| Library / Tipiṭaka / തിപിടക • Tipiṭaka / കഥാവത്ഥുപാളി • Kathāvatthupāḷi |
൯. നവമവഗ്ഗോ
9. Navamavaggo
(൯൦) ൭. വിതക്കാനുപതിതകഥാ
(90) 7. Vitakkānupatitakathā
൫൬൨. സബ്ബം ചിത്തം വിതക്കാനുപതിതന്തി? ആമന്താ. സബ്ബം ചിത്തം വിചാരാനുപതിതം പീതാനുപതിതം സുഖാനുപതിതം ദുക്ഖാനുപതിതം സോമനസ്സാനുപതിതം ദോമനസ്സാനുപതിതം ഉപേക്ഖാനുപതിതം സദ്ധാനുപതിതം വീരിയാനുപതിതം സതാനുപതിതം സമാധാനുപതിതം പഞ്ഞാനുപതിതം രാഗാനുപതിതം ദോസാനുപതിതം…പേ॰… അനോത്തപ്പാനുപതിതന്തി? ന ഹേവം വത്തബ്ബേ…പേ॰….
562. Sabbaṃ cittaṃ vitakkānupatitanti? Āmantā. Sabbaṃ cittaṃ vicārānupatitaṃ pītānupatitaṃ sukhānupatitaṃ dukkhānupatitaṃ somanassānupatitaṃ domanassānupatitaṃ upekkhānupatitaṃ saddhānupatitaṃ vīriyānupatitaṃ satānupatitaṃ samādhānupatitaṃ paññānupatitaṃ rāgānupatitaṃ dosānupatitaṃ…pe… anottappānupatitanti? Na hevaṃ vattabbe…pe….
സബ്ബം ചിത്തം വിതക്കാനുപതിതന്തി? ആമന്താ. നനു അത്ഥി അവിതക്കോ വിചാരമത്തോ സമാധീതി? ആമന്താ. ഹഞ്ചി അത്ഥി അവിതക്കോ വിചാരമത്തോ സമാധി, നോ ച വത രേ വത്തബ്ബേ – ‘‘സബ്ബം ചിത്തം വിതക്കാനുപതിത’’ന്തി .
Sabbaṃ cittaṃ vitakkānupatitanti? Āmantā. Nanu atthi avitakko vicāramatto samādhīti? Āmantā. Hañci atthi avitakko vicāramatto samādhi, no ca vata re vattabbe – ‘‘sabbaṃ cittaṃ vitakkānupatita’’nti .
സബ്ബം ചിത്തം വിതക്കാനുപതിതന്തി? ആമന്താ. നനു അത്ഥി അവിതക്കോ അവിചാരോ സമാധീതി? ആമന്താ. ഹഞ്ചി അത്ഥി അവിതക്കോ അവിചാരോ സമാധി, നോ ച വത രേ വത്തബ്ബേ – ‘‘സബ്ബം ചിത്തം വിതക്കാനുപതിത’’ന്തി. സബ്ബം ചിത്തം വിതക്കാനുപതിതന്തി? ആമന്താ. നനു തയോ സമാധീ വുത്താ ഭഗവതാ – സവിതക്കോ സവിചാരോ സമാധി, അവിതക്കോ വിചാരമത്തോ സമാധി, അവിതക്കോ അവിചാരോ സമാധീതി 1? ആമന്താ. ഹഞ്ചി തയോ സമാധീ വുത്താ ഭഗവതാ – സവിതക്കോ സവിചാരോ സമാധി, അവിതക്കോ വിചാരമത്തോ സമാധി, അവിതക്കോ അവിചാരോ സമാധി, നോ ച വത രേ വത്തബ്ബേ – ‘‘സബ്ബം ചിത്തം വിതക്കാനുപതിത’’ന്തി.
Sabbaṃ cittaṃ vitakkānupatitanti? Āmantā. Nanu atthi avitakko avicāro samādhīti? Āmantā. Hañci atthi avitakko avicāro samādhi, no ca vata re vattabbe – ‘‘sabbaṃ cittaṃ vitakkānupatita’’nti. Sabbaṃ cittaṃ vitakkānupatitanti? Āmantā. Nanu tayo samādhī vuttā bhagavatā – savitakko savicāro samādhi, avitakko vicāramatto samādhi, avitakko avicāro samādhīti 2? Āmantā. Hañci tayo samādhī vuttā bhagavatā – savitakko savicāro samādhi, avitakko vicāramatto samādhi, avitakko avicāro samādhi, no ca vata re vattabbe – ‘‘sabbaṃ cittaṃ vitakkānupatita’’nti.
വിതക്കാനുപതിതകഥാ നിട്ഠിതാ.
Vitakkānupatitakathā niṭṭhitā.
Footnotes:
Related texts:
അട്ഠകഥാ • Aṭṭhakathā / അഭിധമ്മപിടക (അട്ഠകഥാ) • Abhidhammapiṭaka (aṭṭhakathā) / പഞ്ചപകരണ-അട്ഠകഥാ • Pañcapakaraṇa-aṭṭhakathā / ൭. വിതക്കാനുപതിതകഥാവണ്ണനാ • 7. Vitakkānupatitakathāvaṇṇanā
ടീകാ • Tīkā / അഭിധമ്മപിടക (ടീകാ) • Abhidhammapiṭaka (ṭīkā) / പഞ്ചപകരണ-മൂലടീകാ • Pañcapakaraṇa-mūlaṭīkā / ൭. വിതക്കാനുപതിതകഥാവണ്ണനാ • 7. Vitakkānupatitakathāvaṇṇanā
ടീകാ • Tīkā / അഭിധമ്മപിടക (ടീകാ) • Abhidhammapiṭaka (ṭīkā) / പഞ്ചപകരണ-അനുടീകാ • Pañcapakaraṇa-anuṭīkā / ൭. വിതക്കാനുപതിതകഥാവണ്ണനാ • 7. Vitakkānupatitakathāvaṇṇanā
