| Library / Tipiṭaka / តិបិដក • Tipiṭaka / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) |
៨. វិសាខសុត្តវណ្ណនា
8. Visākhasuttavaṇṇanā
៤៨. អដ្ឋមេ បញ្ចាលបុត្តោតិ បញ្ចាលព្រាហ្មណិយា បុត្តោ។ បោរិយា វាចាយាតិ បរិបុណ្ណវាចាយ។ វិស្សដ្ឋាយាតិ អបលិពុទ្ធាយ។ អនេលគលាយាតិ និទ្ទោសាយ ចេវ អគឡិតាយ ច អបតិតបទព្យញ្ជនាយ។ បរិយាបន្នាយាតិ វិវដ្ដបរិយាបន្នាយ។ អនិស្សិតាយាតិ វដ្ដំ អនិស្សិតាយ។ វិវដ្ដនិស្សិតមេវ កត្វា កថេតិ, វដ្ដនិស្សិតំ កត្វា ន កថេតីតិ អយមេត្ថ អធិប្បាយោ។
48. Aṭṭhame pañcālaputtoti pañcālabrāhmaṇiyā putto. Poriyā vācāyāti paripuṇṇavācāya. Vissaṭṭhāyāti apalibuddhāya. Anelagalāyāti niddosāya ceva agaḷitāya ca apatitapadabyañjanāya. Pariyāpannāyāti vivaṭṭapariyāpannāya. Anissitāyāti vaṭṭaṃ anissitāya. Vivaṭṭanissitameva katvā katheti, vaṭṭanissitaṃ katvā na kathetīti ayamettha adhippāyo.
នាភាសមានន្តិ ន អកថេន្តំ។ អមតំ បទន្តិ និព្ពានបទំ។ ភាសយេតិ ឱភាសេយ្យ។ ជោតយេតិ តស្សេវ វេវចនំ។ បគ្គណ្ហេ ឥសិនំ ធជន្តិ អព្ភុគ្គតដ្ឋេន នវលោកុត្តរធម្មោ ឥសីនំ ធជោ នាម វុច្ចតិ, តមេវ បគ្គណ្ហេយ្យ ឧក្ខិបេយ្យ, ឧច្ចំ កត្វា កថេយ្យាតិ អត្ថោ។ នវលោកុត្តរធម្មទីបកំ សុភាសិតំ ធជោ ឯតេសន្តិ សុភាសិតធជា។ ឥសយោតិ ពុទ្ធាទយោ អរិយា។ ធម្មោ ហិ ឥសិនំ ធជោតិ ហេដ្ឋា វុត្តនយេនេវ លោកុត្តរធម្មោ ឥសីនំ ធជោ នាមាតិ។
Nābhāsamānanti na akathentaṃ. Amataṃ padanti nibbānapadaṃ. Bhāsayeti obhāseyya. Jotayeti tasseva vevacanaṃ. Paggaṇhe isinaṃ dhajanti abbhuggataṭṭhena navalokuttaradhammo isīnaṃ dhajo nāma vuccati, tameva paggaṇheyya ukkhipeyya, uccaṃ katvā katheyyāti attho. Navalokuttaradhammadīpakaṃ subhāsitaṃ dhajo etesanti subhāsitadhajā. Isayoti buddhādayo ariyā. Dhammo hi isinaṃ dhajoti heṭṭhā vuttanayeneva lokuttaradhammo isīnaṃ dhajo nāmāti.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya / ៨. វិសាខសុត្តំ • 8. Visākhasuttaṃ
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / ៨. វិសាខសុត្តវណ្ណនា • 8. Visākhasuttavaṇṇanā
