| Library / Tipiṭaka / တိပိဋက • Tipiṭaka / ပရိဝာရပာဠိ • Parivārapāḷi |
၃. ဝိပတ္တိဝာရော
3. Vipattivāro
၁၉၅. မေထုနံ ဓမ္မံ ပဋိသေဝနပစ္စယာ အာပတ္တိယော စတုန္နံ ဝိပတ္တီနံ ကတိ ဝိပတ္တိယော ဘဇန္တိ? မေထုနံ ဓမ္မံ ပဋိသေဝနပစ္စယာ အာပတ္တိယော စတုန္နံ ဝိပတ္တီနံ ဒ္ဝေ ဝိပတ္တိယော ဘဇန္တိ – သိယာ သီလဝိပတ္တိံ သိယာ အာစာရဝိပတ္တိံ။ပေ.။။
195. Methunaṃ dhammaṃ paṭisevanapaccayā āpattiyo catunnaṃ vipattīnaṃ kati vipattiyo bhajanti? Methunaṃ dhammaṃ paṭisevanapaccayā āpattiyo catunnaṃ vipattīnaṃ dve vipattiyo bhajanti – siyā sīlavipattiṃ siyā ācāravipattiṃ…pe….
အနာဒရိယံ ပဋိစ္စ ဥဒကေ ဥစ္စာရံ ဝာ ပသ္သာဝံ ဝာ ခေဠံ ဝာ ကရဏပစ္စယာ အာပတ္တိ စတုန္နံ ဝိပတ္တီနံ ကတိ ဝိပတ္တိယော ဘဇတိ? အနာဒရိယံ ပဋိစ္စ ဥဒကေ ဥစ္စာရံ ဝာ ပသ္သာဝံ ဝာ ခေဠံ ဝာ ကရဏပစ္စယာ အာပတ္တိ စတုန္နံ ဝိပတ္တီနံ ဧကံ ဝိပတ္တိံ ဘဇတိ – အာစာရဝိပတ္တိံ။
Anādariyaṃ paṭicca udake uccāraṃ vā passāvaṃ vā kheḷaṃ vā karaṇapaccayā āpatti catunnaṃ vipattīnaṃ kati vipattiyo bhajati? Anādariyaṃ paṭicca udake uccāraṃ vā passāvaṃ vā kheḷaṃ vā karaṇapaccayā āpatti catunnaṃ vipattīnaṃ ekaṃ vipattiṃ bhajati – ācāravipattiṃ.
ဝိပတ္တိဝာရော နိဋ္ဌိတော တတိယော။
Vipattivāro niṭṭhito tatiyo.
