องฺคุตฺตร นิกาย ๑๐ฯ๒๑๕

๒๑ฯ กรชกายวคฺค

วิสารทสุตฺต

“ทสหิ, ภิกฺขเว, ธมฺเมหิ สมนฺนาคตา อุปาสิกา อวิสารทา อคารํ อชฺฌาวสติฯ กตเมหิ ทสหิ? ปาณาติปาตินี โหติ … อทินฺนาทายินี โหติ … กาเมสุมิจฺฉาจารินี โหติ … มุสาวาทินี โหติ … ปิสุณวาจา โหติ … ผรุสวาจา โหติ … สมฺผปฺปลาปินี โหติ … อภิชฺฌาลุนี โหติ … พฺยาปนฺนจิตฺตา โหติ … มิจฺฉาทิฏฺฐิกา โหติ …ฯ อิเมหิ โข, ภิกฺขเว, ทสหิ ธมฺเมหิ สมนฺนาคตา อุปาสิกา อวิสารทา อคารํ อชฺฌาวสติฯ

ทสหิ, ภิกฺขเว, ธมฺเมหิ สมนฺนาคตา อุปาสิกา วิสารทา อคารํ อชฺฌาวสติฯ กตเมหิ ทสหิ? ปาณาติปาตา ปฏิวิรตา โหติ … อทินฺนาทานา ปฏิวิรตา โหติ … กาเมสุมิจฺฉาจารา ปฏิวิรตา โหติ … มุสาวาทา ปฏิวิรตา โหติ … ปิสุณาย วาจาย ปฏิวิรตา โหติ … ผรุสาย วาจาย ปฏิวิรตา โหติ … สมฺผปฺปลาปา ปฏิวิรตา โหติ … อนภิชฺฌาลุนี โหติ … อพฺยาปนฺนจิตฺตา โหติ … สมฺมาทิฏฺฐิกา โหติ …ฯ อิเมหิ โข, ภิกฺขเว, ทสหิ ธมฺเมหิ สมนฺนาคตา อุปาสิกา วิสารทา อคารํ อชฺฌาวสตี”ติฯ

ปญฺจมํฯ