāti pavattivipākassa ca ekassa tihetukādikammassa soḷasavipākacittādīni vuttanayena yojetabbāni. Tasmā yena kenaci kammunā ekena anekaṃ tadārammaṇaṃ pavattamānaṃ kammavisesābhāvā yesaṃ taṃ anubandhabhūtaṃ, tesaṃ javanasaṅkhātānaṃ paccayānaṃ visesena visiṭṭhaṃ hotīti javanenāyaṃ tadārammaṇaniyāmo vutto, na nānākammunā nibbattamānassa vasena. Evañca katvā paṭṭhāne (paṭṭhā. 3.1.98) ‘‘sahetuke khandhe aniccato dukkhato anattato vipassati. Kusalākusale niruddhe ahetuko vipāko tadārammaṇatā uppajjatī’’ti ñāṇānantaraṃ ahetukatadārammaṇaṃ, ‘‘kusalākusale niruddhe sahetuko vipāko tadārammaṇatā uppajjatī’’ti akusalānantarañca sahetukatadārammaṇaṃ vuttaṃ, na ca ‘‘taṃ etena therena adassita’’nti katvā tassa paṭisedho kato hotīti.
ཡཾ པན ཛཝནེན…པེ॰… ཏཾ ཀུསལཾ སནྡྷཱཡ ཝུཏྟནྟི ཨིདཾ ཀུསལསྶ ཝིཡ ཨཀུསལསྶ སདིསོ ཝིཔཱཀོ ནཏྠཱིཏི ཀཏྭཱ ཝུཏྟཾ། སསངྑཱརིཀཱསངྑཱརིཀནིཡམནཾ པན སནྡྷཱཡ ཏསྨིཾ ཝུཏྟེ ཨཀུསལེཔི ན ཏཾ ན ཡུཛྫཏཱིཏི། ཨཊྛཱནམེཏནྟི ཨིདཾ ནིཡམིཏཱདིཝསེན ཡོནིསོ ཨཡོནིསོ ཝཱ ཨཱཝཊྚིཏེ ཨཡོནིསོ ཡོནིསོ ཝཱ ཝཝཏྠཱཔནསྶ ཨབྷཱཝཾ སནྡྷཱཡ ཝུཏྟཾ།
Yaṃpana javanena…pe… taṃ kusalaṃ sandhāya vuttanti idaṃ kusalassa viya akusalassa sadiso vipāko natthīti katvā vuttaṃ. Sasaṅkhārikāsaṅkhārikaniyamanaṃ pana sandhāya tasmiṃ vutte akusalepi na taṃ na yujjatīti. Aṭṭhānametanti idaṃ niyamitādivasena yoniso ayoniso vā āvaṭṭite ayoniso yoniso vā vavatthāpanassa abhāvaṃ sandhāya vuttaṃ.
པཊིསིདྡྷནྟི ཨཝཙནམེཝ པཊིསེདྷོཏི ཀཏྭཱ ཝུཏྟཾ། ཀཱམཏཎྷཱནིབྦཏྟེན ཀམྨུནཱ མཧགྒཏལོཀུཏྟརཱནུབྷཝནཝིཔཱཀོ ན ཧོཏཱིཏི ཏཏྠ ཏདཱརམྨཎཱབྷཱཝོ ཝེདིཏབྦོ། ཨཱཔཱཐགཏེ ཝིསཡེ ཏནྣིནྣཾ བྷཝངྒཾ ཨཱཝཛྫནཾ ཨུཔྤཱདེཏཱིཏི ཨཱཝཛྫནཾ ཝིསཡེ ནིནྣཏྟཱ ཨུཔྤཛྫཏི། བྷཝངྒཾ པན སབྦདཱ སཝིསཡེ ནིནྣམེཝཱཏི ཝིསཡནྟརཝིཉྙཱཎསྶ པཙྩཡོ ཧུཏྭཱཔི ཏདབྷཱཝཱ ཝིནཱ ཨཱཝཛྫནེན སཝིསཡེ ནིནྣཏྟཱཝ ཨུཔྤཛྫཏི། ཙིཎྞཏྟཱཏི ཨཱཝཛྫནེན ཝིནཱ བཧུལཾ ཨུཔྤནྣཔུབྦཏྟཱ། སམུདཱཙཱརཏྟཱཏི ཨཱཔཱཐགཏེ ཝིསཡེ པཊིསནྡྷིཝིསཡེ ཙ བཧུལཾ ཨུཔྤཱདིཏཔུབྦཏྟཱ། ཙིཎྞཏྟཱཏི ཝཱ པུགྒལེན ཨཱསེཝིཏབྷཱཝོ ཝུཏྟོ། སམུདཱཙཱརཏྟཱཏི སཡཾ བཧུལཾ པཝཏྟབྷཱཝོ། ནིརོདྷསྶ ཨནནྟརཔཙྩཡཾ ནེཝསཉྙཱནཱསཉྙཱཡཏནནྟི ཨིདཾ ཏདནནྟརམེཝ ནིརོདྷཕུསནཾ སནྡྷཱཡ ཝུཏྟཾ, ན ཨརཱུཔཀྑནྡྷཱནཾ ཝིཡ ནིརོདྷསྶ ཨནནྟརཔཙྩཡབྷཱཝཾ། ནེཝསཉྙཱནཱསཉྙཱཡཏནཾ པན ཀིཉྩི པརིཀམྨེན ཝིནཱ ཨུཔྤཛྫམཱནཾ ནཏྠི། པརིཀམྨཱཝཛྫནམེཝ ཏསྶ ཨཱཝཛྫནནྟི ཨཉྙསྶ ཝིཡ ཨེཏསྶཔི སཱཝཛྫནཏཱཡ བྷཝིཏབྦཾ།
Paṭisiddhanti avacanameva paṭisedhoti katvā vuttaṃ. Kāmataṇhānibbattena kammunā mahaggatalokuttarānubhavanavipāko na hotīti tattha tadārammaṇābhāvo veditabbo. Āpāthagate visaye tanninnaṃ bhavaṅgaṃ āvajjanaṃ uppādetīti āvajjanaṃ visaye ninnattā uppajjati. Bhavaṅgaṃ pana sabbadā savisaye ninnamevāti visayantaraviññāṇassa paccayo hutvāpi tadabhāvā vinā āvajjanena savisaye ninnattāva uppajjati. Ciṇṇattāti āvajjanena vinā bahulaṃ uppannapubbattā. Samudācārattāti āpāthagate visaye paṭisandhivisaye ca bahulaṃ uppāditapubbattā. Ciṇṇattāti vā puggalena āsevitabhāvo vutto. Samudācārattāti sayaṃ bahulaṃ pavattabhāvo. Nirodhassa anantarapaccayaṃ nevasaññānāsaññāyatananti idaṃ tadanantarameva nirodhaphusanaṃ sandhāya vuttaṃ, na arūpakkhandhānaṃ viya nirodhassa anantarapaccayabhāvaṃ. Nevasaññānāsaññāyatanaṃ pana kiñci parikammena vinā uppajjamānaṃ natthi. Parikammāvajjanameva tassa āvajjananti aññassa viya etassapi sāvajjanatāya bhavitabbaṃ.
ཨཡཾ པནེཏྠཱདྷིཔྤཱཡོ དཊྛབྦོ – ནེཝསཉྙཱནཱསཉྙཱཡཏནསྶ ན ནིརོདྷསྶ ཨནནྟརཔཙྩཡབྷཱཝེ ནིནྣཱདིཏཱ ཨཉྙཏྠ དིཊྛཱ ཨཏདཏྠཔརིཀམྨབྷཱཝེ ཙ ཨུཔྤཏྟིཡཱ, ཨཐ ཙ ཏཾ ཏསྶ ཨནནྟརཔཙྩཡོ ཧོཏི, ཏཐཱ ཙ ཨུཔྤཛྫཏི། ཨེཝཾ ཡཐཱཝུཏྟཱ མནོཝིཉྙཱཎདྷཱཏུ ཨསཏིཔི ནིརཱཝཛྫནུཔྤཏྟིཡཾ ནིནྣཱདིབྷཱཝེ ནིརཱཝཛྫནཱ ཨུཔྤཛྫཏཱིཏི། ཨེཝཉྩ ཀཏྭཱ ‘‘ཨརིཡམགྒཙིཏྟཾ མགྒཱནནྟརཱནི ཕལཙིཏྟཱནཱི’’ཏི ཨིདཾ ཝུཏྟཾ། ཡདི ཧི ནིབྦཱནཱརམྨཎཱཝཛྫནཱབྷཱཝཾ སནྡྷཱཡེཏཾ ཝུཏྟཾ སིཡཱ, གོཏྲབྷུཝོདཱནཱནི ནིདསྶནཱནི སིཡུཾ ཏེཧེཝ ཨེཏེསཾ ནིརཱཝཛྫནཏཱསིདྡྷིཏོ། ཕལསམཱཔཏྟིཀཱལེ ཙ ‘‘པརིཏྟཱརམྨཎཾ མཧགྒཏཱརམྨཎཾ ཨནུལོམཾ ཕལསམཱཔཏྟིཡཱ ཨནནྟརཔཙྩཡེན པཙྩཡོ’’ཏི ཝཙནཏོ སམཱནཱརམྨཎཱཝཛྫནརཧིཏཏྟཱ ‘‘མགྒཱནནྟརཱནི ཕལཙིཏྟཱནཱི’’ཏི ཨེཝཾ ཕལསམཱཔཏྟིཙིཏྟཱནི ན ཝཛྫེཏབྦཱནི སིཡུཾ, གོཏྲབྷུཝོདཱནཱནི པན ཡདིཔི ནིབྦཱནེ ཙིཎྞཱནི སམུདཱཙཱརཱནི ཙ ན ཧོནྟི, ཨཱརམྨཎནྟརེ ཙིཎྞསམུདཱཙཱརཱནེཝ། ཕལསམཱཔཏྟིཙིཏྟཱནི ཙ མགྒཝཱིཐིཏོ ཨུདྡྷཾ ཏདཏྠཔརིཀམྨསབྦྷཱཝཱཏི ཏེསཾ གཧཎཾ ན ཀཏཾ, ཨནུལོམཱནནྟརཉྩ ཕལསམཱཔཏྟིཙིཏྟཾ ཙིཎྞཾ སམུདཱཙཱརཾ, ན ནེཝསཉྙཱནཱསཉྙཱཡཏནཱནནྟརཾ མགྒཱནནྟརསྶ ཝིཡ ཏདཏྠཔརིཀམྨཱབྷཱཝཱཏི ‘‘ནིརོདྷཱ ཝུཊྛཧནྟསྶཱ’’ཏི ཏཉྩ ནིདསྶནཾ། ཨཱརམྨཎེན པན ཝིནཱ ནུཔྤཛྫཏཱིཏི ཨིདཾ ཨེཏསྶ མཧགྒཏཱརམྨཎཏྟཱབྷཱཝཱ པུཙྪཾ ཀཱརེཏྭཱ ཨཱརམྨཎནིདྡྷཱརཎཏྠཾ ཝུཏྟཾ།
Ayaṃ panetthādhippāyo daṭṭhabbo – nevasaññānāsaññāyatanassa na nirodhassa anantarapaccayabhāve ninnāditā aññattha diṭṭhā atadatthaparikammabhāve ca uppattiyā, atha ca taṃ tassa anantarapaccayo hoti, tathā ca uppajjati. Evaṃ yathāvuttā manoviññāṇadhātu asatipi nirāvajjanuppattiyaṃ ninnādibhāve nirāvajjanā uppajjatīti. Evañca katvā ‘‘ariyamaggacittaṃ maggānantarāni phalacittānī’’ti idaṃ vuttaṃ. Yadi hi nibbānārammaṇāvajjanābhāvaṃ sandhāyetaṃ vuttaṃ siyā, gotrabhuvodānāni nidassanāni siyuṃ teheva etesaṃ nirāvajjanatāsiddhito. Phalasamāpattikāle ca ‘‘parittārammaṇaṃ mahaggatārammaṇaṃ anulomaṃ phalasamāpattiyā anantarapaccayena paccayo’’ti vacanato samānārammaṇāvajjanarahitattā ‘‘maggānantarāni phalacittānī’’ti evaṃ phalasamāpatticittāni na vajjetabbāni siyuṃ, gotrabhuvodānāni pana yadipi nibbāne ciṇṇāni samudācārāni ca na honti, ārammaṇantare ciṇṇasamudācārāneva. Phalasamāpatticittāni ca maggavīthito uddhaṃ tadatthaparikammasabbhāvāti tesaṃ gahaṇaṃ na kataṃ, anulomānantarañca phalasamāpatticittaṃ ciṇṇaṃ samudācāraṃ, na nevasaññānāsaññāyatanānantaraṃ maggānantarassa viya tadatthaparikammābhāvāti ‘‘nirodhā vuṭṭhahantassā’’ti tañca nidassanaṃ. Ārammaṇena pana vinā nuppajjatīti idaṃ etassa mahaggatārammaṇattābhāvā pucchaṃ kāretvā ārammaṇaniddhāraṇatthaṃ vuttaṃ.
ཏཏྠཱཏི ཝིཔཱཀཀཐཱཡཾ། ཛཙྩནྡྷཔཱིཋསཔྤིཨུཔམཱནིདསྶནཾ ཝིཔཱཀསྶ ནིསྶཡེན ཝིནཱ ཨཔྤཝཏྟིདསྶནཏྠཾ། ཝིསཡགྒཱཧོཏི ཨིདཾ ཙཀྑཱདཱིནཾ སཝིསཡགྒཧཎེན ཙཀྑུཝིཉྙཱཎཱདིཝིཔཱཀསྶ དསྶནཏྠཾ ཝུཏྟཾ། ཨུཔནིསྶཡཏོ ཙཀྑཱདཱིནཾ དསྶནཱདིཨཏྠཏོ ཙ ཏསྶེཝ ཝིཔཱཀསྶ དསྶནཏྠཾ ‘‘ཨུཔནིསྶཡམཏྠསོ’’ཏི ཝུཏྟཾ། ཧདཡཝཏྠུམེཝཱཏི ཡཐཱ པུརིམཙིཏྟཱནི ཧདཡཝཏྠུནིསྶིཏཱནི ཙ པསཱདཝཏྠུཨནུགཏཱནི ཙ ཨཉྙཱརམྨཎཱནི ཧོནྟི, ན ཨེཝཾ བྷཝངྒཾ, ཏཾ པནེཏཾ ཝཏྠཱརམྨཎནྟརརཧིཏཾ ཀེཝལཾ ཧདཡཝཏྠུམེཝ ནིསྶཱཡ པཝཏྟཏཱིཏི ཝུཏྟཾ ཧོཏི། ཧདཡརཱུཔཝཏྠུཀནྟི ཨིདྷཱཔི ཨཉྙཝཏྠཱནུགཏནྟི ཨདྷིཔྤཱཡོ ཝེདིཏབྦོ། མཀྐཊཀསྶ ཧི སུཏྟཱརོཧཎཾ ཝིཡ པསཱདཝཏྠུཀཾ ཙིཏྟཾ, སུཏྟེན གམནཱདཱིནི ཝིཡ ཏདནུགཏཱནི སེསཙིཏྟཱནཱིཏི། སུཏྟགྷཊྚནམཀྐཊཀཙལནཱནི ཝིཡ པསཱདགྷཊྚནབྷཝངྒཙལནཱནི སཧ ཧོནྟཱིཏི དཱིཔནཏོ ‘‘ཨེཀེཀཾ…པེ॰… ཨཱགཙྪཏཱི’’ཏིཔི དཱིཔེཏི།
Tatthāti vipākakathāyaṃ. Jaccandhapīṭhasappiupamānidassanaṃ vipākassa nissayena vinā appavattidassanatthaṃ. Visayaggāhoti idaṃ cakkhādīnaṃ savisayaggahaṇena cakkhuviññāṇādivipākassa dassanatthaṃ vuttaṃ. Upanissayato cakkhādīnaṃ dassanādiatthato ca tasseva vipākassa dassanatthaṃ ‘‘upanissayamatthaso’’ti vuttaṃ. Hadayavatthumevāti yathā purimacittāni hadayavatthunissitāni ca pasādavatthuanugatāni ca aññārammaṇāni honti, na evaṃ bhavaṅgaṃ, taṃ panetaṃ vatthārammaṇantararahitaṃ kevalaṃ hadayavatthumeva nissāya pavattatīti vuttaṃ hoti. Hadayarūpavatthukanti idhāpi aññavatthānugatanti adhippāyo veditabbo. Makkaṭakassa hi suttārohaṇaṃ viya pasādavatthukaṃ cittaṃ, suttena gamanādīni viya tadanugatāni sesacittānīti. Suttaghaṭṭanamakkaṭakacalanāni viya pasādaghaṭṭanabhavaṅgacalanāni saha hontīti dīpanato ‘‘ekekaṃ…pe… āgacchatī’’tipi dīpeti.
བྷཝངྒསྶ ཨཱཝཊྚིཏཀཱལོཏི ཨིདཾ དོཝཱརིཀསདིསཱནཾ ཙཀྑུཝིཉྙཱཎཱདཱིནཾ པཱདཔརིམཛྫཀསདིསསྶ ཨཱཝཛྫནསྶ སཉྙཱདཱནསདིསོ ཨནནྟརཔཙྩཡབྷཱཝོ ཨེཝ བྷཝངྒཱཝཊྚནནྟི ཀཏྭཱ ཝུཏྟཾ། ཝིཔཱཀམནོདྷཱཏུཨཱདཱིནཾ ཨདིསྭཱཝ སམྤཊིཙྪནཱདིཀརཎཾ གཱལ༹ྷགྒཧཎམཏྟཔུཐུལཙཏུརསྶབྷཱཝཝིཛཱནནམཏྟཀཧཱཔཎབྷཱཝཝིཛཱནནམཏྟཀམྨོཔནཡནམཏྟསཱམཉྙཝསེན ཝུཏྟཾ, ན གཱལ༹ྷགྒཱཧཀཱདཱིནཾ ཀཧཱཔཎདསྶནསྶ ཨབྷཱཝོ ཏཾསམཱནབྷཱཝོ ཙ སམྤཊིཙྪནཱདཱིནཾ ཨདྷིཔྤེཏོཏི ཝེདིཏབྦོ།
Bhavaṅgassa āvaṭṭitakāloti idaṃ dovārikasadisānaṃ cakkhuviññāṇādīnaṃ pādaparimajjakasadisassa āvajjanassa saññādānasadiso anantarapaccayabhāvo eva bhavaṅgāvaṭṭananti katvā vuttaṃ. Vipākamanodhātuādīnaṃ adisvāva sampaṭicchanādikaraṇaṃ gāḷhaggahaṇamattaputhulacaturassabhāvavijānanamattakahāpaṇabhāvavijānanamattakammopanayanamattasāmaññavasena vuttaṃ, na gāḷhaggāhakādīnaṃ kahāpaṇadassanassa abhāvo taṃsamānabhāvo ca sampaṭicchanādīnaṃ adhippetoti veditabbo.
པཎྜརཾ ཨེཏནྟི པཎྜརརཱུཔདསྶནསཱམཉྙཏོ ཙཀྑུཝིཉྙཱཎམེཝ དསྶནཀིཙྩཾ སཱདྷེཏཱིཏི དཱིཔནཾ ཝེདིཏབྦཾ། ཨེཝཾ སོཏདྭཱརཱདཱིསུཔི ཡོཛེཏབྦཾ སཝནཱདིཝསེན། སནྟཱཔནཝསེན གུལ༹སཱིལོ གུལ༹པྤཡོཛནོ ཝཱ གོལི༹ཡཀོ། ཨུཔནིསྶཡཏོཏི ན ཨུཔནིསྶཡཔཙྩཡཾ སནྡྷཱཡ ཝུཏྟཾ། ཡསྨིཾ པན ཨསཏི ཡོ ན ཧོཏི, སོ ཨིདྷ ‘‘ཨུཔནིསྶཡོ’’ཏི ཨདྷིཔྤེཏོ། ཨཱལོཀསནྣིསྶིཏནྟི ཨིདམྤི ཨཱལོཀེ སཏི སབྦྷཱཝཾ སནྡྷཱཡ ཝུཏྟཾ, ན ཨུཔནིསྶཡཔཙྩཡཏཾ། མནྡཐཱམགཏཾ ནཱམ ཀིརིཡཙིཏྟསྶ པཙྩཡབྷཱཝཾ ཨནུཔགནྟྭཱ སཡམེཝ པཝཏྟམཱནཾ།
Paṇḍaraṃetanti paṇḍararūpadassanasāmaññato cakkhuviññāṇameva dassanakiccaṃ sādhetīti dīpanaṃ veditabbaṃ. Evaṃ sotadvārādīsupi yojetabbaṃ savanādivasena. Santāpanavasena guḷasīlo guḷappayojano vā goḷiyako. Upanissayatoti na upanissayapaccayaṃ sandhāya vuttaṃ. Yasmiṃ pana asati yo na hoti, so idha ‘‘upanissayo’’ti adhippeto. Ālokasannissitanti idampi āloke sati sabbhāvaṃ sandhāya vuttaṃ, na upanissayapaccayataṃ. Mandathāmagataṃ nāma kiriyacittassa paccayabhāvaṃ anupagantvā sayameva pavattamānaṃ.
ཨསངྑཱརིཀསསངྑཱརིཀེསུ དོསཾ དིསྭཱཏི ན ཀམྨསྶ ཝིརུདྡྷསབྷཱཝེན ཝིཔཱཀེན བྷཝིཏབྦནྟི ཨསངྑཱརིཀཀམྨསྶ སསངྑཱརིཀཝིཔཱཀེསུ, སསངྑཱརིཀཀམྨསྶ ཙ ཨསངྑཱརིཀཝིཔཱཀེསུ དོསཾ དིསྭཱ། ཨཧེཏུཀཱནཾ པན རཱུཔཱདཱིསུ ཨབྷིནིཔཱཏམཏྟཱདིཀིཙྩཱནཾ ན སསངྑཱརིཀཝིརུདྡྷོ སབྷཱཝོཏི ཨསངྑཱརིཀཏཱ ནཏྠི, ཨསངྑཱརིཀཝིརུདྡྷསབྷཱཝཱབྷཱཝཱ ནཱཔི སསངྑཱརིཀཏཱཏི ཨུབྷཡཱཝིརོདྷཱ ཨུབྷཡེནཔི ཏེསཾ ནིབྦཏྟིཾ ཨནུཛཱནཱཏི། ཙིཏྟནིཡཱམནྟི ཏདཱརམྨཎནིཡཱམཾ། ཀིརིཡཏོ པཉྩཱཏི ཨིམེསཾ…པེ॰… པཏིཊྛཱཏཱིཏི ཀིརིཡཛཝནཱནནྟརཉྩ ཏདཱརམྨཎཾ ཝུཏྟཾ། པཊྛཱནེ (པཊྛཱ॰ ༡.༣.༩༤) པན ‘‘ཀུསལཱཀུསལེ ནིརུདྡྷེ ཝིཔཱཀོ ཏདཱརམྨཎཏཱ ཨུཔྤཛྫཏཱི’’ཏི ཝིཔཱཀདྷམྨདྷམྨཱནམེཝ ཨནནྟརཱ ཏདཱརམྨཎཾ ཝུཏྟཾ། ཀུསལཏྟིཀེ ཙ ‘‘སེཀྑཱ ཝཱ པུཐུཛྫནཱ ཝཱ ཀུསལཾ ཨནིཙྩཏོ’’ཏིཨཱདིནཱ (པཊྛཱ॰ ༡.༡.༤༠༦) ཀུསལཱཀུསལཛཝནམེཝ ཝཏྭཱ ཏདནནྟརཾ ཏདཱརམྨཎཾ ཝུཏྟཾ, ན ཨབྱཱཀཏཱནནྟརཾ, ན ཙ ཀཏྠཙི ཀིརིཡཱནནྟརཾ ཏདཱརམྨཎསྶ ཝུཏྟཊྛཱནཾ དིསྶཏི། ཝིཛྫམཱནེ ཙ ཏསྨིཾ ཨཝཙནེ ཀཱརཎཾ ནཏྠི, ཏསྨཱ ཨུཔཔརིཀྑིཏབྦོ ཨེསོ ཐེརཝཱདོ། ཝིཔྥཱརིཀཉྷི ཛཝནཾ ནཱཝཾ ཝིཡ ནདཱིསོཏོ བྷཝངྒཾ ཨནུབནྡྷཏཱིཏི ཡུཏྟཾ, ན པན ཚལ༹ངྒུཔེཀྑཝཏོ སནྟཝུཏྟིཾ ཀིརིཡཛཝནཾ པཎྞཔུཊཾ ཝིཡ ནདཱིསོཏོཏི།
Asaṅkhārikasasaṅkhārikesudosaṃ disvāti na kammassa viruddhasabhāvena vipākena bhavitabbanti asaṅkhārikakammassa sasaṅkhārikavipākesu, sasaṅkhārikakammassa ca asaṅkhārikavipākesu dosaṃ disvā. Ahetukānaṃ pana rūpādīsu abhinipātamattādikiccānaṃ na sasaṅkhārikaviruddho sabhāvoti asaṅkhārikatā natthi, asaṅkhārikaviruddhasabhāvābhāvā nāpi sasaṅkhārikatāti ubhayāvirodhā ubhayenapi tesaṃ nibbattiṃ anujānāti. Cittaniyāmanti tadārammaṇaniyāmaṃ. Kiriyato pañcāti imesaṃ…pe… patiṭṭhātīti kiriyajavanānantarañca tadārammaṇaṃ vuttaṃ. Paṭṭhāne (paṭṭhā. 1.3.94) pana ‘‘kusalākusale niruddhe vipāko tadārammaṇatā uppajjatī’’ti vipākadhammadhammānameva anantarā tadārammaṇaṃ vuttaṃ. Kusalattike ca ‘‘sekkhā vā puthujjanā vā kusalaṃ aniccato’’tiādinā (paṭṭhā. 1.1.406) kusalākusalajavanameva vatvā tadanantaraṃ tadārammaṇaṃ vuttaṃ, na abyākatānantaraṃ, na ca katthaci kiriyānantaraṃ tadārammaṇassa vuttaṭṭhānaṃ dissati. Vijjamāne ca tasmiṃ avacane kāraṇaṃ natthi, tasmā upaparikkhitabbo eso theravādo. Vipphārikañhi javanaṃ nāvaṃ viya nadīsoto bhavaṅgaṃ anubandhatīti yuttaṃ, na pana chaḷaṅgupekkhavato santavuttiṃ kiriyajavanaṃ paṇṇapuṭaṃ viya nadīsototi.
པིཎྜཛཝནཾ ཛཝཏཱིཏི ཀུསལཱཀུསལཀིརིཡཛཝནཱནི པིཎྜེཏྭཱ ཀཐིཏཱནཱིཏི ཏཐཱ ཀཐིཏཱནི ཛཝནཱནི པིཎྜིཏཱནི ཝིཡ ཝུཏྟཱནི, ཨེཀསྨིཾ ཝཱ ཏདཱརམྨཎེ པིཎྜེཏྭཱ དསྶིཏཱནི ཧུཏྭཱ ཛཝིཏཱནེཝ ཝུཏྟཱནི། ཨིམཉྩ པན པིཎྜཛཝནཾ ཝདནྟེན ཨཀུསལཏོ ཙཏྟཱརིཡེཝ ཨུཔེཀྑཱསཧགཏཱནི གཧེཏྭཱ དྭཱདསུཔེཀྑཱསཧགཏཛཝནཱནི པིཎྜིཏཱནི ཝིཡ ཝུཏྟཱནི། པཊྛཱནེ པན ‘‘ཀུསལཾ ཨསྶཱདེཏི ཨབྷིནནྡཏི, ཏཾ ཨཱརབྦྷ རཱགོ ཨུཔྤཛྫཏི། དིཊྛི, ཝིཙིཀིཙྪཱ , ཨུདྡྷཙྩཾ, དོམནསྶཾ ཨུཔྤཛྫཏི། ཨཀུསལེ ནིརུདྡྷེ ཝིཔཱཀོ ཏདཱརམྨཎཏཱ ཨུཔྤཛྫཏཱི’’ཏི ཝུཏྟཏྟཱ ཨིཏརཱནི དྭེ ཨིཊྛཱརམྨཎེ པཝཏྟཝིཙིཀིཙྪུདྡྷཙྩསཧགཏཱནིཔི ཀུསལཝིཔཱཀེ ཏདཱརམྨཎེ པིཎྜེཏབྦཱནི སིཡུཾ། ཏེསཾ པན ཨནནྟརཾ ཨཧེཏུཀཝིཔཱཀེནེཝ ཏདཱརམྨཎེན བྷཝིཏབྦཾ, སོ ཙ སནྟཱིརཎབྷཱཝེནེཝ གཧིཏོཏི ཨཔུབྦཾ གཧེཏབྦཾ ནཏྠི། ཨཧེཏུཀེ ཙ པིཎྜེཏབྦཾ ནཱརཧནྟཱིཏི ཨདྷིཔྤཱཡེན ན པིཎྜེཏཱིཏི།
Piṇḍajavanaṃ javatīti kusalākusalakiriyajavanāni piṇḍetvā kathitānīti tathā kathitāni javanāni piṇḍitāni viya vuttāni, ekasmiṃ vā tadārammaṇe piṇḍetvā dassitāni hutvā javitāneva vuttāni. Imañca pana piṇḍajavanaṃ vadantena akusalato cattāriyeva upekkhāsahagatāni gahetvā dvādasupekkhāsahagatajavanāni piṇḍitāni viya vuttāni. Paṭṭhāne pana ‘‘kusalaṃ assādeti abhinandati, taṃ ārabbha rāgo uppajjati. Diṭṭhi, vicikicchā , uddhaccaṃ, domanassaṃ uppajjati. Akusale niruddhe vipāko tadārammaṇatā uppajjatī’’ti vuttattā itarāni dve iṭṭhārammaṇe pavattavicikicchuddhaccasahagatānipi kusalavipāke tadārammaṇe piṇḍetabbāni siyuṃ. Tesaṃ pana anantaraṃ ahetukavipākeneva tadārammaṇena bhavitabbaṃ, so ca santīraṇabhāveneva gahitoti apubbaṃ gahetabbaṃ natthi. Ahetuke ca piṇḍetabbaṃ nārahantīti adhippāyena na piṇḍetīti.
ཏིཧེཏུཀཛཝནཱཝསཱནེ པནེཏྠཱཏི ཨེཏསྨིཾ དུཏིཡཝཱདེ ཏིཧེཏུཀཛཝནཱཝསཱནེ ཏིཧེཏུཀཏདཱརམྨཎཾ ཡུཏྟནྟི དསྶེཏུཾ ཡུཏྟཾ ཝདཏི ཛཝནསམཱནཏྟཱ, ནཱལབྦྷམཱནཏྟཱ ཨཉྙསྶ། པཋམཏྠེརེན ཨཀུསལཱནནྟརཾ ཝུཏྟསྶ ཨཧེཏུཀཏདཱརམྨཎསྶ, ཀུསལཱནནྟརཾ ཝུཏྟསྶ ཙ སཧེཏུཀཏདཱརམྨཎསྶ ཨཀུསལཱནནྟརཾ ཨུཔྤཏྟིཾ ཝདནྟསྶ ཧི པཊིསནྡྷིཛནཀཾ ཏིཧེཏུཀཀམྨཾ དུཧེཏུཀཱཧེཏུཀཾ ཝིཔཱཀཾ ཛནཡནྟམྤི ཏིཧེཏུཀཛཝནཱནནྟརཾ ན ཛནེཏཱིཏི ན ཨེཏྠ ཀཱརཎཾ དིསྶཏཱིཏི ཨེཝཾ ཡུཏྟཾ གཧེཏབྦཾ ཨཝུཏྟམྤཱིཏི ཨདྷིཔྤཱཡོ། ཨཐ ཝཱ ཏསྨིཾ ཏསྨིཾ ཐེརཝཱདེ ཡེན ཨདྷིཔྤཱཡེན སསངྑཱརཱསངྑཱརཝིདྷཱནཱདི ཝུཏྟཾ, ཏཾ ཏེནེཝ ཨདྷིཔྤཱཡེན ཡུཏྟཾ གཧེཏབྦཾ, ན ཨདྷིཔྤཱཡནྟརཾ ཨདྷིཔྤཱཡནྟརེན ཨཱལོལེ༹ཏབྦནྟི ཨཏྠོ། ཧེཏུསདིསམེཝཱཏི ཛནཀཀམྨཧེཏུསདིསམེཝ། མཧཱཔཀརཎེ ཨཱཝི བྷཝིསྶཏཱིཏི མཧཱཔཀརཎེ ཨཱགཏཔཱལི༹ཡཱ པཱཀཊཾ ཨུཔྤཏྟིཝིདྷཱནཾ ཨཱཝི བྷཝིསྶཏཱིཏི ཨདྷིཔྤཱཡེན ཝདཏི།
Tihetukajavanāvasāne panetthāti etasmiṃ dutiyavāde tihetukajavanāvasāne tihetukatadārammaṇaṃ yuttanti dassetuṃ yuttaṃ vadati javanasamānattā, nālabbhamānattā aññassa. Paṭhamattherena akusalānantaraṃ vuttassa ahetukatadārammaṇassa, kusalānantaraṃ vuttassa ca sahetukatadārammaṇassa akusalānantaraṃ uppattiṃ vadantassa hi paṭisandhijanakaṃ tihetukakammaṃ duhetukāhetukaṃ vipākaṃ janayantampi tihetukajavanānantaraṃ na janetīti na ettha kāraṇaṃ dissatīti evaṃ yuttaṃ gahetabbaṃ avuttampīti adhippāyo. Atha vā tasmiṃ tasmiṃ theravāde yena adhippāyena sasaṅkhārāsaṅkhāravidhānādi vuttaṃ, taṃ teneva adhippāyena yuttaṃ gahetabbaṃ, na adhippāyantaraṃ adhippāyantarena āloḷetabbanti attho. Hetusadisamevāti janakakammahetusadisameva. Mahāpakaraṇe āvi bhavissatīti mahāpakaraṇe āgatapāḷiyā pākaṭaṃ uppattividhānaṃ āvi bhavissatīti adhippāyena vadati.
ཀཱམཱཝཙརཀུསལཝིཔཱཀཀཐཱཝཎྞནཱ ནིཊྛིཏཱ།
Kāmāvacarakusalavipākakathāvaṇṇanā niṭṭhitā.
