Library / Tipiṭaka / ཏིཔིཊཀ • Tipiṭaka / པཊིསམྦྷིདཱམགྒཔཱལི༹ • Paṭisambhidāmaggapāḷi

    ༩. ཝིཔསྶནཱཀཐཱ

    9. Vipassanākathā

    ༣༦. ཨེཝཾ མེ སུཏཾ – ཨེཀཾ སམཡཾ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཏཏྲ ཁོ བྷགཝཱ བྷིཀྑཱུ ཨཱམནྟེསི – ‘‘བྷིཀྑཝོ’’ཏི། ‘‘བྷདནྟེ’’ཏི ཏེ བྷིཀྑཱུ བྷགཝཏོ པཙྩསྶོསུཾ། བྷགཝཱ ཨེཏདཝོཙ –

    36. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tatra kho bhagavā bhikkhū āmantesi – ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca –

    ‘‘སོ ཝཏ, བྷིཀྑཝེ, བྷིཀྑུ ཀཉྩི 1 སངྑཱརཾ ནིཙྩཏོ སམནུཔསྶནྟོ ཨནུལོམིཀཱཡ ཁནྟིཡཱ སམནྣཱགཏོ བྷཝིསྶཏཱིཏི – ནེཏཾ ཋཱནཾ ཝིཛྫཏི; ཨནུལོམིཀཱཡ ཁནྟིཡཱ ཨསམནྣཱགཏོ སམྨཏྟནིཡཱམཾ ཨོཀྐམིསྶཏཱིཏི – ནེཏཾ ཋཱནཾ ཝིཛྫཏི; སམྨཏྟནིཡཱམཾ ཨནོཀྐམམཱནོ སོཏཱཔཏྟིཕལཾ ཝཱ སཀདཱགཱམིཕལཾ ཝཱ ཨནཱགཱམིཕལཾ ཝཱ ཨརཧཏྟཾ ཝཱ 2 སཙྪིཀརིསྶཏཱིཏི – ནེཏཾ ཋཱནཾ ཝིཛྫཏི།

    ‘‘So vata, bhikkhave, bhikkhu kañci 3 saṅkhāraṃ niccato samanupassanto anulomikāya khantiyā samannāgato bhavissatīti – netaṃ ṭhānaṃ vijjati; anulomikāya khantiyā asamannāgato sammattaniyāmaṃ okkamissatīti – netaṃ ṭhānaṃ vijjati; sammattaniyāmaṃ anokkamamāno sotāpattiphalaṃ vā sakadāgāmiphalaṃ vā anāgāmiphalaṃ vā arahattaṃ vā 4 sacchikarissatīti – netaṃ ṭhānaṃ vijjati.

    ‘‘སོ ཝཏ, བྷིཀྑཝེ, བྷིཀྑུ སབྦསངྑཱརེ ཨནིཙྩཏོ སམནུཔསྶནྟོ ཨནུལོམིཀཱཡ ཁནྟིཡཱ སམནྣཱགཏོ བྷཝིསྶཏཱིཏི – ཋཱནམེཏཾ ཝིཛྫཏི; ཨནུལོམིཀཱཡ ཁནྟིཡཱ སམནྣཱགཏོ སམྨཏྟནིཡཱམཾ ཨོཀྐམིསྶཏཱིཏི – ཋཱནམེཏཾ ཝིཛྫཏི, སམྨཏྟནིཡཱམཾ ཨོཀྐམམཱནོ སོཏཱཔཏྟིཕལཾ ཝཱ སཀདཱགཱམིཕལཾ ཝཱ ཨནཱགཱམིཕལཾ ཝཱ ཨརཧཏྟཾ ཝཱ སཙྪིཀརིསྶཏཱིཏི – ཋཱནམེཏཾ ཝིཛྫཏི།

    ‘‘So vata, bhikkhave, bhikkhu sabbasaṅkhāre aniccato samanupassanto anulomikāya khantiyā samannāgato bhavissatīti – ṭhānametaṃ vijjati; anulomikāya khantiyā samannāgato sammattaniyāmaṃ okkamissatīti – ṭhānametaṃ vijjati, sammattaniyāmaṃ okkamamāno sotāpattiphalaṃ vā sakadāgāmiphalaṃ vā anāgāmiphalaṃ vā arahattaṃ vā sacchikarissatīti – ṭhānametaṃ vijjati.

    ‘‘སོ ཝཏ, བྷིཀྑཝེ, བྷིཀྑུ ཀཉྩི སངྑཱརཾ སུཁཏོ སམནུཔསྶནྟོ ཨནུལོམིཀཱཡ ཁནྟིཡཱ སམནྣཱགཏོ བྷཝིསྶཏཱིཏི – ནེཏཾ ཋཱནཾ ཝིཛྫཏི; ཨནུལོམིཀཱཡ ཁནྟིཡཱ ཨསམནྣཱགཏོ སམྨཏྟནིཡཱམཾ ཨོཀྐམིསྶཏཱིཏི – ནེཏཾ ཋཱནཾ ཝིཛྫཏི; སམྨཏྟནིཡཱམཾ ཨནོཀྐམམཱནོ སོཏཱཔཏྟིཕལཾ ཝཱ སཀདཱགཱམིཕལཾ ཝཱ ཨནཱགཱམིཕལཾ ཝཱ ཨརཧཏྟཾ ཝཱ སཙྪིཀརིསྶཏཱིཏི – ནེཏཾ ཋཱནཾ ཝིཛྫཏི །

    ‘‘So vata, bhikkhave, bhikkhu kañci saṅkhāraṃ sukhato samanupassanto anulomikāya khantiyā samannāgato bhavissatīti – netaṃ ṭhānaṃ vijjati; anulomikāya khantiyā asamannāgato sammattaniyāmaṃ okkamissatīti – netaṃ ṭhānaṃ vijjati; sammattaniyāmaṃ anokkamamāno sotāpattiphalaṃ vā sakadāgāmiphalaṃ vā anāgāmiphalaṃ vā arahattaṃ vā sacchikarissatīti – netaṃ ṭhānaṃ vijjati .

    ‘‘སོ ཝཏ, བྷིཀྑཝེ, བྷིཀྑུ སབྦསངྑཱརེ དུཀྑཏོ སམནུཔསྶནྟོ ཨནུལོམིཀཱཡ ཁནྟིཡཱ སམནྣཱགཏོ བྷཝིསྶཏཱིཏི – ཋཱནམེཏཾ ཝིཛྫཏི; ཨནུལོམིཀཱཡ ཁནྟིཡཱ སམནྣཱགཏོ སམྨཏྟནིཡཱམཾ ཨོཀྐམིསྶཏཱིཏི – ཋཱནམེཏཾ ཝིཛྫཏི; སམྨཏྟནིཡཱམཾ ཨོཀྐམམཱནོ སོཏཱཔཏྟིཕལཾ ཝཱ སཀདཱགཱམིཕལཾ ཝཱ ཨནཱགཱམིཕལཾ ཝཱ ཨརཧཏྟཾ ཝཱ སཙྪིཀརིསྶཏཱིཏི – ཋཱནམེཏཾ ཝིཛྫཏི།

    ‘‘So vata, bhikkhave, bhikkhu sabbasaṅkhāre dukkhato samanupassanto anulomikāya khantiyā samannāgato bhavissatīti – ṭhānametaṃ vijjati; anulomikāya khantiyā samannāgato sammattaniyāmaṃ okkamissatīti – ṭhānametaṃ vijjati; sammattaniyāmaṃ okkamamāno sotāpattiphalaṃ vā sakadāgāmiphalaṃ vā anāgāmiphalaṃ vā arahattaṃ vā sacchikarissatīti – ṭhānametaṃ vijjati.

    ‘‘སོ ཝཏ, བྷིཀྑཝེ, བྷིཀྑུ ཀཉྩི དྷམྨཾ ཨཏྟཏོ སམནུཔསྶནྟོ ཨནུལོམིཀཱཡ ཁནྟིཡཱ སམནྣཱགཏོ བྷཝིསྶཏཱིཏི – ནེཏཾ ཋཱནཾ ཝིཛྫཏི; ཨནུལོམིཀཱཡ ཁནྟིཡཱ ཨསམནྣཱགཏོ སམྨཏྟནིཡཱམཾ ཨོཀྐམིསྶཏཱིཏི – ནེཏཾ ཋཱནཾ ཝིཛྫཏི; སམྨཏྟནིཡཱམཾ ཨནོཀྐམམཱནོ སོཏཱཔཏྟིཕལཾ ཝཱ སཀདཱགཱམིཕལཾ ཝཱ ཨནཱགཱམིཕལཾ ཝཱ ཨརཧཏྟཾ ཝཱ སཙྪིཀརིསྶཏཱིཏི – ནེཏཾ ཋཱནཾ ཝིཛྫཏི།

    ‘‘So vata, bhikkhave, bhikkhu kañci dhammaṃ attato samanupassanto anulomikāya khantiyā samannāgato bhavissatīti – netaṃ ṭhānaṃ vijjati; anulomikāya khantiyā asamannāgato sammattaniyāmaṃ okkamissatīti – netaṃ ṭhānaṃ vijjati; sammattaniyāmaṃ anokkamamāno sotāpattiphalaṃ vā sakadāgāmiphalaṃ vā anāgāmiphalaṃ vā arahattaṃ vā sacchikarissatīti – netaṃ ṭhānaṃ vijjati.

    ‘‘སོ ཝཏ, བྷིཀྑཝེ, བྷིཀྑུ སབྦདྷམྨེ 5 ཨནཏྟཏོ སམནུཔསྶནྟོ ཨནུལོམིཀཱཡ ཁནྟིཡཱ སམནྣཱགཏོ བྷཝིསྶཏཱིཏི – ཋཱནམེཏཾ ཝིཛྫཏི; ཨནུལོམིཀཱཡ ཁནྟིཡཱ སམནྣཱགཏོ སམྨཏྟནིཡཱམཾ ཨོཀྐམིསྶཏཱིཏི – ཋཱནམེཏཾ ཝིཛྫཏི; སམྨཏྟནིཡཱམཾ ཨོཀྐམམཱནོ སོཏཱཔཏྟིཕལཾ ཝཱ སཀདཱགཱམིཕལཾ ཝཱ ཨནཱགཱམིཕལཾ ཝཱ ཨརཧཏྟཾ ཝཱ སཙྪིཀརིསྶཏཱིཏི – ཋཱནམེཏཾ ཝིཛྫཏི།

    ‘‘So vata, bhikkhave, bhikkhu sabbadhamme 6 anattato samanupassanto anulomikāya khantiyā samannāgato bhavissatīti – ṭhānametaṃ vijjati; anulomikāya khantiyā samannāgato sammattaniyāmaṃ okkamissatīti – ṭhānametaṃ vijjati; sammattaniyāmaṃ okkamamāno sotāpattiphalaṃ vā sakadāgāmiphalaṃ vā anāgāmiphalaṃ vā arahattaṃ vā sacchikarissatīti – ṭhānametaṃ vijjati.

    ‘‘སོ ཝཏ, བྷིཀྑཝེ, བྷིཀྑུ ནིབྦཱནཾ དུཀྑཏོ སམནུཔསྶནྟོ ཨནུལོམིཀཱཡ ཁནྟིཡཱ སམནྣཱགཏོ བྷཝིསྶཏཱིཏི – ནེཏཾ ཋཱནཾ ཝིཛྫཏི; ཨནུལོམིཀཱཡ ཁནྟིཡཱ ཨསམནྣཱགཏོ སམྨཏྟནིཡཱམཾ ཨོཀྐམིསྶཏཱིཏི – ནེཏཾ ཋཱནཾ ཝིཛྫཏི; སམྨཏྟནིཡཱམཾ ཨནོཀྐམམཱནོ སོཏཱཔཏྟིཕལཾ ཝཱ སཀདཱགཱམིཕལཾ ཝཱ ཨནཱགཱམིཕལཾ ཝཱ ཨརཧཏྟཾ ཝཱ སཙྪིཀརིསྶཏཱིཏི – ནེཏཾ ཋཱནཾ ཝིཛྫཏི།

    ‘‘So vata, bhikkhave, bhikkhu nibbānaṃ dukkhato samanupassanto anulomikāya khantiyā samannāgato bhavissatīti – netaṃ ṭhānaṃ vijjati; anulomikāya khantiyā asamannāgato sammattaniyāmaṃ okkamissatīti – netaṃ ṭhānaṃ vijjati; sammattaniyāmaṃ anokkamamāno sotāpattiphalaṃ vā sakadāgāmiphalaṃ vā anāgāmiphalaṃ vā arahattaṃ vā sacchikarissatīti – netaṃ ṭhānaṃ vijjati.

    ‘‘སོ ཝཏ, བྷིཀྑཝེ, བྷིཀྑུ ནིབྦཱནཾ སུཁཏོ སམནུཔསྶནྟོ ཨནུལོམིཀཱཡ ཁནྟིཡཱ སམནྣཱགཏོ བྷཝིསྶཏཱིཏི – ཋཱནམེཏཾ ཝིཛྫཏི; ཨནུལོམིཀཱཡ ཁནྟིཡཱ སམནྣཱགཏོ སམྨཏྟནིཡཱམཾ ཨོཀྐམིསྶཏཱིཏི – ཋཱནམེཏཾ ཝིཛྫཏི; སམྨཏྟནིཡཱམཾ ཨོཀྐམམཱནོ སོཏཱཔཏྟིཕལཾ ཝཱ སཀདཱགཱམིཕལཾ ཝཱ ཨནཱགཱམིཕལཾ ཝཱ ཨརཧཏྟཾ ཝཱ སཙྪིཀརིསྶཏཱིཏི – ཋཱནམེཏཾ ཝིཛྫཏི’’།

    ‘‘So vata, bhikkhave, bhikkhu nibbānaṃ sukhato samanupassanto anulomikāya khantiyā samannāgato bhavissatīti – ṭhānametaṃ vijjati; anulomikāya khantiyā samannāgato sammattaniyāmaṃ okkamissatīti – ṭhānametaṃ vijjati; sammattaniyāmaṃ okkamamāno sotāpattiphalaṃ vā sakadāgāmiphalaṃ vā anāgāmiphalaṃ vā arahattaṃ vā sacchikarissatīti – ṭhānametaṃ vijjati’’.

    ༣༧. ཀཏིཧཱཀཱརེཧི ཨནུལོམིཀཾ ཁནྟིཾ པཊིལབྷཏི, ཀཏིཧཱཀཱརེཧི སམྨཏྟནིཡཱམཾ ཨོཀྐམཏི? ཙཏྟཱརཱིསཱཡ ཨཱཀཱརེཧི ཨནུལོམིཀཾ ཁནྟིཾ པཊིལབྷཏི, ཙཏྟཱརཱིསཱཡ ཨཱཀཱརེཧི སམྨཏྟནིཡཱམཾ ཨོཀྐམཏི།

    37. Katihākārehi anulomikaṃ khantiṃ paṭilabhati, katihākārehi sammattaniyāmaṃ okkamati? Cattārīsāya ākārehi anulomikaṃ khantiṃ paṭilabhati, cattārīsāya ākārehi sammattaniyāmaṃ okkamati.

    ཀཏམེཧི ཙཏྟཱརཱིསཱཡ ཨཱཀཱརེཧི ཨནུལོམིཀཾ ཁནྟིཾ པཊིལབྷཏི, ཀཏམཧི ཙཏྟཱརཱིསཱཡ ཨཱཀཱརེཧི སམྨཏྟནིཡཱམཾ ཨོཀྐམཏི? པཉྩཀྑནྡྷེ ཨནིཙྩཏོ དུཀྑཏོ རོགཏོ གཎྜཏོ སལླཏོ ཨགྷཏོ ཨཱབཱདྷཏོ པརཏོ པལོཀཏོ ཨཱིཏིཏོ ཨུཔདྡཝཏོ བྷཡཏོ ཨུཔསགྒཏོ ཙལཏོ པབྷངྒུཏོ 7 ཨདྡྷུཝཏོ ཨཏཱཎཏོ 8 ཨལེཎཏོ ཨསརཎཏོ རིཏྟཏོ ཏུཙྪཏོ སུཉྙཏོ ཨནཏྟཏོ ཨཱདཱིནཝཏོ ཝིཔརིཎཱམདྷམྨཏོ ཨསཱརཀཏོ ཨགྷམཱུལཏོ ཝདྷཀཏོ ཝིབྷཝཏོ སཱསཝཏོ སངྑཏཏོ མཱརཱམིསཏོ ཛཱཏིདྷམྨཏོ ཛརཱདྷམྨཏོ བྱཱདྷིདྷམྨཏོ མརཎདྷམྨཏོ སོཀདྷམྨཏོ པརིདེཝདྷམྨཏོ ཨུཔཱཡཱསདྷམྨཏོ སཾཀིལེསིཀདྷམྨཏོ།

    Katamehi cattārīsāya ākārehi anulomikaṃ khantiṃ paṭilabhati, katamahi cattārīsāya ākārehi sammattaniyāmaṃ okkamati? Pañcakkhandhe aniccato dukkhato rogato gaṇḍato sallato aghato ābādhato parato palokato ītito upaddavato bhayato upasaggato calato pabhaṅguto 9 addhuvato atāṇato 10 aleṇato asaraṇato rittato tucchato suññato anattato ādīnavato vipariṇāmadhammato asārakato aghamūlato vadhakato vibhavato sāsavato saṅkhatato mārāmisato jātidhammato jarādhammato byādhidhammato maraṇadhammato sokadhammato paridevadhammato upāyāsadhammato saṃkilesikadhammato.

    ༣༨. པཉྩཀྑནྡྷེ ཨནིཙྩཏོ པསྶནྟོ ཨནུལོམིཀཾ ཁནྟིཾ པཊིལབྷཏི། པཉྩནྣཾ ཁནྡྷཱནཾ ནིརོདྷོ ནིཙྩཾ ནིབྦཱནནྟི པསྶནྟོ སམྨཏྟནིཡཱམཾ ཨོཀྐམཏི། པཉྩཀྑནྡྷེ དུཀྑཏོ པསྶནྟོ ཨནུལོམིཀཾ ཁནྟིཾ པཊིལབྷཏི། པཉྩནྣཾ ཁནྡྷཱནཾ ནིརོདྷོ སུཁཾ ནིབྦཱནནྟི པསྶནྟོ སམྨཏྟནིཡཱམཾ ཨོཀྐམཏི། པཉྩཀྑནྡྷེ རོགཏོ པསྶནྟོ ཨནུལོམིཀཾ ཁནྟིཾ པཊིལབྷཏི། པཉྩནྣཾ ཁནྡྷཱནཾ ནིརོདྷོ ཨཱརོགྱཾ ནིབྦཱནནྟི པསྶནྟོ སམྨཏྟནིཡཱམཾ ཨོཀྐམཏི། པཉྩཀྑནྡྷེ གཎྜཏོ པསྶནྟོ ཨནུལོམིཀཾ ཁནྟིཾ པཊིལབྷཏི། པཉྩནྣཾ ཁནྡྷཱནཾ ནིརོདྷོ ཨགཎྜཾ 11 ནིབྦཱནནྟི པསྶནྟོ སམྨཏྟནིཡཱམཾ ཨོཀྐམཏི། པཉྩཀྑནྡྷེ སལླཏོ པསྶནྟོ ཨནུལོམིཀཾ ཁནྟིཾ པཊིལབྷཏི། པཉྩནྣཾ ཁནྡྷཱནཾ ནིརོདྷོ ཝིསལླཾ 12 ནིབྦཱནནྟི པསྶནྟོ སམྨཏྟནིཡཱམཾ ཨོཀྐམཏི།

    38. Pañcakkhandhe aniccato passanto anulomikaṃ khantiṃ paṭilabhati. Pañcannaṃ khandhānaṃ nirodho niccaṃ nibbānanti passanto sammattaniyāmaṃ okkamati. Pañcakkhandhe dukkhato passanto anulomikaṃ khantiṃ paṭilabhati. Pañcannaṃ khandhānaṃ nirodho sukhaṃ nibbānanti passanto sammattaniyāmaṃ okkamati. Pañcakkhandhe rogato passanto anulomikaṃ khantiṃ paṭilabhati. Pañcannaṃ khandhānaṃ nirodho ārogyaṃ nibbānanti passanto sammattaniyāmaṃ okkamati. Pañcakkhandhe gaṇḍato passanto anulomikaṃ khantiṃ paṭilabhati. Pañcannaṃ khandhānaṃ nirodho agaṇḍaṃ 13 nibbānanti passanto sammattaniyāmaṃ okkamati. Pañcakkhandhe sallato passanto anulomikaṃ khantiṃ paṭilabhati. Pañcannaṃ khandhānaṃ nirodho visallaṃ 14 nibbānanti passanto sammattaniyāmaṃ okkamati.

    པཉྩཀྑནྡྷེ ཨགྷཏོ པསྶནྟོ ཨནུལོམིཀཾ ཁནྟིཾ པཊིལབྷཏི། པཉྩནྣཾ ཁནྡྷཱནཾ ནིརོདྷོ ཨནགྷོ ནིབྦཱནནྟི པསྶནྟོ སམྨཏྟནིཡཱམཾ ཨོཀྐམཏི། པཉྩཀྑནྡྷེ ཨཱབཱདྷཏོ པསྶནྟོ ཨནུལོམིཀཾ ཁནྟིཾ པཊིལབྷཏི། པཉྩནྣཾ ཁནྡྷཱནཾ ནིརོདྷོ ཨནཱབཱདྷོ ནིབྦཱནནྟི པསྶནྟོ སམྨཏྟནིཡཱམཾ ཨོཀྐམཏི། པཉྩཀྑནྡྷེ པརཏོ པསྶནྟོ ཨནུལོམིཀཾ ཁནྟིཾ པཊིལབྷཏི། པཉྩནྣཾ ཁནྡྷཱནཾ ནིརོདྷོ ཨཔརཔྤཙྩཡཾ ནིབྦཱནནྟི པསྶནྟོ སམྨཏྟནིཡཱམཾ ཨོཀྐམཏི། པཉྩཀྑནྡྷེ པལོཀཏོ པསྶནྟོ ཨནུལོམིཀཾ ཁནྟིཾ པཊིལབྷཏི། པཉྩནྣཾ ཁནྡྷཱནཾ ནིརོདྷོ ཨཔལོཀདྷམྨོ ནིབྦཱནནྟི པསྶནྟོ སམྨཏྟནིཡཱམཾ ཨོཀྐམཏི། པཉྩཀྑནྡྷེ ཨཱིཏིཏོ པསྶནྟོ ཨནུལོམིཀཾ ཁནྟིཾ པཊིལབྷཏི། པཉྩནྣཾ ཁནྡྷཱནཾ ནིརོདྷོ ཨནཱིཏིཀཾ ནིབྦཱནནྟི པསྶནྟོ སམྨཏྟནིཡཱམཾ ཨོཀྐམཏི།

    Pañcakkhandhe aghato passanto anulomikaṃ khantiṃ paṭilabhati. Pañcannaṃ khandhānaṃ nirodho anagho nibbānanti passanto sammattaniyāmaṃ okkamati. Pañcakkhandhe ābādhato passanto anulomikaṃ khantiṃ paṭilabhati. Pañcannaṃ khandhānaṃ nirodho anābādho nibbānanti passanto sammattaniyāmaṃ okkamati. Pañcakkhandhe parato passanto anulomikaṃ khantiṃ paṭilabhati. Pañcannaṃ khandhānaṃ nirodho aparappaccayaṃ nibbānanti passanto sammattaniyāmaṃ okkamati. Pañcakkhandhe palokato passanto anulomikaṃ khantiṃ paṭilabhati. Pañcannaṃ khandhānaṃ nirodho apalokadhammo nibbānanti passanto sammattaniyāmaṃ okkamati. Pañcakkhandhe ītito passanto anulomikaṃ khantiṃ paṭilabhati. Pañcannaṃ khandhānaṃ nirodho anītikaṃ nibbānanti passanto sammattaniyāmaṃ okkamati.

    པཉྩཀྑནྡྷེ ཨུཔདྡཝཏོ པསྶནྟོ ཨནུལོམིཀཾ ཁནྟིཾ པཊིལབྷཏི། པཉྩནྣཾ ཁནྡྷཱནཾ ནིརོདྷོ ཨནུཔདྡཝཾ ནིབྦཱནནྟི པསྶནྟོ སམྨཏྟནིཡཱམཾ ཨོཀྐམཏི། པཉྩཀྑནྡྷེ བྷཡཏོ པསྶནྟོ ཨནུལོམིཀཾ ཁནྟིཾ པཊིལབྷཏི། པཉྩནྣཾ ཁནྡྷཱནཾ ནིརོདྷོ ཨབྷཡཾ ནིབྦཱནནྟི པསྶནྟོ སམྨཏྟནིཡཱམཾ ཨོཀྐམཏི། པཉྩཀྑནྡྷེ ཨུཔསགྒཏོ པསྶནྟོ ཨནུལོམིཀཾ ཁནྟིཾ པཊིལབྷཏི། པཉྩནྣཾ ཁནྡྷཱནཾ ནིརོདྷོ ཨནུཔསགྒཾ ནིབྦཱནནྟི པསྶནྟོ སམྨཏྟནིཡཱམཾ ཨོཀྐམཏི། པཉྩཀྑནྡྷེ ཙལཏོ པསྶནྟོ ཨནུལོམིཀཾ ཁནྟིཾ པཊིལབྷཏི། པཉྩནྣཾ ཁནྡྷཱནཾ ནིརོདྷོ ཨཙལཾ ནིབྦཱནནྟི པསྶནྟོ སམྨཏྟནིཡཱམཾ ཨོཀྐམཏི། པཉྩཀྑནྡྷེ པབྷངྒུཏོ པསྶནྟོ ཨནུལོམིཀཾ ཁནྟིཾ པཊིལབྷཏི། པཉྩནྣཾ ཁནྡྷཱནཾ ནིརོདྷོ ཨཔབྷངྒུ 15 ནིབྦཱནནྟི པསྶནྟོ སམྨཏྟནིཡཱམཾ ཨོཀྐམཏི།

    Pañcakkhandhe upaddavato passanto anulomikaṃ khantiṃ paṭilabhati. Pañcannaṃ khandhānaṃ nirodho anupaddavaṃ nibbānanti passanto sammattaniyāmaṃ okkamati. Pañcakkhandhe bhayato passanto anulomikaṃ khantiṃ paṭilabhati. Pañcannaṃ khandhānaṃ nirodho abhayaṃ nibbānanti passanto sammattaniyāmaṃ okkamati. Pañcakkhandhe upasaggato passanto anulomikaṃ khantiṃ paṭilabhati. Pañcannaṃ khandhānaṃ nirodho anupasaggaṃ nibbānanti passanto sammattaniyāmaṃ okkamati. Pañcakkhandhe calato passanto anulomikaṃ khantiṃ paṭilabhati. Pañcannaṃ khandhānaṃ nirodho acalaṃ nibbānanti passanto sammattaniyāmaṃ okkamati. Pañcakkhandhe pabhaṅguto passanto anulomikaṃ khantiṃ paṭilabhati. Pañcannaṃ khandhānaṃ nirodho apabhaṅgu 16 nibbānanti passanto sammattaniyāmaṃ okkamati.

    པཉྩཀྑནྡྷེ ཨདྡྷུཝཏོ པསྶནྟོ ཨནུལོམིཀཾ ཁནྟིཾ པཊིལབྷཏི། པཉྩནྣཾ ཁནྡྷཱནཾ ནིརོདྷོ དྷུཝཾ ནིབྦཱནནྟི པསྶནྟོ སམྨཏྟནིཡཱམཾ ཨོཀྐམཏི། པཉྩཀྑནྡྷེ ཨཏཱཎཏོ པསྶནྟོ ཨནུལོམིཀཾ ཁནྟིཾ པཊིལབྷཏི། པཉྩནྣཾ ཁནྡྷཱནཾ ནིརོདྷོ ཏཱཎཾ ནིབྦཱནནྟི པསྶནྟོ སམྨཏྟནིཡཱམཾ ཨོཀྐམཏི། པཉྩཀྑནྡྷེ ཨལེཎཏོ པསྶནྟོ ཨནུལོམིཀཾ ཁནྟིཾ པཊིལབྷཏི། པཉྩནྣཾ ཁནྡྷཱནཾ ནིརོདྷོ ལེཎཾ ནིབྦཱནནྟི པསྶནྟོ སམྨཏྟནིཡཱམཾ ཨོཀྐམཏི། པཉྩཀྑནྡྷེ ཨསརཎཏོ པསྶནྟོ ཨནུལོམིཀཾ ཁནྟིཾ པཊིལབྷཏི། པཉྩནྣཾ ཁནྡྷཱནཾ ནིརོདྷོ སརཎཾ ནིབྦཱནནྟི པསྶནྟོ སམྨཏྟནིཡཱམཾ ཨོཀྐམཏི། པཉྩཀྑནྡྷེ རིཏྟཏོ པསྶནྟོ ཨནུལོམིཀཾ ཁནྟིཾ པཊིལབྷཏི། པཉྩནྣཾ ཁནྡྷཱནཾ ནིརོདྷོ ཨརིཏྟཾ ནིབྦཱནནྟི པསྶནྟོ སམྨཏྟནིཡཱམཾ ཨོཀྐམཏི།

    Pañcakkhandhe addhuvato passanto anulomikaṃ khantiṃ paṭilabhati. Pañcannaṃ khandhānaṃ nirodho dhuvaṃ nibbānanti passanto sammattaniyāmaṃ okkamati. Pañcakkhandhe atāṇato passanto anulomikaṃ khantiṃ paṭilabhati. Pañcannaṃ khandhānaṃ nirodho tāṇaṃ nibbānanti passanto sammattaniyāmaṃ okkamati. Pañcakkhandhe aleṇato passanto anulomikaṃ khantiṃ paṭilabhati. Pañcannaṃ khandhānaṃ nirodho leṇaṃ nibbānanti passanto sammattaniyāmaṃ okkamati. Pañcakkhandhe asaraṇato passanto anulomikaṃ khantiṃ paṭilabhati. Pañcannaṃ khandhānaṃ nirodho saraṇaṃ nibbānanti passanto sammattaniyāmaṃ okkamati. Pañcakkhandhe rittato passanto anulomikaṃ khantiṃ paṭilabhati. Pañcannaṃ khandhānaṃ nirodho arittaṃ nibbānanti passanto sammattaniyāmaṃ okkamati.

    པཉྩཀྑནྡྷེ ཏུཙྪཏོ པསྶནྟོ ཨནུལོམིཀཾ ཁནྟིཾ པཊིལབྷཏི། པཉྩནྣཾ ཁནྡྷཱནཾ ནིརོདྷོ ཨཏུཙྪཾ ནིབྦཱནནྟི པསྶནྟོ སམྨཏྟནིཡཱམཾ ཨོཀྐམཏི། པཉྩཀྑནྡྷེ སུཉྙཏོ པསྶནྟོ ཨནུལོམིཀཾ ཁནྟིཾ པཊིལབྷཏི། པཉྩནྣཾ ཁནྡྷཱནཾ ནིརོདྷོ པརམསུཉྙཾ ནིབྦཱནནྟི པསྶནྟོ སམྨཏྟནིཡཱམཾ ཨོཀྐམཏི། པཉྩཀྑནྡྷེ ཨནཏྟཏོ པསྶནྟོ ཨནུལོམིཀཾ ཁནྟིཾ པཊིལབྷཏི། པཉྩནྣཾ ཁནྡྷཱནཾ ནིརོདྷོ པརམཏྠཾ ནིབྦཱནནྟི པསྶནྟོ སམྨཏྟནིཡཱམཾ ཨོཀྐམཏི། པཉྩཀྑནྡྷེ ཨཱདཱིནཝཏོ པསྶནྟོ ཨནུལོམིཀཾ ཁནྟིཾ པཊིལབྷཏི། པཉྩནྣཾ ཁནྡྷཱནཾ ནིརོདྷོ ཨནཱདཱིནཝཾ ནིབྦཱནནྟི པསྶནྟོ སམྨཏྟནིཡཱམཾ ཨོཀྐམཏི། པཉྩཀྑནྡྷེ ཝིཔརིཎཱམདྷམྨཏོ པསྶནྟོ ཨནུལོམིཀཾ ཁནྟིཾ པཊིལབྷཏི། པཉྩནྣཾ ཁནྡྷཱནཾ ནིརོདྷོ ཨཝིཔརིཎཱམདྷམྨཾ ནིབྦཱནནྟི པསྶནྟོ སམྨཏྟནིཡཱམཾ ཨོཀྐམཏི།

    Pañcakkhandhe tucchato passanto anulomikaṃ khantiṃ paṭilabhati. Pañcannaṃ khandhānaṃ nirodho atucchaṃ nibbānanti passanto sammattaniyāmaṃ okkamati. Pañcakkhandhe suññato passanto anulomikaṃ khantiṃ paṭilabhati. Pañcannaṃ khandhānaṃ nirodho paramasuññaṃ nibbānanti passanto sammattaniyāmaṃ okkamati. Pañcakkhandhe anattato passanto anulomikaṃ khantiṃ paṭilabhati. Pañcannaṃ khandhānaṃ nirodho paramatthaṃ nibbānanti passanto sammattaniyāmaṃ okkamati. Pañcakkhandhe ādīnavato passanto anulomikaṃ khantiṃ paṭilabhati. Pañcannaṃ khandhānaṃ nirodho anādīnavaṃ nibbānanti passanto sammattaniyāmaṃ okkamati. Pañcakkhandhe vipariṇāmadhammato passanto anulomikaṃ khantiṃ paṭilabhati. Pañcannaṃ khandhānaṃ nirodho avipariṇāmadhammaṃ nibbānanti passanto sammattaniyāmaṃ okkamati.

    པཉྩཀྑནྡྷེ ཨསཱརཀཏོ པསྶནྟོ ཨནུལོམིཀཾ ཁནྟིཾ པཊིལབྷཏི། པཉྩནྣཾ ཁནྡྷཱནཾ ནིརོདྷོ སཱརཾ ནིབྦཱནནྟི པསྶནྟོ སམྨཏྟནིཡཱམཾ ཨོཀྐམཏི། པཉྩཀྑནྡྷེ ཨགྷམཱུལཏོ པསྶནྟོ ཨནུལོམིཀཾ ཁནྟིཾ པཊིལབྷཏི། པཉྩནྣཾ ཁནྡྷཱནཾ ནིརོདྷོ ཨནགྷམཱུལཾ ནིབྦཱནནྟི པསྶནྟོ སམྨཏྟནིཡཱམཾ ཨོཀྐམཏི། པཉྩཀྑནྡྷེ ཝདྷཀཏོ པསྶནྟོ ཨནུལོམིཀཾ ཁནྟིཾ པཊིལབྷཏི། པཉྩནྣཾ ཁནྡྷཱནཾ ནིརོདྷོ ཨཝདྷཀཾ ནིབྦཱནནྟི པསྶནྟོ སམྨཏྟནིཡཱམཾ ཨོཀྐམཏི། པཉྩཀྑནྡྷེ ཝིབྷཝཏོ པསྶནྟོ ཨནུལོམིཀཾ ཁནྟིཾ པཊིལབྷཏི། པཉྩནྣཾ ཁནྡྷཱནཾ ནིརོདྷོ ཨཝིབྷཝཾ ནིབྦཱནནྟི པསྶནྟོ སམྨཏྟནིཡཱམཾ ཨོཀྐམཏི། པཉྩཀྑནྡྷེ སཱསཝཏོ པསྶནྟོ ཨནུལོམིཀཾ ཁནྟིཾ པཊིལབྷཏི། པཉྩནྣཾ ཁནྡྷཱནཾ ནིརོདྷོ ཨནཱསཝཾ ནིབྦཱནནྟི པསྶནྟོ སམྨཏྟནིཡཱམཾ ཨོཀྐམཏི།

    Pañcakkhandhe asārakato passanto anulomikaṃ khantiṃ paṭilabhati. Pañcannaṃ khandhānaṃ nirodho sāraṃ nibbānanti passanto sammattaniyāmaṃ okkamati. Pañcakkhandhe aghamūlato passanto anulomikaṃ khantiṃ paṭilabhati. Pañcannaṃ khandhānaṃ nirodho anaghamūlaṃ nibbānanti passanto sammattaniyāmaṃ okkamati. Pañcakkhandhe vadhakato passanto anulomikaṃ khantiṃ paṭilabhati. Pañcannaṃ khandhānaṃ nirodho avadhakaṃ nibbānanti passanto sammattaniyāmaṃ okkamati. Pañcakkhandhe vibhavato passanto anulomikaṃ khantiṃ paṭilabhati. Pañcannaṃ khandhānaṃ nirodho avibhavaṃ nibbānanti passanto sammattaniyāmaṃ okkamati. Pañcakkhandhe sāsavato passanto anulomikaṃ khantiṃ paṭilabhati. Pañcannaṃ khandhānaṃ nirodho anāsavaṃ nibbānanti passanto sammattaniyāmaṃ okkamati.

    པཉྩཀྑནྡྷེ སངྑཏཏོ པསྶནྟོ ཨནུལོམིཀཾ ཁནྟིཾ པཊིལབྷཏི། པཉྩནྣཾ ཁནྡྷཱནཾ ནིརོདྷོ ཨསངྑཏཾ ནིབྦཱནནྟི པསྶནྟོ སམྨཏྟནིཡཱམཾ ཨོཀྐམཏི། པཉྩཀྑནྡྷེ མཱརཱམིསཏོ པསྶནྟོ ཨནུལོམིཀཾ ཁནྟིཾ པཊིལབྷཏི། པཉྩནྣཾ ཁནྡྷཱནཾ ནིརོདྷོ ནིརཱམིསཾ ནིབྦཱནནྟི པསྶནྟོ སམྨཏྟནིཡཱམཾ ཨོཀྐམཏི། པཉྩཀྑནྡྷེ ཛཱཏིདྷམྨཏོ པསྶནྟོ ཨནུལོམིཀཾ ཁནྟིཾ པཊིལབྷཏི། པཉྩནྣཾ ཁནྡྷཱནཾ ནིརོདྷོ ཨཛཱཏཾ ནིབྦཱནནྟི པསྶནྟོ སམྨཏྟནིཡཱམཾ ཨོཀྐམཏི། པཉྩཀྑནྡྷེ ཛརཱདྷམྨཏོ པསྶནྟོ ཨནུལོམིཀཾ ཁནྟིཾ པཊིལབྷཏི། པཉྩནྣཾ ཁནྡྷཱནཾ ནིརོདྷོ ཨཛརཾ ནིབྦཱནནྟི པསྶནྟོ སམྨཏྟནིཡཱམཾ ཨོཀྐམཏི། པཉྩཀྑནྡྷེ བྱཱདྷིདྷམྨཏོ པསྶནྟོ ཨནུལོམིཀཾ ཁནྟིཾ པཊིལབྷཏི། པཉྩནྣཾ ཁནྡྷཱནཾ ནིརོདྷོ ཨབྱཱདྷི 17 ནིབྦཱནནྟི པསྶནྟོ སམྨཏྟནིཡཱམཾ ཨོཀྐམཏི།

    Pañcakkhandhe saṅkhatato passanto anulomikaṃ khantiṃ paṭilabhati. Pañcannaṃ khandhānaṃ nirodho asaṅkhataṃ nibbānanti passanto sammattaniyāmaṃ okkamati. Pañcakkhandhe mārāmisato passanto anulomikaṃ khantiṃ paṭilabhati. Pañcannaṃ khandhānaṃ nirodho nirāmisaṃ nibbānanti passanto sammattaniyāmaṃ okkamati. Pañcakkhandhe jātidhammato passanto anulomikaṃ khantiṃ paṭilabhati. Pañcannaṃ khandhānaṃ nirodho ajātaṃ nibbānanti passanto sammattaniyāmaṃ okkamati. Pañcakkhandhe jarādhammato passanto anulomikaṃ khantiṃ paṭilabhati. Pañcannaṃ khandhānaṃ nirodho ajaraṃ nibbānanti passanto sammattaniyāmaṃ okkamati. Pañcakkhandhe byādhidhammato passanto anulomikaṃ khantiṃ paṭilabhati. Pañcannaṃ khandhānaṃ nirodho abyādhi 18 nibbānanti passanto sammattaniyāmaṃ okkamati.

    པཉྩཀྑནྡྷེ མརཎདྷམྨཏོ པསྶནྟོ ཨནུལོམིཀཾ ཁནྟིཾ པཊིལབྷཏི། པཉྩནྣཾ ཁནྡྷཱནཾ ནིརོདྷོ ཨམཏཾ ནིབྦཱནནྟི པསྶནྟོ སམྨཏྟནིཡཱམཾ ཨོཀྐམཏི། པཉྩཀྑནྡྷེ སོཀདྷམྨཏོ པསྶནྟོ ཨནུལོམིཀཾ ཁནྟིཾ པཊིལབྷཏི། པཉྩནྣཾ ཁནྡྷཱནཾ ནིརོདྷོ ཨསོཀཾ ནིབྦཱནནྟི པསྶནྟོ སམྨཏྟནིཡཱམཾ ཨོཀྐམཏི། པཉྩཀྑནྡྷེ པརིདེཝདྷམྨཏོ པསྶནྟོ ཨནུལོམིཀཾ ཁནྟིཾ པཊིལབྷཏི། པཉྩནྣཾ ཁནྡྷཱནཾ ནིརོདྷོ ཨཔརིདེཝཾ ནིབྦཱནནྟི པསྶནྟོ སམྨཏྟནིཡཱམཾ ཨོཀྐམཏི། པཉྩཀྑནྡྷེ ཨུཔཱཡཱསདྷམྨཏོ པསྶནྟོ ཨནུལོམིཀཾ ཁནྟིཾ པཊིལབྷཏི། པཉྩནྣཾ ཁནྡྷཱནཾ ནིརོདྷོ ཨནུཔཱཡཱསཾ ནིབྦཱནནྟི པསྶནྟོ སམྨཏྟནིཡཱམཾ ཨོཀྐམཏི། པཉྩཀྑནྡྷེ སཾཀིལེསིཀདྷམྨཏོ པསྶནྟོ ཨནུལོམིཀཾ ཁནྟིཾ པཊིལབྷཏི། པཉྩནྣཾ ཁནྡྷཱནཾ ནིརོདྷོ ཨསཾཀིལིཊྛཾ ནིབྦཱནནྟི པསྶནྟོ སམྨཏྟནིཡཱམཾ ཨོཀྐམཏི།

    Pañcakkhandhe maraṇadhammato passanto anulomikaṃ khantiṃ paṭilabhati. Pañcannaṃ khandhānaṃ nirodho amataṃ nibbānanti passanto sammattaniyāmaṃ okkamati. Pañcakkhandhe sokadhammato passanto anulomikaṃ khantiṃ paṭilabhati. Pañcannaṃ khandhānaṃ nirodho asokaṃ nibbānanti passanto sammattaniyāmaṃ okkamati. Pañcakkhandhe paridevadhammato passanto anulomikaṃ khantiṃ paṭilabhati. Pañcannaṃ khandhānaṃ nirodho aparidevaṃ nibbānanti passanto sammattaniyāmaṃ okkamati. Pañcakkhandhe upāyāsadhammato passanto anulomikaṃ khantiṃ paṭilabhati. Pañcannaṃ khandhānaṃ nirodho anupāyāsaṃ nibbānanti passanto sammattaniyāmaṃ okkamati. Pañcakkhandhe saṃkilesikadhammato passanto anulomikaṃ khantiṃ paṭilabhati. Pañcannaṃ khandhānaṃ nirodho asaṃkiliṭṭhaṃ nibbānanti passanto sammattaniyāmaṃ okkamati.

    ༣༩. ཨནིཙྩཏོཏི, ཨནིཙྩཱནུཔསྶནཱ། དུཀྑཏོཏི, དུཀྑཱནུཔསྶནཱ། རོགཏོཏི , དུཀྑཱནུཔསྶནཱ། གཎྜཏོཏི, དུཀྑཱནུཔསྶནཱ། སལླཏོཏི, དུཀྑཱནུཔསྶནཱ། ཨགྷཏོཏི, དུཀྑཱནུཔསྶནཱ། ཨཱབཱདྷཏོཏི, དུཀྑཱནུཔསྶནཱ། པརཏོཏི, ཨནཏྟཱནུཔསྶནཱ། པལོཀཏོཏི, ཨནིཙྩཱནུཔསྶནཱ། ཨཱིཏིཏོཏི, དུཀྑཱནུཔསྶནཱ།

    39. Aniccatoti, aniccānupassanā. Dukkhatoti, dukkhānupassanā. Rogatoti , dukkhānupassanā. Gaṇḍatoti, dukkhānupassanā. Sallatoti, dukkhānupassanā. Aghatoti, dukkhānupassanā. Ābādhatoti, dukkhānupassanā. Paratoti, anattānupassanā. Palokatoti, aniccānupassanā. Ītitoti, dukkhānupassanā.

    ཨུཔདྡཝཏོཏི, དུཀྑཱནུཔསྶནཱ། བྷཡཏོཏི, དུཀྑཱནུཔསྶནཱ ། ཨུཔསགྒཏོཏི, དུཀྑཱནུཔསྶནཱ། ཙལཏོཏི, ཨནིཙྩཱནུཔསྶནཱ། པབྷངྒུཏོཏི, ཨནིཙྩཱནུཔསྶནཱ། ཨདྡྷུཝཏོཏི, ཨནིཙྩཱནུཔསྶནཱ། ཨཏཱཎཏོཏི, དུཀྑཱནུཔསྶནཱ། ཨལེཎཏོཏི, དུཀྑཱནུཔསྶནཱ། ཨསརཎཏོཏི, དུཀྑཱནུཔསྶནཱ། རིཏྟཏོཏི, ཨནཏྟཱནུཔསྶནཱ།

    Upaddavatoti, dukkhānupassanā. Bhayatoti, dukkhānupassanā . Upasaggatoti, dukkhānupassanā. Calatoti, aniccānupassanā. Pabhaṅgutoti, aniccānupassanā. Addhuvatoti, aniccānupassanā. Atāṇatoti, dukkhānupassanā. Aleṇatoti, dukkhānupassanā. Asaraṇatoti, dukkhānupassanā. Rittatoti, anattānupassanā.

    ཏུཙྪཏོཏི, ཨནཏྟཱནུཔསྶནཱ། སུཉྙཏོཏི, ཨནཏྟཱནུཔསྶནཱ། ཨནཏྟཏོཏི , ཨནཏྟཱནུཔསྶནཱ། ཨཱདཱིནཝཏོཏི, དུཀྑཱནུཔསྶནཱ། ཝིཔརིཎཱམདྷམྨཏོཏི, ཨནིཙྩཱནུཔསྶནཱ། ཨསཱརཀཏོཏི, ཨནཏྟཱནུཔསྶནཱ། ཨགྷམཱུལཏོཏི , དུཀྑཱནུཔསྶནཱ། ཝདྷཀཏོཏི, དུཀྑཱནུཔསྶནཱ། ཝིབྷཝཏོཏི, ཨནིཙྩཱནུཔསྶནཱ། སཱསཝཏོཏི, དུཀྑཱནུཔསྶནཱ།

    Tucchatoti, anattānupassanā. Suññatoti, anattānupassanā. Anattatoti , anattānupassanā. Ādīnavatoti, dukkhānupassanā. Vipariṇāmadhammatoti, aniccānupassanā. Asārakatoti, anattānupassanā. Aghamūlatoti , dukkhānupassanā. Vadhakatoti, dukkhānupassanā. Vibhavatoti, aniccānupassanā. Sāsavatoti, dukkhānupassanā.

    སངྑཏཏོཏི, ཨནིཙྩཱནུཔསྶནཱ། མཱརཱམིསཏོཏི, དུཀྑཱནུཔསྶནཱ། ཛཱཏིདྷམྨཏོཏི, དུཀྑཱནུཔསྶནཱ། ཛརཱདྷམྨཏོཏི, དུཀྑཱནུཔསྶནཱ། བྱཱདྷིདྷམྨཏོཏི, དུཀྑཱནུཔསྶནཱ། མརཎདྷམྨཏོཏི, ཨནིཙྩཱནུཔསྶནཱ། སོཀདྷམྨཏོཏི, དུཀྑཱནུཔསྶནཱ། པརིདེཝདྷམྨཏོཏི, དུཀྑཱནུཔསྶནཱ། ཨུཔཱཡཱསདྷམྨཏོཏི, དུཀྑཱནུཔསྶནཱ། སཾཀིལེསིཀདྷམྨཏོཏི, དུཀྑཱནུཔསྶནཱ།

    Saṅkhatatoti, aniccānupassanā. Mārāmisatoti, dukkhānupassanā. Jātidhammatoti, dukkhānupassanā. Jarādhammatoti, dukkhānupassanā. Byādhidhammatoti, dukkhānupassanā. Maraṇadhammatoti, aniccānupassanā. Sokadhammatoti, dukkhānupassanā. Paridevadhammatoti, dukkhānupassanā. Upāyāsadhammatoti, dukkhānupassanā. Saṃkilesikadhammatoti, dukkhānupassanā.

    ཨིམེཧི ཙཏྟཱལཱིསཱཡ ཨཱཀཱརེཧི ཨནུལོམིཀཾ ཁནྟིཾ པཊིལབྷཏི། ཨིམེཧི ཙཏྟཱལཱིསཱཡ ཨཱཀཱརེཧི སམྨཏྟནིཡཱམཾ ཨོཀྐམཏི།

    Imehi cattālīsāya ākārehi anulomikaṃ khantiṃ paṭilabhati. Imehi cattālīsāya ākārehi sammattaniyāmaṃ okkamati.

    ཨིམེཧི ཙཏྟཱལཱིསཱཡ ཨཱཀཱརེཧི ཨནུལོམིཀཾ ཁནྟིཾ པཊིལབྷནྟསྶ, ཨིམེཧི ཙཏྟཱལཱིསཱཡ ཨཱཀཱརེཧི སམྨཏྟནིཡཱམཾ ཨོཀྐམནྟསྶ ཀཏི ཨནིཙྩཱནུཔསྶནཱ, ཀཏི དུཀྑཱནུཔསྶནཱ, ཀཏི ཨནཏྟཱནུཔསྶནཱ?

    Imehi cattālīsāya ākārehi anulomikaṃ khantiṃ paṭilabhantassa, imehi cattālīsāya ākārehi sammattaniyāmaṃ okkamantassa kati aniccānupassanā, kati dukkhānupassanā, kati anattānupassanā?

    པཉྩཝཱིསཏི ཨནཏྟཱནུཔསྶནཱ, པཉྙཱས ཨནིཙྩཱནུཔསྶནཱ།

    Pañcavīsati anattānupassanā, paññāsa aniccānupassanā;

    སཏཾ པཉྩཝཱིསཏི ཙེཝ, ཡཱནི དུཀྑེ པཝུཙྩརེཏི༎

    Sataṃ pañcavīsati ceva, yāni dukkhe pavuccareti.

    ཝིཔསྶནཱཀཐཱ ནིཊྛིཏཱ།

    Vipassanākathā niṭṭhitā.




    Next: ༡༠. མཱཏིཀཱཀཐཱ • 10. Mātikākathā




    Footnotes:
    1. ཀིཉྩི (ཀ॰) ཨ॰ ནི॰ ༦.༩༩-༡༠༠ པསྶིཏབྦཱ
    2. ཨརཧཏྟཕལཾ ཝཱ (སྱཱ॰ ཀ॰) ཨ॰ ནི॰ ༦.༩༨ པསྶིཏབྦཱ
    3. kiñci (ka.) a. ni. 6.99-100 passitabbā
    4. arahattaphalaṃ vā (syā. ka.) a. ni. 6.98 passitabbā
    5. ཀཉྩི དྷམྨཾ (སྱཱ॰), ཀིཉྩི དྷམྨཾ (ཀ॰) ཨ॰ ནི॰ ༦.༡༠༠ པསྶིཏབྦཱ
    6. kañci dhammaṃ (syā.), kiñci dhammaṃ (ka.) a. ni. 6.100 passitabbā
    7. པབྷངྒཏོ (སྱཱ॰)
    8. ཨཏྟཱཎཏོ (སྱཱ॰)
    9. pabhaṅgato (syā.)
    10. attāṇato (syā.)
    11. ནིགཎྜོ (སྱཱ॰)
    12. ནིསྶལླཾ (སྱཱ॰)
    13. nigaṇḍo (syā.)
    14. nissallaṃ (syā.)
    15. ཨཔྤབྷངྒཾ (སྱཱ॰)
    16. appabhaṅgaṃ (syā.)
    17. ཨབྱཱདྷིདྷམྨཾ (སྱཱ॰)
    18. abyādhidhammaṃ (syā.)



    Related texts:



    ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཁུདྡཀནིཀཱཡ (ཨཊྛཀཐཱ) • Khuddakanikāya (aṭṭhakathā) / པཊིསམྦྷིདཱམགྒ-ཨཊྛཀཐཱ • Paṭisambhidāmagga-aṭṭhakathā / ཝིཔསྶནཱཀཐཱཝཎྞནཱ • Vipassanākathāvaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact