| Library / Tipiṭaka / তিপিটক • Tipiṭaka / পটিসম্ভিদামগ্গপাল়ি • Paṭisambhidāmaggapāḷi |
৮. ৰিপল্লাসকথা
8. Vipallāsakathā
২৩৬. পুরিমনিদানং । ‘‘চত্তারোমে , ভিক্খৰে 1, সঞ্ঞাৰিপল্লাসা চিত্তৰিপল্লাসা দিট্ঠিৰিপল্লাসা। কতমে চত্তারো? অনিচ্চে, ভিক্খৰে, নিচ্চন্তি সঞ্ঞাৰিপল্লাসো চিত্তৰিপল্লাসো দিট্ঠিৰিপল্লাসো। দুক্খে, ভিক্খৰে, সুখন্তি সঞ্ঞাৰিপল্লাসো চিত্তৰিপল্লাসো দিট্ঠিৰিপল্লাসো। অনত্তনি, ভিক্খৰে, অত্তাতি সঞ্ঞাৰিপল্লাসো চিত্তৰিপল্লাসো দিট্ঠিৰিপল্লাসো। অসুভে, ভিক্খৰে, সুভন্তি সঞ্ঞাৰিপল্লাসো চিত্তৰিপল্লাসো দিট্ঠিৰিপল্লাসো। ইমে খো, ভিক্খৰে, চত্তারো সঞ্ঞাৰিপল্লাসা চিত্তৰিপল্লাসা দিট্ঠিৰিপল্লাসা।
236. Purimanidānaṃ . ‘‘Cattārome , bhikkhave 2, saññāvipallāsā cittavipallāsā diṭṭhivipallāsā. Katame cattāro? Anicce, bhikkhave, niccanti saññāvipallāso cittavipallāso diṭṭhivipallāso. Dukkhe, bhikkhave, sukhanti saññāvipallāso cittavipallāso diṭṭhivipallāso. Anattani, bhikkhave, attāti saññāvipallāso cittavipallāso diṭṭhivipallāso. Asubhe, bhikkhave, subhanti saññāvipallāso cittavipallāso diṭṭhivipallāso. Ime kho, bhikkhave, cattāro saññāvipallāsā cittavipallāsā diṭṭhivipallāsā.
‘‘চত্তারোমে, ভিক্খৰে, নসঞ্ঞাৰিপল্লাসা নচিত্তৰিপল্লাসা নদিট্ঠিৰিপল্লাসা। কতমে চত্তারো? অনিচ্চে, ভিক্খৰে, অনিচ্চন্তি নসঞ্ঞাৰিপল্লাসো নচিত্তৰিপল্লাসো নদিট্ঠিৰিপল্লাসো। দুক্খে, ভিক্খৰে, দুক্খন্তি নসঞ্ঞাৰিপল্লাসো নচিত্তৰিপল্লাসো নদিট্ঠিৰিপল্লাসো। অনত্তনি, ভিক্খৰে, অনত্তাতি নসঞ্ঞাৰিপল্লাসো নচিত্তৰিপল্লাসো নদিট্ঠিৰিপল্লাসো। অসুভে, ভিক্খৰে, অসুভন্তি নসঞ্ঞাৰিপল্লাসো নচিত্তৰিপল্লাসো নদিট্ঠিৰিপল্লাসো। ইমে খো, ভিক্খৰে, চত্তারো নসঞ্ঞাৰিপল্লাসা নচিত্তৰিপল্লাসা নদিট্ঠিৰিপল্লাসা’’তি।
‘‘Cattārome, bhikkhave, nasaññāvipallāsā nacittavipallāsā nadiṭṭhivipallāsā. Katame cattāro? Anicce, bhikkhave, aniccanti nasaññāvipallāso nacittavipallāso nadiṭṭhivipallāso. Dukkhe, bhikkhave, dukkhanti nasaññāvipallāso nacittavipallāso nadiṭṭhivipallāso. Anattani, bhikkhave, anattāti nasaññāvipallāso nacittavipallāso nadiṭṭhivipallāso. Asubhe, bhikkhave, asubhanti nasaññāvipallāso nacittavipallāso nadiṭṭhivipallāso. Ime kho, bhikkhave, cattāro nasaññāvipallāsā nacittavipallāsā nadiṭṭhivipallāsā’’ti.
‘‘অনিচ্চে নিচ্চসঞ্ঞিনো, দুক্খে চ সুখসঞ্ঞিনো।
‘‘Anicce niccasaññino, dukkhe ca sukhasaññino;
মিচ্ছাদিট্ঠিহতা সত্তা, খিত্তচিত্তা ৰিসঞ্ঞিনো॥
Micchādiṭṭhihatā sattā, khittacittā visaññino.
‘‘তে যোগযুত্তা মারস্স, অযোগক্খেমিনো জনা।
‘‘Te yogayuttā mārassa, ayogakkhemino janā;
সত্তা গচ্ছন্তি সংসারং, জাতিমরণগামিনো॥
Sattā gacchanti saṃsāraṃ, jātimaraṇagāmino.
‘‘যদা চ বুদ্ধা লোকস্মিং, উপ্পজ্জন্তি পভঙ্করা।
‘‘Yadā ca buddhā lokasmiṃ, uppajjanti pabhaṅkarā;
তে ইমং ধম্মং পকাসেন্তি, দুক্খূপসমগামিনং॥
Te imaṃ dhammaṃ pakāsenti, dukkhūpasamagāminaṃ.
‘‘তেসং সুত্ৰান সপ্পঞ্ঞা, সচিত্তং পচ্চলদ্ধু 5 তে।
‘‘Tesaṃ sutvāna sappaññā, sacittaṃ paccaladdhu 6 te;
অনিচ্চং অনিচ্চতো দক্খুং, দুক্খমদ্দক্খু দুক্খতো॥
Aniccaṃ aniccato dakkhuṃ, dukkhamaddakkhu dukkhato.
‘‘অনত্তনি অনত্তাতি, অসুভং অসুভতদ্দসুং।
‘‘Anattani anattāti, asubhaṃ asubhataddasuṃ;
সম্মাদিট্ঠিসমাদানা, সব্বং দুক্খং উপচ্চগু’’ন্তি॥
Sammādiṭṭhisamādānā, sabbaṃ dukkhaṃ upaccagu’’nti.
ইমে চত্তারো ৰিপল্লাসা দিট্ঠিসম্পন্নস্স পুগ্গলস্স পহীনা, অপ্পহীনাতি। কেচি পহীনা, কেচি অপ্পহীনা? অনিচ্চে নিচ্চন্তি সঞ্ঞাৰিপল্লাসো চিত্তৰিপল্লাসো দিট্ঠিৰিপল্লাসো পহীনো। দুক্খে সুখন্তি সঞ্ঞা উপ্পজ্জতি, চিত্তং উপ্পজ্জতি, দিট্ঠিৰিপল্লাসো পহীনো। অনত্তনি অত্তাতি সঞ্ঞাৰিপল্লাসো চিত্তৰিপল্লাসো দিট্ঠিৰিপল্লাসো পহীনো। অসুভে সুভন্তি সঞ্ঞা উপ্পজ্জতি, চিত্তং উপ্পজ্জতি, দিট্ঠিৰিপল্লাসো পহীনো। দ্ৰীসু ৰত্থূসু ছ ৰিপল্লাসা পহীনা । দ্ৰীসু ৰত্থূসু দ্ৰে ৰিপল্লাসা পহীনা, চত্তারো ৰিপল্লাসা অপ্পহীনা। চতূসু ৰত্থূসু অট্ঠ ৰিপল্লাসা পহীনা, চত্তারো ৰিপল্লাসা অপ্পহীনাতি।
Ime cattāro vipallāsā diṭṭhisampannassa puggalassa pahīnā, appahīnāti. Keci pahīnā, keci appahīnā? Anicce niccanti saññāvipallāso cittavipallāso diṭṭhivipallāso pahīno. Dukkhe sukhanti saññā uppajjati, cittaṃ uppajjati, diṭṭhivipallāso pahīno. Anattani attāti saññāvipallāso cittavipallāso diṭṭhivipallāso pahīno. Asubhe subhanti saññā uppajjati, cittaṃ uppajjati, diṭṭhivipallāso pahīno. Dvīsu vatthūsu cha vipallāsā pahīnā . Dvīsu vatthūsu dve vipallāsā pahīnā, cattāro vipallāsā appahīnā. Catūsu vatthūsu aṭṭha vipallāsā pahīnā, cattāro vipallāsā appahīnāti.
ৰিপল্লাসকথা নিট্ঠিতা।
Vipallāsakathā niṭṭhitā.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / পটিসম্ভিদামগ্গ-অট্ঠকথা • Paṭisambhidāmagga-aṭṭhakathā / ৰিপল্লাসকথাৰণ্ণনা • Vipallāsakathāvaṇṇanā
