| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
5. விபத்திஸம்பதா³ஸுத்தவண்ணனா
5. Vipattisampadāsuttavaṇṇanā
118. பஞ்சமே ஸீலவிபத்தீதி ஸீலஸ்ஸ விபன்னாகாரோ. ஸேஸத்³வயேபி ஏஸேவ நயோ. நத்தி² தி³ன்னந்தி தி³ன்னஸ்ஸ ப²லாபா⁴வங் ஸந்தா⁴ய வத³தி. யிட்ட²ங் வுச்சதி மஹாயோகோ³. ஹுதந்தி பஹேணகஸக்காரோ அதி⁴ப்பேதோ. தம்பி உப⁴யங் ப²லாபா⁴வமேவ ஸந்தா⁴ய படிக்கி²பதி. ஸுகதது³க்கடானந்தி ஸுகதது³க்கதானங், குஸலாகுஸலானந்தி அத்தோ². ப²லங் விபாகோதி யங் ப²லந்தி வா விபாகோதி வா வுச்சதி, தங் நத்தீ²தி வத³தி. நத்தி² அயங் லோகோதி பரலோகே டி²தஸ்ஸ அயங் லோகோ நத்தி², நத்தி² பரோ லோகோதி இத⁴ லோகே டி²தஸ்ஸாபி பரலோகோ நத்தி², ஸப்³பே³ தத்த² தத்தே²வ உச்சி²ஜ்ஜந்தீதி த³ஸ்ஸேதி. நத்தி² மாதா நத்தி² பிதாதி தேஸு ஸம்மாபடிபத்திமிச்சா²படிபத்தீனங் ப²லாபா⁴வவஸேன வத³தி. நத்தி² ஸத்தா ஓபபாதிகாதி சவித்வா உப்பஜ்ஜனகஸத்தா நாம நத்தீ²தி வத³தி. ஸம்பதா³தி பாரிபூரியோ. ஸீலஸம்பதா³தி ஸீலஸ்ஸ பரிபுண்ணஅவேகல்லபா⁴வோ. ஸேஸத்³வயேபி ஏஸேவ நயோ. அத்தி² தி³ன்னந்திஆதி³ வுத்தபடிபக்க²னயேன க³ஹேதப்³ப³ங்.
118. Pañcame sīlavipattīti sīlassa vipannākāro. Sesadvayepi eseva nayo. Natthi dinnanti dinnassa phalābhāvaṃ sandhāya vadati. Yiṭṭhaṃ vuccati mahāyogo. Hutanti paheṇakasakkāro adhippeto. Tampi ubhayaṃ phalābhāvameva sandhāya paṭikkhipati. Sukatadukkaṭānanti sukatadukkatānaṃ, kusalākusalānanti attho. Phalaṃ vipākoti yaṃ phalanti vā vipākoti vā vuccati, taṃ natthīti vadati. Natthi ayaṃ lokoti paraloke ṭhitassa ayaṃ loko natthi, natthi paro lokoti idha loke ṭhitassāpi paraloko natthi, sabbe tattha tattheva ucchijjantīti dasseti. Natthi mātā natthi pitāti tesu sammāpaṭipattimicchāpaṭipattīnaṃ phalābhāvavasena vadati. Natthi sattā opapātikāti cavitvā uppajjanakasattā nāma natthīti vadati. Sampadāti pāripūriyo. Sīlasampadāti sīlassa paripuṇṇaavekallabhāvo. Sesadvayepi eseva nayo. Atthi dinnantiādi vuttapaṭipakkhanayena gahetabbaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 5. விபத்திஸம்பதா³ஸுத்தங் • 5. Vipattisampadāsuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 5. விபத்திஸம்பதா³ஸுத்தவண்ணனா • 5. Vipattisampadāsuttavaṇṇanā
