| Library / Tipiṭaka / ཏིཔིཊཀ • Tipiṭaka / མཛྫྷིམནིཀཱཡ • Majjhimanikāya |
༡༠. ཝིཏཀྐསཎྛཱནསུཏྟཾ
10. Vitakkasaṇṭhānasuttaṃ
༢༡༦. ཨེཝཾ མེ སུཏཾ – ཨེཀཾ སམཡཾ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཏཏྲ ཁོ བྷགཝཱ བྷིཀྑཱུ ཨཱམནྟེསི – ‘‘བྷིཀྑཝོ’’ཏི། ‘‘བྷདནྟེ’’ཏི ཏེ བྷིཀྑཱུ བྷགཝཏོ པཙྩསྶོསུཾ། བྷགཝཱ ཨེཏདཝོཙ –
216. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tatra kho bhagavā bhikkhū āmantesi – ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca –
‘‘ཨདྷིཙིཏྟམནུཡུཏྟེན, བྷིཀྑཝེ, བྷིཀྑུནཱ པཉྩ ནིམིཏྟཱནི ཀཱལེན ཀཱལཾ མནསི ཀཱཏབྦཱནི། ཀཏམཱནི པཉྩ? ཨིདྷ, བྷིཀྑཝེ, བྷིཀྑུནོ ཡཾ ནིམིཏྟཾ ཨཱགམྨ ཡཾ ནིམིཏྟཾ མནསིཀརོཏོ ཨུཔྤཛྫནྟི པཱཔཀཱ ཨཀུསལཱ ཝིཏཀྐཱ ཚནྡཱུཔསཾཧིཏཱཔི དོསཱུཔསཾཧིཏཱཔི མོཧཱུཔསཾཧིཏཱཔི, ཏེན, བྷིཀྑཝེ, བྷིཀྑུནཱ ཏམྷཱ ནིམིཏྟཱ ཨཉྙཾ ནིམིཏྟཾ མནསི ཀཱཏབྦཾ ཀུསལཱུཔསཾཧིཏཾ། ཏསྶ ཏམྷཱ ནིམིཏྟཱ ཨཉྙཾ ནིམིཏྟཾ མནསིཀརོཏོ ཀུསལཱུཔསཾཧིཏཾ ཡེ པཱཔཀཱ ཨཀུསལཱ ཝིཏཀྐཱ ཚནྡཱུཔསཾཧིཏཱཔི དོསཱུཔསཾཧིཏཱཔི མོཧཱུཔསཾཧིཏཱཔི ཏེ པཧཱིཡནྟི ཏེ ཨབྦྷཏྠཾ གཙྪནྟི། ཏེསཾ པཧཱནཱ ཨཛ྄ཛྷཏྟམེཝ ཙིཏྟཾ སནྟིཊྛཏི སནྣིསཱིདཏི ཨེཀོདི ཧོཏི 1 སམཱདྷིཡཏི། སེཡྻཐཱཔི, བྷིཀྑཝེ, དཀྑོ པལགཎྜོ ཝཱ པལགཎྜནྟེཝཱསཱི ཝཱ སུཁུམཱཡ ཨཱཎིཡཱ ཨོལཱ༹རིཀཾ ཨཱཎིཾ ཨབྷིནིཧནེཡྻ ཨབྷིནཱིཧརེཡྻ ཨབྷིནིཝཏྟེཡྻ 2; ཨེཝམེཝ ཁོ, བྷིཀྑཝེ, བྷིཀྑུནོ ཡཾ ནིམིཏྟཾ ཨཱགམྨ ཡཾ ནིམིཏྟཾ མནསིཀརོཏོ ཨུཔྤཛྫནྟི པཱཔཀཱ ཨཀུསལཱ ཝིཏཀྐཱ ཚནྡཱུཔསཾཧིཏཱཔི དོསཱུཔསཾཧིཏཱཔི མོཧཱུཔསཾཧིཏཱཔི, ཏེན, བྷིཀྑཝེ, བྷིཀྑུནཱ ཏམྷཱ ནིམིཏྟཱ ཨཉྙཾ ནིམིཏྟཾ མནསི ཀཱཏབྦཾ ཀུསལཱུཔསཾཧིཏཾ། ཏསྶ ཏམྷཱ ནིམིཏྟཱ ཨཉྙཾ ནིམིཏྟཾ མནསིཀརོཏོ ཀུསལཱུཔསཾཧིཏཾ ཡེ པཱཔཀཱ ཨཀུསལཱ ཝིཏཀྐཱ ཚནྡཱུཔསཾཧིཏཱཔི དོསཱུཔསཾཧིཏཱཔི མོཧཱུཔསཾཧིཏཱཔི ཏེ པཧཱིཡནྟི ཏེ ཨབྦྷཏྠཾ གཙྪནྟི། ཏེསཾ པཧཱནཱ ཨཛ྄ཛྷཏྟམེཝ ཙིཏྟཾ སནྟིཊྛཏི སནྣིསཱིདཏི ཨེཀོདི ཧོཏི སམཱདྷིཡཏི།
‘‘Adhicittamanuyuttena, bhikkhave, bhikkhunā pañca nimittāni kālena kālaṃ manasi kātabbāni. Katamāni pañca? Idha, bhikkhave, bhikkhuno yaṃ nimittaṃ āgamma yaṃ nimittaṃ manasikaroto uppajjanti pāpakā akusalā vitakkā chandūpasaṃhitāpi dosūpasaṃhitāpi mohūpasaṃhitāpi, tena, bhikkhave, bhikkhunā tamhā nimittā aññaṃ nimittaṃ manasi kātabbaṃ kusalūpasaṃhitaṃ. Tassa tamhā nimittā aññaṃ nimittaṃ manasikaroto kusalūpasaṃhitaṃ ye pāpakā akusalā vitakkā chandūpasaṃhitāpi dosūpasaṃhitāpi mohūpasaṃhitāpi te pahīyanti te abbhatthaṃ gacchanti. Tesaṃ pahānā ajjhattameva cittaṃ santiṭṭhati sannisīdati ekodi hoti 3 samādhiyati. Seyyathāpi, bhikkhave, dakkho palagaṇḍo vā palagaṇḍantevāsī vā sukhumāya āṇiyā oḷārikaṃ āṇiṃ abhinihaneyya abhinīhareyya abhinivatteyya 4; evameva kho, bhikkhave, bhikkhuno yaṃ nimittaṃ āgamma yaṃ nimittaṃ manasikaroto uppajjanti pāpakā akusalā vitakkā chandūpasaṃhitāpi dosūpasaṃhitāpi mohūpasaṃhitāpi, tena, bhikkhave, bhikkhunā tamhā nimittā aññaṃ nimittaṃ manasi kātabbaṃ kusalūpasaṃhitaṃ. Tassa tamhā nimittā aññaṃ nimittaṃ manasikaroto kusalūpasaṃhitaṃ ye pāpakā akusalā vitakkā chandūpasaṃhitāpi dosūpasaṃhitāpi mohūpasaṃhitāpi te pahīyanti te abbhatthaṃ gacchanti. Tesaṃ pahānā ajjhattameva cittaṃ santiṭṭhati sannisīdati ekodi hoti samādhiyati.
༢༡༧. ‘‘ཏསྶ ཙེ, བྷིཀྑཝེ, བྷིཀྑུནོ ཏམྷཱ ནིམིཏྟཱ ཨཉྙཾ ནིམིཏྟཾ མནསིཀརོཏོ ཀུསལཱུཔསཾཧིཏཾ ཨུཔྤཛྫནྟེཝ པཱཔཀཱ ཨཀུསལཱ ཝིཏཀྐཱ ཚནྡཱུཔསཾཧིཏཱཔི དོསཱུཔསཾཧིཏཱཔི མོཧཱུཔསཾཧིཏཱཔི, ཏེན, བྷིཀྑཝེ, བྷིཀྑུནཱ ཏེསཾ ཝིཏཀྐཱནཾ ཨཱདཱིནཝོ ཨུཔཔརིཀྑིཏབྦོ – ‘ཨིཏིཔིམེ ཝིཏཀྐཱ ཨཀུསལཱ, ཨིཏིཔིམེ ཝིཏཀྐཱ སཱཝཛྫཱ, ཨིཏིཔིམེ ཝིཏཀྐཱ དུཀྑཝིཔཱཀཱ’ཏི། ཏསྶ ཏེསཾ ཝིཏཀྐཱནཾ ཨཱདཱིནཝཾ ཨུཔཔརིཀྑཏོ ཡེ པཱཔཀཱ ཨཀུསལཱ ཝིཏཀྐཱ ཚནྡཱུཔསཾཧིཏཱཔི དོསཱུཔསཾཧིཏཱཔི མོཧཱུཔསཾཧིཏཱཔི ཏེ པཧཱིཡནྟི ཏེ ཨབྦྷཏྠཾ གཙྪནྟི། ཏེསཾ པཧཱནཱ ཨཛ྄ཛྷཏྟམེཝ ཙིཏྟཾ སནྟིཊྛཏི སནྣིསཱིདཏི ཨེཀོདི ཧོཏི སམཱདྷིཡཏི། སེཡྻཐཱཔི, བྷིཀྑཝེ, ཨིཏྠཱི ཝཱ པུརིསོ ཝཱ དཧརོ ཡུཝཱ མཎྜནཀཛཱཏིཀོ ཨཧིཀུཎཔེན ཝཱ ཀུཀྐུརཀུཎཔེན ཝཱ མནུསྶཀུཎཔེན ཝཱ ཀཎྛེ ཨཱསཏྟེན ཨཊྚིཡེཡྻ ཧརཱཡེཡྻ ཛིགུཙྪེཡྻ; ཨེཝམེཝ ཁོ, བྷིཀྑཝེ, ཏསྶ ཙེ བྷིཀྑུནོ ཏམྷཱཔི ནིམིཏྟཱ ཨཉྙཾ ནིམིཏྟཾ མནསིཀརོཏོ ཀུསལཱུཔསཾཧིཏཾ ཨུཔྤཛྫནྟེཝ པཱཔཀཱ ཨཀུསལཱ ཝིཏཀྐཱ ཚནྡཱུཔསཾཧིཏཱཔི དོསཱུཔསཾཧིཏཱཔི མོཧཱུཔསཾཧིཏཱཔི, ཏེན, བྷིཀྑཝེ, བྷིཀྑུནཱ ཏེསཾ ཝིཏཀྐཱནཾ ཨཱདཱིནཝོ ཨུཔཔརིཀྑིཏབྦོ – ‘ཨིཏིཔིམེ ཝིཏཀྐཱ ཨཀུསལཱ, ཨིཏིཔིམེ ཝིཏཀྐཱ སཱཝཛྫཱ, ཨིཏིཔིམེ ཝིཏཀྐཱ དུཀྑཝིཔཱཀཱ’ཏི། ཏསྶ ཏེསཾ ཝིཏཀྐཱནཾ ཨཱདཱིནཝཾ ཨུཔཔརིཀྑཏོ ཡེ པཱཔཀཱ ཨཀུསལཱ ཝིཏཀྐཱ ཚནྡཱུཔསཾཧིཏཱཔི དོསཱུཔསཾཧིཏཱཔི མོཧཱུཔསཾཧིཏཱཔི ཏེ པཧཱིཡནྟི ཏེ ཨབྦྷཏྠཾ གཙྪནྟི། ཏེསཾ པཧཱནཱ ཨཛ྄ཛྷཏྟམེཝ ཙིཏྟཾ སནྟིཊྛཏི སནྣིསཱིདཏི ཨེཀོདི ཧོཏི སམཱདྷིཡཏི།
217. ‘‘Tassa ce, bhikkhave, bhikkhuno tamhā nimittā aññaṃ nimittaṃ manasikaroto kusalūpasaṃhitaṃ uppajjanteva pāpakā akusalā vitakkā chandūpasaṃhitāpi dosūpasaṃhitāpi mohūpasaṃhitāpi, tena, bhikkhave, bhikkhunā tesaṃ vitakkānaṃ ādīnavo upaparikkhitabbo – ‘itipime vitakkā akusalā, itipime vitakkā sāvajjā, itipime vitakkā dukkhavipākā’ti. Tassa tesaṃ vitakkānaṃ ādīnavaṃ upaparikkhato ye pāpakā akusalā vitakkā chandūpasaṃhitāpi dosūpasaṃhitāpi mohūpasaṃhitāpi te pahīyanti te abbhatthaṃ gacchanti. Tesaṃ pahānā ajjhattameva cittaṃ santiṭṭhati sannisīdati ekodi hoti samādhiyati. Seyyathāpi, bhikkhave, itthī vā puriso vā daharo yuvā maṇḍanakajātiko ahikuṇapena vā kukkurakuṇapena vā manussakuṇapena vā kaṇṭhe āsattena aṭṭiyeyya harāyeyya jiguccheyya; evameva kho, bhikkhave, tassa ce bhikkhuno tamhāpi nimittā aññaṃ nimittaṃ manasikaroto kusalūpasaṃhitaṃ uppajjanteva pāpakā akusalā vitakkā chandūpasaṃhitāpi dosūpasaṃhitāpi mohūpasaṃhitāpi, tena, bhikkhave, bhikkhunā tesaṃ vitakkānaṃ ādīnavo upaparikkhitabbo – ‘itipime vitakkā akusalā, itipime vitakkā sāvajjā, itipime vitakkā dukkhavipākā’ti. Tassa tesaṃ vitakkānaṃ ādīnavaṃ upaparikkhato ye pāpakā akusalā vitakkā chandūpasaṃhitāpi dosūpasaṃhitāpi mohūpasaṃhitāpi te pahīyanti te abbhatthaṃ gacchanti. Tesaṃ pahānā ajjhattameva cittaṃ santiṭṭhati sannisīdati ekodi hoti samādhiyati.
༢༡༨. ‘‘ཏསྶ ཙེ, བྷིཀྑཝེ, བྷིཀྑུནོ ཏེསམྤི ཝིཏཀྐཱནཾ ཨཱདཱིནཝཾ ཨུཔཔརིཀྑཏོ ཨུཔྤཛྫནྟེཝ པཱཔཀཱ ཨཀུསལཱ ཝིཏཀྐཱ ཚནྡཱུཔསཾཧིཏཱཔི དོསཱུཔསཾཧིཏཱཔི མོཧཱུཔསཾཧིཏཱཔི, ཏེན, བྷིཀྑཝེ, བྷིཀྑུནཱ ཏེསཾ ཝིཏཀྐཱནཾ ཨསཏིཨམནསིཀཱརོ ཨཱཔཛྫིཏབྦོ། ཏསྶ ཏེསཾ ཝིཏཀྐཱནཾ ཨསཏིཨམནསིཀཱརཾ ཨཱཔཛྫཏོ ཡེ པཱཔཀཱ ཨཀུསལཱ ཝིཏཀྐཱ ཚནྡཱུཔསཾཧིཏཱཔི དོསཱུཔསཾཧིཏཱཔི མོཧཱུཔསཾཧིཏཱཔི ཏེ པཧཱིཡནྟི ཏེ ཨབྦྷཏྠཾ གཙྪནྟི། ཏེསཾ པཧཱནཱ ཨཛ྄ཛྷཏྟམེཝ ཙིཏྟཾ སནྟིཊྛཏི སནྣིསཱིདཏི ཨེཀོདི ཧོཏི སམཱདྷིཡཏི། སེཡྻཐཱཔི, བྷིཀྑཝེ, ཙཀྑུམཱ པུརིསོ ཨཱཔཱཐགཏཱནཾ རཱུཔཱནཾ ཨདསྶནཀཱམོ ཨསྶ; སོ ནིམཱིལེཡྻ ཝཱ ཨཉྙེན ཝཱ ཨཔལོཀེཡྻ། ཨེཝམེཝ ཁོ, བྷིཀྑཝེ, ཏསྶ ཙེ བྷིཀྑུནོ ཏེསམྤི ཝིཏཀྐཱནཾ ཨཱདཱིནཝཾ ཨུཔཔརིཀྑཏོ ཨུཔྤཛྫནྟེཝ པཱཔཀཱ ཨཀུསལཱ ཝིཏཀྐཱ ཚནྡཱུཔསཾཧིཏཱཔི དོསཱུཔསཾཧིཏཱཔི མོཧཱུཔསཾཧིཏཱཔི, ཏེ པཧཱིཡནྟི ཏེ ཨབྦྷཏྠཾ གཙྪནྟི། ཏེསཾ པཧཱནཱ ཨཛ྄ཛྷཏྟམེཝ ཙིཏྟཾ སནྟིཊྛཏི སནྣིསཱིདཏི ཨེཀོདི ཧོཏི སམཱདྷིཡཏི།
218. ‘‘Tassa ce, bhikkhave, bhikkhuno tesampi vitakkānaṃ ādīnavaṃ upaparikkhato uppajjanteva pāpakā akusalā vitakkā chandūpasaṃhitāpi dosūpasaṃhitāpi mohūpasaṃhitāpi, tena, bhikkhave, bhikkhunā tesaṃ vitakkānaṃ asatiamanasikāro āpajjitabbo. Tassa tesaṃ vitakkānaṃ asatiamanasikāraṃ āpajjato ye pāpakā akusalā vitakkā chandūpasaṃhitāpi dosūpasaṃhitāpi mohūpasaṃhitāpi te pahīyanti te abbhatthaṃ gacchanti. Tesaṃ pahānā ajjhattameva cittaṃ santiṭṭhati sannisīdati ekodi hoti samādhiyati. Seyyathāpi, bhikkhave, cakkhumā puriso āpāthagatānaṃ rūpānaṃ adassanakāmo assa; so nimīleyya vā aññena vā apalokeyya. Evameva kho, bhikkhave, tassa ce bhikkhuno tesampi vitakkānaṃ ādīnavaṃ upaparikkhato uppajjanteva pāpakā akusalā vitakkā chandūpasaṃhitāpi dosūpasaṃhitāpi mohūpasaṃhitāpi, te pahīyanti te abbhatthaṃ gacchanti. Tesaṃ pahānā ajjhattameva cittaṃ santiṭṭhati sannisīdati ekodi hoti samādhiyati.
༢༡༩. ‘‘ཏསྶ ཙེ, བྷིཀྑཝེ, བྷིཀྑུནོ ཏེསམྤི ཝིཏཀྐཱནཾ ཨསཏིཨམནསིཀཱརཾ ཨཱཔཛྫཏོ ཨུཔྤཛྫནྟེཝ པཱཔཀཱ ཨཀུསལཱ ཝིཏཀྐཱ ཚནྡཱུཔསཾཧིཏཱཔི དོསཱུཔསཾཧིཏཱཔི མོཧཱུཔསཾཧིཏཱཔི, ཏེན, བྷིཀྑཝེ, བྷིཀྑུནཱ ཏེསཾ ཝིཏཀྐཱནཾ ཝིཏཀྐསངྑཱརསཎྛཱནཾ མནསིཀཱཏབྦཾ། ཏསྶ ཏེསཾ ཝིཏཀྐཱནཾ ཝིཏཀྐསངྑཱརསཎྛཱནཾ མནསིཀརོཏོ ཡེ པཱཔཀཱ ཨཀུསལཱ ཝིཏཀྐཱ ཚནྡཱུཔསཾཧིཏཱཔི དོསཱུཔསཾཧིཏཱཔི མོཧཱུཔསཾཧིཏཱཔི ཏེ པཧཱིཡནྟི ཏེ ཨབྦྷཏྠཾ གཙྪནྟི། ཏེསཾ པཧཱནཱ ཨཛ྄ཛྷཏྟམེཝ ཙིཏྟཾ སནྟིཊྛཏི སནྣིསཱིདཏི ཨེཀོདི ཧོཏི སམཱདྷིཡཏི། སེཡྻཐཱཔི, བྷིཀྑཝེ, པུརིསོ སཱིགྷཾ གཙྪེཡྻ། ཏསྶ ཨེཝམསྶ – ‘ཀིཾ ནུ ཁོ ཨཧཾ སཱིགྷཾ གཙྪཱམི? ཡཾནཱུནཱཧཾ སཎིཀཾ གཙྪེཡྻ’ནྟི། སོ སཎིཀཾ གཙྪེཡྻ། ཏསྶ ཨེཝམསྶ – ‘ཀིཾ ནུ ཁོ ཨཧཾ སཎིཀཾ གཙྪཱམི? ཡཾནཱུནཱཧཾ ཏིཊྛེཡྻ’ནྟི། སོ ཏིཊྛེཡྻ ། ཏསྶ ཨེཝམསྶ – ‘ཀིཾ ནུ ཁོ ཨཧཾ ཋིཏོ? ཡཾནཱུནཱཧཾ ནིསཱིདེཡྻ’ནྟི། སོ ནིསཱིདེཡྻ། ཏསྶ ཨེཝམསྶ – ‘ཀིཾ ནུ ཁོ ཨཧཾ ནིསིནྣོ? ཡཾནཱུནཱཧཾ ནིཔཛྫེཡྻ’ནྟི། སོ ནིཔཛྫེཡྻ། ཨེཝཉྷི སོ, བྷིཀྑཝེ, པུརིསོ ཨོལཱ༹རིཀཾ ཨོལཱ༹རིཀཾ ཨིརིཡཱཔཐཾ ཨབྷིནིཝཛྫེཏྭཱ 5 སུཁུམཾ སུཁུམཾ ཨིརིཡཱཔཐཾ ཀཔྤེཡྻ། ཨེཝམེཝ ཁོ, བྷིཀྑཝེ, ཏསྶ ཙེ བྷིཀྑུནོ ཏེསམྤི ཝིཏཀྐཱནཾ ཨསཏིཨམནསིཀཱརཾ ཨཱཔཛྫཏོ ཨུཔྤཛྫནྟེཝ པཱཔཀཱ ཨཀུསལཱ ཝིཏཀྐཱ ཚནྡཱུཔསཾཧིཏཱཔི དོསཱུཔསཾཧིཏཱཔི མོཧཱུཔསཾཧིཏཱཔི ཏེ པཧཱིཡནྟི ཏེ ཨབྦྷཏྠཾ གཙྪནྟི། ཏེསཾ པཧཱནཱ ཨཛ྄ཛྷཏྟམེཝ ཙིཏྟཾ སནྟིཊྛཏི སནྣིསཱིདཏི ཨེཀོདི ཧོཏི སམཱདྷིཡཏི།
219. ‘‘Tassa ce, bhikkhave, bhikkhuno tesampi vitakkānaṃ asatiamanasikāraṃ āpajjato uppajjanteva pāpakā akusalā vitakkā chandūpasaṃhitāpi dosūpasaṃhitāpi mohūpasaṃhitāpi, tena, bhikkhave, bhikkhunā tesaṃ vitakkānaṃ vitakkasaṅkhārasaṇṭhānaṃ manasikātabbaṃ. Tassa tesaṃ vitakkānaṃ vitakkasaṅkhārasaṇṭhānaṃ manasikaroto ye pāpakā akusalā vitakkā chandūpasaṃhitāpi dosūpasaṃhitāpi mohūpasaṃhitāpi te pahīyanti te abbhatthaṃ gacchanti. Tesaṃ pahānā ajjhattameva cittaṃ santiṭṭhati sannisīdati ekodi hoti samādhiyati. Seyyathāpi, bhikkhave, puriso sīghaṃ gaccheyya. Tassa evamassa – ‘kiṃ nu kho ahaṃ sīghaṃ gacchāmi? Yaṃnūnāhaṃ saṇikaṃ gaccheyya’nti. So saṇikaṃ gaccheyya. Tassa evamassa – ‘kiṃ nu kho ahaṃ saṇikaṃ gacchāmi? Yaṃnūnāhaṃ tiṭṭheyya’nti. So tiṭṭheyya . Tassa evamassa – ‘kiṃ nu kho ahaṃ ṭhito? Yaṃnūnāhaṃ nisīdeyya’nti. So nisīdeyya. Tassa evamassa – ‘kiṃ nu kho ahaṃ nisinno? Yaṃnūnāhaṃ nipajjeyya’nti. So nipajjeyya. Evañhi so, bhikkhave, puriso oḷārikaṃ oḷārikaṃ iriyāpathaṃ abhinivajjetvā 6 sukhumaṃ sukhumaṃ iriyāpathaṃ kappeyya. Evameva kho, bhikkhave, tassa ce bhikkhuno tesampi vitakkānaṃ asatiamanasikāraṃ āpajjato uppajjanteva pāpakā akusalā vitakkā chandūpasaṃhitāpi dosūpasaṃhitāpi mohūpasaṃhitāpi te pahīyanti te abbhatthaṃ gacchanti. Tesaṃ pahānā ajjhattameva cittaṃ santiṭṭhati sannisīdati ekodi hoti samādhiyati.
༢༢༠. ‘‘ཏསྶ ཙེ, བྷིཀྑཝེ, བྷིཀྑུནོ ཏེསམྤི ཝིཏཀྐཱནཾ ཝིཏཀྐསངྑཱརསཎྛཱནཾ མནསིཀརོཏོ ཨུཔྤཛྫནྟེཝ པཱཔཀཱ ཨཀུསལཱ ཝིཏཀྐཱ ཚནྡཱུཔསཾཧིཏཱཔི དོསཱུཔསཾཧིཏཱཔི མོཧཱུཔསཾཧིཏཱཔི། ཏེན, བྷིཀྑཝེ, བྷིཀྑུནཱ དནྟེབྷིདནྟམཱདྷཱཡ 7 ཛིཝ྄ཧཱཡ ཏཱལུཾ ཨཱཧཙྩ ཙེཏསཱ ཙིཏྟཾ ཨབྷིནིགྒཎྷིཏབྦཾ ཨབྷིནིཔྤཱིལེ༹ཏབྦཾ ཨབྷིསནྟཱཔེཏབྦཾ ། ཏསྶ དནྟེབྷིདནྟམཱདྷཱཡ ཛིཝ྄ཧཱཡ ཏཱལུཾ ཨཱཧཙྩ ཙེཏསཱ ཙིཏྟཾ ཨབྷིནིགྒཎྷཏོ ཨབྷིནིཔྤཱིལ༹ཡཏོ ཨབྷིསནྟཱཔཡཏོ ཡེ པཱཔཀཱ ཨཀུསལཱ ཝིཏཀྐཱ ཚནྡཱུཔསཾཧིཏཱཔི དོསཱུཔསཾཧིཏཱཔི མོཧཱུཔསཾཧིཏཱཔི ཏེ པཧཱིཡནྟི ཏེ ཨབྦྷཏྠཾ གཙྪནྟི། ཏེསཾ པཧཱནཱ ཨཛ྄ཛྷཏྟམེཝ ཙིཏྟཾ སནྟིཊྛཏི སནྣིསཱིདཏི ཨེཀོདི ཧོཏི སམཱདྷིཡཏི། སེཡྻཐཱཔི, བྷིཀྑཝེ, བལཝཱ པུརིསོ དུབྦལཏརཾ པུརིསཾ སཱིསེ ཝཱ གལེ ཝཱ ཁནྡྷེ ཝཱ གཧེཏྭཱ ཨབྷིནིགྒཎྷེཡྻ ཨབྷིནིཔྤཱིལེ༹ཡྻ ཨབྷིསནྟཱཔེཡྻ; ཨེཝམེཝ ཁོ, བྷིཀྑཝེ, ཏསྶ ཙེ བྷིཀྑུནོ ཏེསམྤི ཝིཏཀྐཱནཾ ཝིཏཀྐསངྑཱརསཎྛཱནཾ མནསིཀརོཏོ ཨུཔྤཛྫནྟེཝ པཱཔཀཱ ཨཀུསལཱ ཝིཏཀྐཱ ཚནྡཱུཔསཾཧིཏཱཔི དོསཱུཔསཾཧིཏཱཔི མོཧཱུཔསཾཧིཏཱཔི། ཏེན, བྷིཀྑཝེ, བྷིཀྑུནཱ དནྟེབྷིདནྟམཱདྷཱཡ ཛིཝ྄ཧཱཡ ཏཱལུཾ ཨཱཧཙྩ ཙེཏསཱ ཙིཏྟཾ ཨབྷིནིགྒཎྷིཏབྦཾ ཨབྷིནིཔྤཱིལེ༹ཏབྦཾ ཨབྷིསནྟཱཔེཏབྦཾ། ཏསྶ དནྟེབྷིདནྟམཱདྷཱཡ ཛིཝ྄ཧཱཡ ཏཱལུཾ ཨཱཧཙྩ ཙེཏསཱ ཙིཏྟཾ ཨབྷིནིགྒཎྷཏོ ཨབྷིནིཔྤཱིལ༹ཡཏོ ཨབྷིསནྟཱཔཡཏོ ཡེ པཱཔཀཱ ཨཀུསལཱ ཝིཏཀྐཱ ཚནྡཱུཔསཾཧིཏཱཔི དོསཱུཔསཾཧིཏཱཔི མོཧཱུཔསཾཧིཏཱཔི ཏེ པཧཱིཡནྟི ཏེ ཨབྦྷཏྠཾ གཙྪནྟི། ཏེསཾ པཧཱནཱ ཨཛ྄ཛྷཏྟམེཝ ཙིཏྟཾ སནྟིཊྛཏི སནྣིསཱིདཏི ཨེཀོདི ཧོཏི སམཱདྷིཡཏི།
220. ‘‘Tassa ce, bhikkhave, bhikkhuno tesampi vitakkānaṃ vitakkasaṅkhārasaṇṭhānaṃ manasikaroto uppajjanteva pāpakā akusalā vitakkā chandūpasaṃhitāpi dosūpasaṃhitāpi mohūpasaṃhitāpi. Tena, bhikkhave, bhikkhunā dantebhidantamādhāya 8 jivhāya tāluṃ āhacca cetasā cittaṃ abhiniggaṇhitabbaṃ abhinippīḷetabbaṃ abhisantāpetabbaṃ . Tassa dantebhidantamādhāya jivhāya tāluṃ āhacca cetasā cittaṃ abhiniggaṇhato abhinippīḷayato abhisantāpayato ye pāpakā akusalā vitakkā chandūpasaṃhitāpi dosūpasaṃhitāpi mohūpasaṃhitāpi te pahīyanti te abbhatthaṃ gacchanti. Tesaṃ pahānā ajjhattameva cittaṃ santiṭṭhati sannisīdati ekodi hoti samādhiyati. Seyyathāpi, bhikkhave, balavā puriso dubbalataraṃ purisaṃ sīse vā gale vā khandhe vā gahetvā abhiniggaṇheyya abhinippīḷeyya abhisantāpeyya; evameva kho, bhikkhave, tassa ce bhikkhuno tesampi vitakkānaṃ vitakkasaṅkhārasaṇṭhānaṃ manasikaroto uppajjanteva pāpakā akusalā vitakkā chandūpasaṃhitāpi dosūpasaṃhitāpi mohūpasaṃhitāpi. Tena, bhikkhave, bhikkhunā dantebhidantamādhāya jivhāya tāluṃ āhacca cetasā cittaṃ abhiniggaṇhitabbaṃ abhinippīḷetabbaṃ abhisantāpetabbaṃ. Tassa dantebhidantamādhāya jivhāya tāluṃ āhacca cetasā cittaṃ abhiniggaṇhato abhinippīḷayato abhisantāpayato ye pāpakā akusalā vitakkā chandūpasaṃhitāpi dosūpasaṃhitāpi mohūpasaṃhitāpi te pahīyanti te abbhatthaṃ gacchanti. Tesaṃ pahānā ajjhattameva cittaṃ santiṭṭhati sannisīdati ekodi hoti samādhiyati.
༢༢༡. ‘‘ཡཏོ ཁོ 9, བྷིཀྑཝེ, བྷིཀྑུནོ ཡཾ ནིམིཏྟཾ ཨཱགམྨ ཡཾ ནིམིཏྟཾ མནསིཀརོཏོ ཨུཔྤཛྫནྟི པཱཔཀཱ ཨཀུསལཱ ཝིཏཀྐཱ ཚནྡཱུཔསཾཧིཏཱཔི དོསཱུཔསཾཧིཏཱཔི མོཧཱུཔསཾཧིཏཱཔི, ཏསྶ ཏམྷཱ ནིམིཏྟཱ ཨཉྙཾ ནིམིཏྟཾ མནསིཀརོཏོ ཀུསལཱུཔསཾཧིཏཾ ཡེ པཱཔཀཱ ཨཀུསལཱ ཝིཏཀྐཱ ཚནྡཱུཔསཾཧིཏཱཔི དོསཱུཔསཾཧིཏཱཔི མོཧཱུཔསཾཧིཏཱཔི ཏེ པཧཱིཡནྟི ཏེ ཨབྦྷཏྠཾ གཙྪནྟི། ཏེསཾ པཧཱནཱ ཨཛ྄ཛྷཏྟམེཝ ཙིཏྟཾ སནྟིཊྛཏི སནྣིསཱིདཏི ཨེཀོདི ཧོཏི སམཱདྷིཡཏི། ཏེསམྤི ཝིཏཀྐཱནཾ ཨཱདཱིནཝཾ ཨུཔཔརིཀྑཏོ ཡེ པཱཔཀཱ ཨཀུསལཱ ཝིཏཀྐཱ ཚནྡཱུཔསཾཧིཏཱཔི དོསཱུཔསཾཧིཏཱཔི མོཧཱུཔསཾཧིཏཱཔི ཏེ པཧཱིཡནྟི ཏེ ཨབྦྷཏྠཾ གཙྪནྟི། ཏེསཾ པཧཱནཱ ཨཛ྄ཛྷཏྟམེཝ ཙིཏྟཾ སནྟིཊྛཏི སནྣིསཱིདཏི ཨེཀོདི ཧོཏི སམཱདྷིཡཏི། ཏེསམྤི ཝིཏཀྐཱནཾ ཨསཏིཨམནསིཀཱརཾ ཨཱཔཛྫཏོ ཡེ པཱཔཀཱ ཨཀུསལཱ ཝིཏཀྐཱ ཚནྡཱུཔསཾཧིཏཱཔི དོསཱུཔསཾཧིཏཱཔི མོཧཱུཔསཾཧིཏཱཔི ཏེ པཧཱིཡནྟི ཏེ ཨབྦྷཏྠཾ གཙྪནྟི། ཏེསཾ པཧཱནཱ ཨཛ྄ཛྷཏྟམེཝ ཙིཏྟཾ སནྟིཊྛཏི སནྣིསཱིདཏི ཨེཀོདི ཧོཏི སམཱདྷིཡཏི། ཏེསམྤི ཝིཏཀྐཱནཾ ཝིཏཀྐསངྑཱརསཎྛཱནཾ མནསིཀརོཏོ ཡེ པཱཔཀཱ ཨཀུསལཱ ཝིཏཀྐཱ ཚནྡཱུཔསཾཧིཏཱཔི དོསཱུཔསཾཧིཏཱཔི མོཧཱུཔསཾཧིཏཱཔི ཏེ པཧཱིཡནྟི ཏེ ཨབྦྷཏྠཾ གཙྪནྟི། ཏེསཾ པཧཱནཱ ཨཛ྄ཛྷཏྟམེཝ ཙིཏྟཾ སནྟིཊྛཏི སནྣིསཱིདཏི ཨེཀོདི ཧོཏི སམཱདྷིཡཏི། དནྟེབྷིདནྟམཱདྷཱཡ ཛིཝ྄ཧཱཡ ཏཱལུཾ ཨཱཧཙྩ ཙེཏསཱ ཙིཏྟཾ ཨབྷིནིགྒཎྷཏོ ཨབྷིནིཔྤཱིལ༹ཡཏོ ཨབྷིསནྟཱཔཡཏོ ཡེ པཱཔཀཱ ཨཀུསལཱ ཝིཏཀྐཱ ཚནྡཱུཔསཾཧིཏཱཔི དོསཱུཔསཾཧིཏཱཔི མོཧཱུཔསཾཧིཏཱཔི ཏེ པཧཱིཡནྟི ཏེ ཨབྦྷཏྠཾ གཙྪནྟི། ཏེསཾ པཧཱནཱ ཨཛ྄ཛྷཏྟམེཝ ཙིཏྟཾ སནྟིཊྛཏི སནྣིསཱིདཏི ཨེཀོདི ཧོཏི སམཱདྷིཡཏི། ཨཡཾ ཝུཙྩཏི, བྷིཀྑཝེ, བྷིཀྑུ ཝསཱི ཝིཏཀྐཔརིཡཱཡཔཐེསུ། ཡཾ ཝིཏཀྐཾ ཨཱཀངྑིསྶཏི ཏཾ ཝིཏཀྐཾ ཝིཏཀྐེསྶཏི, ཡཾ ཝིཏཀྐཾ ནཱཀངྑིསྶཏི ན ཏཾ ཝིཏཀྐཾ ཝིཏཀྐེསྶཏི། ཨཙྪེཙྪི ཏཎྷཾ, ཝིཝཏྟཡི 10 སཾཡོཛནཾ, སམྨཱ མཱནཱབྷིསམཡཱ ཨནྟམཀཱསི དུཀྑསྶཱ’’ཏི།
221. ‘‘Yato kho 11, bhikkhave, bhikkhuno yaṃ nimittaṃ āgamma yaṃ nimittaṃ manasikaroto uppajjanti pāpakā akusalā vitakkā chandūpasaṃhitāpi dosūpasaṃhitāpi mohūpasaṃhitāpi, tassa tamhā nimittā aññaṃ nimittaṃ manasikaroto kusalūpasaṃhitaṃ ye pāpakā akusalā vitakkā chandūpasaṃhitāpi dosūpasaṃhitāpi mohūpasaṃhitāpi te pahīyanti te abbhatthaṃ gacchanti. Tesaṃ pahānā ajjhattameva cittaṃ santiṭṭhati sannisīdati ekodi hoti samādhiyati. Tesampi vitakkānaṃ ādīnavaṃ upaparikkhato ye pāpakā akusalā vitakkā chandūpasaṃhitāpi dosūpasaṃhitāpi mohūpasaṃhitāpi te pahīyanti te abbhatthaṃ gacchanti. Tesaṃ pahānā ajjhattameva cittaṃ santiṭṭhati sannisīdati ekodi hoti samādhiyati. Tesampi vitakkānaṃ asatiamanasikāraṃ āpajjato ye pāpakā akusalā vitakkā chandūpasaṃhitāpi dosūpasaṃhitāpi mohūpasaṃhitāpi te pahīyanti te abbhatthaṃ gacchanti. Tesaṃ pahānā ajjhattameva cittaṃ santiṭṭhati sannisīdati ekodi hoti samādhiyati. Tesampi vitakkānaṃ vitakkasaṅkhārasaṇṭhānaṃ manasikaroto ye pāpakā akusalā vitakkā chandūpasaṃhitāpi dosūpasaṃhitāpi mohūpasaṃhitāpi te pahīyanti te abbhatthaṃ gacchanti. Tesaṃ pahānā ajjhattameva cittaṃ santiṭṭhati sannisīdati ekodi hoti samādhiyati. Dantebhidantamādhāya jivhāya tāluṃ āhacca cetasā cittaṃ abhiniggaṇhato abhinippīḷayato abhisantāpayato ye pāpakā akusalā vitakkā chandūpasaṃhitāpi dosūpasaṃhitāpi mohūpasaṃhitāpi te pahīyanti te abbhatthaṃ gacchanti. Tesaṃ pahānā ajjhattameva cittaṃ santiṭṭhati sannisīdati ekodi hoti samādhiyati. Ayaṃ vuccati, bhikkhave, bhikkhu vasī vitakkapariyāyapathesu. Yaṃ vitakkaṃ ākaṅkhissati taṃ vitakkaṃ vitakkessati, yaṃ vitakkaṃ nākaṅkhissati na taṃ vitakkaṃ vitakkessati. Acchecchi taṇhaṃ, vivattayi 12 saṃyojanaṃ, sammā mānābhisamayā antamakāsi dukkhassā’’ti.
ཨིདམཝོཙ བྷགཝཱ། ཨཏྟམནཱ ཏེ བྷིཀྑཱུ བྷགཝཏོ བྷཱསིཏཾ ཨབྷིནནྡུནྟི།
Idamavoca bhagavā. Attamanā te bhikkhū bhagavato bhāsitaṃ abhinandunti.
ཝིཏཀྐསཎྛཱནསུཏྟཾ ནིཊྛིཏཾ དསམཾ།
Vitakkasaṇṭhānasuttaṃ niṭṭhitaṃ dasamaṃ.
སཱིཧནཱདཝགྒོ ནིཊྛིཏོ དུཏིཡོ།
Sīhanādavaggo niṭṭhito dutiyo.
ཏསྶུདྡཱནཾ –
Tassuddānaṃ –
ཙཱུལ༹སཱིཧནཱདལོམཧཾསཝརོ, མཧཱཙཱུལ༹དུཀྑཀྑནྡྷཨནུམཱནིཀསུཏྟཾ།
Cūḷasīhanādalomahaṃsavaro, mahācūḷadukkhakkhandhaanumānikasuttaṃ;
ཁིལཔཏྠམདྷུཔིཎྜིཀདྭིདྷཱཝིཏཀྐ, པཉྩནིམིཏྟཀཐཱ པུན ཝགྒོ༎
Khilapatthamadhupiṇḍikadvidhāvitakka, pañcanimittakathā puna vaggo.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / མཛྫྷིམནིཀཱཡ (ཨཊྛཀཐཱ) • Majjhimanikāya (aṭṭhakathā) / ༡༠. ཝིཏཀྐསཎྛཱནསུཏྟཝཎྞནཱ • 10. Vitakkasaṇṭhānasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / མཛྫྷིམནིཀཱཡ (ཊཱིཀཱ) • Majjhimanikāya (ṭīkā) / ༡༠. ཝིཏཀྐསཎྛཱནསུཏྟཝཎྞནཱ • 10. Vitakkasaṇṭhānasuttavaṇṇanā
