| Library / Tipiṭaka / तिपिटक • Tipiṭaka / अङ्गुत्तरनिकाय (अट्ठकथा) • Aṅguttaranikāya (aṭṭhakathā) |
९. विपल्लाससुत्तवण्णना
9. Vipallāsasuttavaṇṇanā
४९. नवमे सञ्ञाविपल्लासाति सञ्ञाय विपल्लत्थभावा, चतस्सो विपरीतसञ्ञायोति अत्थो। सेसपदद्वयेपि एसेव नयो। अनिच्चे, भिक्खवे, निच्चन्ति सञ्ञाविपल्लासोति अनिच्चे वत्थुस्मिं ‘‘निच्चं इद’’न्ति एवं गहेत्वा उप्पज्जनकसञ्ञा, सञ्ञाविपल्लासोति अत्थो। इमिना नयेन सब्बपदेसु अत्थो वेदितब्बो।
49. Navame saññāvipallāsāti saññāya vipallatthabhāvā, catasso viparītasaññāyoti attho. Sesapadadvayepi eseva nayo. Anicce, bhikkhave, niccanti saññāvipallāsoti anicce vatthusmiṃ ‘‘niccaṃ ida’’nti evaṃ gahetvā uppajjanakasaññā, saññāvipallāsoti attho. Iminā nayena sabbapadesu attho veditabbo.
अनत्तनि च अत्ताति अनत्तनि ‘‘अत्ता’’ति एवंसञ्ञिनोति अत्थो। मिच्छादिट्ठिहताति न केवलं सञ्ञिनोव, सञ्ञाय विय उप्पज्जमानाय मिच्छादिट्ठियापि हता। खित्तचित्ताति ते सञ्ञादिट्ठियो विय उप्पज्जमानेन खित्तेन चित्तेन समन्नागता। विसञ्ञिनोति देसनामत्तमेतं, विपरीतसञ्ञाचित्तदिट्ठिनोति अत्थो। ते योगयुत्ता मारस्साति ते मारस्स योगे युत्ता नाम होन्ति। अयोगक्खेमिनोति चतूहि योगेहि खेमं निब्बानं अप्पत्ता। सत्ताति पुग्गला। बुद्धाति चतुसच्चबुद्धा। इमं धम्मन्ति चतुसच्चधम्मं। सचित्तं पच्चलद्धाति सकं चित्तं पटिलभित्वा। अनिच्चतो दक्खुन्ति अनिच्चभावेन अद्दसंसु। असुभतद्दसुन्ति असुभं असुभतोयेव अद्दसंसु। सम्मादिट्ठिसमादानाति गहितसम्मादस्सना। सब्बं दुक्खं उपच्चगुन्ति सकलं वट्टदुक्खं समतिक्कन्ता।
Anattani ca attāti anattani ‘‘attā’’ti evaṃsaññinoti attho. Micchādiṭṭhihatāti na kevalaṃ saññinova, saññāya viya uppajjamānāya micchādiṭṭhiyāpi hatā. Khittacittāti te saññādiṭṭhiyo viya uppajjamānena khittena cittena samannāgatā. Visaññinoti desanāmattametaṃ, viparītasaññācittadiṭṭhinoti attho. Te yogayuttā mārassāti te mārassa yoge yuttā nāma honti. Ayogakkheminoti catūhi yogehi khemaṃ nibbānaṃ appattā. Sattāti puggalā. Buddhāti catusaccabuddhā. Imaṃ dhammanti catusaccadhammaṃ. Sacittaṃ paccaladdhāti sakaṃ cittaṃ paṭilabhitvā. Aniccato dakkhunti aniccabhāvena addasaṃsu. Asubhataddasunti asubhaṃ asubhatoyeva addasaṃsu. Sammādiṭṭhisamādānāti gahitasammādassanā. Sabbaṃ dukkhaṃ upaccagunti sakalaṃ vaṭṭadukkhaṃ samatikkantā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / अङ्गुत्तरनिकाय • Aṅguttaranikāya / ९. विपल्लाससुत्तं • 9. Vipallāsasuttaṃ
टीका • Tīkā / सुत्तपिटक (टीका) • Suttapiṭaka (ṭīkā) / अङ्गुत्तरनिकाय (टीका) • Aṅguttaranikāya (ṭīkā) / ९. विपल्लाससुत्तवण्णना • 9. Vipallāsasuttavaṇṇanā
