| Library / Tipiṭaka / ཏིཔིཊཀ • Tipiṭaka / པཊིསམྦྷིདཱམགྒཔཱལི༹ • Paṭisambhidāmaggapāḷi |
༣༨. ཝཱིརིཡཱརམྦྷཉཱཎནིདྡེསོ
38. Vīriyārambhañāṇaniddeso
༨༩. ཀཐཾ ཨསལླཱིནཏྟཔཧིཏཏྟཔགྒཧཊྛེ པཉྙཱ ཝཱིརིཡཱརམྦྷེ ཉཱཎཾ? ཨནུཔྤནྣཱནཾ པཱཔཀཱནཾ ཨཀུསལཱནཾ དྷམྨཱནཾ ཨནུཔྤཱདཱཡ ཨསལླཱིནཏྟཔཧིཏཏྟཔགྒཧཊྛེ པཉྙཱ ཝཱིརིཡཱརམྦྷེ ཉཱཎཾ། ཨུཔྤནྣཱནཾ པཱཔཀཱནཾ ཨཀུསལཱནཾ དྷམྨཱནཾ པཧཱནཱཡ ཨསལླཱིནཏྟཔཧིཏཏྟཔགྒཧཊྛེ པཉྙཱ ཝཱིརིཡཱརམྦྷེ ཉཱཎཾ། ཨནུཔྤནྣཱནཾ ཀུསལཱནཾ དྷམྨཱནཾ ཨུཔྤཱདཱཡ ཨསལླཱིནཏྟཔཧིཏཏྟཔགྒཧཊྛེ པཉྙཱ ཝཱིརིཡཱརམྦྷེ ཉཱཎཾ། ཨུཔྤནྣཱནཾ ཀུསལཱནཾ དྷམྨཱནཾ ཋིཏིཡཱ ཨསམྨོསཱཡ བྷིཡྻོབྷཱཝཱཡ ཝེཔུལླཱཡ བྷཱཝནཱཡ པཱརིཔཱུརིཡཱ ཨསལླཱིནཏྟཔཧིཏཏྟཔགྒཧཊྛེ པཉྙཱ ཝཱིརིཡཱརམྦྷེ ཉཱཎཾ།
89. Kathaṃ asallīnattapahitattapaggahaṭṭhe paññā vīriyārambhe ñāṇaṃ? Anuppannānaṃ pāpakānaṃ akusalānaṃ dhammānaṃ anuppādāya asallīnattapahitattapaggahaṭṭhe paññā vīriyārambhe ñāṇaṃ. Uppannānaṃ pāpakānaṃ akusalānaṃ dhammānaṃ pahānāya asallīnattapahitattapaggahaṭṭhe paññā vīriyārambhe ñāṇaṃ. Anuppannānaṃ kusalānaṃ dhammānaṃ uppādāya asallīnattapahitattapaggahaṭṭhe paññā vīriyārambhe ñāṇaṃ. Uppannānaṃ kusalānaṃ dhammānaṃ ṭhitiyā asammosāya bhiyyobhāvāya vepullāya bhāvanāya pāripūriyā asallīnattapahitattapaggahaṭṭhe paññā vīriyārambhe ñāṇaṃ.
ཨནུཔྤནྣསྶ ཀཱམཙྪནྡསྶ ཨནུཔྤཱདཱཡ ཨསལླཱིནཏྟཔཧིཏཏྟཔགྒཧཊྛེ པཉྙཱ ཝཱིརིཡཱརམྦྷེ ཉཱཎཾ། ཨུཔྤནྣསྶ ཀཱམཙྪནྡསྶ པཧཱནཱཡ ཨསལླཱིནཏྟཔཧིཏཏྟཔགྒཧཊྛེ པཉྙཱ ཝཱིརིཡཱརམྦྷེ ཉཱཎཾ། ཨནུཔྤནྣསྶ ནེཀྑམྨསྶ ཨུཔྤཱདཱཡ ཨསལླཱིནཏྟཔཧིཏཏྟཔགྒཧཊྛེ པཉྙཱ ཝཱིརིཡཱརམྦྷེ ཉཱཎཾ། ཨུཔྤནྣསྶ ནེཀྑམྨསྶ ཋིཏིཡཱ ཨསམྨོསཱཡ བྷིཡྻོབྷཱཝཱཡ ཝེཔུལླཱཡ བྷཱཝནཱཡ པཱརིཔཱུརིཡཱ ཨསལླཱིནཏྟཔཧིཏཏྟཔགྒཧཊྛེ པཉྙཱ ཝཱིརིཡཱརམྦྷེ ཉཱཎཾ…པེ॰…།
Anuppannassa kāmacchandassa anuppādāya asallīnattapahitattapaggahaṭṭhe paññā vīriyārambhe ñāṇaṃ. Uppannassa kāmacchandassa pahānāya asallīnattapahitattapaggahaṭṭhe paññā vīriyārambhe ñāṇaṃ. Anuppannassa nekkhammassa uppādāya asallīnattapahitattapaggahaṭṭhe paññā vīriyārambhe ñāṇaṃ. Uppannassa nekkhammassa ṭhitiyā asammosāya bhiyyobhāvāya vepullāya bhāvanāya pāripūriyā asallīnattapahitattapaggahaṭṭhe paññā vīriyārambhe ñāṇaṃ…pe….
ཨནུཔྤནྣཱནཾ སབྦཀིལེསཱནཾ ཨནུཔྤཱདཱཡ ཨསལླཱིནཏྟཔཧིཏཏྟཔགྒཧཊྛེ པཉྙཱ ཝཱིརིཡཱརམྦྷེ ཉཱཎཾ། ཨུཔྤནྣཱནཾ སབྦཀིལེསཱནཾ པཧཱནཱཡ ཨསལླཱིནཏྟཔཧིཏཏྟཔགྒཧཊྛེ པཉྙཱ ཝཱིརིཡཱརམྦྷེ ཉཱཎཾ…པེ॰… ཨནུཔྤནྣསྶ ཨརཧཏྟམགྒསྶ ཨུཔྤཱདཱཡ ཨསལླཱིནཏྟཔཧིཏཏྟཔགྒཧཊྛེ པཉྙཱ ཝཱིརིཡཱརམྦྷེ ཉཱཎཾ། ཨུཔྤནྣསྶ ཨརཧཏྟམགྒསྶ ཋིཏིཡཱ ཨསམྨོསཱཡ བྷིཡྻོབྷཱཝཱཡ ཝེཔུལླཱཡ བྷཱཝནཱཡ པཱརིཔཱུརིཡཱ ཨསལླཱིནཏྟཔཧིཏཏྟཔགྒཧཊྛེ པཉྙཱ ཝཱིརིཡཱརམྦྷེ ཉཱཎཾ། ཏཾ ཉཱཏཊྛེན ཉཱཎཾ, པཛཱནནཊྛེན པཉྙཱ། ཏེན ཝུཙྩཏི – ‘‘ཨསལླཱིནཏྟཔཧིཏཏྟཔགྒཧཊྛེ པཉྙཱ ཝཱིརིཡཱརམྦྷེ ཉཱཎཾ’’།
Anuppannānaṃ sabbakilesānaṃ anuppādāya asallīnattapahitattapaggahaṭṭhe paññā vīriyārambhe ñāṇaṃ. Uppannānaṃ sabbakilesānaṃ pahānāya asallīnattapahitattapaggahaṭṭhe paññā vīriyārambhe ñāṇaṃ…pe… anuppannassa arahattamaggassa uppādāya asallīnattapahitattapaggahaṭṭhe paññā vīriyārambhe ñāṇaṃ. Uppannassa arahattamaggassa ṭhitiyā asammosāya bhiyyobhāvāya vepullāya bhāvanāya pāripūriyā asallīnattapahitattapaggahaṭṭhe paññā vīriyārambhe ñāṇaṃ. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘asallīnattapahitattapaggahaṭṭhe paññā vīriyārambhe ñāṇaṃ’’.
ཝཱིརིཡཱརམྦྷཉཱཎནིདྡེསོ ཨཊྛཏིཾསཏིམོ།
Vīriyārambhañāṇaniddeso aṭṭhatiṃsatimo.
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཁུདྡཀནིཀཱཡ (ཨཊྛཀཐཱ) • Khuddakanikāya (aṭṭhakathā) / པཊིསམྦྷིདཱམགྒ-ཨཊྛཀཐཱ • Paṭisambhidāmagga-aṭṭhakathā / ༣༨. ཝཱིརིཡཱརམྦྷཉཱཎནིདྡེསཝཎྞནཱ • 38. Vīriyārambhañāṇaniddesavaṇṇanā
