| Library / Tipiṭaka / තිපිටක • Tipiṭaka / උදානපාළි • Udānapāḷi |
9. විසාඛාසුත්‌තං
9. Visākhāsuttaṃ
19. එවං මෙ සුතං – එකං සමයං භගවා සාවත්‌ථියං විහරති පුබ්‌බාරාමෙ මිගාරමාතුපාසාදෙ. තෙන ඛො පන සමයෙන විසාඛාය මිගාරමාතුයා කොචිදෙව අත්‌ථො රඤ්‌ඤෙ පසෙනදිම්‌හි කොසලෙ පටිබද්‌ධො 1 හොති. තං රාජා පසෙනදි කොසලො න යථාධිප්‌පායං තීරෙති .
19. Evaṃ me sutaṃ – ekaṃ samayaṃ bhagavā sāvatthiyaṃ viharati pubbārāme migāramātupāsāde. Tena kho pana samayena visākhāya migāramātuyā kocideva attho raññe pasenadimhi kosale paṭibaddho 2 hoti. Taṃ rājā pasenadi kosalo na yathādhippāyaṃ tīreti .
අථ ඛො විසාඛා මිගාරමාතා දිවා දිවස්‌ස 3 යෙන භගවා තෙනුපසඞ්‌කමි; උපසඞ්‌කමිත්‌වා භගවන්‌තං අභිවාදෙත්‌වා එකමන්‌තං නිසීදි. එකමන්‌තං නිසින්‌නං ඛො විසාඛං මිගාරමාතරං භගවා එතදවොච – ‘‘හන්‌ද කුතො නු ත්‌වං, විසාඛෙ, ආගච්‌ඡසි දිවා දිවස්‌සා’’ති? ‘‘ඉධ මෙ, භන්‌තෙ, කොචිදෙව අත්‌ථො රඤ්‌ඤෙ පසෙනදිම්‌හි කොසලෙ පටිබද්‌ධො; තං රාජා පසෙනදි කොසලො න යථාධිප්‌පායං තීරෙතී’’ති.
Atha kho visākhā migāramātā divā divassa 4 yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho visākhaṃ migāramātaraṃ bhagavā etadavoca – ‘‘handa kuto nu tvaṃ, visākhe, āgacchasi divā divassā’’ti? ‘‘Idha me, bhante, kocideva attho raññe pasenadimhi kosale paṭibaddho; taṃ rājā pasenadi kosalo na yathādhippāyaṃ tīretī’’ti.
අථ ඛො භගවා එතමත්‌ථං විදිත්‌වා තායං වෙලායං ඉමං උදානං උදානෙසි –
Atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi –
‘‘සබ්‌බං පරවසං දුක්‌ඛං, සබ්‌බං ඉස්‌සරියං සුඛං;
‘‘Sabbaṃ paravasaṃ dukkhaṃ, sabbaṃ issariyaṃ sukhaṃ;
සාධාරණෙ විහඤ්‌ඤන්‌ති, යොගා හි දුරතික්‌කමා’’ති. නවමං;
Sādhāraṇe vihaññanti, yogā hi duratikkamā’’ti. navamaṃ;
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / උදාන-අට්‌ඨකථා • Udāna-aṭṭhakathā / 9. විසාඛාසුත්‌තවණ්‌ණනා • 9. Visākhāsuttavaṇṇanā
