| Library / Tipiṭaka / তিপিটক • Tipiṭaka / পটিসম্ভিদামগ্গপাল়ি • Paṭisambhidāmaggapāḷi |
৯. ৰিপস্সনাকথা
9. Vipassanākathā
৩৬. এৰং মে সুতং – একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তত্র খো ভগৰা ভিক্খূ আমন্তেসি – ‘‘ভিক্খৰো’’তি। ‘‘ভদন্তে’’তি তে ভিক্খূ ভগৰতো পচ্চস্সোসুং। ভগৰা এতদৰোচ –
36. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tatra kho bhagavā bhikkhū āmantesi – ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca –
‘‘সো ৰত, ভিক্খৰে, ভিক্খু কঞ্চি 1 সঙ্খারং নিচ্চতো সমনুপস্সন্তো অনুলোমিকায খন্তিযা সমন্নাগতো ভৰিস্সতীতি – নেতং ঠানং ৰিজ্জতি; অনুলোমিকায খন্তিযা অসমন্নাগতো সম্মত্তনিযামং ওক্কমিস্সতীতি – নেতং ঠানং ৰিজ্জতি; সম্মত্তনিযামং অনোক্কমমানো সোতাপত্তিফলং ৰা সকদাগামিফলং ৰা অনাগামিফলং ৰা অরহত্তং ৰা 2 সচ্ছিকরিস্সতীতি – নেতং ঠানং ৰিজ্জতি।
‘‘So vata, bhikkhave, bhikkhu kañci 3 saṅkhāraṃ niccato samanupassanto anulomikāya khantiyā samannāgato bhavissatīti – netaṃ ṭhānaṃ vijjati; anulomikāya khantiyā asamannāgato sammattaniyāmaṃ okkamissatīti – netaṃ ṭhānaṃ vijjati; sammattaniyāmaṃ anokkamamāno sotāpattiphalaṃ vā sakadāgāmiphalaṃ vā anāgāmiphalaṃ vā arahattaṃ vā 4 sacchikarissatīti – netaṃ ṭhānaṃ vijjati.
‘‘সো ৰত, ভিক্খৰে, ভিক্খু সব্বসঙ্খারে অনিচ্চতো সমনুপস্সন্তো অনুলোমিকায খন্তিযা সমন্নাগতো ভৰিস্সতীতি – ঠানমেতং ৰিজ্জতি; অনুলোমিকায খন্তিযা সমন্নাগতো সম্মত্তনিযামং ওক্কমিস্সতীতি – ঠানমেতং ৰিজ্জতি, সম্মত্তনিযামং ওক্কমমানো সোতাপত্তিফলং ৰা সকদাগামিফলং ৰা অনাগামিফলং ৰা অরহত্তং ৰা সচ্ছিকরিস্সতীতি – ঠানমেতং ৰিজ্জতি।
‘‘So vata, bhikkhave, bhikkhu sabbasaṅkhāre aniccato samanupassanto anulomikāya khantiyā samannāgato bhavissatīti – ṭhānametaṃ vijjati; anulomikāya khantiyā samannāgato sammattaniyāmaṃ okkamissatīti – ṭhānametaṃ vijjati, sammattaniyāmaṃ okkamamāno sotāpattiphalaṃ vā sakadāgāmiphalaṃ vā anāgāmiphalaṃ vā arahattaṃ vā sacchikarissatīti – ṭhānametaṃ vijjati.
‘‘সো ৰত, ভিক্খৰে, ভিক্খু কঞ্চি সঙ্খারং সুখতো সমনুপস্সন্তো অনুলোমিকায খন্তিযা সমন্নাগতো ভৰিস্সতীতি – নেতং ঠানং ৰিজ্জতি; অনুলোমিকায খন্তিযা অসমন্নাগতো সম্মত্তনিযামং ওক্কমিস্সতীতি – নেতং ঠানং ৰিজ্জতি; সম্মত্তনিযামং অনোক্কমমানো সোতাপত্তিফলং ৰা সকদাগামিফলং ৰা অনাগামিফলং ৰা অরহত্তং ৰা সচ্ছিকরিস্সতীতি – নেতং ঠানং ৰিজ্জতি ।
‘‘So vata, bhikkhave, bhikkhu kañci saṅkhāraṃ sukhato samanupassanto anulomikāya khantiyā samannāgato bhavissatīti – netaṃ ṭhānaṃ vijjati; anulomikāya khantiyā asamannāgato sammattaniyāmaṃ okkamissatīti – netaṃ ṭhānaṃ vijjati; sammattaniyāmaṃ anokkamamāno sotāpattiphalaṃ vā sakadāgāmiphalaṃ vā anāgāmiphalaṃ vā arahattaṃ vā sacchikarissatīti – netaṃ ṭhānaṃ vijjati .
‘‘সো ৰত, ভিক্খৰে, ভিক্খু সব্বসঙ্খারে দুক্খতো সমনুপস্সন্তো অনুলোমিকায খন্তিযা সমন্নাগতো ভৰিস্সতীতি – ঠানমেতং ৰিজ্জতি; অনুলোমিকায খন্তিযা সমন্নাগতো সম্মত্তনিযামং ওক্কমিস্সতীতি – ঠানমেতং ৰিজ্জতি; সম্মত্তনিযামং ওক্কমমানো সোতাপত্তিফলং ৰা সকদাগামিফলং ৰা অনাগামিফলং ৰা অরহত্তং ৰা সচ্ছিকরিস্সতীতি – ঠানমেতং ৰিজ্জতি।
‘‘So vata, bhikkhave, bhikkhu sabbasaṅkhāre dukkhato samanupassanto anulomikāya khantiyā samannāgato bhavissatīti – ṭhānametaṃ vijjati; anulomikāya khantiyā samannāgato sammattaniyāmaṃ okkamissatīti – ṭhānametaṃ vijjati; sammattaniyāmaṃ okkamamāno sotāpattiphalaṃ vā sakadāgāmiphalaṃ vā anāgāmiphalaṃ vā arahattaṃ vā sacchikarissatīti – ṭhānametaṃ vijjati.
‘‘সো ৰত, ভিক্খৰে, ভিক্খু কঞ্চি ধম্মং অত্ততো সমনুপস্সন্তো অনুলোমিকায খন্তিযা সমন্নাগতো ভৰিস্সতীতি – নেতং ঠানং ৰিজ্জতি; অনুলোমিকায খন্তিযা অসমন্নাগতো সম্মত্তনিযামং ওক্কমিস্সতীতি – নেতং ঠানং ৰিজ্জতি; সম্মত্তনিযামং অনোক্কমমানো সোতাপত্তিফলং ৰা সকদাগামিফলং ৰা অনাগামিফলং ৰা অরহত্তং ৰা সচ্ছিকরিস্সতীতি – নেতং ঠানং ৰিজ্জতি।
‘‘So vata, bhikkhave, bhikkhu kañci dhammaṃ attato samanupassanto anulomikāya khantiyā samannāgato bhavissatīti – netaṃ ṭhānaṃ vijjati; anulomikāya khantiyā asamannāgato sammattaniyāmaṃ okkamissatīti – netaṃ ṭhānaṃ vijjati; sammattaniyāmaṃ anokkamamāno sotāpattiphalaṃ vā sakadāgāmiphalaṃ vā anāgāmiphalaṃ vā arahattaṃ vā sacchikarissatīti – netaṃ ṭhānaṃ vijjati.
‘‘সো ৰত, ভিক্খৰে, ভিক্খু সব্বধম্মে 5 অনত্ততো সমনুপস্সন্তো অনুলোমিকায খন্তিযা সমন্নাগতো ভৰিস্সতীতি – ঠানমেতং ৰিজ্জতি; অনুলোমিকায খন্তিযা সমন্নাগতো সম্মত্তনিযামং ওক্কমিস্সতীতি – ঠানমেতং ৰিজ্জতি; সম্মত্তনিযামং ওক্কমমানো সোতাপত্তিফলং ৰা সকদাগামিফলং ৰা অনাগামিফলং ৰা অরহত্তং ৰা সচ্ছিকরিস্সতীতি – ঠানমেতং ৰিজ্জতি।
‘‘So vata, bhikkhave, bhikkhu sabbadhamme 6 anattato samanupassanto anulomikāya khantiyā samannāgato bhavissatīti – ṭhānametaṃ vijjati; anulomikāya khantiyā samannāgato sammattaniyāmaṃ okkamissatīti – ṭhānametaṃ vijjati; sammattaniyāmaṃ okkamamāno sotāpattiphalaṃ vā sakadāgāmiphalaṃ vā anāgāmiphalaṃ vā arahattaṃ vā sacchikarissatīti – ṭhānametaṃ vijjati.
‘‘সো ৰত, ভিক্খৰে, ভিক্খু নিব্বানং দুক্খতো সমনুপস্সন্তো অনুলোমিকায খন্তিযা সমন্নাগতো ভৰিস্সতীতি – নেতং ঠানং ৰিজ্জতি; অনুলোমিকায খন্তিযা অসমন্নাগতো সম্মত্তনিযামং ওক্কমিস্সতীতি – নেতং ঠানং ৰিজ্জতি; সম্মত্তনিযামং অনোক্কমমানো সোতাপত্তিফলং ৰা সকদাগামিফলং ৰা অনাগামিফলং ৰা অরহত্তং ৰা সচ্ছিকরিস্সতীতি – নেতং ঠানং ৰিজ্জতি।
‘‘So vata, bhikkhave, bhikkhu nibbānaṃ dukkhato samanupassanto anulomikāya khantiyā samannāgato bhavissatīti – netaṃ ṭhānaṃ vijjati; anulomikāya khantiyā asamannāgato sammattaniyāmaṃ okkamissatīti – netaṃ ṭhānaṃ vijjati; sammattaniyāmaṃ anokkamamāno sotāpattiphalaṃ vā sakadāgāmiphalaṃ vā anāgāmiphalaṃ vā arahattaṃ vā sacchikarissatīti – netaṃ ṭhānaṃ vijjati.
‘‘সো ৰত, ভিক্খৰে, ভিক্খু নিব্বানং সুখতো সমনুপস্সন্তো অনুলোমিকায খন্তিযা সমন্নাগতো ভৰিস্সতীতি – ঠানমেতং ৰিজ্জতি; অনুলোমিকায খন্তিযা সমন্নাগতো সম্মত্তনিযামং ওক্কমিস্সতীতি – ঠানমেতং ৰিজ্জতি; সম্মত্তনিযামং ওক্কমমানো সোতাপত্তিফলং ৰা সকদাগামিফলং ৰা অনাগামিফলং ৰা অরহত্তং ৰা সচ্ছিকরিস্সতীতি – ঠানমেতং ৰিজ্জতি’’।
‘‘So vata, bhikkhave, bhikkhu nibbānaṃ sukhato samanupassanto anulomikāya khantiyā samannāgato bhavissatīti – ṭhānametaṃ vijjati; anulomikāya khantiyā samannāgato sammattaniyāmaṃ okkamissatīti – ṭhānametaṃ vijjati; sammattaniyāmaṃ okkamamāno sotāpattiphalaṃ vā sakadāgāmiphalaṃ vā anāgāmiphalaṃ vā arahattaṃ vā sacchikarissatīti – ṭhānametaṃ vijjati’’.
৩৭. কতিহাকারেহি অনুলোমিকং খন্তিং পটিলভতি, কতিহাকারেহি সম্মত্তনিযামং ওক্কমতি? চত্তারীসায আকারেহি অনুলোমিকং খন্তিং পটিলভতি, চত্তারীসায আকারেহি সম্মত্তনিযামং ওক্কমতি।
37. Katihākārehi anulomikaṃ khantiṃ paṭilabhati, katihākārehi sammattaniyāmaṃ okkamati? Cattārīsāya ākārehi anulomikaṃ khantiṃ paṭilabhati, cattārīsāya ākārehi sammattaniyāmaṃ okkamati.
কতমেহি চত্তারীসায আকারেহি অনুলোমিকং খন্তিং পটিলভতি, কতমহি চত্তারীসায আকারেহি সম্মত্তনিযামং ওক্কমতি? পঞ্চক্খন্ধে অনিচ্চতো দুক্খতো রোগতো গণ্ডতো সল্লতো অঘতো আবাধতো পরতো পলোকতো ঈতিতো উপদ্দৰতো ভযতো উপসগ্গতো চলতো পভঙ্গুতো 7 অদ্ধুৰতো অতাণতো 8 অলেণতো অসরণতো রিত্ততো তুচ্ছতো সুঞ্ঞতো অনত্ততো আদীনৰতো ৰিপরিণামধম্মতো অসারকতো অঘমূলতো ৰধকতো ৰিভৰতো সাসৰতো সঙ্খততো মারামিসতো জাতিধম্মতো জরাধম্মতো ব্যাধিধম্মতো মরণধম্মতো সোকধম্মতো পরিদেৰধম্মতো উপাযাসধম্মতো সংকিলেসিকধম্মতো।
Katamehi cattārīsāya ākārehi anulomikaṃ khantiṃ paṭilabhati, katamahi cattārīsāya ākārehi sammattaniyāmaṃ okkamati? Pañcakkhandhe aniccato dukkhato rogato gaṇḍato sallato aghato ābādhato parato palokato ītito upaddavato bhayato upasaggato calato pabhaṅguto 9 addhuvato atāṇato 10 aleṇato asaraṇato rittato tucchato suññato anattato ādīnavato vipariṇāmadhammato asārakato aghamūlato vadhakato vibhavato sāsavato saṅkhatato mārāmisato jātidhammato jarādhammato byādhidhammato maraṇadhammato sokadhammato paridevadhammato upāyāsadhammato saṃkilesikadhammato.
৩৮. পঞ্চক্খন্ধে অনিচ্চতো পস্সন্তো অনুলোমিকং খন্তিং পটিলভতি। পঞ্চন্নং খন্ধানং নিরোধো নিচ্চং নিব্বানন্তি পস্সন্তো সম্মত্তনিযামং ওক্কমতি। পঞ্চক্খন্ধে দুক্খতো পস্সন্তো অনুলোমিকং খন্তিং পটিলভতি। পঞ্চন্নং খন্ধানং নিরোধো সুখং নিব্বানন্তি পস্সন্তো সম্মত্তনিযামং ওক্কমতি। পঞ্চক্খন্ধে রোগতো পস্সন্তো অনুলোমিকং খন্তিং পটিলভতি। পঞ্চন্নং খন্ধানং নিরোধো আরোগ্যং নিব্বানন্তি পস্সন্তো সম্মত্তনিযামং ওক্কমতি। পঞ্চক্খন্ধে গণ্ডতো পস্সন্তো অনুলোমিকং খন্তিং পটিলভতি। পঞ্চন্নং খন্ধানং নিরোধো অগণ্ডং 11 নিব্বানন্তি পস্সন্তো সম্মত্তনিযামং ওক্কমতি। পঞ্চক্খন্ধে সল্লতো পস্সন্তো অনুলোমিকং খন্তিং পটিলভতি। পঞ্চন্নং খন্ধানং নিরোধো ৰিসল্লং 12 নিব্বানন্তি পস্সন্তো সম্মত্তনিযামং ওক্কমতি।
38. Pañcakkhandhe aniccato passanto anulomikaṃ khantiṃ paṭilabhati. Pañcannaṃ khandhānaṃ nirodho niccaṃ nibbānanti passanto sammattaniyāmaṃ okkamati. Pañcakkhandhe dukkhato passanto anulomikaṃ khantiṃ paṭilabhati. Pañcannaṃ khandhānaṃ nirodho sukhaṃ nibbānanti passanto sammattaniyāmaṃ okkamati. Pañcakkhandhe rogato passanto anulomikaṃ khantiṃ paṭilabhati. Pañcannaṃ khandhānaṃ nirodho ārogyaṃ nibbānanti passanto sammattaniyāmaṃ okkamati. Pañcakkhandhe gaṇḍato passanto anulomikaṃ khantiṃ paṭilabhati. Pañcannaṃ khandhānaṃ nirodho agaṇḍaṃ 13 nibbānanti passanto sammattaniyāmaṃ okkamati. Pañcakkhandhe sallato passanto anulomikaṃ khantiṃ paṭilabhati. Pañcannaṃ khandhānaṃ nirodho visallaṃ 14 nibbānanti passanto sammattaniyāmaṃ okkamati.
পঞ্চক্খন্ধে অঘতো পস্সন্তো অনুলোমিকং খন্তিং পটিলভতি। পঞ্চন্নং খন্ধানং নিরোধো অনঘো নিব্বানন্তি পস্সন্তো সম্মত্তনিযামং ওক্কমতি। পঞ্চক্খন্ধে আবাধতো পস্সন্তো অনুলোমিকং খন্তিং পটিলভতি। পঞ্চন্নং খন্ধানং নিরোধো অনাবাধো নিব্বানন্তি পস্সন্তো সম্মত্তনিযামং ওক্কমতি। পঞ্চক্খন্ধে পরতো পস্সন্তো অনুলোমিকং খন্তিং পটিলভতি। পঞ্চন্নং খন্ধানং নিরোধো অপরপ্পচ্চযং নিব্বানন্তি পস্সন্তো সম্মত্তনিযামং ওক্কমতি। পঞ্চক্খন্ধে পলোকতো পস্সন্তো অনুলোমিকং খন্তিং পটিলভতি। পঞ্চন্নং খন্ধানং নিরোধো অপলোকধম্মো নিব্বানন্তি পস্সন্তো সম্মত্তনিযামং ওক্কমতি। পঞ্চক্খন্ধে ঈতিতো পস্সন্তো অনুলোমিকং খন্তিং পটিলভতি। পঞ্চন্নং খন্ধানং নিরোধো অনীতিকং নিব্বানন্তি পস্সন্তো সম্মত্তনিযামং ওক্কমতি।
Pañcakkhandhe aghato passanto anulomikaṃ khantiṃ paṭilabhati. Pañcannaṃ khandhānaṃ nirodho anagho nibbānanti passanto sammattaniyāmaṃ okkamati. Pañcakkhandhe ābādhato passanto anulomikaṃ khantiṃ paṭilabhati. Pañcannaṃ khandhānaṃ nirodho anābādho nibbānanti passanto sammattaniyāmaṃ okkamati. Pañcakkhandhe parato passanto anulomikaṃ khantiṃ paṭilabhati. Pañcannaṃ khandhānaṃ nirodho aparappaccayaṃ nibbānanti passanto sammattaniyāmaṃ okkamati. Pañcakkhandhe palokato passanto anulomikaṃ khantiṃ paṭilabhati. Pañcannaṃ khandhānaṃ nirodho apalokadhammo nibbānanti passanto sammattaniyāmaṃ okkamati. Pañcakkhandhe ītito passanto anulomikaṃ khantiṃ paṭilabhati. Pañcannaṃ khandhānaṃ nirodho anītikaṃ nibbānanti passanto sammattaniyāmaṃ okkamati.
পঞ্চক্খন্ধে উপদ্দৰতো পস্সন্তো অনুলোমিকং খন্তিং পটিলভতি। পঞ্চন্নং খন্ধানং নিরোধো অনুপদ্দৰং নিব্বানন্তি পস্সন্তো সম্মত্তনিযামং ওক্কমতি। পঞ্চক্খন্ধে ভযতো পস্সন্তো অনুলোমিকং খন্তিং পটিলভতি। পঞ্চন্নং খন্ধানং নিরোধো অভযং নিব্বানন্তি পস্সন্তো সম্মত্তনিযামং ওক্কমতি। পঞ্চক্খন্ধে উপসগ্গতো পস্সন্তো অনুলোমিকং খন্তিং পটিলভতি। পঞ্চন্নং খন্ধানং নিরোধো অনুপসগ্গং নিব্বানন্তি পস্সন্তো সম্মত্তনিযামং ওক্কমতি। পঞ্চক্খন্ধে চলতো পস্সন্তো অনুলোমিকং খন্তিং পটিলভতি। পঞ্চন্নং খন্ধানং নিরোধো অচলং নিব্বানন্তি পস্সন্তো সম্মত্তনিযামং ওক্কমতি। পঞ্চক্খন্ধে পভঙ্গুতো পস্সন্তো অনুলোমিকং খন্তিং পটিলভতি। পঞ্চন্নং খন্ধানং নিরোধো অপভঙ্গু 15 নিব্বানন্তি পস্সন্তো সম্মত্তনিযামং ওক্কমতি।
Pañcakkhandhe upaddavato passanto anulomikaṃ khantiṃ paṭilabhati. Pañcannaṃ khandhānaṃ nirodho anupaddavaṃ nibbānanti passanto sammattaniyāmaṃ okkamati. Pañcakkhandhe bhayato passanto anulomikaṃ khantiṃ paṭilabhati. Pañcannaṃ khandhānaṃ nirodho abhayaṃ nibbānanti passanto sammattaniyāmaṃ okkamati. Pañcakkhandhe upasaggato passanto anulomikaṃ khantiṃ paṭilabhati. Pañcannaṃ khandhānaṃ nirodho anupasaggaṃ nibbānanti passanto sammattaniyāmaṃ okkamati. Pañcakkhandhe calato passanto anulomikaṃ khantiṃ paṭilabhati. Pañcannaṃ khandhānaṃ nirodho acalaṃ nibbānanti passanto sammattaniyāmaṃ okkamati. Pañcakkhandhe pabhaṅguto passanto anulomikaṃ khantiṃ paṭilabhati. Pañcannaṃ khandhānaṃ nirodho apabhaṅgu 16 nibbānanti passanto sammattaniyāmaṃ okkamati.
পঞ্চক্খন্ধে অদ্ধুৰতো পস্সন্তো অনুলোমিকং খন্তিং পটিলভতি। পঞ্চন্নং খন্ধানং নিরোধো ধুৰং নিব্বানন্তি পস্সন্তো সম্মত্তনিযামং ওক্কমতি। পঞ্চক্খন্ধে অতাণতো পস্সন্তো অনুলোমিকং খন্তিং পটিলভতি। পঞ্চন্নং খন্ধানং নিরোধো তাণং নিব্বানন্তি পস্সন্তো সম্মত্তনিযামং ওক্কমতি। পঞ্চক্খন্ধে অলেণতো পস্সন্তো অনুলোমিকং খন্তিং পটিলভতি। পঞ্চন্নং খন্ধানং নিরোধো লেণং নিব্বানন্তি পস্সন্তো সম্মত্তনিযামং ওক্কমতি। পঞ্চক্খন্ধে অসরণতো পস্সন্তো অনুলোমিকং খন্তিং পটিলভতি। পঞ্চন্নং খন্ধানং নিরোধো সরণং নিব্বানন্তি পস্সন্তো সম্মত্তনিযামং ওক্কমতি। পঞ্চক্খন্ধে রিত্ততো পস্সন্তো অনুলোমিকং খন্তিং পটিলভতি। পঞ্চন্নং খন্ধানং নিরোধো অরিত্তং নিব্বানন্তি পস্সন্তো সম্মত্তনিযামং ওক্কমতি।
Pañcakkhandhe addhuvato passanto anulomikaṃ khantiṃ paṭilabhati. Pañcannaṃ khandhānaṃ nirodho dhuvaṃ nibbānanti passanto sammattaniyāmaṃ okkamati. Pañcakkhandhe atāṇato passanto anulomikaṃ khantiṃ paṭilabhati. Pañcannaṃ khandhānaṃ nirodho tāṇaṃ nibbānanti passanto sammattaniyāmaṃ okkamati. Pañcakkhandhe aleṇato passanto anulomikaṃ khantiṃ paṭilabhati. Pañcannaṃ khandhānaṃ nirodho leṇaṃ nibbānanti passanto sammattaniyāmaṃ okkamati. Pañcakkhandhe asaraṇato passanto anulomikaṃ khantiṃ paṭilabhati. Pañcannaṃ khandhānaṃ nirodho saraṇaṃ nibbānanti passanto sammattaniyāmaṃ okkamati. Pañcakkhandhe rittato passanto anulomikaṃ khantiṃ paṭilabhati. Pañcannaṃ khandhānaṃ nirodho arittaṃ nibbānanti passanto sammattaniyāmaṃ okkamati.
পঞ্চক্খন্ধে তুচ্ছতো পস্সন্তো অনুলোমিকং খন্তিং পটিলভতি। পঞ্চন্নং খন্ধানং নিরোধো অতুচ্ছং নিব্বানন্তি পস্সন্তো সম্মত্তনিযামং ওক্কমতি। পঞ্চক্খন্ধে সুঞ্ঞতো পস্সন্তো অনুলোমিকং খন্তিং পটিলভতি। পঞ্চন্নং খন্ধানং নিরোধো পরমসুঞ্ঞং নিব্বানন্তি পস্সন্তো সম্মত্তনিযামং ওক্কমতি। পঞ্চক্খন্ধে অনত্ততো পস্সন্তো অনুলোমিকং খন্তিং পটিলভতি। পঞ্চন্নং খন্ধানং নিরোধো পরমত্থং নিব্বানন্তি পস্সন্তো সম্মত্তনিযামং ওক্কমতি। পঞ্চক্খন্ধে আদীনৰতো পস্সন্তো অনুলোমিকং খন্তিং পটিলভতি। পঞ্চন্নং খন্ধানং নিরোধো অনাদীনৰং নিব্বানন্তি পস্সন্তো সম্মত্তনিযামং ওক্কমতি। পঞ্চক্খন্ধে ৰিপরিণামধম্মতো পস্সন্তো অনুলোমিকং খন্তিং পটিলভতি। পঞ্চন্নং খন্ধানং নিরোধো অৰিপরিণামধম্মং নিব্বানন্তি পস্সন্তো সম্মত্তনিযামং ওক্কমতি।
Pañcakkhandhe tucchato passanto anulomikaṃ khantiṃ paṭilabhati. Pañcannaṃ khandhānaṃ nirodho atucchaṃ nibbānanti passanto sammattaniyāmaṃ okkamati. Pañcakkhandhe suññato passanto anulomikaṃ khantiṃ paṭilabhati. Pañcannaṃ khandhānaṃ nirodho paramasuññaṃ nibbānanti passanto sammattaniyāmaṃ okkamati. Pañcakkhandhe anattato passanto anulomikaṃ khantiṃ paṭilabhati. Pañcannaṃ khandhānaṃ nirodho paramatthaṃ nibbānanti passanto sammattaniyāmaṃ okkamati. Pañcakkhandhe ādīnavato passanto anulomikaṃ khantiṃ paṭilabhati. Pañcannaṃ khandhānaṃ nirodho anādīnavaṃ nibbānanti passanto sammattaniyāmaṃ okkamati. Pañcakkhandhe vipariṇāmadhammato passanto anulomikaṃ khantiṃ paṭilabhati. Pañcannaṃ khandhānaṃ nirodho avipariṇāmadhammaṃ nibbānanti passanto sammattaniyāmaṃ okkamati.
পঞ্চক্খন্ধে অসারকতো পস্সন্তো অনুলোমিকং খন্তিং পটিলভতি। পঞ্চন্নং খন্ধানং নিরোধো সারং নিব্বানন্তি পস্সন্তো সম্মত্তনিযামং ওক্কমতি। পঞ্চক্খন্ধে অঘমূলতো পস্সন্তো অনুলোমিকং খন্তিং পটিলভতি। পঞ্চন্নং খন্ধানং নিরোধো অনঘমূলং নিব্বানন্তি পস্সন্তো সম্মত্তনিযামং ওক্কমতি। পঞ্চক্খন্ধে ৰধকতো পস্সন্তো অনুলোমিকং খন্তিং পটিলভতি। পঞ্চন্নং খন্ধানং নিরোধো অৰধকং নিব্বানন্তি পস্সন্তো সম্মত্তনিযামং ওক্কমতি। পঞ্চক্খন্ধে ৰিভৰতো পস্সন্তো অনুলোমিকং খন্তিং পটিলভতি। পঞ্চন্নং খন্ধানং নিরোধো অৰিভৰং নিব্বানন্তি পস্সন্তো সম্মত্তনিযামং ওক্কমতি। পঞ্চক্খন্ধে সাসৰতো পস্সন্তো অনুলোমিকং খন্তিং পটিলভতি। পঞ্চন্নং খন্ধানং নিরোধো অনাসৰং নিব্বানন্তি পস্সন্তো সম্মত্তনিযামং ওক্কমতি।
Pañcakkhandhe asārakato passanto anulomikaṃ khantiṃ paṭilabhati. Pañcannaṃ khandhānaṃ nirodho sāraṃ nibbānanti passanto sammattaniyāmaṃ okkamati. Pañcakkhandhe aghamūlato passanto anulomikaṃ khantiṃ paṭilabhati. Pañcannaṃ khandhānaṃ nirodho anaghamūlaṃ nibbānanti passanto sammattaniyāmaṃ okkamati. Pañcakkhandhe vadhakato passanto anulomikaṃ khantiṃ paṭilabhati. Pañcannaṃ khandhānaṃ nirodho avadhakaṃ nibbānanti passanto sammattaniyāmaṃ okkamati. Pañcakkhandhe vibhavato passanto anulomikaṃ khantiṃ paṭilabhati. Pañcannaṃ khandhānaṃ nirodho avibhavaṃ nibbānanti passanto sammattaniyāmaṃ okkamati. Pañcakkhandhe sāsavato passanto anulomikaṃ khantiṃ paṭilabhati. Pañcannaṃ khandhānaṃ nirodho anāsavaṃ nibbānanti passanto sammattaniyāmaṃ okkamati.
পঞ্চক্খন্ধে সঙ্খততো পস্সন্তো অনুলোমিকং খন্তিং পটিলভতি। পঞ্চন্নং খন্ধানং নিরোধো অসঙ্খতং নিব্বানন্তি পস্সন্তো সম্মত্তনিযামং ওক্কমতি। পঞ্চক্খন্ধে মারামিসতো পস্সন্তো অনুলোমিকং খন্তিং পটিলভতি। পঞ্চন্নং খন্ধানং নিরোধো নিরামিসং নিব্বানন্তি পস্সন্তো সম্মত্তনিযামং ওক্কমতি। পঞ্চক্খন্ধে জাতিধম্মতো পস্সন্তো অনুলোমিকং খন্তিং পটিলভতি। পঞ্চন্নং খন্ধানং নিরোধো অজাতং নিব্বানন্তি পস্সন্তো সম্মত্তনিযামং ওক্কমতি। পঞ্চক্খন্ধে জরাধম্মতো পস্সন্তো অনুলোমিকং খন্তিং পটিলভতি। পঞ্চন্নং খন্ধানং নিরোধো অজরং নিব্বানন্তি পস্সন্তো সম্মত্তনিযামং ওক্কমতি। পঞ্চক্খন্ধে ব্যাধিধম্মতো পস্সন্তো অনুলোমিকং খন্তিং পটিলভতি। পঞ্চন্নং খন্ধানং নিরোধো অব্যাধি 17 নিব্বানন্তি পস্সন্তো সম্মত্তনিযামং ওক্কমতি।
Pañcakkhandhe saṅkhatato passanto anulomikaṃ khantiṃ paṭilabhati. Pañcannaṃ khandhānaṃ nirodho asaṅkhataṃ nibbānanti passanto sammattaniyāmaṃ okkamati. Pañcakkhandhe mārāmisato passanto anulomikaṃ khantiṃ paṭilabhati. Pañcannaṃ khandhānaṃ nirodho nirāmisaṃ nibbānanti passanto sammattaniyāmaṃ okkamati. Pañcakkhandhe jātidhammato passanto anulomikaṃ khantiṃ paṭilabhati. Pañcannaṃ khandhānaṃ nirodho ajātaṃ nibbānanti passanto sammattaniyāmaṃ okkamati. Pañcakkhandhe jarādhammato passanto anulomikaṃ khantiṃ paṭilabhati. Pañcannaṃ khandhānaṃ nirodho ajaraṃ nibbānanti passanto sammattaniyāmaṃ okkamati. Pañcakkhandhe byādhidhammato passanto anulomikaṃ khantiṃ paṭilabhati. Pañcannaṃ khandhānaṃ nirodho abyādhi 18 nibbānanti passanto sammattaniyāmaṃ okkamati.
পঞ্চক্খন্ধে মরণধম্মতো পস্সন্তো অনুলোমিকং খন্তিং পটিলভতি। পঞ্চন্নং খন্ধানং নিরোধো অমতং নিব্বানন্তি পস্সন্তো সম্মত্তনিযামং ওক্কমতি। পঞ্চক্খন্ধে সোকধম্মতো পস্সন্তো অনুলোমিকং খন্তিং পটিলভতি। পঞ্চন্নং খন্ধানং নিরোধো অসোকং নিব্বানন্তি পস্সন্তো সম্মত্তনিযামং ওক্কমতি। পঞ্চক্খন্ধে পরিদেৰধম্মতো পস্সন্তো অনুলোমিকং খন্তিং পটিলভতি। পঞ্চন্নং খন্ধানং নিরোধো অপরিদেৰং নিব্বানন্তি পস্সন্তো সম্মত্তনিযামং ওক্কমতি। পঞ্চক্খন্ধে উপাযাসধম্মতো পস্সন্তো অনুলোমিকং খন্তিং পটিলভতি। পঞ্চন্নং খন্ধানং নিরোধো অনুপাযাসং নিব্বানন্তি পস্সন্তো সম্মত্তনিযামং ওক্কমতি। পঞ্চক্খন্ধে সংকিলেসিকধম্মতো পস্সন্তো অনুলোমিকং খন্তিং পটিলভতি। পঞ্চন্নং খন্ধানং নিরোধো অসংকিলিট্ঠং নিব্বানন্তি পস্সন্তো সম্মত্তনিযামং ওক্কমতি।
Pañcakkhandhe maraṇadhammato passanto anulomikaṃ khantiṃ paṭilabhati. Pañcannaṃ khandhānaṃ nirodho amataṃ nibbānanti passanto sammattaniyāmaṃ okkamati. Pañcakkhandhe sokadhammato passanto anulomikaṃ khantiṃ paṭilabhati. Pañcannaṃ khandhānaṃ nirodho asokaṃ nibbānanti passanto sammattaniyāmaṃ okkamati. Pañcakkhandhe paridevadhammato passanto anulomikaṃ khantiṃ paṭilabhati. Pañcannaṃ khandhānaṃ nirodho aparidevaṃ nibbānanti passanto sammattaniyāmaṃ okkamati. Pañcakkhandhe upāyāsadhammato passanto anulomikaṃ khantiṃ paṭilabhati. Pañcannaṃ khandhānaṃ nirodho anupāyāsaṃ nibbānanti passanto sammattaniyāmaṃ okkamati. Pañcakkhandhe saṃkilesikadhammato passanto anulomikaṃ khantiṃ paṭilabhati. Pañcannaṃ khandhānaṃ nirodho asaṃkiliṭṭhaṃ nibbānanti passanto sammattaniyāmaṃ okkamati.
৩৯. অনিচ্চতোতি, অনিচ্চানুপস্সনা। দুক্খতোতি, দুক্খানুপস্সনা। রোগতোতি , দুক্খানুপস্সনা। গণ্ডতোতি, দুক্খানুপস্সনা। সল্লতোতি, দুক্খানুপস্সনা। অঘতোতি, দুক্খানুপস্সনা। আবাধতোতি, দুক্খানুপস্সনা। পরতোতি, অনত্তানুপস্সনা। পলোকতোতি, অনিচ্চানুপস্সনা। ঈতিতোতি, দুক্খানুপস্সনা।
39. Aniccatoti, aniccānupassanā. Dukkhatoti, dukkhānupassanā. Rogatoti , dukkhānupassanā. Gaṇḍatoti, dukkhānupassanā. Sallatoti, dukkhānupassanā. Aghatoti, dukkhānupassanā. Ābādhatoti, dukkhānupassanā. Paratoti, anattānupassanā. Palokatoti, aniccānupassanā. Ītitoti, dukkhānupassanā.
উপদ্দৰতোতি, দুক্খানুপস্সনা। ভযতোতি, দুক্খানুপস্সনা । উপসগ্গতোতি, দুক্খানুপস্সনা। চলতোতি, অনিচ্চানুপস্সনা। পভঙ্গুতোতি, অনিচ্চানুপস্সনা। অদ্ধুৰতোতি, অনিচ্চানুপস্সনা। অতাণতোতি, দুক্খানুপস্সনা। অলেণতোতি, দুক্খানুপস্সনা। অসরণতোতি, দুক্খানুপস্সনা। রিত্ততোতি, অনত্তানুপস্সনা।
Upaddavatoti, dukkhānupassanā. Bhayatoti, dukkhānupassanā . Upasaggatoti, dukkhānupassanā. Calatoti, aniccānupassanā. Pabhaṅgutoti, aniccānupassanā. Addhuvatoti, aniccānupassanā. Atāṇatoti, dukkhānupassanā. Aleṇatoti, dukkhānupassanā. Asaraṇatoti, dukkhānupassanā. Rittatoti, anattānupassanā.
তুচ্ছতোতি, অনত্তানুপস্সনা। সুঞ্ঞতোতি, অনত্তানুপস্সনা। অনত্ততোতি , অনত্তানুপস্সনা। আদীনৰতোতি, দুক্খানুপস্সনা। ৰিপরিণামধম্মতোতি, অনিচ্চানুপস্সনা। অসারকতোতি, অনত্তানুপস্সনা। অঘমূলতোতি , দুক্খানুপস্সনা। ৰধকতোতি, দুক্খানুপস্সনা। ৰিভৰতোতি, অনিচ্চানুপস্সনা। সাসৰতোতি, দুক্খানুপস্সনা।
Tucchatoti, anattānupassanā. Suññatoti, anattānupassanā. Anattatoti , anattānupassanā. Ādīnavatoti, dukkhānupassanā. Vipariṇāmadhammatoti, aniccānupassanā. Asārakatoti, anattānupassanā. Aghamūlatoti , dukkhānupassanā. Vadhakatoti, dukkhānupassanā. Vibhavatoti, aniccānupassanā. Sāsavatoti, dukkhānupassanā.
সঙ্খততোতি, অনিচ্চানুপস্সনা। মারামিসতোতি, দুক্খানুপস্সনা। জাতিধম্মতোতি, দুক্খানুপস্সনা। জরাধম্মতোতি, দুক্খানুপস্সনা। ব্যাধিধম্মতোতি, দুক্খানুপস্সনা। মরণধম্মতোতি, অনিচ্চানুপস্সনা। সোকধম্মতোতি, দুক্খানুপস্সনা। পরিদেৰধম্মতোতি, দুক্খানুপস্সনা। উপাযাসধম্মতোতি, দুক্খানুপস্সনা। সংকিলেসিকধম্মতোতি, দুক্খানুপস্সনা।
Saṅkhatatoti, aniccānupassanā. Mārāmisatoti, dukkhānupassanā. Jātidhammatoti, dukkhānupassanā. Jarādhammatoti, dukkhānupassanā. Byādhidhammatoti, dukkhānupassanā. Maraṇadhammatoti, aniccānupassanā. Sokadhammatoti, dukkhānupassanā. Paridevadhammatoti, dukkhānupassanā. Upāyāsadhammatoti, dukkhānupassanā. Saṃkilesikadhammatoti, dukkhānupassanā.
ইমেহি চত্তালীসায আকারেহি অনুলোমিকং খন্তিং পটিলভতি। ইমেহি চত্তালীসায আকারেহি সম্মত্তনিযামং ওক্কমতি।
Imehi cattālīsāya ākārehi anulomikaṃ khantiṃ paṭilabhati. Imehi cattālīsāya ākārehi sammattaniyāmaṃ okkamati.
ইমেহি চত্তালীসায আকারেহি অনুলোমিকং খন্তিং পটিলভন্তস্স, ইমেহি চত্তালীসায আকারেহি সম্মত্তনিযামং ওক্কমন্তস্স কতি অনিচ্চানুপস্সনা, কতি দুক্খানুপস্সনা, কতি অনত্তানুপস্সনা?
Imehi cattālīsāya ākārehi anulomikaṃ khantiṃ paṭilabhantassa, imehi cattālīsāya ākārehi sammattaniyāmaṃ okkamantassa kati aniccānupassanā, kati dukkhānupassanā, kati anattānupassanā?
পঞ্চৰীসতি অনত্তানুপস্সনা, পঞ্ঞাস অনিচ্চানুপস্সনা।
Pañcavīsati anattānupassanā, paññāsa aniccānupassanā;
সতং পঞ্চৰীসতি চেৰ, যানি দুক্খে পৰুচ্চরেতি॥
Sataṃ pañcavīsati ceva, yāni dukkhe pavuccareti.
ৰিপস্সনাকথা নিট্ঠিতা।
Vipassanākathā niṭṭhitā.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / পটিসম্ভিদামগ্গ-অট্ঠকথা • Paṭisambhidāmagga-aṭṭhakathā / ৰিপস্সনাকথাৰণ্ণনা • Vipassanākathāvaṇṇanā
