| Library / Tipiṭaka / ติปิฎก • Tipiṭaka / องฺคุตฺตรนิกาย (อฎฺฐกถา) • Aṅguttaranikāya (aṭṭhakathā) |
๙. วิปลฺลาสสุตฺตวณฺณนา
9. Vipallāsasuttavaṇṇanā
๔๙. นวเม สญฺญาวิปลฺลาสาติ สญฺญาย วิปลฺลตฺถภาวา, จตโสฺส วิปรีตสญฺญาโยติ อโตฺถฯ เสสปททฺวเยปิ เอเสว นโยฯ อนิเจฺจ, ภิกฺขเว, นิจฺจนฺติ สญฺญาวิปลฺลาโสติ อนิเจฺจ วตฺถุสฺมิํ ‘‘นิจฺจํ อิท’’นฺติ เอวํ คเหตฺวา อุปฺปชฺชนกสญฺญา, สญฺญาวิปลฺลาโสติ อโตฺถฯ อิมินา นเยน สพฺพปเทสุ อโตฺถ เวทิตโพฺพฯ
49. Navame saññāvipallāsāti saññāya vipallatthabhāvā, catasso viparītasaññāyoti attho. Sesapadadvayepi eseva nayo. Anicce, bhikkhave, niccanti saññāvipallāsoti anicce vatthusmiṃ ‘‘niccaṃ ida’’nti evaṃ gahetvā uppajjanakasaññā, saññāvipallāsoti attho. Iminā nayena sabbapadesu attho veditabbo.
อนตฺตนิ จ อตฺตาติ อนตฺตนิ ‘‘อตฺตา’’ติ เอวํสญฺญิโนติ อโตฺถฯ มิจฺฉาทิฎฺฐิหตาติ น เกวลํ สญฺญิโนว, สญฺญาย วิย อุปฺปชฺชมานาย มิจฺฉาทิฎฺฐิยาปิ หตาฯ ขิตฺตจิตฺตาติ เต สญฺญาทิฎฺฐิโย วิย อุปฺปชฺชมาเนน ขิเตฺตน จิเตฺตน สมนฺนาคตาฯ วิสญฺญิโนติ เทสนามตฺตเมตํ, วิปรีตสญฺญาจิตฺตทิฎฺฐิโนติ อโตฺถฯ เต โยคยุตฺตา มารสฺสาติ เต มารสฺส โยเค ยุตฺตา นาม โหนฺติฯ อโยคเกฺขมิโนติ จตูหิ โยเคหิ เขมํ นิพฺพานํ อปฺปตฺตาฯ สตฺตาติ ปุคฺคลาฯ พุทฺธาติ จตุสจฺจพุทฺธาฯ อิมํ ธมฺมนฺติ จตุสจฺจธมฺมํฯ สจิตฺตํ ปจฺจลทฺธาติ สกํ จิตฺตํ ปฎิลภิตฺวาฯ อนิจฺจโต ทกฺขุนฺติ อนิจฺจภาเวน อทฺทสํสุฯ อสุภตทฺทสุนฺติ อสุภํ อสุภโตเยว อทฺทสํสุฯ สมฺมาทิฎฺฐิสมาทานาติ คหิตสมฺมาทสฺสนาฯ สพฺพํ ทุกฺขํ อุปจฺจคุนฺติ สกลํ วฎฺฎทุกฺขํ สมติกฺกนฺตาฯ
Anattani ca attāti anattani ‘‘attā’’ti evaṃsaññinoti attho. Micchādiṭṭhihatāti na kevalaṃ saññinova, saññāya viya uppajjamānāya micchādiṭṭhiyāpi hatā. Khittacittāti te saññādiṭṭhiyo viya uppajjamānena khittena cittena samannāgatā. Visaññinoti desanāmattametaṃ, viparītasaññācittadiṭṭhinoti attho. Te yogayuttā mārassāti te mārassa yoge yuttā nāma honti. Ayogakkheminoti catūhi yogehi khemaṃ nibbānaṃ appattā. Sattāti puggalā. Buddhāti catusaccabuddhā. Imaṃ dhammanti catusaccadhammaṃ. Sacittaṃ paccaladdhāti sakaṃ cittaṃ paṭilabhitvā. Aniccato dakkhunti aniccabhāvena addasaṃsu. Asubhataddasunti asubhaṃ asubhatoyeva addasaṃsu. Sammādiṭṭhisamādānāti gahitasammādassanā. Sabbaṃ dukkhaṃ upaccagunti sakalaṃ vaṭṭadukkhaṃ samatikkantā.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / องฺคุตฺตรนิกาย • Aṅguttaranikāya / ๙. วิปลฺลาสสุตฺตํ • 9. Vipallāsasuttaṃ
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / องฺคุตฺตรนิกาย (ฎีกา) • Aṅguttaranikāya (ṭīkā) / ๙. วิปลฺลาสสุตฺตวณฺณนา • 9. Vipallāsasuttavaṇṇanā
