| Library / Tipiṭaka / တိပိဋက • Tipiṭaka / ခုဒ္ဒသိက္ခာ-မူလသိက္ခာ • Khuddasikkhā-mūlasikkhā |
၅၀. ဝိပသ္သနာနိဒ္ဒေသဝဏ္ဏနာ
50. Vipassanāniddesavaṇṇanā
၄၇၁-၂. နာမရူပန္တိ စိတ္တစေတသိကသင္ခာတံ နာမဉ္စ အဋ္ဌဝီသတိဝိဓံ ရူပဉ္စ။ ‘‘နမနလက္ခဏံ နာမံ, ရုပ္ပနလက္ခဏံ ရူပံ, နာမရူပတော န အညော အတ္တာဒိကော ကောစိ အတ္ထီ’’တိ ဧဝံ ဈာနလာဘီ စေ, ဈာနတော ဝုဋ္ဌာယ ဈာနဂတံ ဝာ ဝိပသ္သနာယာနိကော စေ, ပကိဏ္ဏကဘူတံ နာမရူပံ ပရိဂ္ဂဟေတ္ဝာ။ ပာတိမောက္ခသံဝရာဒိ သီလဝိသုဒ္ဓိ, စတုရာရက္ခဝသေန ဒီပိတာ သောပစာရသမာဓိသင္ခာတာ စိတ္တဝိသုဒ္ဓိ စ ဝုတ္တာဝ နာမာတိ ဣမိနာ ဒိဋ္ဌိဝိသုဒ္ဓိ ကထိတာ။ တတော တသ္သ ပစ္စယဉ္စ ပရိဂ္ဂဟေတ္ဝာတိ သမ္ဗန္ဓော။ တသ္သ ပစ္စယန္တိ ‘‘ပဋိသန္ဓိက္ခဏေ နာမရူပဒ္ဝယမေဝ အဝိဇ္ဇာတဏ္ဟာဥပာဒာနကမ္မေဟိ ဥပ္ပဇ္ဇတိ, န ဣသ္သရာဒိကာရဏေနာ’’တိအာဒိနာ တသ္သ ကာရဏံ, ဣမိနာ ကင္ခာဝိတရဏဝိသုဒ္ဓိ ဒသ္သိတာ။
471-2.Nāmarūpanti cittacetasikasaṅkhātaṃ nāmañca aṭṭhavīsatividhaṃ rūpañca. ‘‘Namanalakkhaṇaṃ nāmaṃ, ruppanalakkhaṇaṃ rūpaṃ, nāmarūpato na añño attādiko koci atthī’’ti evaṃ jhānalābhī ce, jhānato vuṭṭhāya jhānagataṃ vā vipassanāyāniko ce, pakiṇṇakabhūtaṃ nāmarūpaṃ pariggahetvā. Pātimokkhasaṃvarādi sīlavisuddhi, caturārakkhavasena dīpitā sopacārasamādhisaṅkhātā cittavisuddhi ca vuttāva nāmāti iminā diṭṭhivisuddhi kathitā. Tato tassa paccayañca pariggahetvāti sambandho. Tassa paccayanti ‘‘paṭisandhikkhaṇe nāmarūpadvayameva avijjātaṇhāupādānakammehi uppajjati, na issarādikāraṇenā’’tiādinā tassa kāraṇaṃ, iminā kaṅkhāvitaraṇavisuddhi dassitā.
ဟုတ္ဝာ အဘာဝတော အနိစ္စာတိ သဗ္ဗေပိ နာမရူပသင္ခာရာ ဥပ္ပဇ္ဇိတ္ဝာ အဘာဝာပဇ္ဇနတော အနိစ္စာ။ ဥဒယဗ္ဗယပီဠနာ ဒုက္ခာတိ ဥပ္ပာဒနိရောဓဝသေန ပီဠနတော ဒုက္ခာ။ အဝသဝတ္တိတ္တာ အနတ္တာတိ အတ္တနော ဝသေ အဝတ္တနတော အနတ္တာတိ ဧဝံ သင္ခာရေဟိ သဒ္ဓိံ တိလက္ခဏံ အာရောပေတ္ဝာ။ ပုနပ္ပုနံ သမ္မသန္တောတိ ယထာဝုတ္တနယေန သမ္မသန္တော သမထယာနိကော ဝိပသ္သနာယာနိကော စ ယောဂာဝစရော။ ဣမိနာ မဂ္ဂာမဂ္ဂဉာဏဒသ္သနဝိသုဒ္ဓိ, ပဋိပဒာဉာဏဒသ္သနဝိသုဒ္ဓိ စ ဒသ္သိတာ။ သင္ခာရာနမေဝ ဟိ ဥဒယဗ္ဗယာဒိနာနုပသ္သနတော ဥဒယဗ္ဗယဘင္ဂဘယအာဒီနဝနိဗ္ဗိဒာမုဉ္စိတုကမ္ယတာပဋိသင္ခာနုပသ္သနာသ- င္ခာရုပေက္ခာဉာဏသင္ခာတသ္သ အဋ္ဌဝိဓသ္သ ဉာဏသ္သ ဝသေန သိခာပ္ပတ္တံ ဝိပသ္သနာဉာဏံ ပဋိပဒာဉာဏဒသ္သနဝိသုဒ္ဓိ နာမ။ အနုပုဗ္ဗေန သဗ္ဗသံယောဇနက္ခယံ ပာပုဏေယ္ယာတိ ဣမိနာ ဉာဏဒသ္သနဝိသုဒ္ဓိ ဒသ္သိတာ။ သဗ္ဗသံယောဇနက္ခယန္တိ ဩရမ္ဘာဂိယာနံ ပဉ္စန္နံ သံယောဇနာနံ ဟေဋ္ဌာ မဂ္ဂတ္တယေန ခေပိတတ္တာ, ဣတရေသံ ဥဒ္ဓမ္ဘာဂိယာနံ သံယောဇနာနံ ခေပိတတ္တာ စ သဗ္ဗေသံ သံယောဇနာနံ ခယန္တေ ဇာတံ အရဟတ္တမဂ္ဂံ။
Hutvā abhāvato aniccāti sabbepi nāmarūpasaṅkhārā uppajjitvā abhāvāpajjanato aniccā. Udayabbayapīḷanā dukkhāti uppādanirodhavasena pīḷanato dukkhā. Avasavattittā anattāti attano vase avattanato anattāti evaṃ saṅkhārehi saddhiṃ tilakkhaṇaṃ āropetvā. Punappunaṃ sammasantoti yathāvuttanayena sammasanto samathayāniko vipassanāyāniko ca yogāvacaro. Iminā maggāmaggañāṇadassanavisuddhi, paṭipadāñāṇadassanavisuddhi ca dassitā. Saṅkhārānameva hi udayabbayādinānupassanato udayabbayabhaṅgabhayaādīnavanibbidāmuñcitukamyatāpaṭisaṅkhānupassanāsa- ṅkhārupekkhāñāṇasaṅkhātassa aṭṭhavidhassa ñāṇassa vasena sikhāppattaṃ vipassanāñāṇaṃ paṭipadāñāṇadassanavisuddhi nāma. Anupubbena sabbasaṃyojanakkhayaṃ pāpuṇeyyāti iminā ñāṇadassanavisuddhi dassitā. Sabbasaṃyojanakkhayanti orambhāgiyānaṃ pañcannaṃ saṃyojanānaṃ heṭṭhā maggattayena khepitattā, itaresaṃ uddhambhāgiyānaṃ saṃyojanānaṃ khepitattā ca sabbesaṃ saṃyojanānaṃ khayante jātaṃ arahattamaggaṃ.
