| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
50. விபஸ்ஸனானித்³தே³ஸவண்ணனா
50. Vipassanāniddesavaṇṇanā
471-2. நாமரூபந்தி சித்தசேதஸிகஸங்கா²தங் நாமஞ்ச அட்ட²வீஸதிவித⁴ங் ரூபஞ்ச. ‘‘நமனலக்க²ணங் நாமங், ருப்பனலக்க²ணங் ரூபங், நாமரூபதோ ந அஞ்ஞோ அத்தாதி³கோ கோசி அத்தீ²’’தி ஏவங் ஜா²னலாபீ⁴ சே, ஜா²னதோ வுட்டா²ய ஜா²னக³தங் வா விபஸ்ஸனாயானிகோ சே, பகிண்ணகபூ⁴தங் நாமரூபங் பரிக்³க³ஹெத்வா. பாதிமொக்க²ஸங்வராதி³ ஸீலவிஸுத்³தி⁴, சதுராரக்க²வஸேன தீ³பிதா ஸோபசாரஸமாதி⁴ஸங்கா²தா சித்தவிஸுத்³தி⁴ ச வுத்தாவ நாமாதி இமினா தி³ட்டி²விஸுத்³தி⁴ கதி²தா. ததோ தஸ்ஸ பச்சயஞ்ச பரிக்³க³ஹெத்வாதி ஸம்ப³ந்தோ⁴. தஸ்ஸ பச்சயந்தி ‘‘படிஸந்தி⁴க்க²ணே நாமரூபத்³வயமேவ அவிஜ்ஜாதண்ஹாஉபாதா³னகம்மேஹி உப்பஜ்ஜதி, ந இஸ்ஸராதி³காரணேனா’’திஆதி³னா தஸ்ஸ காரணங், இமினா கங்கா²விதரணவிஸுத்³தி⁴ த³ஸ்ஸிதா.
471-2.Nāmarūpanti cittacetasikasaṅkhātaṃ nāmañca aṭṭhavīsatividhaṃ rūpañca. ‘‘Namanalakkhaṇaṃ nāmaṃ, ruppanalakkhaṇaṃ rūpaṃ, nāmarūpato na añño attādiko koci atthī’’ti evaṃ jhānalābhī ce, jhānato vuṭṭhāya jhānagataṃ vā vipassanāyāniko ce, pakiṇṇakabhūtaṃ nāmarūpaṃ pariggahetvā. Pātimokkhasaṃvarādi sīlavisuddhi, caturārakkhavasena dīpitā sopacārasamādhisaṅkhātā cittavisuddhi ca vuttāva nāmāti iminā diṭṭhivisuddhi kathitā. Tato tassa paccayañca pariggahetvāti sambandho. Tassa paccayanti ‘‘paṭisandhikkhaṇe nāmarūpadvayameva avijjātaṇhāupādānakammehi uppajjati, na issarādikāraṇenā’’tiādinā tassa kāraṇaṃ, iminā kaṅkhāvitaraṇavisuddhi dassitā.
ஹுத்வா அபா⁴வதோ அனிச்சாதி ஸப்³பே³பி நாமரூபஸங்கா²ரா உப்பஜ்ஜித்வா அபா⁴வாபஜ்ஜனதோ அனிச்சா. உத³யப்³ப³யபீளனா து³க்கா²தி உப்பாத³னிரோத⁴வஸேன பீளனதோ து³க்கா². அவஸவத்தித்தா அனத்தாதி அத்தனோ வஸே அவத்தனதோ அனத்தாதி ஏவங் ஸங்கா²ரேஹி ஸத்³தி⁴ங் திலக்க²ணங் ஆரோபெத்வா. புனப்புனங் ஸம்மஸந்தோதி யதா²வுத்தனயேன ஸம்மஸந்தோ ஸமத²யானிகோ விபஸ்ஸனாயானிகோ ச யோகா³வசரோ. இமினா மக்³கா³மக்³க³ஞாணத³ஸ்ஸனவிஸுத்³தி⁴, படிபதா³ஞாணத³ஸ்ஸனவிஸுத்³தி⁴ ச த³ஸ்ஸிதா. ஸங்கா²ரானமேவ ஹி உத³யப்³ப³யாதி³னானுபஸ்ஸனதோ உத³யப்³ப³யப⁴ங்க³ப⁴யஆதீ³னவனிப்³பி³தா³முஞ்சிதுகம்யதாபடிஸங்கா²னுபஸ்ஸனாஸ- ங்கா²ருபெக்கா²ஞாணஸங்கா²தஸ்ஸ அட்ட²வித⁴ஸ்ஸ ஞாணஸ்ஸ வஸேன ஸிகா²ப்பத்தங் விபஸ்ஸனாஞாணங் படிபதா³ஞாணத³ஸ்ஸனவிஸுத்³தி⁴ நாம. அனுபுப்³பே³ன ஸப்³ப³ஸங்யோஜனக்க²யங் பாபுணெய்யாதி இமினா ஞாணத³ஸ்ஸனவிஸுத்³தி⁴ த³ஸ்ஸிதா. ஸப்³ப³ஸங்யோஜனக்க²யந்தி ஓரம்பா⁴கி³யானங் பஞ்சன்னங் ஸங்யோஜனானங் ஹெட்டா² மக்³க³த்தயேன கே²பிதத்தா, இதரேஸங் உத்³த⁴ம்பா⁴கி³யானங் ஸங்யோஜனானங் கே²பிதத்தா ச ஸப்³பே³ஸங் ஸங்யோஜனானங் க²யந்தே ஜாதங் அரஹத்தமக்³க³ங்.
Hutvā abhāvato aniccāti sabbepi nāmarūpasaṅkhārā uppajjitvā abhāvāpajjanato aniccā. Udayabbayapīḷanā dukkhāti uppādanirodhavasena pīḷanato dukkhā. Avasavattittā anattāti attano vase avattanato anattāti evaṃ saṅkhārehi saddhiṃ tilakkhaṇaṃ āropetvā. Punappunaṃ sammasantoti yathāvuttanayena sammasanto samathayāniko vipassanāyāniko ca yogāvacaro. Iminā maggāmaggañāṇadassanavisuddhi, paṭipadāñāṇadassanavisuddhi ca dassitā. Saṅkhārānameva hi udayabbayādinānupassanato udayabbayabhaṅgabhayaādīnavanibbidāmuñcitukamyatāpaṭisaṅkhānupassanāsa- ṅkhārupekkhāñāṇasaṅkhātassa aṭṭhavidhassa ñāṇassa vasena sikhāppattaṃ vipassanāñāṇaṃ paṭipadāñāṇadassanavisuddhi nāma. Anupubbena sabbasaṃyojanakkhayaṃ pāpuṇeyyāti iminā ñāṇadassanavisuddhi dassitā. Sabbasaṃyojanakkhayanti orambhāgiyānaṃ pañcannaṃ saṃyojanānaṃ heṭṭhā maggattayena khepitattā, itaresaṃ uddhambhāgiyānaṃ saṃyojanānaṃ khepitattā ca sabbesaṃ saṃyojanānaṃ khayante jātaṃ arahattamaggaṃ.
