| Library / Tipiṭaka / திபிடக • Tipiṭaka / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā |
5. விராக³கதா²
5. Virāgakathā
விராக³கதா²வண்ணனா
Virāgakathāvaṇṇanā
28. இதா³னி மக்³க³பயோஜனபரியோஸானாய மெத்தாகதா²ய அனந்தரங் கதி²தாய விராக³ஸங்கா²தமக்³க³புப்³ப³ங்க³மாய விராக³கதா²ய அபுப்³ப³த்தா²னுவண்ணனா. தத்த² பட²மங் தாவ ‘‘நிப்³பி³ந்த³ங் விரஜ்ஜதி விராகா³ விமுச்சதீ’’தி (மஹாவ 23) வுத்தானங் த்³வின்னங் ஸுத்தந்தபதா³னங் அத்த²ங் நித்³தி³ஸிதுகாமேன விராகோ³ மக்³கோ³, விமுத்தி ப²லந்தி உத்³தே³ஸோ ட²பிதோ. தத்த² பட²மங் வசனத்த²ங் தாவ நித்³தி³ஸிதுகாமோ கத²ங் விராகோ³ மக்³கோ³திஆதி³மாஹ. தத்த² விரஜ்ஜதீதி விரத்தா ஹோதி. ஸேஸானி மக்³க³ஞாணனித்³தே³ஸே வுத்தத்தா²னி. விராகோ³தி யஸ்மா ஸம்மாதி³ட்டி² விரஜ்ஜதி, தஸ்மா விராகோ³ நாமாதி அத்தோ² . ஸோ ச விராகோ³ யஸ்மா விராகா³ரம்மணோ…பே॰… விராகே³ பதிட்டி²தோ, தஸ்மா ச விராகோ³தி ஏவங் ‘‘விராகா³ரம்மணோ’’திஆதீ³னங் பஞ்சன்னங் வசனானங் ஸம்ப³ந்தோ⁴ வேதி³தப்³போ³. தத்த² விராகா³ரம்மணோதி நிப்³பா³னாரம்மணோ. விராக³கோ³சரோதி நிப்³பா³னவிஸயோ. விராகே³ ஸமுதா³க³தோதி நிப்³பா³னே ஸமுப்பன்னோ. விராகே³ டி²தோதி பவத்திவஸேன நிப்³பா³னே டி²தோ. விராகே³ பதிட்டி²தோதி அனிவத்தனவஸேன நிப்³பா³னே பதிட்டி²தோ.
28. Idāni maggapayojanapariyosānāya mettākathāya anantaraṃ kathitāya virāgasaṅkhātamaggapubbaṅgamāya virāgakathāya apubbatthānuvaṇṇanā. Tattha paṭhamaṃ tāva ‘‘nibbindaṃ virajjati virāgā vimuccatī’’ti (mahāva 23) vuttānaṃ dvinnaṃ suttantapadānaṃ atthaṃ niddisitukāmena virāgo maggo, vimutti phalanti uddeso ṭhapito. Tattha paṭhamaṃ vacanatthaṃ tāva niddisitukāmo kathaṃ virāgo maggotiādimāha. Tattha virajjatīti virattā hoti. Sesāni maggañāṇaniddese vuttatthāni. Virāgoti yasmā sammādiṭṭhi virajjati, tasmā virāgo nāmāti attho . So ca virāgo yasmā virāgārammaṇo…pe… virāge patiṭṭhito, tasmā ca virāgoti evaṃ ‘‘virāgārammaṇo’’tiādīnaṃ pañcannaṃ vacanānaṃ sambandho veditabbo. Tattha virāgārammaṇoti nibbānārammaṇo. Virāgagocaroti nibbānavisayo. Virāge samudāgatoti nibbāne samuppanno. Virāge ṭhitoti pavattivasena nibbāne ṭhito. Virāge patiṭṭhitoti anivattanavasena nibbāne patiṭṭhito.
நிப்³பா³னஞ்ச விராகோ³தி நிப்³பா³னங் விராக³ஹேதுத்தா விராகோ³. நிப்³பா³னாரம்மணதாஜாதாதி நிப்³பா³னாரம்மணே ஜாதா, நிப்³பா³னாரம்மணபா⁴வேன வா ஜாதா. தே மக்³க³ஸம்பயுத்தா ஸப்³பே³வ ப²ஸ்ஸாத³யோ த⁴ம்மா விரஜ்ஜனட்டே²ன விராகா³ ஹொந்தீதி விராகா³ நாம ஹொந்தி. ஸஹஜாதானீதி ஸம்மாதி³ட்டி²ஸஹஜாதானி ஸம்மாஸங்கப்பாதீ³னி ஸத்த மக்³க³ங்கா³னி. விராக³ங் க³ச்ச²ந்தீதி விராகோ³ மக்³கோ³தி விராக³ங் நிப்³பா³னங் ஆரம்மணங் கத்வா க³ச்ச²ந்தீதி விராகா³ரம்மணத்தா விராகோ³ நாம, மக்³க³னட்டே²ன மக்³கோ³ நாம ஹோதீதி அத்தோ². ஏகேகம்பி மக்³க³ங்க³ங் மக்³கோ³தி நாமங் லப⁴தி. இதி ஏகேகஸ்ஸ அங்க³ஸ்ஸ மக்³க³த்தே வுத்தே ஸம்மாதி³ட்டி²யாபி மக்³க³த்தங் வுத்தமேவ ஹோதி. தஸ்மாயேவ ச ஏதேன மக்³கே³னாதி அட்ட² மக்³க³ங்கா³னி க³ஹெத்வா வுத்தங். பு³த்³தா⁴ சாதி பச்சேகபு³த்³தா⁴பி ஸங்க³ஹிதா. தேபி ஹி ‘‘த்³வேமே, பி⁴க்க²வே, பு³த்³தா⁴ ததா²க³தோ ச அரஹங் ஸம்மாஸம்பு³த்³தோ⁴ பச்சேகபு³த்³தோ⁴ சா’’தி (அ॰ நி॰ 2.57) வுத்தத்தா பு³த்³தா⁴யேவ . அக³தந்தி அனமதக்³கே³ ஸங்ஸாரே அக³தபுப்³ப³ங். தி³ஸந்தி ஸகலாயபடிபத்தியா தி³ஸ்ஸதி அபதி³ஸ்ஸதி அபி⁴ஸந்த³ஹீயதீதி தி³ஸா, ஸப்³ப³பு³த்³தே⁴ஹி வா பரமங் ஸுக²ந்தி தி³ஸ்ஸதி அபதி³ஸ்ஸதி கதீ²யதீதி தி³ஸா , ஸப்³ப³து³க்க²ங் வா தி³ஸ்ஸந்தி விஸ்ஸஜ்ஜெந்தி உஜ்ஜ²ந்தி ஏதாயாதி தி³ஸா. தங் தி³ஸங். அட்ட²ங்கி³கோ மக்³கோ³தி கிங் வுத்தங் ஹோதி? யோ ஸோ அட்ட²ங்கி³கோ த⁴ம்மஸமூஹோ, ஸோ ஏதேன நிப்³பா³னங் க³ச்ச²ந்தீதி க³மனட்டே²ன மக்³கோ³ நாமாதி வுத்தங் ஹோதி. புது²ஸமணப்³ராஹ்மணானங் பரப்பவாதா³னந்தி விஸுங் விஸுங் ஸமணானங் ப்³ராஹ்மணானஞ்ச இதோ அஞ்ஞலத்³தி⁴கானங். அக்³கோ³தி தேஸங் ஸேஸமக்³கா³னங் விஸிட்டோ². ஸெட்டோ²தி ஸேஸமக்³க³தோ அதிவிய பஸங்ஸனீயோ. மொக்கோ²தி முகே² ஸாது⁴, ஸேஸமக்³கா³னங் அபி⁴முகே² அயமேவ ஸாதூ⁴தி அத்தோ². உத்தமோதி ஸேஸமக்³கே³ அதிவிய உத்திண்ணோ. பவரோதி ஸேஸமக்³க³தோ நானப்பகாரேஹி ஸங்ப⁴ஜனீயோ. இதீதி காரணத்தே² நிபாதோ. தஸ்மா ப⁴க³வதா ‘‘மக்³கா³னங் அட்ட²ங்கி³கோ ஸெட்டோ²’’தி வுத்தோதி அதி⁴ப்பாயோ. வுத்தஞ்ஹி ப⁴க³வதா –
Nibbānañca virāgoti nibbānaṃ virāgahetuttā virāgo. Nibbānārammaṇatājātāti nibbānārammaṇe jātā, nibbānārammaṇabhāvena vā jātā. Te maggasampayuttā sabbeva phassādayo dhammā virajjanaṭṭhena virāgā hontīti virāgā nāma honti. Sahajātānīti sammādiṭṭhisahajātāni sammāsaṅkappādīni satta maggaṅgāni. Virāgaṃ gacchantīti virāgo maggoti virāgaṃ nibbānaṃ ārammaṇaṃ katvā gacchantīti virāgārammaṇattā virāgo nāma, magganaṭṭhena maggo nāma hotīti attho. Ekekampi maggaṅgaṃ maggoti nāmaṃ labhati. Iti ekekassa aṅgassa maggatte vutte sammādiṭṭhiyāpi maggattaṃ vuttameva hoti. Tasmāyeva ca etena maggenāti aṭṭha maggaṅgāni gahetvā vuttaṃ. Buddhā cāti paccekabuddhāpi saṅgahitā. Tepi hi ‘‘dveme, bhikkhave, buddhā tathāgato ca arahaṃ sammāsambuddho paccekabuddho cā’’ti (a. ni. 2.57) vuttattā buddhāyeva . Agatanti anamatagge saṃsāre agatapubbaṃ. Disanti sakalāyapaṭipattiyā dissati apadissati abhisandahīyatīti disā, sabbabuddhehi vā paramaṃ sukhanti dissati apadissati kathīyatīti disā , sabbadukkhaṃ vā dissanti vissajjenti ujjhanti etāyāti disā. Taṃ disaṃ. Aṭṭhaṅgiko maggoti kiṃ vuttaṃ hoti? Yo so aṭṭhaṅgiko dhammasamūho, so etena nibbānaṃ gacchantīti gamanaṭṭhena maggo nāmāti vuttaṃ hoti. Puthusamaṇabrāhmaṇānaṃ parappavādānanti visuṃ visuṃ samaṇānaṃ brāhmaṇānañca ito aññaladdhikānaṃ. Aggoti tesaṃ sesamaggānaṃ visiṭṭho. Seṭṭhoti sesamaggato ativiya pasaṃsanīyo. Mokkhoti mukhe sādhu, sesamaggānaṃ abhimukhe ayameva sādhūti attho. Uttamoti sesamagge ativiya uttiṇṇo. Pavaroti sesamaggato nānappakārehi saṃbhajanīyo. Itīti kāraṇatthe nipāto. Tasmā bhagavatā ‘‘maggānaṃ aṭṭhaṅgiko seṭṭho’’ti vuttoti adhippāyo. Vuttañhi bhagavatā –
‘‘மக்³கா³னட்ட²ங்கி³கோ ஸெட்டோ², ஸச்சானங் சதுரோ பதா³;
‘‘Maggānaṭṭhaṅgiko seṭṭho, saccānaṃ caturo padā;
விராகோ³ ஸெட்டோ² த⁴ம்மானங், த்³விபதா³னஞ்ச சக்கு²மா’’தி. (த⁴॰ ப॰ 273);
Virāgo seṭṭho dhammānaṃ, dvipadānañca cakkhumā’’ti. (dha. pa. 273);
தங் இத⁴ விச்சி²ந்தி³த்வா ‘‘மக்³கா³னங் அட்ட²ங்கி³கோ ஸெட்டோ²’’தி வுத்தங். ஸேஸவாரேஸுபி இமினா ச நயேன ஹெட்டா² வுத்தனயேன ச அத்தோ² வேதி³தப்³போ³.
Taṃ idha vicchinditvā ‘‘maggānaṃ aṭṭhaṅgiko seṭṭho’’ti vuttaṃ. Sesavāresupi iminā ca nayena heṭṭhā vuttanayena ca attho veditabbo.
த³ஸ்ஸனவிராகோ³திஆதீ³ஸு த³ஸ்ஸனஸங்கா²தோ விராகோ³ த³ஸ்ஸனவிராகோ³. இந்த்³ரியட்ட²தோ ப³லஸ்ஸ விஸிட்ட²த்தா இத⁴ இந்த்³ரியதோ ப³லங் பட²மங் வுத்தந்தி வேதி³தப்³ப³ங். ஆதி⁴பதெய்யட்டே²ன இந்த்³ரியானீதிஆதி³ இந்த்³ரியாதீ³னங் அத்த²விபா⁴வனா, ந விராக³ஸ்ஸ. தத²ட்டே²ன ஸச்சாதி ஸச்சஞாணங் வேதி³தப்³ப³ங். ஸீலவிஸுத்³தீ⁴தி ஸம்மாவாசாகம்மந்தாஜீவா. சித்தவிஸுத்³தீ⁴தி ஸம்மாஸமாதி⁴. தி³ட்டி²விஸுத்³தீ⁴தி ஸம்மாதி³ட்டி²ஸங்கப்பா. விமுத்தட்டே²னாதி தங்தங்மக்³க³வஜ்ஜ²கிலேஸேஹி முத்தட்டே²ன. விஜ்ஜாதி ஸம்மாதி³ட்டி². விமுத்தீதி ஸமுச்சே²த³விமுத்தி. அமதோக³த⁴ங் நிப்³பா³னங் பரியோஸானட்டே²ன மக்³கோ³தி மக்³க³ப²லபச்சவெக்க²ணாஹி மக்³கீ³யதீதி மக்³கோ³.
Dassanavirāgotiādīsu dassanasaṅkhāto virāgo dassanavirāgo. Indriyaṭṭhato balassa visiṭṭhattā idha indriyato balaṃ paṭhamaṃ vuttanti veditabbaṃ. Ādhipateyyaṭṭhena indriyānītiādi indriyādīnaṃ atthavibhāvanā, na virāgassa. Tathaṭṭhena saccāti saccañāṇaṃ veditabbaṃ. Sīlavisuddhīti sammāvācākammantājīvā. Cittavisuddhīti sammāsamādhi. Diṭṭhivisuddhīti sammādiṭṭhisaṅkappā. Vimuttaṭṭhenāti taṃtaṃmaggavajjhakilesehi muttaṭṭhena. Vijjāti sammādiṭṭhi. Vimuttīti samucchedavimutti. Amatogadhaṃ nibbānaṃ pariyosānaṭṭhena maggoti maggaphalapaccavekkhaṇāhi maggīyatīti maggo.
இமஸ்மிங் விராக³னித்³தே³ஸே வுத்தா த⁴ம்மா ஸப்³பே³பி மக்³க³க்க²ணேயேவ. விமுத்தினித்³தே³ஸே ப²லக்க²ணே. தஸ்மா ச²ந்த³மனஸிகாராபி மக்³க³ப²லஸம்பயுத்தா.
Imasmiṃ virāganiddese vuttā dhammā sabbepi maggakkhaṇeyeva. Vimuttiniddese phalakkhaṇe. Tasmā chandamanasikārāpi maggaphalasampayuttā.
29. விராக³னித்³தே³ஸே வுத்தனயேனேவ விமுத்தினித்³தே³ஸேபி அத்தோ² வேதி³தப்³போ³. ப²லங் பனெத்த² படிப்பஸ்ஸத்³தி⁴விமுத்தத்தா விமுத்தி, நிப்³பா³னங் நிஸ்ஸரணவிமுத்தத்தா விமுத்தி. ‘‘ஸஹஜாதானி ஸத்தங்கா³னீ’’திஆதீ³னி வசனானி இத⁴ ந லப்³ப⁴ந்தீதி ந வுத்தானி. ஸயங் ப²லவிமுத்தத்தா பரிச்சாக³ட்டே²ன விமுத்தீதி எத்தகமேவ வுத்தங். ஸேஸங் வுத்தனயமேவாதி.
29. Virāganiddese vuttanayeneva vimuttiniddesepi attho veditabbo. Phalaṃ panettha paṭippassaddhivimuttattā vimutti, nibbānaṃ nissaraṇavimuttattā vimutti. ‘‘Sahajātāni sattaṅgānī’’tiādīni vacanāni idha na labbhantīti na vuttāni. Sayaṃ phalavimuttattā pariccāgaṭṭhena vimuttīti ettakameva vuttaṃ. Sesaṃ vuttanayamevāti.
விராக³கதா²வண்ணனா நிட்டி²தா.
Virāgakathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / படிஸம்பி⁴தா³மக்³க³பாளி • Paṭisambhidāmaggapāḷi / 5. விராக³கதா² • 5. Virāgakathā
