| Library / Tipiṭaka / តិបិដក • Tipiṭaka / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) |
៩. វិបល្លាសសុត្តវណ្ណនា
9. Vipallāsasuttavaṇṇanā
៤៩. នវមេ សញ្ញាវិបល្លាសាតិ សញ្ញាយ វិបល្លត្ថភាវា, ចតស្សោ វិបរីតសញ្ញាយោតិ អត្ថោ។ សេសបទទ្វយេបិ ឯសេវ នយោ។ អនិច្ចេ, ភិក្ខវេ, និច្ចន្តិ សញ្ញាវិបល្លាសោតិ អនិច្ចេ វត្ថុស្មិំ ‘‘និច្ចំ ឥទ’’ន្តិ ឯវំ គហេត្វា ឧប្បជ្ជនកសញ្ញា, សញ្ញាវិបល្លាសោតិ អត្ថោ។ ឥមិនា នយេន សព្ពបទេសុ អត្ថោ វេទិតព្ពោ។
49. Navame saññāvipallāsāti saññāya vipallatthabhāvā, catasso viparītasaññāyoti attho. Sesapadadvayepi eseva nayo. Anicce, bhikkhave, niccanti saññāvipallāsoti anicce vatthusmiṃ ‘‘niccaṃ ida’’nti evaṃ gahetvā uppajjanakasaññā, saññāvipallāsoti attho. Iminā nayena sabbapadesu attho veditabbo.
អនត្តនិ ច អត្តាតិ អនត្តនិ ‘‘អត្តា’’តិ ឯវំសញ្ញិនោតិ អត្ថោ។ មិច្ឆាទិដ្ឋិហតាតិ ន កេវលំ សញ្ញិនោវ, សញ្ញាយ វិយ ឧប្បជ្ជមានាយ មិច្ឆាទិដ្ឋិយាបិ ហតា។ ខិត្តចិត្តាតិ តេ សញ្ញាទិដ្ឋិយោ វិយ ឧប្បជ្ជមានេន ខិត្តេន ចិត្តេន សមន្នាគតា។ វិសញ្ញិនោតិ ទេសនាមត្តមេតំ, វិបរីតសញ្ញាចិត្តទិដ្ឋិនោតិ អត្ថោ។ តេ យោគយុត្តា មារស្សាតិ តេ មារស្ស យោគេ យុត្តា នាម ហោន្តិ។ អយោគក្ខេមិនោតិ ចតូហិ យោគេហិ ខេមំ និព្ពានំ អប្បត្តា។ សត្តាតិ បុគ្គលា។ ពុទ្ធាតិ ចតុសច្ចពុទ្ធា។ ឥមំ ធម្មន្តិ ចតុសច្ចធម្មំ។ សចិត្តំ បច្ចលទ្ធាតិ សកំ ចិត្តំ បដិលភិត្វា។ អនិច្ចតោ ទក្ខុន្តិ អនិច្ចភាវេន អទ្ទសំសុ។ អសុភតទ្ទសុន្តិ អសុភំ អសុភតោយេវ អទ្ទសំសុ។ សម្មាទិដ្ឋិសមាទានាតិ គហិតសម្មាទស្សនា។ សព្ពំ ទុក្ខំ ឧបច្ចគុន្តិ សកលំ វដ្ដទុក្ខំ សមតិក្កន្តា។
Anattani ca attāti anattani ‘‘attā’’ti evaṃsaññinoti attho. Micchādiṭṭhihatāti na kevalaṃ saññinova, saññāya viya uppajjamānāya micchādiṭṭhiyāpi hatā. Khittacittāti te saññādiṭṭhiyo viya uppajjamānena khittena cittena samannāgatā. Visaññinoti desanāmattametaṃ, viparītasaññācittadiṭṭhinoti attho. Te yogayuttā mārassāti te mārassa yoge yuttā nāma honti. Ayogakkheminoti catūhi yogehi khemaṃ nibbānaṃ appattā. Sattāti puggalā. Buddhāti catusaccabuddhā. Imaṃ dhammanti catusaccadhammaṃ. Sacittaṃ paccaladdhāti sakaṃ cittaṃ paṭilabhitvā. Aniccato dakkhunti aniccabhāvena addasaṃsu. Asubhataddasunti asubhaṃ asubhatoyeva addasaṃsu. Sammādiṭṭhisamādānāti gahitasammādassanā. Sabbaṃ dukkhaṃ upaccagunti sakalaṃ vaṭṭadukkhaṃ samatikkantā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya / ៩. វិបល្លាសសុត្តំ • 9. Vipallāsasuttaṃ
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / ៩. វិបល្លាសសុត្តវណ្ណនា • 9. Vipallāsasuttavaṇṇanā
