| Library / Tipiṭaka / তিপিটক • Tipiṭaka / অঙ্গুত্তরনিকায (টীকা) • Aṅguttaranikāya (ṭīkā) |
৮. ৰিসাখসুত্তৰণ্ণনা
8. Visākhasuttavaṇṇanā
৪৮. অট্ঠমে ৰাক্করণচাতুরিযতো ৰচনগুণহেতূনং পূরিযা পোরী, পোরিযং ভৰাতি পোরী, তায পোরিযা। তেনাহ ‘‘পরিপুণ্ণৰাচাযা’’তি, অক্খরপদপরিপুণ্ণায ৰাচাযাতি অত্থো। অপলিবুদ্ধাযাতি পিত্তাদীহি ন ৰিবদ্ধায অননুবুন্ধিতায। অনেলগলাযাতি অনেলায অগলায নিদ্দোসায অগল়িতপদব্যঞ্জনায চ। থেরস্স হি কথযতো পদং ৰা ব্যঞ্জনং ৰা ন পরিহাযতি। তেনাহ ‘‘অনেলগলাযাতি নিদ্দোসায চেৰ অগল়িতায চা’’তিআদি। তত্থ নিদ্দোসাযাতি অত্থতো চ ব্যঞ্জনতো চ ৰিগতদোসায। অপতিতপদব্যঞ্জনাযাতি অৰিরহিতপদব্যঞ্জনায। অথ ৰা অনেলগলাযাতি ন এলং দোসং গলতীতি অনেলগলা। অৰিচ্ছিন্নৰাচায অনেলগলায যথা দন্ধমনুস্সা মুখেন খেল়ং গল়ন্তেন ৰাচং ভাসন্তি, ন এৰরূপায। অথ খো নিদ্দোসায ৰিসদৰাচাযাতি অত্থো। ৰিৰট্টপ্পকাসিনী ৰাচা ন কদাচি ৰিৰট্টমুত্তাতি কত্ৰা আহ ‘‘ৰিৰট্টপরিযাপন্নাযা’’তি, ৰিৰট্টং অমুঞ্চিত্ৰা পৰত্তাযাতি অত্থো। ৰিৰট্টপ্পকাসিনী হি ৰাচা ৰিৰট্টং পরিচ্ছিজ্জ আপাদেন্তী পৰত্ততি। নৰলোকুত্তরধম্মো সব্বধম্মেহি সমুস্সিতট্ঠেন অব্ভুগ্গতট্ঠেন চ ধজো নামাতি আহ ‘‘অব্ভুগ্গতট্ঠেনা’’তিআদি। সেসমেত্থ সুৰিঞ্ঞেয্যমেৰ।
48. Aṭṭhame vākkaraṇacāturiyato vacanaguṇahetūnaṃ pūriyā porī, poriyaṃ bhavāti porī, tāya poriyā. Tenāha ‘‘paripuṇṇavācāyā’’ti, akkharapadaparipuṇṇāya vācāyāti attho. Apalibuddhāyāti pittādīhi na vibaddhāya ananubundhitāya. Anelagalāyāti anelāya agalāya niddosāya agaḷitapadabyañjanāya ca. Therassa hi kathayato padaṃ vā byañjanaṃ vā na parihāyati. Tenāha ‘‘anelagalāyāti niddosāya ceva agaḷitāya cā’’tiādi. Tattha niddosāyāti atthato ca byañjanato ca vigatadosāya. Apatitapadabyañjanāyāti avirahitapadabyañjanāya. Atha vā anelagalāyāti na elaṃ dosaṃ galatīti anelagalā. Avicchinnavācāya anelagalāya yathā dandhamanussā mukhena kheḷaṃ gaḷantena vācaṃ bhāsanti, na evarūpāya. Atha kho niddosāya visadavācāyāti attho. Vivaṭṭappakāsinī vācā na kadāci vivaṭṭamuttāti katvā āha ‘‘vivaṭṭapariyāpannāyā’’ti, vivaṭṭaṃ amuñcitvā pavattāyāti attho. Vivaṭṭappakāsinī hi vācā vivaṭṭaṃ paricchijja āpādentī pavattati. Navalokuttaradhammo sabbadhammehi samussitaṭṭhena abbhuggataṭṭhena ca dhajo nāmāti āha ‘‘abbhuggataṭṭhenā’’tiādi. Sesamettha suviññeyyameva.
ৰিসাখসুত্তৰণ্ণনা নিট্ঠিতা।
Visākhasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ৮. ৰিসাখসুত্তং • 8. Visākhasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৮. ৰিসাখসুত্তৰণ্ণনা • 8. Visākhasuttavaṇṇanā
