| Library / Tipiṭaka / ཏིཔིཊཀ • Tipiṭaka / ཀཐཱཝཏྠུཔཱལི༹ • Kathāvatthupāḷi |
༩. ནཝམཝགྒོ
9. Navamavaggo
(༩༠) ༧. ཝིཏཀྐཱནུཔཏིཏཀཐཱ
(90) 7. Vitakkānupatitakathā
༥༦༢. སབྦཾ ཙིཏྟཾ ཝིཏཀྐཱནུཔཏིཏནྟི? ཨཱམནྟཱ། སབྦཾ ཙིཏྟཾ ཝིཙཱརཱནུཔཏིཏཾ པཱིཏཱནུཔཏིཏཾ སུཁཱནུཔཏིཏཾ དུཀྑཱནུཔཏིཏཾ སོམནསྶཱནུཔཏིཏཾ དོམནསྶཱནུཔཏིཏཾ ཨུཔེཀྑཱནུཔཏིཏཾ སདྡྷཱནུཔཏིཏཾ ཝཱིརིཡཱནུཔཏིཏཾ སཏཱནུཔཏིཏཾ སམཱདྷཱནུཔཏིཏཾ པཉྙཱནུཔཏིཏཾ རཱགཱནུཔཏིཏཾ དོསཱནུཔཏིཏཾ…པེ॰… ཨནོཏྟཔྤཱནུཔཏིཏནྟི? ན ཧེཝཾ ཝཏྟབྦེ…པེ॰…།
562. Sabbaṃ cittaṃ vitakkānupatitanti? Āmantā. Sabbaṃ cittaṃ vicārānupatitaṃ pītānupatitaṃ sukhānupatitaṃ dukkhānupatitaṃ somanassānupatitaṃ domanassānupatitaṃ upekkhānupatitaṃ saddhānupatitaṃ vīriyānupatitaṃ satānupatitaṃ samādhānupatitaṃ paññānupatitaṃ rāgānupatitaṃ dosānupatitaṃ…pe… anottappānupatitanti? Na hevaṃ vattabbe…pe….
སབྦཾ ཙིཏྟཾ ཝིཏཀྐཱནུཔཏིཏནྟི? ཨཱམནྟཱ། ནནུ ཨཏྠི ཨཝིཏཀྐོ ཝིཙཱརམཏྟོ སམཱདྷཱིཏི? ཨཱམནྟཱ། ཧཉྩི ཨཏྠི ཨཝིཏཀྐོ ཝིཙཱརམཏྟོ སམཱདྷི, ནོ ཙ ཝཏ རེ ཝཏྟབྦེ – ‘‘སབྦཾ ཙིཏྟཾ ཝིཏཀྐཱནུཔཏིཏ’’ནྟི །
Sabbaṃ cittaṃ vitakkānupatitanti? Āmantā. Nanu atthi avitakko vicāramatto samādhīti? Āmantā. Hañci atthi avitakko vicāramatto samādhi, no ca vata re vattabbe – ‘‘sabbaṃ cittaṃ vitakkānupatita’’nti .
སབྦཾ ཙིཏྟཾ ཝིཏཀྐཱནུཔཏིཏནྟི? ཨཱམནྟཱ། ནནུ ཨཏྠི ཨཝིཏཀྐོ ཨཝིཙཱརོ སམཱདྷཱིཏི? ཨཱམནྟཱ། ཧཉྩི ཨཏྠི ཨཝིཏཀྐོ ཨཝིཙཱརོ སམཱདྷི, ནོ ཙ ཝཏ རེ ཝཏྟབྦེ – ‘‘སབྦཾ ཙིཏྟཾ ཝིཏཀྐཱནུཔཏིཏ’’ནྟི། སབྦཾ ཙིཏྟཾ ཝིཏཀྐཱནུཔཏིཏནྟི? ཨཱམནྟཱ། ནནུ ཏཡོ སམཱདྷཱི ཝུཏྟཱ བྷགཝཏཱ – སཝིཏཀྐོ སཝིཙཱརོ སམཱདྷི, ཨཝིཏཀྐོ ཝིཙཱརམཏྟོ སམཱདྷི, ཨཝིཏཀྐོ ཨཝིཙཱརོ སམཱདྷཱིཏི 1? ཨཱམནྟཱ། ཧཉྩི ཏཡོ སམཱདྷཱི ཝུཏྟཱ བྷགཝཏཱ – སཝིཏཀྐོ སཝིཙཱརོ སམཱདྷི, ཨཝིཏཀྐོ ཝིཙཱརམཏྟོ སམཱདྷི, ཨཝིཏཀྐོ ཨཝིཙཱརོ སམཱདྷི, ནོ ཙ ཝཏ རེ ཝཏྟབྦེ – ‘‘སབྦཾ ཙིཏྟཾ ཝིཏཀྐཱནུཔཏིཏ’’ནྟི།
Sabbaṃ cittaṃ vitakkānupatitanti? Āmantā. Nanu atthi avitakko avicāro samādhīti? Āmantā. Hañci atthi avitakko avicāro samādhi, no ca vata re vattabbe – ‘‘sabbaṃ cittaṃ vitakkānupatita’’nti. Sabbaṃ cittaṃ vitakkānupatitanti? Āmantā. Nanu tayo samādhī vuttā bhagavatā – savitakko savicāro samādhi, avitakko vicāramatto samādhi, avitakko avicāro samādhīti 2? Āmantā. Hañci tayo samādhī vuttā bhagavatā – savitakko savicāro samādhi, avitakko vicāramatto samādhi, avitakko avicāro samādhi, no ca vata re vattabbe – ‘‘sabbaṃ cittaṃ vitakkānupatita’’nti.
ཝིཏཀྐཱནུཔཏིཏཀཐཱ ནིཊྛིཏཱ།
Vitakkānupatitakathā niṭṭhitā.
Footnotes:
Related texts:
ཨཊྛཀཐཱ • Aṭṭhakathā / ཨབྷིདྷམྨཔིཊཀ (ཨཊྛཀཐཱ) • Abhidhammapiṭaka (aṭṭhakathā) / པཉྩཔཀརཎ-ཨཊྛཀཐཱ • Pañcapakaraṇa-aṭṭhakathā / ༧. ཝིཏཀྐཱནུཔཏིཏཀཐཱཝཎྞནཱ • 7. Vitakkānupatitakathāvaṇṇanā
ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / པཉྩཔཀརཎ-མཱུལཊཱིཀཱ • Pañcapakaraṇa-mūlaṭīkā / ༧. ཝིཏཀྐཱནུཔཏིཏཀཐཱཝཎྞནཱ • 7. Vitakkānupatitakathāvaṇṇanā
ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / པཉྩཔཀརཎ-ཨནུཊཱིཀཱ • Pañcapakaraṇa-anuṭīkā / ༧. ཝིཏཀྐཱནུཔཏིཏཀཐཱཝཎྞནཱ • 7. Vitakkānupatitakathāvaṇṇanā
