| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
5. விபத்திஸம்பதா³ஸுத்தவண்ணனா
5. Vipattisampadāsuttavaṇṇanā
118. பஞ்சமே தி³ன்னந்தி தெ³ய்யத⁴ம்மஸீஸேன தா³னங் வுத்தந்தி ஆஹ ‘‘தி³ன்னஸ்ஸ ப²லாபா⁴வங் ஸந்தா⁴ய வத³தீ’’தி. தி³ன்னங் பன அன்னாதி³வத்து²ங் கத²ங் படிக்கி²பதி. ஏஸ நயோ ‘‘யிட்ட²ங் ஹுத’’ந்தி எத்தா²பி. மஹாயாகோ³தி ஸப்³ப³ஸாதா⁴ரணங் மஹாதா³னங். பஹேணகஸக்காரோதி பாஹுனகானங் காதப்³ப³ஸக்காரோ. ப²லந்தி ஆனிஸங்ஸப²லங் நிஸ்ஸந்த³ப²லஞ்ச. விபாகோதி ஸதி³ஸப²லங். பரலோகே டி²தஸ்ஸ அயங் லோகோ நத்தீ²தி பரலோகே டி²தஸ்ஸ கம்முனா லத்³த⁴ப்³போ³ அயங் லோகோ ந ஹோதி. இத⁴லோகே டி²தஸ்ஸபி பரலோகோ நத்தீ²தி இத⁴லோகே டி²தஸ்ஸ கம்முனா லத்³த⁴ப்³போ³ பரலோகோ ந ஹோதி. தத்த² காரணமாஹ ‘‘ஸப்³பே³ தத்த² தத்தே²வ உச்சி²ஜ்ஜந்தீ’’தி. இமே ஸத்தா யத்த² யத்த² ப⁴வயோனிக³திஆதீ³ஸு டி²தா, தத்த² தத்தே²வ உச்சி²ஜ்ஜந்தி, த்³வயவினாஸேன வினஸ்ஸந்தி.
118. Pañcame dinnanti deyyadhammasīsena dānaṃ vuttanti āha ‘‘dinnassa phalābhāvaṃ sandhāya vadatī’’ti. Dinnaṃ pana annādivatthuṃ kathaṃ paṭikkhipati. Esa nayo ‘‘yiṭṭhaṃ huta’’nti etthāpi. Mahāyāgoti sabbasādhāraṇaṃ mahādānaṃ. Paheṇakasakkāroti pāhunakānaṃ kātabbasakkāro. Phalanti ānisaṃsaphalaṃ nissandaphalañca. Vipākoti sadisaphalaṃ. Paraloke ṭhitassa ayaṃ loko natthīti paraloke ṭhitassa kammunā laddhabbo ayaṃ loko na hoti. Idhaloke ṭhitassapi paraloko natthīti idhaloke ṭhitassa kammunā laddhabbo paraloko na hoti. Tattha kāraṇamāha ‘‘sabbe tattha tattheva ucchijjantī’’ti. Ime sattā yattha yattha bhavayonigatiādīsu ṭhitā, tattha tattheva ucchijjanti, dvayavināsena vinassanti.
ப²லாபா⁴வவஸேனாதி மாதாபிதூஸு ஸம்மாபடிபத்திமிச்சா²படிபத்தீனங் ப²லஸ்ஸ அபா⁴வவஸேன ‘‘நத்தி² மாதா, நத்தி² பிதா’’தி வத³தி, ந மாதாபிதூனங், நாபி தேஸு ஸம்மாபடிபத்திமிச்சா²படிபத்தீனங் அபா⁴வவஸேன தேஸங் லோகபச்சக்க²த்தா. புப்³பு³ளகஸ்ஸ விய இமேஸங் ஸத்தானங் உப்பாதோ³ நாம கேவலோ, ந ச க²னபுப்³ப³கோதி த³ஸ்ஸனத்த²ங் ‘‘நத்தி² ஸத்தா ஓபபாதிகா’’தி வுத்தந்தி ஆஹ ‘‘சவித்வா உப்பஜ்ஜனகா ஸத்தா நாம நத்தீ²தி வத³தீ’’தி. ஸயங் அபி⁴ஞ்ஞா ஸச்சி²கத்வா பவேதெ³ந்தீதி யே இமஞ்ச லோகங் பரஞ்ச லோகங் அபி⁴விஸிட்டா²ய பஞ்ஞாய ஸயங் பச்சக்க²ங் கத்வா பவேதெ³ந்தி, தே நத்தீ²தி ஸப்³ப³ஞ்ஞுபு³த்³தா⁴னங் அபா⁴வங் தீ³பேதி.
Phalābhāvavasenāti mātāpitūsu sammāpaṭipattimicchāpaṭipattīnaṃ phalassa abhāvavasena ‘‘natthi mātā, natthi pitā’’ti vadati, na mātāpitūnaṃ, nāpi tesu sammāpaṭipattimicchāpaṭipattīnaṃ abhāvavasena tesaṃ lokapaccakkhattā. Pubbuḷakassa viya imesaṃ sattānaṃ uppādo nāma kevalo, na ca khanapubbakoti dassanatthaṃ ‘‘natthi sattā opapātikā’’ti vuttanti āha ‘‘cavitvā uppajjanakā sattā nāma natthīti vadatī’’ti. Sayaṃ abhiññā sacchikatvā pavedentīti ye imañca lokaṃ parañca lokaṃ abhivisiṭṭhāya paññāya sayaṃ paccakkhaṃ katvā pavedenti, te natthīti sabbaññubuddhānaṃ abhāvaṃ dīpeti.
விபத்திஸம்பதா³ஸுத்தவண்ணனா நிட்டி²தா.
Vipattisampadāsuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 5. விபத்திஸம்பதா³ஸுத்தங் • 5. Vipattisampadāsuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 5. விபத்திஸம்பதா³ஸுத்தவண்ணனா • 5. Vipattisampadāsuttavaṇṇanā
