| Library / Tipiṭaka / តិបិដក • Tipiṭaka / បរិវារបាឡិ • Parivārapāḷi |
៧. វិស្សជ្ជនាវារោ
7. Vissajjanāvāro
៣៥០. យស្មិំ សមយេ សម្មុខាវិនយេន ច សតិវិនយេន ច អធិករណំ វូបសម្មតិ – យត្ថ សតិវិនយោ តត្ថ សម្មុខាវិនយោ, យត្ថ សម្មុខាវិនយោ តត្ថ សតិវិនយោ, ន តត្ថ អមូឡ្ហវិនយោ, ន តត្ថ បដិញ្ញាតករណំ, ន តត្ថ យេភុយ្យសិកា, ន តត្ថ តស្សបាបិយសិកា, ន តត្ថ តិណវត្ថារកោ។ យស្មិំ សមយេ សម្មុខាវិនយេន ច អមូឡ្ហវិនយេន ច…បេ.… សម្មុខាវិនយេន ច បដិញ្ញាតករណេន ច…បេ.… សម្មុខាវិនយេន ច យេភុយ្យសិកាយ ច…បេ.… សម្មុខាវិនយេន ច តស្សបាបិយសិកាយ ច…បេ.… សម្មុខាវិនយេន ច តិណវត្ថារកេន ច អធិករណំ វូបសម្មតិ – យត្ថ តិណវត្ថារកោ តត្ថ សម្មុខាវិនយោ, យត្ថ សម្មុខាវិនយោ តត្ថ តិណវត្ថារកោ, ន តត្ថ សតិវិនយោ, ន តត្ថ អមូឡ្ហវិនយោ, ន តត្ថ បដិញ្ញាតករណំ, ន តត្ថ យេភុយ្យសិកា, ន តត្ថ តស្សបាបិយសិកា។
350. Yasmiṃ samaye sammukhāvinayena ca sativinayena ca adhikaraṇaṃ vūpasammati – yattha sativinayo tattha sammukhāvinayo, yattha sammukhāvinayo tattha sativinayo, na tattha amūḷhavinayo, na tattha paṭiññātakaraṇaṃ, na tattha yebhuyyasikā, na tattha tassapāpiyasikā, na tattha tiṇavatthārako. Yasmiṃ samaye sammukhāvinayena ca amūḷhavinayena ca…pe… sammukhāvinayena ca paṭiññātakaraṇena ca…pe… sammukhāvinayena ca yebhuyyasikāya ca…pe… sammukhāvinayena ca tassapāpiyasikāya ca…pe… sammukhāvinayena ca tiṇavatthārakena ca adhikaraṇaṃ vūpasammati – yattha tiṇavatthārako tattha sammukhāvinayo, yattha sammukhāvinayo tattha tiṇavatthārako, na tattha sativinayo, na tattha amūḷhavinayo, na tattha paṭiññātakaraṇaṃ, na tattha yebhuyyasikā, na tattha tassapāpiyasikā.
