| Library / Tipiṭaka / திபிடக • Tipiṭaka / பரிவாரபாளி • Parivārapāḷi |
4. விபத்திபச்சயவாரோ
4. Vipattipaccayavāro
284. ஸீலவிபத்திபச்சயா கதி ஆபத்தியோ ஆபஜ்ஜதி? ஸீலவிபத்திபச்சயா சதஸ்ஸோ ஆபத்தியோ ஆபஜ்ஜதி – பி⁴க்கு²னீ ஜானங் பாராஜிகங் த⁴ம்மங் படிச்சா²தே³தி, ஆபத்தி பாராஜிகஸ்ஸ; வேமதிகா படிச்சா²தே³தி, ஆபத்தி து²ல்லச்சயஸ்ஸ; பி⁴க்கு² ஸங்கா⁴தி³ஸேஸங் படிச்சா²தே³தி, ஆபத்தி பாசித்தியஸ்ஸ; அத்தனோ து³ட்டு²ல்லங் ஆபத்திங் படிச்சா²தே³தி, ஆபத்தி து³க்கடஸ்ஸ – ஸீலவிபத்திபச்சயா இமா சதஸ்ஸோ ஆபத்தியோ ஆபஜ்ஜதி.
284. Sīlavipattipaccayā kati āpattiyo āpajjati? Sīlavipattipaccayā catasso āpattiyo āpajjati – bhikkhunī jānaṃ pārājikaṃ dhammaṃ paṭicchādeti, āpatti pārājikassa; vematikā paṭicchādeti, āpatti thullaccayassa; bhikkhu saṅghādisesaṃ paṭicchādeti, āpatti pācittiyassa; attano duṭṭhullaṃ āpattiṃ paṭicchādeti, āpatti dukkaṭassa – sīlavipattipaccayā imā catasso āpattiyo āpajjati.
தா ஆபத்தியோ சதுன்னங் விபத்தீனங் கதி விபத்தியோ ப⁴ஜந்தி…பே॰… ஸத்தன்னங் ஸமதா²னங் கதிஹி ஸமதே²ஹி ஸம்மந்தி? தா ஆபத்தியோ சதுன்னங் விபத்தீனங் த்³வே விபத்தியோ ப⁴ஜந்தி – ஸியா ஸீலவிபத்திங், ஸியா ஆசாரவிபத்திங். ஸத்தன்னங் ஆபத்திக்க²ந்தா⁴னங் சதூஹி ஆபத்திக்க²ந்தே⁴ஹி ஸங்க³ஹிதா – ஸியா பாராஜிகாபத்திக்க²ந்தே⁴ன, ஸியா து²ல்லச்சயாபத்திக்க²ந்தே⁴ன, ஸியா பாசித்தியாபத்திக்க²ந்தே⁴ன, ஸியா து³க்கடாபத்திக்க²ந்தே⁴ன. ச²ன்னங் ஆபத்திஸமுட்டா²னானங் ஏகேன ஸமுட்டா²னேன ஸமுட்ட²ந்தி – காயதோ ச வாசதோ ச சித்ததோ ச ஸமுட்ட²ந்தி. சதுன்னங் அதி⁴கரணானங், ஆபத்தாதி⁴கரணங். ஸத்தன்னங் ஸமதா²னங் தீஹி ஸமதே²ஹி ஸம்மந்தி – ஸியா ஸம்முகா²வினயேன ச படிஞ்ஞாதகரணேன ச, ஸியா ஸம்முகா²வினயேன ச திணவத்தா²ரகேன ச.
Tā āpattiyo catunnaṃ vipattīnaṃ kati vipattiyo bhajanti…pe… sattannaṃ samathānaṃ katihi samathehi sammanti? Tā āpattiyo catunnaṃ vipattīnaṃ dve vipattiyo bhajanti – siyā sīlavipattiṃ, siyā ācāravipattiṃ. Sattannaṃ āpattikkhandhānaṃ catūhi āpattikkhandhehi saṅgahitā – siyā pārājikāpattikkhandhena, siyā thullaccayāpattikkhandhena, siyā pācittiyāpattikkhandhena, siyā dukkaṭāpattikkhandhena. Channaṃ āpattisamuṭṭhānānaṃ ekena samuṭṭhānena samuṭṭhanti – kāyato ca vācato ca cittato ca samuṭṭhanti. Catunnaṃ adhikaraṇānaṃ, āpattādhikaraṇaṃ. Sattannaṃ samathānaṃ tīhi samathehi sammanti – siyā sammukhāvinayena ca paṭiññātakaraṇena ca, siyā sammukhāvinayena ca tiṇavatthārakena ca.
285. ஆசாரவிபத்திபச்சயா கதி ஆபத்தியோ ஆபஜ்ஜதி? ஆசாரவிபத்திபச்சயா ஏகங் ஆபத்திங் ஆபஜ்ஜதி. ஆசாரவிபத்திங் படிச்சா²தே³தி, ஆபத்தி து³க்கடஸ்ஸ – ஆசாரவிபத்திபச்சயா இமங் ஏகங் ஆபத்திங் ஆபஜ்ஜதி.
285. Ācāravipattipaccayā kati āpattiyo āpajjati? Ācāravipattipaccayā ekaṃ āpattiṃ āpajjati. Ācāravipattiṃ paṭicchādeti, āpatti dukkaṭassa – ācāravipattipaccayā imaṃ ekaṃ āpattiṃ āpajjati.
ஸா ஆபத்தி சதுன்னங் விபத்தீனங் கதி விபத்தியோ ப⁴ஜதி …பே॰… ஸத்தன்னங் ஸமதா²னங் கதிஹி ஸமதே²ஹி ஸம்மதி? ஸா ஆபத்தி சதுன்னங் விபத்தீனங் ஏகங் விபத்திங் ப⁴ஜதி – ஆசாரவிபத்திங். ஸத்தன்னங் ஆபத்திக்க²ந்தா⁴னங் ஏகேன ஆபத்திக்க²ந்தே⁴ன ஸங்க³ஹிதா – து³க்கடாபத்திக்க²ந்தே⁴ன. ச²ன்னங் ஆபத்திஸமுட்டா²னானங் ஏகேன ஸமுட்டா²னேன ஸமுட்டா²தி – காயதோ ச வாசதோ ச சித்ததோ ச ஸமுட்டா²தி. சதுன்னங் அதி⁴கரணானங் ஆபத்தாதி⁴கரணங். ஸத்தன்னங் ஸமதா²னங் தீஹி ஸமதே²ஹி ஸம்மதி – ஸியா ஸம்முகா²வினயேன ச படிஞ்ஞாதகரணேன ச, ஸியா ஸம்முகா²வினயேன ச திணவத்தா²ரகேன ச.
Sā āpatti catunnaṃ vipattīnaṃ kati vipattiyo bhajati …pe… sattannaṃ samathānaṃ katihi samathehi sammati? Sā āpatti catunnaṃ vipattīnaṃ ekaṃ vipattiṃ bhajati – ācāravipattiṃ. Sattannaṃ āpattikkhandhānaṃ ekena āpattikkhandhena saṅgahitā – dukkaṭāpattikkhandhena. Channaṃ āpattisamuṭṭhānānaṃ ekena samuṭṭhānena samuṭṭhāti – kāyato ca vācato ca cittato ca samuṭṭhāti. Catunnaṃ adhikaraṇānaṃ āpattādhikaraṇaṃ. Sattannaṃ samathānaṃ tīhi samathehi sammati – siyā sammukhāvinayena ca paṭiññātakaraṇena ca, siyā sammukhāvinayena ca tiṇavatthārakena ca.
286. தி³ட்டி²விபத்திபச்சயா கதி ஆபத்தியோ ஆபஜ்ஜதி? தி³ட்டி²விபத்திபச்சயா த்³வே ஆபத்தியோ ஆபஜ்ஜதி. பாபிகாய தி³ட்டி²யா யாவததியங் ஸமனுபா⁴ஸனாய ந படினிஸ்ஸஜ்ஜதி, ஞத்தியா து³க்கடங் 1; கம்மவாசாபரியோஸானே ஆபத்தி பாசித்தியஸ்ஸ – தி³ட்டி²விபத்திபச்சயா இமா த்³வே ஆபத்தியோ ஆபஜ்ஜதி.
286. Diṭṭhivipattipaccayā kati āpattiyo āpajjati? Diṭṭhivipattipaccayā dve āpattiyo āpajjati. Pāpikāya diṭṭhiyā yāvatatiyaṃ samanubhāsanāya na paṭinissajjati, ñattiyā dukkaṭaṃ 2; kammavācāpariyosāne āpatti pācittiyassa – diṭṭhivipattipaccayā imā dve āpattiyo āpajjati.
தா ஆபத்தியோ சதுன்னங் விபத்தீனங் கதி விபத்தியோ ப⁴ஜந்தி…பே॰… ஸத்தன்னங் ஸமதா²னங் கதிஹி ஸமதே²ஹி ஸம்மந்தி? தா ஆபத்தியோ சதுன்னங் விபத்தீனங் ஏகங் விபத்திங் ப⁴ஜந்தி – ஆசாரவிபத்திங். ஸத்தன்னங் ஆபத்திக்க²ந்தா⁴னங் த்³வீஹி ஆபத்திக்க²ந்தே⁴ஹி ஸங்க³ஹிதா – ஸியா பாசித்தியாபத்திக்க²ந்தே⁴ன , ஸியா து³க்கடாபத்திக்க²ந்தே⁴ன. ச²ன்னங் ஆபத்திஸமுட்டா²னானங் ஏகேன ஸமுட்டா²னேன ஸமுட்ட²ந்தி – காயதோ ச வாசதோ ச சித்ததோ ச ஸமுட்ட²ந்தி. சதுன்னங் அதி⁴கரணானங், ஆபத்தாதி⁴கரணங். ஸத்தன்னங் ஸமதா²னங் தீஹி ஸமதே²ஹி ஸம்மந்தி – ஸியா ஸம்முகா²வினயேன ச படிஞ்ஞாதகரணேன ச, ஸியா ஸம்முகா²வினயேன ச திணவத்தா²ரகேன ச.
Tā āpattiyo catunnaṃ vipattīnaṃ kati vipattiyo bhajanti…pe… sattannaṃ samathānaṃ katihi samathehi sammanti? Tā āpattiyo catunnaṃ vipattīnaṃ ekaṃ vipattiṃ bhajanti – ācāravipattiṃ. Sattannaṃ āpattikkhandhānaṃ dvīhi āpattikkhandhehi saṅgahitā – siyā pācittiyāpattikkhandhena , siyā dukkaṭāpattikkhandhena. Channaṃ āpattisamuṭṭhānānaṃ ekena samuṭṭhānena samuṭṭhanti – kāyato ca vācato ca cittato ca samuṭṭhanti. Catunnaṃ adhikaraṇānaṃ, āpattādhikaraṇaṃ. Sattannaṃ samathānaṃ tīhi samathehi sammanti – siyā sammukhāvinayena ca paṭiññātakaraṇena ca, siyā sammukhāvinayena ca tiṇavatthārakena ca.
287. ஆஜீவவிபத்திபச்சயா கதி ஆபத்தியோ ஆபஜ்ஜதி? ஆஜீவவிபத்திபச்சயா ச² ஆபத்தியோ ஆபஜ்ஜதி – ஆஜீவஹேது ஆஜீவகாரணா பாபிச்சோ² இச்சா²பகதோ அஸந்தங் அபூ⁴தங் உத்தரிமனுஸ்ஸத⁴ம்மங் உல்லபதி, ஆபத்தி பாராஜிகஸ்ஸ; ஆஜீவஹேது ஆஜீவகாரணா ஸஞ்சரித்தங் ஸமாபஜ்ஜதி, ஆபத்தி ஸங்கா⁴தி³ஸேஸஸ்ஸ; ஆஜீவஹேது ஆஜீவகாரணா ‘‘யோ தே விஹாரே வஸதி, ஸோ பி⁴க்கு² அரஹா’’தி ப⁴ணதி, படிவிஜானந்தஸ்ஸ ஆபத்தி து²ல்லச்சயஸ்ஸ; ஆஜீவஹேது ஆஜீவகாரணா பி⁴க்கு² பணீதபோ⁴ஜனானி அத்தனோ அத்தா²ய விஞ்ஞாபெத்வா பு⁴ஞ்ஜதி, ஆபத்தி பாசித்தியஸ்ஸ; ஆஜீவஹேது ஆஜீவகாரணா பி⁴க்கு²னீ பணீதபோ⁴ஜனானி அத்தனோ அத்தா²ய விஞ்ஞாபெத்வா பு⁴ஞ்ஜதி, ஆபத்தி பாடிதே³ஸனீயஸ்ஸ; ஆஜீவஹேது ஆஜீவகாரணா ஸூபங் வா ஓத³னங் வா அகி³லானோ அத்தனோ அத்தா²ய விஞ்ஞாபெத்வா பு⁴ஞ்ஜதி, ஆபத்தி து³க்கடஸ்ஸ – ஆஜீவவிபத்திபச்சயா இமா ச² ஆபத்தியோ ஆபஜ்ஜதி.
287. Ājīvavipattipaccayā kati āpattiyo āpajjati? Ājīvavipattipaccayā cha āpattiyo āpajjati – ājīvahetu ājīvakāraṇā pāpiccho icchāpakato asantaṃ abhūtaṃ uttarimanussadhammaṃ ullapati, āpatti pārājikassa; ājīvahetu ājīvakāraṇā sañcarittaṃ samāpajjati, āpatti saṅghādisesassa; ājīvahetu ājīvakāraṇā ‘‘yo te vihāre vasati, so bhikkhu arahā’’ti bhaṇati, paṭivijānantassa āpatti thullaccayassa; ājīvahetu ājīvakāraṇā bhikkhu paṇītabhojanāni attano atthāya viññāpetvā bhuñjati, āpatti pācittiyassa; ājīvahetu ājīvakāraṇā bhikkhunī paṇītabhojanāni attano atthāya viññāpetvā bhuñjati, āpatti pāṭidesanīyassa; ājīvahetu ājīvakāraṇā sūpaṃ vā odanaṃ vā agilāno attano atthāya viññāpetvā bhuñjati, āpatti dukkaṭassa – ājīvavipattipaccayā imā cha āpattiyo āpajjati.
தா ஆபத்தியோ சதுன்னங் விபத்தீனங் கதி விபத்தியோ ப⁴ஜந்தி…பே॰… ஸத்தன்னங் ஸமதா²னங் கதிஹி ஸமதே²ஹி ஸம்மந்தி. தா ஆபத்தியோ சதுன்னங் விபத்தீனங் த்³வே விபத்தியோ ப⁴ஜந்தி – ஸியா ஸீலவிபத்திங், ஸியா ஆசாரவிபத்திங். ஸத்தன்னங் ஆபத்திக்க²ந்தா⁴னங் ச²ஹி ஆபத்திக்க²ந்தே⁴ஹி ஸங்க³ஹிதா – ஸியா பாராஜிகாபத்திக்க²ந்தே⁴ன, ஸியா ஸங்கா⁴தி³ஸேஸாபத்திக்க²ந்தே⁴ன, ஸியா து²ல்லச்சயாபத்திக்க²ந்தே⁴ன, ஸியா பாசித்தியாபத்திக்க²ந்தே⁴ன, ஸியா பாடிதே³ஸனீயாபத்திக்க²ந்தே⁴ன, ஸியா து³க்கடாபத்திக்க²ந்தே⁴ன. ச²ன்னங் ஆபத்திஸமுட்டா²னானங் ச²ஹி ஸமுட்டா²னேஹி ஸமுட்ட²ந்தி – ஸியா காயதோ ஸமுட்ட²ந்தி, ந வாசதோ ந சித்ததோ; ஸியா வாசதோ ஸமுட்ட²ந்தி, ந காயதோ ந சித்ததோ; ஸியா காயதோ ச வாசதோ ச ஸமுட்ட²ந்தி, ந சித்ததோ; ஸியா காயதோ ச சித்ததோ ச ஸமுட்ட²ந்தி, ந வாசதோ; ஸியா வாசதோ ச சித்ததோ ச ஸமுட்ட²ந்தி, ந காயதோ; ஸியா காயதோ ச வாசதோ ச சித்ததோ ச ஸமுட்ட²ந்தி. சதுன்னங் அதி⁴கரணானங், ஆபத்தாதி⁴கரணங். ஸத்தன்னங் ஸமதா²னங் தீஹி ஸமதே²ஹி ஸம்மந்தி – ஸியா ஸம்முகா²வினயேன ச படிஞ்ஞாதகரணேன ச, ஸியா ஸம்முகா²வினயேன ச திணவத்தா²ரகேன ச.
Tā āpattiyo catunnaṃ vipattīnaṃ kati vipattiyo bhajanti…pe… sattannaṃ samathānaṃ katihi samathehi sammanti. Tā āpattiyo catunnaṃ vipattīnaṃ dve vipattiyo bhajanti – siyā sīlavipattiṃ, siyā ācāravipattiṃ. Sattannaṃ āpattikkhandhānaṃ chahi āpattikkhandhehi saṅgahitā – siyā pārājikāpattikkhandhena, siyā saṅghādisesāpattikkhandhena, siyā thullaccayāpattikkhandhena, siyā pācittiyāpattikkhandhena, siyā pāṭidesanīyāpattikkhandhena, siyā dukkaṭāpattikkhandhena. Channaṃ āpattisamuṭṭhānānaṃ chahi samuṭṭhānehi samuṭṭhanti – siyā kāyato samuṭṭhanti, na vācato na cittato; siyā vācato samuṭṭhanti, na kāyato na cittato; siyā kāyato ca vācato ca samuṭṭhanti, na cittato; siyā kāyato ca cittato ca samuṭṭhanti, na vācato; siyā vācato ca cittato ca samuṭṭhanti, na kāyato; siyā kāyato ca vācato ca cittato ca samuṭṭhanti. Catunnaṃ adhikaraṇānaṃ, āpattādhikaraṇaṃ. Sattannaṃ samathānaṃ tīhi samathehi sammanti – siyā sammukhāvinayena ca paṭiññātakaraṇena ca, siyā sammukhāvinayena ca tiṇavatthārakena ca.
விபத்திபச்சயவாரோ நிட்டி²தோ சதுத்தோ².
Vipattipaccayavāro niṭṭhito catuttho.
Footnotes:
Related texts:
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ச²ஆபத்திஸமுட்டா²னவாராதி³வண்ணனா • Chaāpattisamuṭṭhānavārādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / விபத்திபச்சயவாரவண்ணனா • Vipattipaccayavāravaṇṇanā
