| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
8. විසාඛසුත්‌තවණ්‌ණනා
8. Visākhasuttavaṇṇanā
48. අට්‌ඨමෙ පඤ්‌චාලපුත්‌තොති පඤ්‌චාලබ්‍රාහ්‌මණියා පුත්‌තො. පොරියා වාචායාති පරිපුණ්‌ණවාචාය. විස්‌සට්‌ඨායාති අපලිබුද්‌ධාය. අනෙලගලායාති නිද්‌දොසාය චෙව අගළිතාය ච අපතිතපදබ්‍යඤ්‌ජනාය. පරියාපන්‌නායාති විවට්‌ටපරියාපන්‌නාය. අනිස්‌සිතායාති වට්‌ටං අනිස්‌සිතාය. විවට්‌ටනිස්‌සිතමෙව කත්‌වා කථෙති, වට්‌ටනිස්‌සිතං කත්‌වා න කථෙතීති අයමෙත්‌ථ අධිප්‌පායො.
48. Aṭṭhame pañcālaputtoti pañcālabrāhmaṇiyā putto. Poriyā vācāyāti paripuṇṇavācāya. Vissaṭṭhāyāti apalibuddhāya. Anelagalāyāti niddosāya ceva agaḷitāya ca apatitapadabyañjanāya. Pariyāpannāyāti vivaṭṭapariyāpannāya. Anissitāyāti vaṭṭaṃ anissitāya. Vivaṭṭanissitameva katvā katheti, vaṭṭanissitaṃ katvā na kathetīti ayamettha adhippāyo.
නාභාසමානන්‌ති න අකථෙන්‌තං. අමතං පදන්‌ති නිබ්‌බානපදං. භාසයෙති ඔභාසෙය්‍ය. ජොතයෙති තස්‌සෙව වෙවචනං. පග්‌ගණ්‌හෙ ඉසිනං ධජන්‌ති අබ්‌භුග්‌ගතට්‌ඨෙන නවලොකුත්‌තරධම්‌මො ඉසීනං ධජො නාම වුච්‌චති, තමෙව පග්‌ගණ්‌හෙය්‍ය උක්‌ඛිපෙය්‍ය, උච්‌චං කත්‌වා කථෙය්‍යාති අත්‌ථො. නවලොකුත්‌තරධම්‌මදීපකං සුභාසිතං ධජො එතෙසන්‌ති සුභාසිතධජා. ඉසයොති බුද්‌ධාදයො අරියා. ධම්‌මො හි ඉසිනං ධජොති හෙට්‌ඨා වුත්‌තනයෙනෙව ලොකුත්‌තරධම්‌මො ඉසීනං ධජො නාමාති.
Nābhāsamānanti na akathentaṃ. Amataṃ padanti nibbānapadaṃ. Bhāsayeti obhāseyya. Jotayeti tasseva vevacanaṃ. Paggaṇhe isinaṃ dhajanti abbhuggataṭṭhena navalokuttaradhammo isīnaṃ dhajo nāma vuccati, tameva paggaṇheyya ukkhipeyya, uccaṃ katvā katheyyāti attho. Navalokuttaradhammadīpakaṃ subhāsitaṃ dhajo etesanti subhāsitadhajā. Isayoti buddhādayo ariyā. Dhammo hi isinaṃ dhajoti heṭṭhā vuttanayeneva lokuttaradhammo isīnaṃ dhajo nāmāti.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 8. විසාඛසුත්‌තං • 8. Visākhasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 8. විසාඛසුත්‌තවණ්‌ණනා • 8. Visākhasuttavaṇṇanā
