| Library / Tipiṭaka / д̇ибидага • Tipiṭaka / бадисамбхид̣̇аамаг̇г̇а-адтагат̇аа • Paṭisambhidāmagga-aṭṭhakathā |
5. вирааг̇агат̇аа
5. Virāgakathā
вирааг̇агат̇ааван̣н̣анаа
Virāgakathāvaṇṇanā
28. ид̣̇аани маг̇г̇абаяож̇анабарияосаанааяа мзд̇д̇аагат̇ааяа ананд̇арам̣ гат̇ид̇ааяа вирааг̇асан̇каад̇амаг̇г̇абуб̣б̣ан̇г̇амааяа вирааг̇агат̇ааяа абуб̣б̣ад̇т̇аануван̣н̣анаа. д̇ад̇т̇а батамам̣ д̇аава ‘‘ниб̣б̣инд̣̇ам̣ вираж̇ж̇ад̇и вирааг̇аа вимужжад̇ий’’д̇и (махаава 23) вуд̇д̇аанам̣ д̣̇виннам̣ суд̇д̇анд̇абад̣̇аанам̣ ад̇т̇ам̣ нид̣̇д̣̇исид̇угаамзна вирааг̇о маг̇г̇о, вимуд̇д̇и паланд̇и уд̣̇д̣̇зсо табид̇о. д̇ад̇т̇а батамам̣ важанад̇т̇ам̣ д̇аава нид̣̇д̣̇исид̇угаамо гат̇ам̣ вирааг̇о маг̇г̇од̇иаад̣̇имааха. д̇ад̇т̇а вираж̇ж̇ад̇ийд̇и вирад̇д̇аа ход̇и. сзсаани маг̇г̇ан̃аан̣анид̣̇д̣̇зсз вуд̇д̇ад̇т̇аани. вирааг̇од̇и яасмаа саммаад̣̇идти вираж̇ж̇ад̇и, д̇асмаа вирааг̇о наамаад̇и ад̇т̇о . со жа вирааг̇о яасмаа вирааг̇аарамман̣о…бз… вирааг̇з бад̇идтид̇о, д̇асмаа жа вирааг̇од̇и звам̣ ‘‘вирааг̇аарамман̣о’’д̇иаад̣̇ийнам̣ бан̃жаннам̣ важанаанам̣ самб̣анд̇хо взд̣̇ид̇аб̣б̣о. д̇ад̇т̇а вирааг̇аарамман̣од̇и ниб̣б̣аанаарамман̣о. вирааг̇аг̇ожарод̇и ниб̣б̣аанависаяо. вирааг̇з самуд̣̇ааг̇ад̇од̇и ниб̣б̣аанз самуббанно. вирааг̇з тид̇од̇и бавад̇д̇ивасзна ниб̣б̣аанз тид̇о. вирааг̇з бад̇идтид̇од̇и анивад̇д̇анавасзна ниб̣б̣аанз бад̇идтид̇о.
28. Idāni maggapayojanapariyosānāya mettākathāya anantaraṃ kathitāya virāgasaṅkhātamaggapubbaṅgamāya virāgakathāya apubbatthānuvaṇṇanā. Tattha paṭhamaṃ tāva ‘‘nibbindaṃ virajjati virāgā vimuccatī’’ti (mahāva 23) vuttānaṃ dvinnaṃ suttantapadānaṃ atthaṃ niddisitukāmena virāgo maggo, vimutti phalanti uddeso ṭhapito. Tattha paṭhamaṃ vacanatthaṃ tāva niddisitukāmo kathaṃ virāgo maggotiādimāha. Tattha virajjatīti virattā hoti. Sesāni maggañāṇaniddese vuttatthāni. Virāgoti yasmā sammādiṭṭhi virajjati, tasmā virāgo nāmāti attho . So ca virāgo yasmā virāgārammaṇo…pe… virāge patiṭṭhito, tasmā ca virāgoti evaṃ ‘‘virāgārammaṇo’’tiādīnaṃ pañcannaṃ vacanānaṃ sambandho veditabbo. Tattha virāgārammaṇoti nibbānārammaṇo. Virāgagocaroti nibbānavisayo. Virāge samudāgatoti nibbāne samuppanno. Virāge ṭhitoti pavattivasena nibbāne ṭhito. Virāge patiṭṭhitoti anivattanavasena nibbāne patiṭṭhito.
ниб̣б̣аанан̃жа вирааг̇од̇и ниб̣б̣аанам̣ вирааг̇ахзд̇уд̇д̇аа вирааг̇о. ниб̣б̣аанаарамман̣ад̇ааж̇аад̇аад̇и ниб̣б̣аанаарамман̣з ж̇аад̇аа, ниб̣б̣аанаарамман̣абхаавзна ваа ж̇аад̇аа. д̇з маг̇г̇асамбаяуд̇д̇аа саб̣б̣зва пассаад̣̇аяо д̇хаммаа вираж̇ж̇анадтзна вирааг̇аа хонд̇ийд̇и вирааг̇аа наама хонд̇и. сахаж̇аад̇аанийд̇и саммаад̣̇идтисахаж̇аад̇аани саммаасан̇габбаад̣̇ийни сад̇д̇а маг̇г̇ан̇г̇аани. вирааг̇ам̣ г̇ажчанд̇ийд̇и вирааг̇о маг̇г̇од̇и вирааг̇ам̣ ниб̣б̣аанам̣ аарамман̣ам̣ гад̇ваа г̇ажчанд̇ийд̇и вирааг̇аарамман̣ад̇д̇аа вирааг̇о наама, маг̇г̇анадтзна маг̇г̇о наама ход̇ийд̇и ад̇т̇о. згзгамби маг̇г̇ан̇г̇ам̣ маг̇г̇од̇и наамам̣ лабхад̇и. ид̇и згзгасса ан̇г̇асса маг̇г̇ад̇д̇з вуд̇д̇з саммаад̣̇идтияааби маг̇г̇ад̇д̇ам̣ вуд̇д̇амзва ход̇и. д̇асмааязва жа зд̇зна маг̇г̇знаад̇и адта маг̇г̇ан̇г̇аани г̇ахзд̇ваа вуд̇д̇ам̣. б̣уд̣̇д̇хаа жаад̇и бажжзгаб̣уд̣̇д̇хааби сан̇г̇ахид̇аа. д̇зби хи ‘‘д̣̇взмз, бхигкавз, б̣уд̣̇д̇хаа д̇ат̇ааг̇ад̇о жа арахам̣ саммаасамб̣уд̣̇д̇хо бажжзгаб̣уд̣̇д̇хо жаа’’д̇и (а. ни. 2.57) вуд̇д̇ад̇д̇аа б̣уд̣̇д̇хааязва . аг̇ад̇анд̇и анамад̇аг̇г̇з сам̣саарз аг̇ад̇абуб̣б̣ам̣. д̣̇исанд̇и сагалааяабадибад̇д̇ияаа д̣̇иссад̇и абад̣̇иссад̇и абхисанд̣̇ахийяад̇ийд̇и д̣̇исаа, саб̣б̣аб̣уд̣̇д̇хзхи ваа барамам̣ суканд̇и д̣̇иссад̇и абад̣̇иссад̇и гат̇ийяад̇ийд̇и д̣̇исаа , саб̣б̣ад̣̇угкам̣ ваа д̣̇иссанд̇и виссаж̇ж̇знд̇и уж̇жханд̇и зд̇ааяаад̇и д̣̇исаа. д̇ам̣ д̣̇исам̣. адтан̇г̇иго маг̇г̇од̇и гим̣ вуд̇д̇ам̣ ход̇и? яо со адтан̇г̇иго д̇хаммасамуухо, со зд̇зна ниб̣б̣аанам̣ г̇ажчанд̇ийд̇и г̇аманадтзна маг̇г̇о наамаад̇и вуд̇д̇ам̣ ход̇и. бут̇усаман̣аб̣раахман̣аанам̣ бараббаваад̣̇аананд̇и висум̣ висум̣ саман̣аанам̣ б̣раахман̣аанан̃жа ид̇о ан̃н̃алад̣̇д̇хигаанам̣. аг̇г̇од̇и д̇зсам̣ сзсамаг̇г̇аанам̣ висидто. сздтод̇и сзсамаг̇г̇ад̇о ад̇ивияа басам̣санийяо. могкод̇и мукз саад̇ху, сзсамаг̇г̇аанам̣ абхимукз аяамзва саад̇хууд̇и ад̇т̇о. уд̇д̇амод̇и сзсамаг̇г̇з ад̇ивияа уд̇д̇ин̣н̣о. баварод̇и сзсамаг̇г̇ад̇о наанаббагаарзхи сам̣бхаж̇анийяо. ид̇ийд̇и гааран̣ад̇т̇з нибаад̇о. д̇асмаа бхаг̇авад̇аа ‘‘маг̇г̇аанам̣ адтан̇г̇иго сздто’’д̇и вуд̇д̇од̇и ад̇хиббааяо. вуд̇д̇ан̃хи бхаг̇авад̇аа –
Nibbānañca virāgoti nibbānaṃ virāgahetuttā virāgo. Nibbānārammaṇatājātāti nibbānārammaṇe jātā, nibbānārammaṇabhāvena vā jātā. Te maggasampayuttā sabbeva phassādayo dhammā virajjanaṭṭhena virāgā hontīti virāgā nāma honti. Sahajātānīti sammādiṭṭhisahajātāni sammāsaṅkappādīni satta maggaṅgāni. Virāgaṃ gacchantīti virāgo maggoti virāgaṃ nibbānaṃ ārammaṇaṃ katvā gacchantīti virāgārammaṇattā virāgo nāma, magganaṭṭhena maggo nāma hotīti attho. Ekekampi maggaṅgaṃ maggoti nāmaṃ labhati. Iti ekekassa aṅgassa maggatte vutte sammādiṭṭhiyāpi maggattaṃ vuttameva hoti. Tasmāyeva ca etena maggenāti aṭṭha maggaṅgāni gahetvā vuttaṃ. Buddhā cāti paccekabuddhāpi saṅgahitā. Tepi hi ‘‘dveme, bhikkhave, buddhā tathāgato ca arahaṃ sammāsambuddho paccekabuddho cā’’ti (a. ni. 2.57) vuttattā buddhāyeva . Agatanti anamatagge saṃsāre agatapubbaṃ. Disanti sakalāyapaṭipattiyā dissati apadissati abhisandahīyatīti disā, sabbabuddhehi vā paramaṃ sukhanti dissati apadissati kathīyatīti disā , sabbadukkhaṃ vā dissanti vissajjenti ujjhanti etāyāti disā. Taṃ disaṃ. Aṭṭhaṅgiko maggoti kiṃ vuttaṃ hoti? Yo so aṭṭhaṅgiko dhammasamūho, so etena nibbānaṃ gacchantīti gamanaṭṭhena maggo nāmāti vuttaṃ hoti. Puthusamaṇabrāhmaṇānaṃ parappavādānanti visuṃ visuṃ samaṇānaṃ brāhmaṇānañca ito aññaladdhikānaṃ. Aggoti tesaṃ sesamaggānaṃ visiṭṭho. Seṭṭhoti sesamaggato ativiya pasaṃsanīyo. Mokkhoti mukhe sādhu, sesamaggānaṃ abhimukhe ayameva sādhūti attho. Uttamoti sesamagge ativiya uttiṇṇo. Pavaroti sesamaggato nānappakārehi saṃbhajanīyo. Itīti kāraṇatthe nipāto. Tasmā bhagavatā ‘‘maggānaṃ aṭṭhaṅgiko seṭṭho’’ti vuttoti adhippāyo. Vuttañhi bhagavatā –
‘‘маг̇г̇аанадтан̇г̇иго сздто, сажжаанам̣ жад̇уро бад̣̇аа;
‘‘Maggānaṭṭhaṅgiko seṭṭho, saccānaṃ caturo padā;
вирааг̇о сздто д̇хаммаанам̣, д̣̇вибад̣̇аанан̃жа жагкумаа’’д̇и. (д̇ха. ба. 273);
Virāgo seṭṭho dhammānaṃ, dvipadānañca cakkhumā’’ti. (dha. pa. 273);
д̇ам̣ ид̇ха вижчинд̣̇ид̇ваа ‘‘маг̇г̇аанам̣ адтан̇г̇иго сздто’’д̇и вуд̇д̇ам̣. сзсаваарзсуби иминаа жа наязна хздтаа вуд̇д̇анаязна жа ад̇т̇о взд̣̇ид̇аб̣б̣о.
Taṃ idha vicchinditvā ‘‘maggānaṃ aṭṭhaṅgiko seṭṭho’’ti vuttaṃ. Sesavāresupi iminā ca nayena heṭṭhā vuttanayena ca attho veditabbo.
д̣̇ассанавирааг̇од̇иаад̣̇ийсу д̣̇ассанасан̇каад̇о вирааг̇о д̣̇ассанавирааг̇о. инд̣̇рияадтад̇о б̣аласса висидтад̇д̇аа ид̇ха инд̣̇рияад̇о б̣алам̣ батамам̣ вуд̇д̇анд̇и взд̣̇ид̇аб̣б̣ам̣. аад̇хибад̇зяяадтзна инд̣̇рияаанийд̇иаад̣̇и инд̣̇рияаад̣̇ийнам̣ ад̇т̇авибхааванаа, на вирааг̇асса. д̇ат̇адтзна сажжаад̇и сажжан̃аан̣ам̣ взд̣̇ид̇аб̣б̣ам̣. сийлависуд̣̇д̇хийд̇и саммааваажаагамманд̇ааж̇ийваа. жид̇д̇ависуд̣̇д̇хийд̇и саммаасамаад̇хи. д̣̇идтивисуд̣̇д̇хийд̇и саммаад̣̇идтисан̇габбаа. вимуд̇д̇адтзнаад̇и д̇ам̣д̇ам̣маг̇г̇аваж̇жхагилзсзхи муд̇д̇адтзна. виж̇ж̇аад̇и саммаад̣̇идти. вимуд̇д̇ийд̇и самужчзд̣̇авимуд̇д̇и. амад̇ог̇ад̇хам̣ ниб̣б̣аанам̣ барияосаанадтзна маг̇г̇од̇и маг̇г̇апалабажжавзгкан̣аахи маг̇г̇ийяад̇ийд̇и маг̇г̇о.
Dassanavirāgotiādīsu dassanasaṅkhāto virāgo dassanavirāgo. Indriyaṭṭhato balassa visiṭṭhattā idha indriyato balaṃ paṭhamaṃ vuttanti veditabbaṃ. Ādhipateyyaṭṭhena indriyānītiādi indriyādīnaṃ atthavibhāvanā, na virāgassa. Tathaṭṭhena saccāti saccañāṇaṃ veditabbaṃ. Sīlavisuddhīti sammāvācākammantājīvā. Cittavisuddhīti sammāsamādhi. Diṭṭhivisuddhīti sammādiṭṭhisaṅkappā. Vimuttaṭṭhenāti taṃtaṃmaggavajjhakilesehi muttaṭṭhena. Vijjāti sammādiṭṭhi. Vimuttīti samucchedavimutti. Amatogadhaṃ nibbānaṃ pariyosānaṭṭhena maggoti maggaphalapaccavekkhaṇāhi maggīyatīti maggo.
имасмим̣ вирааг̇анид̣̇д̣̇зсз вуд̇д̇аа д̇хаммаа саб̣б̣зби маг̇г̇агкан̣зязва. вимуд̇д̇инид̣̇д̣̇зсз палагкан̣з. д̇асмаа чанд̣̇аманасигаарааби маг̇г̇апаласамбаяуд̇д̇аа.
Imasmiṃ virāganiddese vuttā dhammā sabbepi maggakkhaṇeyeva. Vimuttiniddese phalakkhaṇe. Tasmā chandamanasikārāpi maggaphalasampayuttā.
29. вирааг̇анид̣̇д̣̇зсз вуд̇д̇анаязнзва вимуд̇д̇инид̣̇д̣̇зсзби ад̇т̇о взд̣̇ид̇аб̣б̣о. палам̣ банзд̇т̇а бадиббассад̣̇д̇хивимуд̇д̇ад̇д̇аа вимуд̇д̇и, ниб̣б̣аанам̣ ниссаран̣авимуд̇д̇ад̇д̇аа вимуд̇д̇и. ‘‘сахаж̇аад̇аани сад̇д̇ан̇г̇ааний’’д̇иаад̣̇ийни важанаани ид̇ха на лаб̣бханд̇ийд̇и на вуд̇д̇аани. саяам̣ палавимуд̇д̇ад̇д̇аа барижжааг̇адтзна вимуд̇д̇ийд̇и зд̇д̇агамзва вуд̇д̇ам̣. сзсам̣ вуд̇д̇анаяамзваад̇и.
29. Virāganiddese vuttanayeneva vimuttiniddesepi attho veditabbo. Phalaṃ panettha paṭippassaddhivimuttattā vimutti, nibbānaṃ nissaraṇavimuttattā vimutti. ‘‘Sahajātāni sattaṅgānī’’tiādīni vacanāni idha na labbhantīti na vuttāni. Sayaṃ phalavimuttattā pariccāgaṭṭhena vimuttīti ettakameva vuttaṃ. Sesaṃ vuttanayamevāti.
вирааг̇агат̇ааван̣н̣анаа нидтид̇аа.
Virāgakathāvaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / бадисамбхид̣̇аамаг̇г̇абаал̣и • Paṭisambhidāmaggapāḷi / 5. вирааг̇агат̇аа • 5. Virāgakathā
