Library / Tipiṭaka / ติปิฎก • Tipiṭaka / องฺคุตฺตรนิกาย • Aṅguttaranikāya

    ๙. วิปลฺลาสสุตฺตํ

    9. Vipallāsasuttaṃ

    ๔๙. ‘‘จตฺตาโรเม , ภิกฺขเว, สญฺญาวิปลฺลาสา จิตฺตวิปลฺลาสา ทิฎฺฐิวิปลฺลาสา ฯ กตเม จตฺตาโร? อนิเจฺจ, ภิกฺขเว, นิจฺจนฺติ สญฺญาวิปลฺลาโส จิตฺตวิปลฺลาโส ทิฎฺฐิวิปลฺลาโส; ทุเกฺข, ภิกฺขเว, สุขนฺติ สญฺญาวิปลฺลาโส จิตฺตวิปลฺลาโส ทิฎฺฐิวิปลฺลาโส; อนตฺตนิ, ภิกฺขเว, อตฺตาติ สญฺญาวิปลฺลาโส จิตฺตวิปลฺลาโส ทิฎฺฐิวิปลฺลาโส; อสุเภ, ภิกฺขเว, สุภนฺติ สญฺญาวิปลฺลาโส จิตฺตวิปลฺลาโส ทิฎฺฐิวิปลฺลาโสฯ อิเม โข, ภิกฺขเว, จตฺตาโร สญฺญาวิปลฺลาสา จิตฺตวิปลฺลาสา ทิฎฺฐิวิปลฺลาสาฯ

    49. ‘‘Cattārome , bhikkhave, saññāvipallāsā cittavipallāsā diṭṭhivipallāsā . Katame cattāro? Anicce, bhikkhave, niccanti saññāvipallāso cittavipallāso diṭṭhivipallāso; dukkhe, bhikkhave, sukhanti saññāvipallāso cittavipallāso diṭṭhivipallāso; anattani, bhikkhave, attāti saññāvipallāso cittavipallāso diṭṭhivipallāso; asubhe, bhikkhave, subhanti saññāvipallāso cittavipallāso diṭṭhivipallāso. Ime kho, bhikkhave, cattāro saññāvipallāsā cittavipallāsā diṭṭhivipallāsā.

    ‘‘จตฺตาโรเม, ภิกฺขเว, นสญฺญาวิปลฺลาสา นจิตฺตวิปลฺลาสา นทิฎฺฐิวิปลฺลาสาฯ กตเม จตฺตาโร? อนิเจฺจ, ภิกฺขเว, อนิจฺจนฺติ นสญฺญาวิปลฺลาโส นจิตฺตวิปลฺลาโส นทิฎฺฐิวิปลฺลาโส; ทุเกฺข, ภิกฺขเว, ทุกฺขนฺติ นสญฺญาวิปลฺลาโส นจิตฺตวิปลฺลาโส นทิฎฺฐิวิปลฺลาโส; อนตฺตนิ, ภิกฺขเว, อนตฺตาติ นสญฺญาวิปลฺลาโส นจิตฺตวิปลฺลาโส นทิฎฺฐิวิปลฺลาโส; อสุเภ, ภิกฺขเว, อสุภนฺติ นสญฺญาวิปลฺลาโส นจิตฺตวิปลฺลาโส นทิฎฺฐิวิปลฺลาโส ฯ อิเม โข, ภิกฺขเว, จตฺตาโร นสญฺญาวิปลฺลาสา นจิตฺตวิปลฺลาสา นทิฎฺฐิวิปลฺลาสา’’ติฯ

    ‘‘Cattārome, bhikkhave, nasaññāvipallāsā nacittavipallāsā nadiṭṭhivipallāsā. Katame cattāro? Anicce, bhikkhave, aniccanti nasaññāvipallāso nacittavipallāso nadiṭṭhivipallāso; dukkhe, bhikkhave, dukkhanti nasaññāvipallāso nacittavipallāso nadiṭṭhivipallāso; anattani, bhikkhave, anattāti nasaññāvipallāso nacittavipallāso nadiṭṭhivipallāso; asubhe, bhikkhave, asubhanti nasaññāvipallāso nacittavipallāso nadiṭṭhivipallāso . Ime kho, bhikkhave, cattāro nasaññāvipallāsā nacittavipallāsā nadiṭṭhivipallāsā’’ti.

    ‘‘อนิเจฺจ นิจฺจสญฺญิโน, ทุเกฺข จ สุขสญฺญิโน;

    ‘‘Anicce niccasaññino, dukkhe ca sukhasaññino;

    อนตฺตนิ จ อตฺตาติ, อสุเภ สุภสญฺญิโน;

    Anattani ca attāti, asubhe subhasaññino;

    มิจฺฉาทิฎฺฐิหตา สตฺตา, ขิตฺตจิตฺตา วิสญฺญิโนฯ

    Micchādiṭṭhihatā sattā, khittacittā visaññino.

    ‘‘เต โยคยุตฺตา มารสฺส, อโยคเกฺขมิโน ชนา;

    ‘‘Te yogayuttā mārassa, ayogakkhemino janā;

    สตฺตา คจฺฉนฺติ สํสารํ, ชาติมรณคามิโนฯ

    Sattā gacchanti saṃsāraṃ, jātimaraṇagāmino.

    ‘‘ยทา จ พุทฺธา โลกสฺมิํ, อุปฺปชฺชนฺติ ปภงฺกรา;

    ‘‘Yadā ca buddhā lokasmiṃ, uppajjanti pabhaṅkarā;

    เต อิมํ ธมฺมํ 1 ปกาเสนฺติ, ทุกฺขูปสมคามินํฯ

    Te imaṃ dhammaṃ 2 pakāsenti, dukkhūpasamagāminaṃ.

    ‘‘เตสํ สุตฺวาน สปฺปญฺญา, สจิตฺตํ ปจฺจลทฺธา เต;

    ‘‘Tesaṃ sutvāna sappaññā, sacittaṃ paccaladdhā te;

    อนิจฺจํ อนิจฺจโต ทกฺขุํ, ทุกฺขมทฺทกฺขุ ทุกฺขโตฯ

    Aniccaṃ aniccato dakkhuṃ, dukkhamaddakkhu dukkhato.

    ‘‘อนตฺตนิ อนตฺตาติ, อสุภํ อสุภตทฺทสุํ;

    ‘‘Anattani anattāti, asubhaṃ asubhataddasuṃ;

    สมฺมาทิฎฺฐิสมาทานา, สพฺพํ ทุกฺขํ อุปจฺจคุ’’นฺติ 3ฯ นวมํ;

    Sammādiṭṭhisamādānā, sabbaṃ dukkhaṃ upaccagu’’nti 4. navamaṃ;




    Next: ๑๐. อุปกฺกิเลสสุตฺตํ • 10. Upakkilesasuttaṃ




    Footnotes:
    1. เตมํ ธมฺมํ (สี. สฺยา. กํ.)
    2. temaṃ dhammaṃ (sī. syā. kaṃ.)
    3. ปฎิ. ม. ๑.๒๓๖
    4. paṭi. ma. 1.236



    Related texts:



    อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / องฺคุตฺตรนิกาย (อฎฺฐกถา) • Aṅguttaranikāya (aṭṭhakathā) / ๙. วิปลฺลาสสุตฺตวณฺณนา • 9. Vipallāsasuttavaṇṇanā

    ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / องฺคุตฺตรนิกาย (ฎีกา) • Aṅguttaranikāya (ṭīkā) / ๙. วิปลฺลาสสุตฺตวณฺณนา • 9. Vipallāsasuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact