| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
8. விஸாக²ஸுத்தவண்ணனா
8. Visākhasuttavaṇṇanā
48. அட்ட²மே வாக்கரணசாதுரியதோ வசனகு³ணஹேதூனங் பூரியா போரீ, போரியங் ப⁴வாதி போரீ, தாய போரியா. தேனாஹ ‘‘பரிபுண்ணவாசாயா’’தி, அக்க²ரபத³பரிபுண்ணாய வாசாயாதி அத்தோ². அபலிபு³த்³தா⁴யாதி பித்தாதீ³ஹி ந விப³த்³தா⁴ய அனநுபு³ந்தி⁴தாய. அனேலக³லாயாதி அனேலாய அக³லாய நித்³தோ³ஸாய அக³ளிதபத³ப்³யஞ்ஜனாய ச. தே²ரஸ்ஸ ஹி கத²யதோ பத³ங் வா ப்³யஞ்ஜனங் வா ந பரிஹாயதி. தேனாஹ ‘‘அனேலக³லாயாதி நித்³தோ³ஸாய சேவ அக³ளிதாய சா’’திஆதி³. தத்த² நித்³தோ³ஸாயாதி அத்த²தோ ச ப்³யஞ்ஜனதோ ச விக³ததோ³ஸாய. அபதிதபத³ப்³யஞ்ஜனாயாதி அவிரஹிதபத³ப்³யஞ்ஜனாய. அத² வா அனேலக³லாயாதி ந ஏலங் தோ³ஸங் க³லதீதி அனேலக³லா. அவிச்சி²ன்னவாசாய அனேலக³லாய யதா² த³ந்த⁴மனுஸ்ஸா முகே²ன கே²ளங் க³ளந்தேன வாசங் பா⁴ஸந்தி, ந ஏவரூபாய. அத² கோ² நித்³தோ³ஸாய விஸத³வாசாயாதி அத்தோ². விவட்டப்பகாஸினீ வாசா ந கதா³சி விவட்டமுத்தாதி கத்வா ஆஹ ‘‘விவட்டபரியாபன்னாயா’’தி, விவட்டங் அமுஞ்சித்வா பவத்தாயாதி அத்தோ². விவட்டப்பகாஸினீ ஹி வாசா விவட்டங் பரிச்சி²ஜ்ஜ ஆபாதெ³ந்தீ பவத்ததி. நவலோகுத்தரத⁴ம்மோ ஸப்³ப³த⁴ம்மேஹி ஸமுஸ்ஸிதட்டே²ன அப்³பு⁴க்³க³தட்டே²ன ச த⁴ஜோ நாமாதி ஆஹ ‘‘அப்³பு⁴க்³க³தட்டே²னா’’திஆதி³. ஸேஸமெத்த² ஸுவிஞ்ஞெய்யமேவ.
48. Aṭṭhame vākkaraṇacāturiyato vacanaguṇahetūnaṃ pūriyā porī, poriyaṃ bhavāti porī, tāya poriyā. Tenāha ‘‘paripuṇṇavācāyā’’ti, akkharapadaparipuṇṇāya vācāyāti attho. Apalibuddhāyāti pittādīhi na vibaddhāya ananubundhitāya. Anelagalāyāti anelāya agalāya niddosāya agaḷitapadabyañjanāya ca. Therassa hi kathayato padaṃ vā byañjanaṃ vā na parihāyati. Tenāha ‘‘anelagalāyāti niddosāya ceva agaḷitāya cā’’tiādi. Tattha niddosāyāti atthato ca byañjanato ca vigatadosāya. Apatitapadabyañjanāyāti avirahitapadabyañjanāya. Atha vā anelagalāyāti na elaṃ dosaṃ galatīti anelagalā. Avicchinnavācāya anelagalāya yathā dandhamanussā mukhena kheḷaṃ gaḷantena vācaṃ bhāsanti, na evarūpāya. Atha kho niddosāya visadavācāyāti attho. Vivaṭṭappakāsinī vācā na kadāci vivaṭṭamuttāti katvā āha ‘‘vivaṭṭapariyāpannāyā’’ti, vivaṭṭaṃ amuñcitvā pavattāyāti attho. Vivaṭṭappakāsinī hi vācā vivaṭṭaṃ paricchijja āpādentī pavattati. Navalokuttaradhammo sabbadhammehi samussitaṭṭhena abbhuggataṭṭhena ca dhajo nāmāti āha ‘‘abbhuggataṭṭhenā’’tiādi. Sesamettha suviññeyyameva.
விஸாக²ஸுத்தவண்ணனா நிட்டி²தா.
Visākhasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 8. விஸாக²ஸுத்தங் • 8. Visākhasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 8. விஸாக²ஸுத்தவண்ணனா • 8. Visākhasuttavaṇṇanā
