| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၈. ဝိသာခသုတ္တဝဏ္ဏနာ
8. Visākhasuttavaṇṇanā
၄၈. အဋ္ဌမေ ပဉ္စာလပုတ္တောတိ ပဉ္စာလဗ္ရာဟ္မဏိယာ ပုတ္တော။ ပောရိယာ ဝာစာယာတိ ပရိပုဏ္ဏဝာစာယ။ ဝိသ္သဋ္ဌာယာတိ အပလိဗုဒ္ဓာယ။ အနေလဂလာယာတိ နိဒ္ဒောသာယ စေဝ အဂဠိတာယ စ အပတိတပဒဗ္ယဉ္ဇနာယ။ ပရိယာပန္နာယာတိ ဝိဝဋ္ဋပရိယာပန္နာယ။ အနိသ္သိတာယာတိ ဝဋ္ဋံ အနိသ္သိတာယ။ ဝိဝဋ္ဋနိသ္သိတမေဝ ကတ္ဝာ ကထေတိ, ဝဋ္ဋနိသ္သိတံ ကတ္ဝာ န ကထေတီတိ အယမေတ္ထ အဓိပ္ပာယော။
48. Aṭṭhame pañcālaputtoti pañcālabrāhmaṇiyā putto. Poriyā vācāyāti paripuṇṇavācāya. Vissaṭṭhāyāti apalibuddhāya. Anelagalāyāti niddosāya ceva agaḷitāya ca apatitapadabyañjanāya. Pariyāpannāyāti vivaṭṭapariyāpannāya. Anissitāyāti vaṭṭaṃ anissitāya. Vivaṭṭanissitameva katvā katheti, vaṭṭanissitaṃ katvā na kathetīti ayamettha adhippāyo.
နာဘာသမာနန္တိ န အကထေန္တံ။ အမတံ ပဒန္တိ နိဗ္ဗာနပဒံ။ ဘာသယေတိ ဩဘာသေယ္ယ။ ဇောတယေတိ တသ္သေဝ ဝေဝစနံ။ ပဂ္ဂဏ္ဟေ ဣသိနံ ဓဇန္တိ အဗ္ဘုဂ္ဂတဋ္ဌေန နဝလောကုတ္တရဓမ္မော ဣသီနံ ဓဇော နာမ ဝုစ္စတိ, တမေဝ ပဂ္ဂဏ္ဟေယ္ယ ဥက္ခိပေယ္ယ, ဥစ္စံ ကတ္ဝာ ကထေယ္ယာတိ အတ္ထော။ နဝလောကုတ္တရဓမ္မဒီပကံ သုဘာသိတံ ဓဇော ဧတေသန္တိ သုဘာသိတဓဇာ။ ဣသယောတိ ဗုဒ္ဓာဒယော အရိယာ။ ဓမ္မော ဟိ ဣသိနံ ဓဇောတိ ဟေဋ္ဌာ ဝုတ္တနယေနေဝ လောကုတ္တရဓမ္မော ဣသီနံ ဓဇော နာမာတိ။
Nābhāsamānanti na akathentaṃ. Amataṃ padanti nibbānapadaṃ. Bhāsayeti obhāseyya. Jotayeti tasseva vevacanaṃ. Paggaṇhe isinaṃ dhajanti abbhuggataṭṭhena navalokuttaradhammo isīnaṃ dhajo nāma vuccati, tameva paggaṇheyya ukkhipeyya, uccaṃ katvā katheyyāti attho. Navalokuttaradhammadīpakaṃ subhāsitaṃ dhajo etesanti subhāsitadhajā. Isayoti buddhādayo ariyā. Dhammo hi isinaṃ dhajoti heṭṭhā vuttanayeneva lokuttaradhammo isīnaṃ dhajo nāmāti.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၈. ဝိသာခသုတ္တံ • 8. Visākhasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၈. ဝိသာခသုတ္တဝဏ္ဏနာ • 8. Visākhasuttavaṇṇanā
