| Library / Tipiṭaka / ਤਿਪਿਟਕ • Tipiṭaka / ਪਟਿਸਮ੍ਭਿਦਾਮਗ੍ਗ-ਅਟ੍ਠਕਥਾ • Paṭisambhidāmagga-aṭṭhakathā |
੮. વਿਪਲ੍ਲਾਸਕਥਾ
8. Vipallāsakathā
વਿਪਲ੍ਲਾਸਕਥਾવਣ੍ਣਨਾ
Vipallāsakathāvaṇṇanā
੨੩੬. ਇਦਾਨਿ ਤਸ੍ਸ ਕਮ੍ਮਸ੍ਸ ਪਚ੍ਚਯਭੂਤੇ વਿਪਲ੍ਲਾਸੇ ਦਸ੍ਸੇਨ੍ਤੇਨ ਕਥਿਤਾਯ ਸੁਤ੍ਤਨ੍ਤਪੁਬ੍ਬਙ੍ਗਮਾਯ વਿਪਲ੍ਲਾਸਕਥਾਯ ਅਪੁਬ੍ਬਤ੍ਥਾਨੁવਣ੍ਣਨਾ। ਸੁਤ੍ਤਨ੍ਤੇ ਤਾવ ਸਞ੍ਞਾવਿਪਲ੍ਲਾਸਾਤਿ ਸਞ੍ਞਾਯ વਿਪਲ੍ਲਤ੍ਥਭਾવਾ વਿਪਰੀਤਭਾવਾ, વਿਪਰੀਤਸਞ੍ਞਾਤਿ ਅਤ੍ਥੋ। ਸੇਸਦ੍વਯੇਸੁਪਿ ਏਸੇવ ਨਯੋ। ਚਿਤ੍ਤਕਿਚ੍ਚਸ੍ਸ ਦੁਬ੍ਬਲਟ੍ਠਾਨੇ ਦਿਟ੍ਠਿવਿਰਹਿਤਾਯ ਅਕੁਸਲਸਞ੍ਞਾਯ ਸਕਕਿਚ੍ਚਸ੍ਸ ਬਲવਕਾਲੇ ਸਞ੍ਞਾવਿਪਲ੍ਲਾਸੋ। ਦਿਟ੍ਠਿવਿਰਹਿਤਸ੍ਸੇવ ਅਕੁਸਲਚਿਤ੍ਤਸ੍ਸ ਸਕਕਿਚ੍ਚਸ੍ਸ ਬਲવਕਾਲੇ ਚਿਤ੍ਤવਿਪਲ੍ਲਾਸੋ। ਦਿਟ੍ਠਿਸਮ੍ਪਯੁਤ੍ਤੇ ਚਿਤ੍ਤੇ ਦਿਟ੍ਠਿવਿਪਲ੍ਲਾਸੋ। ਤਸ੍ਮਾ ਸਬ੍ਬਦੁਬ੍ਬਲੋ ਸਞ੍ਞਾવਿਪਲ੍ਲਾਸੋ, ਤਤੋ ਬਲવਤਰੋ ਚਿਤ੍ਤવਿਪਲ੍ਲਾਸੋ, ਸਬ੍ਬਬਲવਤਰੋ ਦਿਟ੍ਠਿવਿਪਲ੍ਲਾਸੋ। ਅਜਾਤਬੁਦ੍ਧਿਦਾਰਕਸ੍ਸ ਕਹਾਪਣਦਸ੍ਸਨਂ વਿਯ ਹਿ ਸਞ੍ਞਾ ਆਰਮ੍ਮਣਸ੍ਸ ਉਪਟ੍ਠਾਨਾਕਾਰਮਤ੍ਤਗ੍ਗਹਣਤੋ। ਗਾਮਿਕਪੁਰਿਸਸ੍ਸ ਕਹਾਪਣਦਸ੍ਸਨਂ વਿਯ ਚਿਤ੍ਤਂ ਲਕ੍ਖਣਪਟਿવੇਧਸ੍ਸਾਪਿ ਸਮ੍ਪਾਪਨਤੋ। ਕਮ੍ਮਾਰਸ੍ਸ ਮਹਾਸਣ੍ਡਾਸੇਨ ਅਯੋਗਹਣਂ વਿਯ ਦਿਟ੍ਠਿ ਅਭਿਨਿવਿਸ੍ਸ ਪਰਾਮਸਨਤੋ। ਅਨਿਚ੍ਚੇ ਨਿਚ੍ਚਨ੍ਤਿ ਸਞ੍ਞਾવਿਪਲ੍ਲਾਸੋਤਿ ਅਨਿਚ੍ਚੇ વਤ੍ਥੁਸ੍ਮਿਂ ‘‘ਨਿਚ੍ਚਂ ਇਦ’’ਨ੍ਤਿ ਏવਂ ਗਹੇਤ੍વਾ ਉਪ੍ਪਜ੍ਜਨਕਸਞ੍ਞਾ ਸਞ੍ਞਾવਿਪਲ੍ਲਾਸੋ। ਇਮਿਨਾ ਨਯੇਨ ਸਬ੍ਬਪਦੇਸੁ ਅਤ੍ਥੋ વੇਦਿਤਬ੍ਬੋ। ਨ ਸਞ੍ਞਾવਿਪਲ੍ਲਾਸੋ ਨ ਚਿਤ੍ਤવਿਪਲ੍ਲਾਸੋ ਨ ਦਿਟ੍ਠਿવਿਪਲ੍ਲਾਸੋਤਿ ਚਤੂਸੁ વਤ੍ਥੂਸੁ ਦ੍વਾਦਸਨ੍ਨਂ વਿਪਲ੍ਲਾਸਗ੍ਗਾਹਾਨਂ ਅਭਾવਾ ਯਾਥਾવਗ੍ਗਹਣਂ વੁਤ੍ਤਂ।
236. Idāni tassa kammassa paccayabhūte vipallāse dassentena kathitāya suttantapubbaṅgamāya vipallāsakathāya apubbatthānuvaṇṇanā. Suttante tāva saññāvipallāsāti saññāya vipallatthabhāvā viparītabhāvā, viparītasaññāti attho. Sesadvayesupi eseva nayo. Cittakiccassa dubbalaṭṭhāne diṭṭhivirahitāya akusalasaññāya sakakiccassa balavakāle saññāvipallāso. Diṭṭhivirahitasseva akusalacittassa sakakiccassa balavakāle cittavipallāso. Diṭṭhisampayutte citte diṭṭhivipallāso. Tasmā sabbadubbalo saññāvipallāso, tato balavataro cittavipallāso, sabbabalavataro diṭṭhivipallāso. Ajātabuddhidārakassa kahāpaṇadassanaṃ viya hi saññā ārammaṇassa upaṭṭhānākāramattaggahaṇato. Gāmikapurisassa kahāpaṇadassanaṃ viya cittaṃ lakkhaṇapaṭivedhassāpi sampāpanato. Kammārassa mahāsaṇḍāsena ayogahaṇaṃ viya diṭṭhi abhinivissa parāmasanato. Anicce niccanti saññāvipallāsoti anicce vatthusmiṃ ‘‘niccaṃ ida’’nti evaṃ gahetvā uppajjanakasaññā saññāvipallāso. Iminā nayena sabbapadesu attho veditabbo. Na saññāvipallāso na cittavipallāso na diṭṭhivipallāsoti catūsu vatthūsu dvādasannaṃ vipallāsaggāhānaṃ abhāvā yāthāvaggahaṇaṃ vuttaṃ.
ਗਾਥਾਸੁ ਅਨਤ੍ਤਨਿ ਚ ਅਤ੍ਤਾਤਿ ਅਨਤ੍ਤਨਿ ਅਤ੍ਤਾਤਿ ਏવਂਸਞ੍ਞਿਨੋਤਿ ਅਤ੍ਥੋ। ਮਿਚ੍ਛਾਦਿਟ੍ਠਿਹਤਾਤਿ ਨ ਕੇવਲਂ ਸਞ੍ਞਿਨੋવ, ਸਞ੍ਞਾਯ વਿਯ ਉਪ੍ਪਜ੍ਜਮਾਨਾਯ ਮਿਚ੍ਛਾਦਿਟ੍ਠਿਯਾਪਿ ਹਤਾ। ਖਿਤ੍ਤਚਿਤ੍ਤਾਤਿ ਸਞ੍ਞਾਦਿਟ੍ਠੀਹਿ વਿਯ ਉਪ੍ਪਜ੍ਜਮਾਨੇਨ ਖਿਤ੍ਤੇਨ વਿਬ੍ਭਨ੍ਤੇਨ ਚਿਤ੍ਤੇਨ ਸਮਨ੍ਨਾਗਤਾ। વਿਸਞ੍ਞਿਨੋਤਿ ਦੇਸਨਾਮਤ੍ਤਮੇਤਂ, વਿਪਰੀਤਸਞ੍ਞਾਚਿਤ੍ਤਦਿਟ੍ਠਿਨੋਤਿ ਅਤ੍ਥੋ। ਅਥ વਾ ਸਞ੍ਞਾਪੁਬ੍ਬਙ੍ਗਮਤ੍ਤਾ ਦਿਟ੍ਠਿਯਾ ਪਠਮਂ ਚਤੂਹਿ ਪਦੇਹਿ ਸਞ੍ਞਾવਿਪਲ੍ਲਾਸੋ વੁਤ੍ਤੋ, ਤਤੋ ਮਿਚ੍ਛਾਦਿਟ੍ਠਿਹਤਾਤਿ ਦਿਟ੍ਠਿવਿਪਲ੍ਲਾਸੋ, ਖਿਤ੍ਤਚਿਤ੍ਤਾਤਿ ਚਿਤ੍ਤવਿਪਲ੍ਲਾਸੋ। વਿਸਞ੍ਞਿਨੋਤਿ ਤੀਹਿ વਿਪਲ੍ਲਾਸਗ੍ਗਾਹੇਹਿ ਪਕਤਿਸਞ੍ਞਾવਿਰਹਿਤਾ ਮੋਹਂ ਗਤਾ ‘‘ਮੁਚ੍ਛਿਤੋ વਿਸવੇਗੇਨ, વਿਸਞ੍ਞੀ ਸਮਪਜ੍ਜਥਾ’’ਤਿਏਤ੍ਥ (ਜਾ॰ ੨.੨੨.੩੨੮) વਿਯ। ਤੇ ਯੋਗਯੁਤ੍ਤਾ ਮਾਰਸ੍ਸਾਤਿ ਤੇ ਜਨਾ ਸਤ੍ਤਾ ਮਾਰਸ੍ਸ ਯੋਗੇ ਯੁਤ੍ਤਾ ਨਾਮ ਹੋਨ੍ਤਿ। ਅਯੋਗਕ੍ਖੇਮਿਨੋਤਿ ਚਤੂਹਿ ਯੋਗੇਹਿ ਈਤੀਹਿ ਖੇਮਂ ਨਿਬ੍ਬਾਨਂ ਅਪ੍ਪਤ੍ਤਾ। ਸਤ੍ਤਾ ਗਚ੍ਛਨ੍ਤਿ ਸਂਸਾਰਨ੍ਤਿ ਤੇਯੇવ ਪੁਗ੍ਗਲਾ ਸਂਸਾਰਂ ਸਂਸਰਨ੍ਤਿ। ਕਸ੍ਮਾ? ਜਾਤਿਮਰਣਗਾਮਿਨੋ ਹਿ ਤੇ, ਤਸ੍ਮਾ ਸਂਸਰਨ੍ਤੀਤਿ ਅਤ੍ਥੋ। ਬੁਦ੍ਧਾਤਿ ਚਤੁਸਚ੍ਚਬੁਦ੍ਧਾ ਸਬ੍ਬਞ੍ਞੁਨੋ। ਕਾਲਤ੍ਤਯਸਾਧਾਰਣવਸੇਨ ਬਹੁવਚਨਂ। ਲੋਕਸ੍ਮਿਨ੍ਤਿ ਓਕਾਸਲੋਕੇ। ਪਭਙ੍ਕਰਾਤਿ ਲੋਕਸ੍ਸ ਪਞ੍ਞਾਲੋਕਂ ਕਰਾ। ਇਮਂ ਧਮ੍ਮਂ ਪਕਾਸੇਨ੍ਤੀਤਿ વਿਪਲ੍ਲਾਸਪ੍ਪਹਾਨਂ ਧਮ੍ਮਂ ਜੋਤੇਨ੍ਤਿ। ਦੁਕ੍ਖੂਪਸਮਗਾਮਿਨਨ੍ਤਿ ਦੁਕ੍ਖવੂਪਸਮਂ ਨਿਬ੍ਬਾਨਂ ਗਚ੍ਛਨ੍ਤਂ। ਤੇਸਂ ਸੁਤ੍વਾਨਾਤਿ ਤੇਸਂ ਬੁਦ੍ਧਾਨਂ ਧਮ੍ਮਂ ਸੁਤ੍વਾਨ। ਸਪ੍ਪਞ੍ਞਾਤਿ ਭਬ੍ਬਭੂਤਾ ਪਞ੍ਞવਨ੍ਤੋ। ਸਚਿਤ੍ਤਂ ਪਚ੍ਚਲਦ੍ਧੂਤਿ વਿਪਲ੍ਲਾਸવਜ੍ਜਿਤਂ ਸਕਚਿਤ੍ਤਂ ਪਟਿਲਭਿਤ੍વਾ। ਪਟਿਅਲਦ੍ਧੂਤਿ ਪਦਚ੍ਛੇਦੋ। ਅਥ વਾ ਪਟਿਲਭਿਂਸੁ ਪਟਿਅਲਦ੍ਧੁਨ੍ਤਿ ਪਦਚ੍ਛੇਦੋ। ਅਨਿਚ੍ਚਤੋ ਦਕ੍ਖੁਨ੍ਤਿ ਅਨਿਚ੍ਚવਸੇਨੇવ ਅਦ੍ਦਸਂਸੁ। ਅਨਤ੍ਤਨਿ ਅਨਤ੍ਤਾਤਿ ਅਨਤ੍ਤਾਨਂ ਅਨਤ੍ਤਾਤਿ ਅਦ੍ਦਕ੍ਖੁਂ। ਅਥ વਾ ਅਨਤ੍ਤਨਿ વਤ੍ਥੁਸ੍ਮਿਂ ਅਤ੍ਤਾ ਨਤ੍ਥੀਤਿ ਅਦ੍ਦਕ੍ਖੁਂ। ਸਮ੍ਮਾਦਿਟ੍ਠਿਸਮਾਦਾਨਾਤਿ ਗਹਿਤਸਮ੍ਮਾਦਸ੍ਸਨਾ। ਸਬ੍ਬਂ ਦੁਕ੍ਖਂ ਉਪਚ੍ਚਗੁਨ੍ਤਿ ਸਕਲਂ વਟ੍ਟਦੁਕ੍ਖਂ ਸਮਤਿਕ੍ਕਨ੍ਤਾ।
Gāthāsu anattani ca attāti anattani attāti evaṃsaññinoti attho. Micchādiṭṭhihatāti na kevalaṃ saññinova, saññāya viya uppajjamānāya micchādiṭṭhiyāpi hatā. Khittacittāti saññādiṭṭhīhi viya uppajjamānena khittena vibbhantena cittena samannāgatā. Visaññinoti desanāmattametaṃ, viparītasaññācittadiṭṭhinoti attho. Atha vā saññāpubbaṅgamattā diṭṭhiyā paṭhamaṃ catūhi padehi saññāvipallāso vutto, tato micchādiṭṭhihatāti diṭṭhivipallāso, khittacittāti cittavipallāso. Visaññinoti tīhi vipallāsaggāhehi pakatisaññāvirahitā mohaṃ gatā ‘‘mucchito visavegena, visaññī samapajjathā’’tiettha (jā. 2.22.328) viya. Te yogayuttā mārassāti te janā sattā mārassa yoge yuttā nāma honti. Ayogakkheminoti catūhi yogehi ītīhi khemaṃ nibbānaṃ appattā. Sattā gacchanti saṃsāranti teyeva puggalā saṃsāraṃ saṃsaranti. Kasmā? Jātimaraṇagāmino hi te, tasmā saṃsarantīti attho. Buddhāti catusaccabuddhā sabbaññuno. Kālattayasādhāraṇavasena bahuvacanaṃ. Lokasminti okāsaloke. Pabhaṅkarāti lokassa paññālokaṃ karā. Imaṃ dhammaṃ pakāsentīti vipallāsappahānaṃ dhammaṃ jotenti. Dukkhūpasamagāminanti dukkhavūpasamaṃ nibbānaṃ gacchantaṃ. Tesaṃ sutvānāti tesaṃ buddhānaṃ dhammaṃ sutvāna. Sappaññāti bhabbabhūtā paññavanto. Sacittaṃ paccaladdhūti vipallāsavajjitaṃ sakacittaṃ paṭilabhitvā. Paṭialaddhūti padacchedo. Atha vā paṭilabhiṃsu paṭialaddhunti padacchedo. Aniccato dakkhunti aniccavaseneva addasaṃsu. Anattani anattāti anattānaṃ anattāti addakkhuṃ. Atha vā anattani vatthusmiṃ attā natthīti addakkhuṃ. Sammādiṭṭhisamādānāti gahitasammādassanā. Sabbaṃ dukkhaṃ upaccagunti sakalaṃ vaṭṭadukkhaṃ samatikkantā.
ਪਹੀਨਾਪਹੀਨਪੁਚ੍ਛਾਯ ਦਿਟ੍ਠਿਸਮ੍ਪਨ੍ਨਸ੍ਸਾਤਿ ਸੋਤਾਪਨ੍ਨਸ੍ਸ। ਦੁਕ੍ਖੇ ਸੁਖਨ੍ਤਿ ਸਞ੍ਞਾ ਉਪ੍ਪਜ੍ਜਤਿ। ਚਿਤ੍ਤਂ ਉਪ੍ਪਜ੍ਜਤੀਤਿ ਮੋਹਕਾਲੁਸ੍ਸਿਯਸ੍ਸ ਅਪ੍ਪਹੀਨਤ੍ਤਾ ਸਞ੍ਞਾਮਤ੍ਤਂ વਾ ਚਿਤ੍ਤਮਤ੍ਤਂ વਾ ਉਪ੍ਪਜ੍ਜਤਿ, ਅਨਾਗਾਮਿਸ੍ਸਪਿ ਉਪ੍ਪਜ੍ਜਤਿ, ਕਿਂ ਪਨ ਸੋਤਾਪਨ੍ਨਸ੍ਸ। ਇਮੇ ਦ੍વੇ ਅਰਹਤੋਯੇવ ਪਹੀਨਾ। ਅਸੁਭੇ ਸੁਭਨ੍ਤਿ ਸਞ੍ਞਾ ਉਪ੍ਪਜ੍ਜਤਿ। ਚਿਤ੍ਤਂ ਉਪ੍ਪਜ੍ਜਤੀਤਿ ਸਕਦਾਗਾਮਿਸ੍ਸਪਿ ਉਪ੍ਪਜ੍ਜਤਿ, ਕਿਂ ਪਨ ਸੋਤਾਪਨ੍ਨਸ੍ਸ। ਇਮੇ ਦ੍વੇ ਅਨਾਗਾਮਿਸ੍ਸ ਪਹੀਨਾਤਿ ਅਟ੍ਠਕਥਾਯਂ વੁਤ੍ਤਂ। ਤਸ੍ਮਾ ਇਦਂ ਦ੍વਯਂ ਸੋਤਾਪਨ੍ਨਸਕਦਾਗਾਮਿਨੋ ਸਨ੍ਧਾਯ વੁਤ੍ਤਨ੍ਤਿ વੇਦਿਤਬ੍ਬਂ। ਅਨਾਗਾਮਿਨੋ ਕਾਮਰਾਗਸ੍ਸ ਪਹੀਨਤ੍ਤਾ ‘‘ਅਸੁਭੇ ਸੁਭ’’ਨ੍ਤਿ ਸਞ੍ਞਾਚਿਤ੍ਤવਿਪਲ੍ਲਾਸਾਨਞ੍ਚ ਪਹਾਨਂ વੁਤ੍ਤਨ੍ਤਿ વੇਦਿਤਬ੍ਬਂ। ਦ੍વੀਸੁ વਤ੍ਥੂਸੂਤਿਆਦੀਹਿ ਪਦੇਹਿ ਪਹੀਨਾਪਹੀਨੇ ਨਿਗਮੇਤ੍વਾ ਦਸ੍ਸੇਤਿ। ਤਤ੍ਥ ‘‘ਅਨਿਚ੍ਚੇ ਨਿਚ੍ਚ’’ਨ੍ਤਿ, ‘‘ਅਨਤ੍ਤਨਿ ਅਤ੍ਤਾ’’ਤਿ ਇਮੇਸੁ ਦ੍વੀਸੁ વਤ੍ਥੂਸੁ ਛ વਿਪਲ੍ਲਾਸਾ ਪਹੀਨਾ। ‘‘ਦੁਕ੍ਖੇ ਸੁਖ’’ਨ੍ਤਿ, ‘‘ਅਸੁਭੇ ਸੁਭ’’ਨ੍ਤਿ ਇਮੇਸੁ ਦ੍વੀਸੁ વਤ੍ਥੂਸੁ ਦ੍વੇ ਦਿਟ੍ਠਿવਿਪਲ੍ਲਾਸਾ ਪਹੀਨਾ। ਕੇਸੁਚਿ ਪੋਤ੍ਥਕੇਸੁ ਦ੍વੇਤਿ ਪਠਮਂ ਲਿਖਿਤਂ, ਪਚ੍ਛਾ ਛਾਤਿ। ਚਤੂਸੁ વਤ੍ਥੂਸੂਤਿ ਚਤ੍ਤਾਰਿ ਏਕਤੋ ਕਤ੍વਾ વੁਤ੍ਤਂ। ਅਟ੍ਠਾਤਿ ਦ੍વੀਸੁ ਛ, ਦ੍વੀਸੁ ਦ੍વੇਤਿ ਅਟ੍ਠ। ਚਤ੍ਤਾਰੋਤਿ ਦੁਕ੍ਖਾਸੁਭવਤ੍ਥੂਸੁ ਏਕੇਕਸ੍ਮਿਂ ਦ੍વੇ ਦ੍વੇ ਸਞ੍ਞਾਚਿਤ੍ਤવਿਪਲ੍ਲਾਸਾਤਿ ਚਤ੍ਤਾਰੋ। ਕੇਸੁਚਿ ਪੋਤ੍ਥਕੇਸੁ ‘‘ਛ ਦ੍વੀਸੂ’’ਤਿ વੁਤ੍ਤਟ੍ਠਾਨੇਸੁਪਿ ਏવਮੇવ ਲਿਖਿਤਨ੍ਤਿ।
Pahīnāpahīnapucchāya diṭṭhisampannassāti sotāpannassa. Dukkhe sukhanti saññā uppajjati. Cittaṃ uppajjatīti mohakālussiyassa appahīnattā saññāmattaṃ vā cittamattaṃ vā uppajjati, anāgāmissapi uppajjati, kiṃ pana sotāpannassa. Ime dve arahatoyeva pahīnā. Asubhe subhanti saññā uppajjati. Cittaṃ uppajjatīti sakadāgāmissapi uppajjati, kiṃ pana sotāpannassa. Ime dve anāgāmissa pahīnāti aṭṭhakathāyaṃ vuttaṃ. Tasmā idaṃ dvayaṃ sotāpannasakadāgāmino sandhāya vuttanti veditabbaṃ. Anāgāmino kāmarāgassa pahīnattā ‘‘asubhe subha’’nti saññācittavipallāsānañca pahānaṃ vuttanti veditabbaṃ. Dvīsuvatthūsūtiādīhi padehi pahīnāpahīne nigametvā dasseti. Tattha ‘‘anicce nicca’’nti, ‘‘anattani attā’’ti imesu dvīsu vatthūsu cha vipallāsā pahīnā. ‘‘Dukkhe sukha’’nti, ‘‘asubhe subha’’nti imesu dvīsu vatthūsu dve diṭṭhivipallāsā pahīnā. Kesuci potthakesu dveti paṭhamaṃ likhitaṃ, pacchā chāti. Catūsu vatthūsūti cattāri ekato katvā vuttaṃ. Aṭṭhāti dvīsu cha, dvīsu dveti aṭṭha. Cattāroti dukkhāsubhavatthūsu ekekasmiṃ dve dve saññācittavipallāsāti cattāro. Kesuci potthakesu ‘‘cha dvīsū’’ti vuttaṭṭhānesupi evameva likhitanti.
વਿਪਲ੍ਲਾਸਕਥਾવਣ੍ਣਨਾ ਨਿਟ੍ਠਿਤਾ।
Vipallāsakathāvaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਖੁਦ੍ਦਕਨਿਕਾਯ • Khuddakanikāya / ਪਟਿਸਮ੍ਭਿਦਾਮਗ੍ਗਪਾਲ਼ਿ • Paṭisambhidāmaggapāḷi / ੮. વਿਪਲ੍ਲਾਸਕਥਾ • 8. Vipallāsakathā
