| Library / Tipiṭaka / திபிடக • Tipiṭaka / படிஸம்பி⁴தா³மக்³க³பாளி • Paṭisambhidāmaggapāḷi |
5. விராக³கதா²
5. Virāgakathā
28. விராகோ³ மக்³கோ³, விமுத்தி ப²லங். கத²ங் விராகோ³ மக்³கோ³? ஸோதாபத்திமக்³க³க்க²ணே த³ஸ்ஸனட்டே²ன ஸம்மாதி³ட்டி² மிச்சா²தி³ட்டி²யா விரஜ்ஜதி, தத³னுவத்தககிலேஸேஹி ச க²ந்தே⁴ஹி ச விரஜ்ஜதி, ப³ஹித்³தா⁴ ச ஸப்³ப³னிமித்தேஹி விரஜ்ஜதி. விராகோ³ விராகா³ரம்மணோ விராக³கோ³சரோ விராகே³ ஸமுதா³க³தோ 1 விராகே³ டி²தோ விராகே³ பதிட்டி²தோ.
28. Virāgo maggo, vimutti phalaṃ. Kathaṃ virāgo maggo? Sotāpattimaggakkhaṇe dassanaṭṭhena sammādiṭṭhi micchādiṭṭhiyā virajjati, tadanuvattakakilesehi ca khandhehi ca virajjati, bahiddhā ca sabbanimittehi virajjati. Virāgo virāgārammaṇo virāgagocaro virāge samudāgato 2 virāge ṭhito virāge patiṭṭhito.
விராகோ³தி த்³வே விராகா³ – நிப்³பா³னஞ்ச விராகோ³, யே ச நிப்³பா³னாரம்மணதாஜாதா த⁴ம்மா ஸப்³பே³ விராகா³ ஹொந்தீதி – விராகா³. ஸஹஜாதானி ஸத்தங்கா³னி விராக³ங் க³ச்ச²ந்தீதி – விராகோ³ மக்³கோ³. ஏதேன மக்³கே³ன பு³த்³தா⁴ ச ஸாவகா ச அக³தங் தி³ஸங் நிப்³பா³னங் க³ச்ச²ந்தீதி – அட்ட²ங்கி³கோ மக்³கோ³. யாவதா புது²ஸமணப்³ராஹ்மணானங் பரப்பவாதா³னங் மக்³கா³, அயமேவ அரியோ அட்ட²ங்கி³கோ மக்³கோ³ அக்³கோ³ ச ஸெட்டோ² ச பாமொக்கோ² 3 ச உத்தமோ ச பவரோ சாதி – மக்³கா³னங் அட்ட²ங்கி³கோ ஸெட்டோ².
Virāgoti dve virāgā – nibbānañca virāgo, ye ca nibbānārammaṇatājātā dhammā sabbe virāgā hontīti – virāgā. Sahajātāni sattaṅgāni virāgaṃ gacchantīti – virāgo maggo. Etena maggena buddhā ca sāvakā ca agataṃ disaṃ nibbānaṃ gacchantīti – aṭṭhaṅgiko maggo. Yāvatā puthusamaṇabrāhmaṇānaṃ parappavādānaṃ maggā, ayameva ariyo aṭṭhaṅgiko maggo aggo ca seṭṭho ca pāmokkho 4 ca uttamo ca pavaro cāti – maggānaṃ aṭṭhaṅgiko seṭṭho.
அபி⁴னிரோபனட்டே²ன ஸம்மாஸங்கப்போ மிச்சா²ஸங்கப்பா விரஜ்ஜதி. பரிக்³க³ஹட்டே²ன ஸம்மாவாசா மிச்சா²வாசாய விரஜ்ஜதி. ஸமுட்டா²னட்டே²ன ஸம்மாகம்மந்தோ மிச்சா²கம்மந்தா விரஜ்ஜதி. வோதா³னட்டே²ன ஸம்மாஆஜீவோ மிச்சா²ஆஜீவா விரஜ்ஜதி. பக்³க³ஹட்டே²ன ஸம்மாவாயாமோ மிச்சா²வாயாமா விரஜ்ஜதி. உபட்டா²னட்டே²ன ஸம்மாஸதி மிச்சா²ஸதியா விரஜ்ஜதி. அவிக்கே²பட்டே²ன ஸம்மாஸமாதி⁴ மிச்சா²ஸமாதி⁴தோ விரஜ்ஜதி. தத³னுவத்தககிலேஸேஹி ச க²ந்தே⁴ஹி ச விரஜ்ஜதி. ப³ஹித்³தா⁴ ச ஸப்³ப³னிமித்தேஹி விரஜ்ஜதி. விராகோ³ விராகா³ரம்மணோ விராக³கோ³சரோ விராகே³ ஸமுதா³க³தோ விராகே³ டி²தோ விராகே³ பதிட்டி²தோ.
Abhiniropanaṭṭhena sammāsaṅkappo micchāsaṅkappā virajjati. Pariggahaṭṭhena sammāvācā micchāvācāya virajjati. Samuṭṭhānaṭṭhena sammākammanto micchākammantā virajjati. Vodānaṭṭhena sammāājīvo micchāājīvā virajjati. Paggahaṭṭhena sammāvāyāmo micchāvāyāmā virajjati. Upaṭṭhānaṭṭhena sammāsati micchāsatiyā virajjati. Avikkhepaṭṭhena sammāsamādhi micchāsamādhito virajjati. Tadanuvattakakilesehi ca khandhehi ca virajjati. Bahiddhā ca sabbanimittehi virajjati. Virāgo virāgārammaṇo virāgagocaro virāge samudāgato virāge ṭhito virāge patiṭṭhito.
விராகோ³தி த்³வே விராகா³ – நிப்³பா³னஞ்ச விராகோ³, யே ச நிப்³பா³னாரம்மணதாஜாதா த⁴ம்மா ஸப்³பே³ விராகா³ ஹொந்தீதி – விராகா³. ஸஹஜாதானி ஸத்தங்கா³னி விராக³ங் க³ச்ச²ந்தீதி – விராகோ³ மக்³கோ³ . ஏதேன மக்³கே³ன பு³த்³தா⁴ ச ஸாவகா ச அக³தங் தி³ஸங் நிப்³பா³னங் க³ச்ச²ந்தீதி – அட்ட²ங்கி³கோ மக்³கோ³. யாவதா புது²ஸமணப்³ராஹ்மணானங் பரப்பவாதா³னங் மக்³கா³, அயமேவ அரியோ அட்ட²ங்கி³கோ மக்³கோ³ அக்³கோ³ ச ஸெட்டோ² ச பாமொக்கோ² ச உத்தமோ ச பவரோ சாதி – மக்³கா³னங் அட்ட²ங்கி³கோ ஸெட்டோ².
Virāgoti dve virāgā – nibbānañca virāgo, ye ca nibbānārammaṇatājātā dhammā sabbe virāgā hontīti – virāgā. Sahajātāni sattaṅgāni virāgaṃ gacchantīti – virāgo maggo . Etena maggena buddhā ca sāvakā ca agataṃ disaṃ nibbānaṃ gacchantīti – aṭṭhaṅgiko maggo. Yāvatā puthusamaṇabrāhmaṇānaṃ parappavādānaṃ maggā, ayameva ariyo aṭṭhaṅgiko maggo aggo ca seṭṭho ca pāmokkho ca uttamo ca pavaro cāti – maggānaṃ aṭṭhaṅgiko seṭṭho.
ஸகதா³கா³மிமக்³க³க்க²ணே த³ஸ்ஸனட்டே²ன ஸம்மாதி³ட்டி²…பே॰… அவிக்கே²பட்டே²ன ஸம்மாஸமாதி⁴ ஓளாரிகா காமராக³ஸஞ்ஞோஜனா படிக⁴ஸஞ்ஞோஜனா ஓளாரிகா காமராகா³னுஸயா படிகா⁴னுஸயா விரஜ்ஜதி, தத³னுவத்தககிலேஸேஹி ச க²ந்தே⁴ஹி ச விரஜ்ஜதி, ப³ஹித்³தா⁴ ச ஸப்³ப³னிமித்தேஹி விரஜ்ஜதி. விராகோ³ விராகா³ரம்மணோ விராக³கோ³சரோ விராகே³ ஸமுதா³க³தோ விராகே³ டி²தோ விராகே³ பதிட்டி²தோ.
Sakadāgāmimaggakkhaṇe dassanaṭṭhena sammādiṭṭhi…pe… avikkhepaṭṭhena sammāsamādhi oḷārikā kāmarāgasaññojanā paṭighasaññojanā oḷārikā kāmarāgānusayā paṭighānusayā virajjati, tadanuvattakakilesehi ca khandhehi ca virajjati, bahiddhā ca sabbanimittehi virajjati. Virāgo virāgārammaṇo virāgagocaro virāge samudāgato virāge ṭhito virāge patiṭṭhito.
விராகோ³தி த்³வே விராகா³ – நிப்³பா³னஞ்ச விராகோ³, யே ச நிப்³பா³னாரம்மணதாஜாதா த⁴ம்மா ஸப்³பே³ விராகா³ ஹொந்தீதி – விராகா³. ஸஹஜாதானி ஸத்தங்கா³னி விராக³ங் க³ச்ச²ந்தீதி – விராகோ³ மக்³கோ³. ஏதேன மக்³கே³ன பு³த்³தா⁴ ச ஸாவகா ச அக³தங் தி³ஸங் நிப்³பா³னங் க³ச்ச²ந்தீதி – அட்ட²ங்கி³கோ மக்³கோ³. யாவதா புது²ஸமணப்³ராஹ்மணானங் பரப்பவாதா³னங் மக்³கா³. அயமேவ அரியோ அட்ட²ங்கி³கோ மக்³கோ³ அக்³கோ³ ச ஸெட்டோ² ச பாமொக்கோ² ச உத்தமோ ச பவரோ சாதி – மக்³கா³னங் அட்ட²ங்கி³கோ ஸெட்டோ².
Virāgoti dve virāgā – nibbānañca virāgo, ye ca nibbānārammaṇatājātā dhammā sabbe virāgā hontīti – virāgā. Sahajātāni sattaṅgāni virāgaṃ gacchantīti – virāgo maggo. Etena maggena buddhā ca sāvakā ca agataṃ disaṃ nibbānaṃ gacchantīti – aṭṭhaṅgiko maggo. Yāvatā puthusamaṇabrāhmaṇānaṃ parappavādānaṃ maggā. Ayameva ariyo aṭṭhaṅgiko maggo aggo ca seṭṭho ca pāmokkho ca uttamo ca pavaro cāti – maggānaṃ aṭṭhaṅgiko seṭṭho.
அனாகா³மிமக்³க³க்க²ணே த³ஸ்ஸனட்டே²ன ஸம்மாதி³ட்டி²…பே॰… அவிக்கே²பட்டே²ன ஸம்மாஸமாதி⁴ அனுஸஹக³தா காமராக³ஸஞ்ஞோஜனா படிக⁴ஸஞ்ஞோஜனா அனுஸஹக³தா காமராகா³னுஸயா படிகா⁴னுஸயா விரஜ்ஜதி, தத³னுவத்தககிலேஸேஹி ச க²ந்தே⁴ஹி ச விரஜ்ஜதி, ப³ஹித்³தா⁴ ச ஸப்³ப³னிமித்தேஹி விரஜ்ஜதி. விராகோ³ விராகா³ரம்மணோ…பே॰… மக்³கா³னங் அட்ட²ங்கி³கோ ஸெட்டோ².
Anāgāmimaggakkhaṇe dassanaṭṭhena sammādiṭṭhi…pe… avikkhepaṭṭhena sammāsamādhi anusahagatā kāmarāgasaññojanā paṭighasaññojanā anusahagatā kāmarāgānusayā paṭighānusayā virajjati, tadanuvattakakilesehi ca khandhehi ca virajjati, bahiddhā ca sabbanimittehi virajjati. Virāgo virāgārammaṇo…pe… maggānaṃ aṭṭhaṅgiko seṭṭho.
அரஹத்தமக்³க³க்க²ணே த³ஸ்ஸனட்டே²ன ஸம்மாதி³ட்டி²…பே॰… அவிக்கே²பட்டே²ன ஸம்மாஸமாதி⁴ ரூபராகா³ அரூபராகா³ மானா உத்³த⁴ச்சா அவிஜ்ஜாய மானானுஸயா ப⁴வராகா³னுஸயா அவிஜ்ஜானுஸயா விரஜ்ஜதி, தத³னுவத்தககிலேஸேஹி ச க²ந்தே⁴ஹி ச விரஜ்ஜதி, ப³ஹித்³தா⁴ ச ஸப்³ப³னிமித்தேஹி விரஜ்ஜதி விராகோ³ விராகா³ரம்மணோ விராக³கோ³சரோ விராகே³ ஸமுதா³க³தோ விராகே³ டி²தோ விராகே³ பதிட்டி²தோ.
Arahattamaggakkhaṇe dassanaṭṭhena sammādiṭṭhi…pe… avikkhepaṭṭhena sammāsamādhi rūparāgā arūparāgā mānā uddhaccā avijjāya mānānusayā bhavarāgānusayā avijjānusayā virajjati, tadanuvattakakilesehi ca khandhehi ca virajjati, bahiddhā ca sabbanimittehi virajjati virāgo virāgārammaṇo virāgagocaro virāge samudāgato virāge ṭhito virāge patiṭṭhito.
விராகோ³தி த்³வே விராகா³ – நிப்³பா³னஞ்ச விராகோ³, யே ச நிப்³பா³னாரம்மணதாஜாதா த⁴ம்மா ஸப்³பே³ விராகா³ ஹொந்தீதி – விராகா³. ஸஹஜாதானி ஸத்தங்கா³னி விராக³ங் க³ச்ச²ந்தீதி – விராகோ³ மக்³கோ³. ஏதேன மக்³கே³ன பு³த்³தா⁴ ச ஸாவகா ச அக³தங் தி³ஸங் நிப்³பா³னங் க³ச்ச²ந்தீதி – அட்ட²ங்கி³கோ மக்³கோ³ . யாவதா புது²ஸமணப்³ராஹ்மணானங் பரப்பவாதா³னங் மக்³கா³. அயமேவ அரியோ அட்ட²ங்கி³கோ மக்³கோ³ அக்³கோ³ ச ஸெட்டோ² ச பாமொக்கோ² ச உத்தமோ ச பவரோ சாதி – மக்³கா³னங் அட்ட²ங்கி³கோ ஸெட்டோ².
Virāgoti dve virāgā – nibbānañca virāgo, ye ca nibbānārammaṇatājātā dhammā sabbe virāgā hontīti – virāgā. Sahajātāni sattaṅgāni virāgaṃ gacchantīti – virāgo maggo. Etena maggena buddhā ca sāvakā ca agataṃ disaṃ nibbānaṃ gacchantīti – aṭṭhaṅgiko maggo . Yāvatā puthusamaṇabrāhmaṇānaṃ parappavādānaṃ maggā. Ayameva ariyo aṭṭhaṅgiko maggo aggo ca seṭṭho ca pāmokkho ca uttamo ca pavaro cāti – maggānaṃ aṭṭhaṅgiko seṭṭho.
த³ஸ்ஸனவிராகோ³ ஸம்மாதி³ட்டி². அபி⁴னிரோபனவிராகோ³ ஸம்மாஸங்கப்போ. பரிக்³க³ஹவிராகோ³ ஸம்மாவாசா. ஸமுட்டா²னவிராகோ³ ஸம்மாகம்மந்தோ. வோதா³னவிராகோ³ ஸம்மாஆஜீவோ . பக்³க³ஹவிராகோ³ ஸம்மாவாயாமோ. உபட்டா²னவிராகோ³ ஸம்மாஸதி. அவிக்கே²பவிராகோ³ ஸம்மாஸமாதி⁴. உபட்டா²னவிராகோ³ ஸதிஸம்பொ³ஜ்ஜ²ங்கோ³. பவிசயவிராகோ³ த⁴ம்மவிசயஸம்பொ³ஜ்ஜ²ங்கோ³. பக்³க³ஹவிராகோ³ வீரியஸம்பொ³ஜ்ஜ²ங்கோ³. ப²ரணவிராகோ³ பீதிஸம்பொ³ஜ்ஜ²ங்கோ³. உபஸமவிராகோ³ பஸ்ஸத்³தி⁴ஸம்பொ³ஜ்ஜ²ங்கோ³. அவிக்கே²பவிராகோ³ ஸமாதி⁴ஸம்பொ³ஜ்ஜ²ங்கோ³. படிஸங்கா²னவிராகோ³ உபெக்கா²ஸம்பொ³ஜ்ஜ²ங்கோ³. அஸ்ஸத்³தி⁴யே அகம்பியவிராகோ³ ஸத்³தா⁴ப³லங். கோஸஜ்ஜே அகம்பியவிராகோ³ வீரியப³லங். பமாதே³ அகம்பியவிராகோ³ ஸதிப³லங். உத்³த⁴ச்சே அகம்பியவிராகோ³ ஸமாதி⁴ப³லங். அவிஜ்ஜாய அகம்பியவிராகோ³ பஞ்ஞாப³லங். அதி⁴மொக்க²விராகோ³ ஸத்³தி⁴ந்த்³ரியங். பக்³க³ஹவிராகோ³ வீரியிந்த்³ரியங். உபட்டா²னவிராகோ³ ஸதிந்த்³ரியங். அவிக்கே²பவிராகோ³ ஸமாதி⁴ந்த்³ரியங். த³ஸ்ஸனவிராகோ³ பஞ்ஞிந்த்³ரியங். ஆதி⁴பதெய்யட்டே²ன இந்த்³ரியானி விராகோ³. அகம்பியட்டே²ன ப³லங் விராகோ³. நிய்யானட்டே²ன பொ³ஜ்ஜ²ங்கா³ விராகோ³. ஹேதுட்டே²ன மக்³கோ³ விராகோ³. உபட்டா²னட்டே²ன ஸதிபட்டா²னா விராகோ³. பத³ஹனட்டே²ன ஸம்மப்பதா⁴னா விராகோ³. இஜ்ஜ²னட்டே²ன இத்³தி⁴பாதா³ விராகோ³. தத²ட்டே²ன ஸச்சா விராகோ³. அவிக்கே²பட்டே²ன ஸமதோ² விராகோ³. அனுபஸ்ஸனட்டே²ன விபஸ்ஸனா விராகோ³. ஏகரஸட்டே²ன ஸமத²விபஸ்ஸனா விராகோ³. அனதிவத்தனட்டே²ன யுக³னத்³த⁴ங் விராகோ³. ஸங்வரட்டே²ன ஸீலவிஸுத்³தி⁴ விராகோ³. அவிக்கே²பட்டே²ன சித்தவிஸுத்³தி⁴ விராகோ³. த³ஸ்ஸனட்டே²ன தி³ட்டி²விஸுத்³தி⁴ விராகோ³. விமுத்தட்டே²ன விமொக்கோ² விராகோ³. படிவேத⁴ட்டே²ன விஜ்ஜா விராகோ³. பரிச்சாக³ட்டே²ன விமுத்தி விராகோ³. ஸமுச்சே²த³ட்டே²ன க²யே ஞாணங் விராகோ³. ச²ந்தோ³ மூலட்டே²ன விராகோ³. மனஸிகாரோ ஸமுட்டா²னட்டே²ன விராகோ³. ப²ஸ்ஸோ ஸமோதா⁴னட்டே²ன விராகோ³. வேத³னா ஸமோஸரணட்டே²ன விராகோ³. ஸமாதி⁴ பமுக²ட்டே²ன விராகோ³. ஸதி ஆதி⁴பதெய்யட்டே²ன விராகோ³. பஞ்ஞா ததுத்தரட்டே²ன விராகோ³. விமுத்தி ஸாரட்டே²ன விராகோ³. அமதோக³த⁴ங் நிப்³பா³னங் பரியோஸானட்டே²ன மக்³கோ³.
Dassanavirāgo sammādiṭṭhi. Abhiniropanavirāgo sammāsaṅkappo. Pariggahavirāgo sammāvācā. Samuṭṭhānavirāgo sammākammanto. Vodānavirāgo sammāājīvo . Paggahavirāgo sammāvāyāmo. Upaṭṭhānavirāgo sammāsati. Avikkhepavirāgo sammāsamādhi. Upaṭṭhānavirāgo satisambojjhaṅgo. Pavicayavirāgo dhammavicayasambojjhaṅgo. Paggahavirāgo vīriyasambojjhaṅgo. Pharaṇavirāgo pītisambojjhaṅgo. Upasamavirāgo passaddhisambojjhaṅgo. Avikkhepavirāgo samādhisambojjhaṅgo. Paṭisaṅkhānavirāgo upekkhāsambojjhaṅgo. Assaddhiye akampiyavirāgo saddhābalaṃ. Kosajje akampiyavirāgo vīriyabalaṃ. Pamāde akampiyavirāgo satibalaṃ. Uddhacce akampiyavirāgo samādhibalaṃ. Avijjāya akampiyavirāgo paññābalaṃ. Adhimokkhavirāgo saddhindriyaṃ. Paggahavirāgo vīriyindriyaṃ. Upaṭṭhānavirāgo satindriyaṃ. Avikkhepavirāgo samādhindriyaṃ. Dassanavirāgo paññindriyaṃ. Ādhipateyyaṭṭhena indriyāni virāgo. Akampiyaṭṭhena balaṃ virāgo. Niyyānaṭṭhena bojjhaṅgā virāgo. Hetuṭṭhena maggo virāgo. Upaṭṭhānaṭṭhena satipaṭṭhānā virāgo. Padahanaṭṭhena sammappadhānā virāgo. Ijjhanaṭṭhena iddhipādā virāgo. Tathaṭṭhena saccā virāgo. Avikkhepaṭṭhena samatho virāgo. Anupassanaṭṭhena vipassanā virāgo. Ekarasaṭṭhena samathavipassanā virāgo. Anativattanaṭṭhena yuganaddhaṃ virāgo. Saṃvaraṭṭhena sīlavisuddhi virāgo. Avikkhepaṭṭhena cittavisuddhi virāgo. Dassanaṭṭhena diṭṭhivisuddhi virāgo. Vimuttaṭṭhena vimokkho virāgo. Paṭivedhaṭṭhena vijjā virāgo. Pariccāgaṭṭhena vimutti virāgo. Samucchedaṭṭhena khaye ñāṇaṃ virāgo. Chando mūlaṭṭhena virāgo. Manasikāro samuṭṭhānaṭṭhena virāgo. Phasso samodhānaṭṭhena virāgo. Vedanā samosaraṇaṭṭhena virāgo. Samādhi pamukhaṭṭhena virāgo. Sati ādhipateyyaṭṭhena virāgo. Paññā tatuttaraṭṭhena virāgo. Vimutti sāraṭṭhena virāgo. Amatogadhaṃ nibbānaṃ pariyosānaṭṭhena maggo.
த³ஸ்ஸனமக்³கோ³ ஸம்மாதி³ட்டி², அபி⁴னிரோபனமக்³கோ³ ஸம்மாஸங்கப்போ…பே॰… அமதோக³த⁴ங் நிப்³பா³னங் பரியோஸானட்டே²ன மக்³கோ³. ஏவங் விராகோ³ மக்³கோ³.
Dassanamaggo sammādiṭṭhi, abhiniropanamaggo sammāsaṅkappo…pe… amatogadhaṃ nibbānaṃ pariyosānaṭṭhena maggo. Evaṃ virāgo maggo.
29. கத²ங் விமுத்தி ப²லங்? ஸோதாபத்திப²லக்க²ணே த³ஸ்ஸனட்டே²ன ஸம்மாதி³ட்டி² மிச்சா²தி³ட்டி²யா விமுத்தா ஹோதி, தத³னுவத்தககிலேஸேஹி ச க²ந்தே⁴ஹி ச விமுத்தா ஹோதி, ப³ஹித்³தா⁴ ச ஸப்³ப³னிமித்தேஹி விமுத்தா ஹோதி, விமுத்தி விமுத்தாரம்மணா விமுத்திகோ³சரா விமுத்தியா ஸமுதா³க³தா விமுத்தியா டி²தா விமுத்தியா பதிட்டி²தா. விமுத்தீதி த்³வே முத்தியோ – நிப்³பா³னஞ்ச விமுத்தி, யே ச நிப்³பா³னாரம்மணதாஜாதா த⁴ம்மா ஸப்³பே³ ச விமுத்தா ஹொந்தீதி – விமுத்தி ப²லங்.
29. Kathaṃ vimutti phalaṃ? Sotāpattiphalakkhaṇe dassanaṭṭhena sammādiṭṭhi micchādiṭṭhiyā vimuttā hoti, tadanuvattakakilesehi ca khandhehi ca vimuttā hoti, bahiddhā ca sabbanimittehi vimuttā hoti, vimutti vimuttārammaṇā vimuttigocarā vimuttiyā samudāgatā vimuttiyā ṭhitā vimuttiyā patiṭṭhitā. Vimuttīti dve muttiyo – nibbānañca vimutti, ye ca nibbānārammaṇatājātā dhammā sabbe ca vimuttā hontīti – vimutti phalaṃ.
அபி⁴னிரோபனட்டே²ன ஸம்மாஸங்கப்போ மிச்சா²ஸங்கப்பா விமுத்தோ ஹோதி, தத³னுவத்தககிலேஸேஹி ச க²ந்தே⁴ஹி ச விமுத்தோ ஹோதி, ப³ஹித்³தா⁴ ச ஸப்³ப³னிமித்தேஹி விமுத்தோ ஹோதி, விமுத்தி விமுத்தாரம்மணா விமுத்திகோ³சரா விமுத்தியா ஸமுதா³க³தா விமுத்தியா டி²தா விமுத்தியா பதிட்டி²தா. விமுத்தீதி த்³வே விமுத்தியோ – நிப்³பா³னஞ்ச விமுத்தி, யே ச நிப்³பா³னாரம்மணதாஜாதா த⁴ம்மா ஸப்³பே³ விமுத்தா ஹொந்தீதி – விமுத்தி ப²லங்.
Abhiniropanaṭṭhena sammāsaṅkappo micchāsaṅkappā vimutto hoti, tadanuvattakakilesehi ca khandhehi ca vimutto hoti, bahiddhā ca sabbanimittehi vimutto hoti, vimutti vimuttārammaṇā vimuttigocarā vimuttiyā samudāgatā vimuttiyā ṭhitā vimuttiyā patiṭṭhitā. Vimuttīti dve vimuttiyo – nibbānañca vimutti, ye ca nibbānārammaṇatājātā dhammā sabbe vimuttā hontīti – vimutti phalaṃ.
பரிக்³க³ஹட்டே²ன ஸம்மாவாசா மிச்சா²வாசாய விமுத்தா ஹோதி, ஸமுட்டா²னட்டே²ன ஸம்மாகம்மந்தோ மிச்சா²கம்மந்தா விமுத்தோ ஹோதி, வோதா³னட்டே²ன ஸம்மாஆஜீவோ மிச்சா²ஆஜீவா விமுத்தோ ஹோதி, பக்³க³ஹட்டே²ன ஸம்மாவாயாமோ மிச்சா²வாயாமா விமுத்தோ ஹோதி, உபட்டா²னட்டே²ன ஸம்மாஸதி மிச்சா²ஸதியா விமுத்தா ஹோதி, அவிக்கே²பட்டே²ன ஸம்மாஸமாதி⁴ மிச்சா²ஸமாதி⁴தோ விமுத்தோ ஹோதி, தத³னுவத்தககிலேஸேஹி ச க²ந்தே⁴ஹி ச விமுத்தோ ஹோதி, ப³ஹித்³தா⁴ ச ஸப்³ப³னிமித்தேஹி விமுத்தோ ஹோதி, விமுத்தி விமுத்தாரம்மணா விமுத்திகோ³சரா விமுத்தியா ஸமுதா³க³தா விமுத்தியா டி²தா விமுத்தியா பதிட்டி²தா. விமுத்தீதி. த்³வே விமுத்தியோ – நிப்³பா³னஞ்ச விமுத்தி, யே ச நிப்³பா³னாரம்மணதாஜாதா த⁴ம்மா ஸப்³பே³ விமுத்தா ஹொந்தீதி – விமுத்தி ப²லங்.
Pariggahaṭṭhena sammāvācā micchāvācāya vimuttā hoti, samuṭṭhānaṭṭhena sammākammanto micchākammantā vimutto hoti, vodānaṭṭhena sammāājīvo micchāājīvā vimutto hoti, paggahaṭṭhena sammāvāyāmo micchāvāyāmā vimutto hoti, upaṭṭhānaṭṭhena sammāsati micchāsatiyā vimuttā hoti, avikkhepaṭṭhena sammāsamādhi micchāsamādhito vimutto hoti, tadanuvattakakilesehi ca khandhehi ca vimutto hoti, bahiddhā ca sabbanimittehi vimutto hoti, vimutti vimuttārammaṇā vimuttigocarā vimuttiyā samudāgatā vimuttiyā ṭhitā vimuttiyā patiṭṭhitā. Vimuttīti. Dve vimuttiyo – nibbānañca vimutti, ye ca nibbānārammaṇatājātā dhammā sabbe vimuttā hontīti – vimutti phalaṃ.
ஸகதா³கா³மிப²லக்க²ணே த³ஸ்ஸனட்டே²ன ஸம்மாதி³ட்டி²…பே॰… அவிக்கே²பட்டே²ன ஸம்மாஸமாதி⁴ ஓளாரிகா காமராக³ஸஞ்ஞோஜனா படிக⁴ஸஞ்ஞோஜனா ஓளாரிகா காமராகா³னுஸயா படிகா⁴னுஸயா விமுத்தோ ஹோதி, தத³னுவத்தககிலேஸேஹி ச க²ந்தே⁴ஹி ச விமுத்தோ ஹோதி, ப³ஹித்³தா⁴ ச ஸப்³ப³னிமித்தேஹி விமுத்தோ ஹோதி, விமுத்தி விமுத்தாரம்மணா விமுத்திகோ³சரா விமுத்தியா ஸமுதா³க³தா விமுத்தியா டி²தா விமுத்தியா பதிட்டி²தா. விமுத்தீதி த்³வே விமுத்தியோ – நிப்³பா³னஞ்ச விமுத்தி, யே ச நிப்³பா³னாரம்மணதாஜாதா த⁴ம்மா ஸப்³பே³ விமுத்தா ஹொந்தீதி – விமுத்தி ப²லங்.
Sakadāgāmiphalakkhaṇe dassanaṭṭhena sammādiṭṭhi…pe… avikkhepaṭṭhena sammāsamādhi oḷārikā kāmarāgasaññojanā paṭighasaññojanā oḷārikā kāmarāgānusayā paṭighānusayā vimutto hoti, tadanuvattakakilesehi ca khandhehi ca vimutto hoti, bahiddhā ca sabbanimittehi vimutto hoti, vimutti vimuttārammaṇā vimuttigocarā vimuttiyā samudāgatā vimuttiyā ṭhitā vimuttiyā patiṭṭhitā. Vimuttīti dve vimuttiyo – nibbānañca vimutti, ye ca nibbānārammaṇatājātā dhammā sabbe vimuttā hontīti – vimutti phalaṃ.
அனாகா³மிப²லக்க²ணே த³ஸ்ஸனட்டே²ன ஸம்மாதி³ட்டி²…பே॰… அவிக்கே²பட்டே²ன ஸம்மாஸமாதி⁴ அனுஸஹக³தா காமராக³ஸஞ்ஞோஜனா படிக⁴ஸஞ்ஞோஜனா அனுஸஹக³தா காமராகா³னுஸயா படிகா⁴னுஸயா விமுத்தோ ஹோதி, தத³னுவத்தககிலேஸேஹி ச க²ந்தே⁴ஹி ச விமுத்தோ ஹோதி, ப³ஹித்³தா⁴ ச ஸப்³ப³னிமித்தேஹி விமுத்தோ ஹோதி, விமுத்தி விமுத்தாரம்மணா விமுத்திகோ³சரா விமுத்தியா ஸமுதா³க³தா விமுத்தியா டி²தா விமுத்தியா பதிட்டி²தா…பே॰….
Anāgāmiphalakkhaṇe dassanaṭṭhena sammādiṭṭhi…pe… avikkhepaṭṭhena sammāsamādhi anusahagatā kāmarāgasaññojanā paṭighasaññojanā anusahagatā kāmarāgānusayā paṭighānusayā vimutto hoti, tadanuvattakakilesehi ca khandhehi ca vimutto hoti, bahiddhā ca sabbanimittehi vimutto hoti, vimutti vimuttārammaṇā vimuttigocarā vimuttiyā samudāgatā vimuttiyā ṭhitā vimuttiyā patiṭṭhitā…pe….
அரஹத்தப²லக்க²ணே த³ஸ்ஸனட்டே²ன ஸம்மாதி³ட்டி²…பே॰… அவிக்கே²பட்டே²ன ஸம்மாஸமாதி⁴ ரூபராகா³ அரூபராகா³ மானா உத்³த⁴ச்சா அவிஜ்ஜாய மானானுஸயா ப⁴வராகா³னுஸயா அவிஜ்ஜானுஸயா விமுத்தோ ஹோதி, தத³னுவத்தககிலேஸேஹி ச க²ந்தே⁴ஹி ச விமுத்தோ ஹோதி, ப³ஹித்³தா⁴ ச ஸப்³ப³னிமித்தேஹி விமுத்தோ ஹோதி, விமுத்தி விமுத்தாரம்மணா விமுத்திகோ³சரா விமுத்தியா ஸமுதா³க³தா விமுத்தியா டி²தா விமுத்தியா பதிட்டி²தா. விமுத்தீதி த்³வே விமுத்தியோ – நிப்³பா³னஞ்ச விமுத்தி, யே ச நிப்³பா³னாரம்மணதா ஜாதா த⁴ம்மா ஸப்³பே³ விமுத்தா ஹொந்தீதி – விமுத்தி ப²லங்.
Arahattaphalakkhaṇe dassanaṭṭhena sammādiṭṭhi…pe… avikkhepaṭṭhena sammāsamādhi rūparāgā arūparāgā mānā uddhaccā avijjāya mānānusayā bhavarāgānusayā avijjānusayā vimutto hoti, tadanuvattakakilesehi ca khandhehi ca vimutto hoti, bahiddhā ca sabbanimittehi vimutto hoti, vimutti vimuttārammaṇā vimuttigocarā vimuttiyā samudāgatā vimuttiyā ṭhitā vimuttiyā patiṭṭhitā. Vimuttīti dve vimuttiyo – nibbānañca vimutti, ye ca nibbānārammaṇatā jātā dhammā sabbe vimuttā hontīti – vimutti phalaṃ.
த³ஸ்ஸனவிமுத்தி ஸம்மாதி³ட்டி²…பே॰… அவிக்கே²பவிமுத்தி ஸம்மாஸமாதி⁴, உபட்டா²னவிமுத்தி ஸதிஸம்பொ³ஜ்ஜ²ங்கோ³, படிஸங்கா²னவிமுத்தி உபெக்கா²ஸம்பொ³ஜ்ஜ²ங்கோ³. அஸ்ஸத்³தி⁴யே அகம்பியவிமுத்தி ஸத்³தா⁴ப³லங்…பே॰… அவிஜ்ஜாய அகம்பியவிமுத்தி பஞ்ஞாப³லங். அதி⁴மொக்க²விமுத்தி ஸத்³தி⁴ந்த்³ரியங்…பே॰… த³ஸ்ஸனவிமுத்தி பஞ்ஞிந்த்³ரியங்.
Dassanavimutti sammādiṭṭhi…pe… avikkhepavimutti sammāsamādhi, upaṭṭhānavimutti satisambojjhaṅgo, paṭisaṅkhānavimutti upekkhāsambojjhaṅgo. Assaddhiye akampiyavimutti saddhābalaṃ…pe… avijjāya akampiyavimutti paññābalaṃ. Adhimokkhavimutti saddhindriyaṃ…pe… dassanavimutti paññindriyaṃ.
ஆதி⁴பதெய்யட்டே²ன இந்த்³ரியா விமுத்தி. அகம்பியட்டே²ன ப³லா விமுத்தி, நிய்யானட்டே²ன பொ³ஜ்ஜ²ங்கா³ விமுத்தி, ஹேதுட்டே²ன மக்³கோ³ விமுத்தி, உபட்டா²னட்டே²ன ஸதிபட்டா²னா விமுத்தி, பத³ஹனட்டே²ன ஸம்மப்பதா⁴னா விமுத்தி, இஜ்ஜ²னட்டே²ன இத்³தி⁴பாதா³ விமுத்தி, தத²ட்டே²ன ஸச்சா விமுத்தி, அவிக்கே²பட்டே²ன ஸமதோ² விமுத்தி, அனுபஸ்ஸனட்டே²ன விபஸ்ஸனா விமுத்தி, ஏகரஸட்டே²ன ஸமத²விபஸ்ஸனா விமுத்தி, அனதிவத்தனட்டே²ன யுக³னத்³த⁴ங் விமுத்தி, ஸங்வரட்டே²ன ஸீலவிஸுத்³தி⁴ விமுத்தி, அவிக்கே²பட்டே²ன சித்தவிஸுத்³தி⁴ விமுத்தி, த³ஸ்ஸனட்டே²ன தி³ட்டி²விஸுத்³தி⁴ விமுத்தி, விமுத்தட்டே²ன விமொக்கோ² விமுத்தி, படிவேத⁴ட்டே²ன விஜ்ஜா விமுத்தி, பரிச்சாக³ட்டே²ன விமுத்தி விமுத்தி, படிப்பஸ்ஸத்³தி⁴யட்டே²ன அனுப்பாதே³ ஞாணங் விமுத்தி, ச²ந்தோ³ மூலட்டே²ன விமுத்தி, மனஸிகாரோ ஸமுட்டா²னட்டே²ன விமுத்தி, ப²ஸ்ஸோ ஸமோதா⁴னட்டே²ன விமுத்தி, வேத³னா ஸமோஸரணட்டே²ன விமுத்தி, ஸமாதி⁴ பமுக²ட்டே²ன விமுத்தி, ஸதி ஆதி⁴பதெய்யட்டே²ன விமுத்தி, பஞ்ஞா ததுத்தரட்டே²ன விமுத்தி, விமுத்தி ஸாரட்டே²ன விமுத்தி, அமதோக³த⁴ங் நிப்³பா³னங் பரியோஸானட்டே²ன விமுத்தி. ஏவங் விமுத்தி ப²லங். ஏவங் விராகோ³ மக்³கோ³ , விமுத்தி ப²லந்தி.
Ādhipateyyaṭṭhena indriyā vimutti. Akampiyaṭṭhena balā vimutti, niyyānaṭṭhena bojjhaṅgā vimutti, hetuṭṭhena maggo vimutti, upaṭṭhānaṭṭhena satipaṭṭhānā vimutti, padahanaṭṭhena sammappadhānā vimutti, ijjhanaṭṭhena iddhipādā vimutti, tathaṭṭhena saccā vimutti, avikkhepaṭṭhena samatho vimutti, anupassanaṭṭhena vipassanā vimutti, ekarasaṭṭhena samathavipassanā vimutti, anativattanaṭṭhena yuganaddhaṃ vimutti, saṃvaraṭṭhena sīlavisuddhi vimutti, avikkhepaṭṭhena cittavisuddhi vimutti, dassanaṭṭhena diṭṭhivisuddhi vimutti, vimuttaṭṭhena vimokkho vimutti, paṭivedhaṭṭhena vijjā vimutti, pariccāgaṭṭhena vimutti vimutti, paṭippassaddhiyaṭṭhena anuppāde ñāṇaṃ vimutti, chando mūlaṭṭhena vimutti, manasikāro samuṭṭhānaṭṭhena vimutti, phasso samodhānaṭṭhena vimutti, vedanā samosaraṇaṭṭhena vimutti, samādhi pamukhaṭṭhena vimutti, sati ādhipateyyaṭṭhena vimutti, paññā tatuttaraṭṭhena vimutti, vimutti sāraṭṭhena vimutti, amatogadhaṃ nibbānaṃ pariyosānaṭṭhena vimutti. Evaṃ vimutti phalaṃ. Evaṃ virāgo maggo , vimutti phalanti.
விராக³கதா² நிட்டி²தா.
Virāgakathā niṭṭhitā.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā / விராக³கதா²வண்ணனா • Virāgakathāvaṇṇanā
