| Library / Tipiṭaka / д̇ибидага • Tipiṭaka / маж̇жхиманигааяа (адтагат̇аа) • Majjhimanikāya (aṭṭhakathā) |
10. вид̇аггасан̣таанасуд̇д̇аван̣н̣анаа
10. Vitakkasaṇṭhānasuttavaṇṇanā
216. звам̣ мз суд̇анд̇и вид̇аггасан̣таанасуд̇д̇ам̣. д̇ад̇т̇а ад̇хижид̇д̇амануяуд̇д̇знаад̇и д̣̇асагусалагаммабат̇авасзна уббаннам̣ жид̇д̇ам̣ жид̇д̇амзва, вибассанаабаад̣̇агаадтасамаабад̇д̇ижид̇д̇ам̣ д̇ад̇о жид̇д̇ад̇о ад̇хигам̣ жид̇д̇анд̇и ад̇хижид̇д̇ам̣. ануяуд̇д̇знаад̇и д̇ам̣ ад̇хижид̇д̇ам̣ ануяуд̇д̇зна, д̇ад̇т̇а яуд̇д̇аббаяуд̇д̇знаад̇и ад̇т̇о.
216.Evaṃme sutanti vitakkasaṇṭhānasuttaṃ. Tattha adhicittamanuyuttenāti dasakusalakammapathavasena uppannaṃ cittaṃ cittameva, vipassanāpādakaaṭṭhasamāpatticittaṃ tato cittato adhikaṃ cittanti adhicittaṃ. Anuyuttenāti taṃ adhicittaṃ anuyuttena, tattha yuttappayuttenāti attho.
д̇ад̇рааяам̣ бхигку бурзбхад̇д̇ам̣ бин̣д̣ааяа жарид̇ваа бажчаабхад̇д̇ам̣ бин̣д̣абаад̇аббадигганд̇о нисийд̣̇анам̣ аад̣̇ааяа асугасмим̣ ругкамуулз ваа ванасан̣д̣з ваа баб̣б̣ад̇абаад̣̇з ваа баб̣бхаарз ваа саман̣ад̇хаммам̣ гариссаамийд̇и нигкаманд̇оби, д̇ад̇т̇а г̇анд̇ваа хад̇т̇зхи ваа баад̣̇зхи ваа нисаж̇ж̇адтаанад̇о д̇ин̣абан̣н̣аани абанзнд̇оби ад̇хижид̇д̇ам̣ ануяуд̇д̇оязва. нисийд̣̇ид̇ваа бана хад̇т̇абаад̣̇з д̇ховид̇ваа баллан̇гам̣ аабхуж̇ид̇ваа муулагаммадтаанам̣ г̇ахзд̇ваа вихаранд̇оби ад̇хижид̇д̇ам̣ ануяуд̇д̇оязва.
Tatrāyaṃ bhikkhu purebhattaṃ piṇḍāya caritvā pacchābhattaṃ piṇḍapātappaṭikkanto nisīdanaṃ ādāya asukasmiṃ rukkhamūle vā vanasaṇḍe vā pabbatapāde vā pabbhāre vā samaṇadhammaṃ karissāmīti nikkhamantopi, tattha gantvā hatthehi vā pādehi vā nisajjaṭṭhānato tiṇapaṇṇāni apanentopi adhicittaṃ anuyuttoyeva. Nisīditvā pana hatthapāde dhovitvā pallaṅkaṃ ābhujitvā mūlakammaṭṭhānaṃ gahetvā viharantopi adhicittaṃ anuyuttoyeva.
нимид̇д̇аанийд̇и гааран̣аани. гаалзна гааланд̇и самаяз самаяз. на ну жа гаммадтаанам̣ наама мухуд̇д̇амби ачад̣д̣зд̇ваа ниранд̇арам̣ манасигаад̇аб̣б̣ам̣, гасмаа бхаг̇аваа ‘‘гаалзна гаала’’нд̇и аахаад̇и. баал̣ияан̃хи адтад̇им̣са гаммадтаанаани вибхад̇д̇аани, д̇зсу бхигкунаа ад̇д̇ано жид̇д̇аружид̇ам̣ гаммадтаанам̣ г̇ахзд̇ваа нисиннзна яаава гожид̣̇зва убаггилзсо нуббаж̇ж̇ад̇и, д̇аава имзсам̣ нимид̇д̇аанам̣ манасигаарагижжам̣ над̇т̇и. яад̣̇аа бана уббаж̇ж̇ад̇и, д̇ад̣̇аа имаани г̇ахзд̇ваа жид̇д̇з уббаннам̣ аб̣б̣уд̣̇ам̣ нийхарид̇аб̣б̣анд̇и д̣̇ассзнд̇о звамааха.
Nimittānīti kāraṇāni. Kālena kālanti samaye samaye. Na nu ca kammaṭṭhānaṃ nāma muhuttampi achaḍḍetvā nirantaraṃ manasikātabbaṃ, kasmā bhagavā ‘‘kālena kāla’’nti āhāti. Pāḷiyañhi aṭṭhatiṃsa kammaṭṭhānāni vibhattāni, tesu bhikkhunā attano cittarucitaṃ kammaṭṭhānaṃ gahetvā nisinnena yāva kocideva upakkileso nuppajjati, tāva imesaṃ nimittānaṃ manasikārakiccaṃ natthi. Yadā pana uppajjati, tadā imāni gahetvā citte uppannaṃ abbudaṃ nīharitabbanti dassento evamāha.
чанд̣̇уубасам̣хид̇аад̇и чанд̣̇асахаг̇ад̇аа рааг̇асамбаяуд̇д̇аа. имзсам̣ бана д̇ин̣н̣ам̣ вид̇аггаанам̣ кзд̇д̇ан̃жа аарамман̣ан̃жа ж̇аанид̇аб̣б̣ам̣. д̇ад̇т̇а чанд̣̇уубасан̃хид̇аанам̣ адта лобхасахаг̇ад̇ажид̇д̇аани кзд̇д̇ам̣, д̣̇осуубасан̃хид̇аанам̣ д̣̇вз д̣̇оманассасахаг̇ад̇аани, мохуубасан̃хид̇аанам̣ д̣̇ваад̣̇асаби агусалажид̇д̇аани. вижигижчаауд̣̇д̇хажжасамбаяуд̇д̇ажид̇д̇аани бана д̣̇вз зд̇зсам̣ баадибуг̇г̇алигам̣ кзд̇д̇ам̣. саб̣б̣зсамби сад̇д̇аа жзва сан̇каараа жа аарамман̣ам̣, идтаанидтаасамабзгкид̇зсу хи сад̇д̇зсу жа сан̇каарзсу жа д̇з уббаж̇ж̇анд̇и . ан̃н̃амби нимид̇д̇ам̣ манасигаад̇аб̣б̣ам̣ гусалуубасам̣хид̇анд̇и д̇ад̇о нимид̇д̇ад̇о ан̃н̃ам̣ гусаланиссид̇ам̣ нимид̇д̇ам̣ манасигаад̇аб̣б̣ам̣. д̇ад̇т̇а ан̃н̃ам̣ нимид̇д̇ам̣ наама чанд̣̇уубасан̃хид̇з вид̇аггз сад̇д̇зсу уббаннз асубхабхааванаа ан̃н̃ам̣ нимид̇д̇ам̣ наама. сан̇каарзсу уббаннз анижжаманасигааро ан̃н̃ам̣ нимид̇д̇ам̣ наама. д̣̇осуубасан̃хид̇з сад̇д̇зсу уббаннз мзд̇д̇аабхааванаа ан̃н̃ам̣ нимид̇д̇ам̣ наама. сан̇каарзсу уббаннз д̇хаад̇уманасигааро ан̃н̃ам̣ нимид̇д̇ам̣ наама. мохуубасан̃хид̇з яад̇т̇а гад̇т̇ажи уббаннз бан̃жад̇хаммуубаниссаяо ан̃н̃ам̣ нимид̇д̇ам̣ наама.
Chandūpasaṃhitāti chandasahagatā rāgasampayuttā. Imesaṃ pana tiṇṇaṃ vitakkānaṃ khettañca ārammaṇañca jānitabbaṃ. Tattha chandūpasañhitānaṃ aṭṭha lobhasahagatacittāni khettaṃ, dosūpasañhitānaṃ dve domanassasahagatāni, mohūpasañhitānaṃ dvādasapi akusalacittāni. Vicikicchāuddhaccasampayuttacittāni pana dve etesaṃ pāṭipuggalikaṃ khettaṃ. Sabbesampi sattā ceva saṅkhārā ca ārammaṇaṃ, iṭṭhāniṭṭhaasamapekkhitesu hi sattesu ca saṅkhāresu ca te uppajjanti . Aññampi nimittaṃ manasikātabbaṃ kusalūpasaṃhitanti tato nimittato aññaṃ kusalanissitaṃ nimittaṃ manasikātabbaṃ. Tattha aññaṃ nimittaṃ nāma chandūpasañhite vitakke sattesu uppanne asubhabhāvanā aññaṃ nimittaṃ nāma. Saṅkhāresu uppanne aniccamanasikāro aññaṃ nimittaṃ nāma. Dosūpasañhite sattesu uppanne mettābhāvanā aññaṃ nimittaṃ nāma. Saṅkhāresu uppanne dhātumanasikāro aññaṃ nimittaṃ nāma. Mohūpasañhite yattha katthaci uppanne pañcadhammūpanissayo aññaṃ nimittaṃ nāma.
имасса хад̇т̇аа ваа собханаа баад̣̇аа ваад̇иаад̣̇инаа наязна хи сад̇д̇зсу лобхз уббаннз асубхад̇о убасам̣харид̇аб̣б̣ам̣. гимхи саарад̇д̇оси? гзсзсу саарад̇д̇оси. ломзсу…бз… муд̇д̇зсу саарад̇д̇оси. аяам̣ ад̇д̇абхааво наама д̇ийхи адтисад̇зхи уссаабид̇о, навахи нхаарусад̇зхи ааб̣ад̣̇д̇хо, навахи мам̣сабзсисад̇зхи анулид̇д̇о, аллажаммзна барияонад̣̇д̇хо, чавирааг̇зна бадижчанно, навахи ван̣амукзхи наванавуд̇иломагуубасахассзхи жа асужи баг̇гхарад̇и, гун̣абабуурид̇о, д̣̇уг̇г̇анд̇хо, ж̇зг̇ужчо, бадигууло, д̣̇вад̇д̇им̣сагун̣абасан̃жаяо, над̇т̇зд̇т̇а саарам̣ ваа варам̣ ваад̇и звам̣ асубхад̇о убасам̣харанд̇асса сад̇д̇зсу уббанно лобхо бахийяад̇и, д̇знасса асубхад̇о убасам̣харан̣ам̣ ан̃н̃ам̣ нимид̇д̇ам̣ наама ход̇и.
Imassa hatthā vā sobhanā pādā vātiādinā nayena hi sattesu lobhe uppanne asubhato upasaṃharitabbaṃ. Kimhi sārattosi? Kesesu sārattosi. Lomesu…pe… muttesu sārattosi. Ayaṃ attabhāvo nāma tīhi aṭṭhisatehi ussāpito, navahi nhārusatehi ābaddho, navahi maṃsapesisatehi anulitto, allacammena pariyonaddho, chavirāgena paṭicchanno, navahi vaṇamukhehi navanavutilomakūpasahassehi ca asuci paggharati, kuṇapapūrito, duggandho, jeguccho, paṭikūlo, dvattiṃsakuṇapasañcayo, natthettha sāraṃ vā varaṃ vāti evaṃ asubhato upasaṃharantassa sattesu uppanno lobho pahīyati, tenassa asubhato upasaṃharaṇaṃ aññaṃ nimittaṃ nāma hoti.
бад̇д̇ажийвараад̣̇ийсу сан̇каарзсу лобхз уббаннз д̣̇вийхаагаарзхи сан̇каарамаж̇жхад̇д̇ад̇ам̣ самудтаабзд̇ийд̇и сад̇ибадтаанаван̣н̣анааяам̣ вуд̇д̇анаязна ассаамигад̇аавагаалигабхаававасзна манасигарод̇о со бахийяад̇и. д̇знасса анижжад̇о манасигааро ан̃н̃ам̣ нимид̇д̇ам̣ наама ход̇и. сад̇д̇зсу д̣̇осз уббаннз бана аагхаад̇авинаяагагажобамоваад̣̇аад̣̇ийнам̣ васзна мзд̇д̇аа бхаавзд̇аб̣б̣аа, д̇ам̣ бхааваяад̇о д̣̇осо бахийяад̇и, д̇знасса мзд̇д̇аабхааванаа ан̃н̃ам̣ нимид̇д̇ам̣ наама ход̇и. каан̣уган̣дагад̇ин̣абан̣н̣аад̣̇ийсу бана д̣̇осз уббаннз д̇вам̣ гасса губбаси, гим̣ бат̇авийд̇хаад̇уяаа, уд̣̇ааху аабод̇хаад̇уяаа, го ваа банааяам̣ губбад̇и наама, гим̣ бат̇авийд̇хаад̇у уд̣̇ааху аабод̇хаад̇ууд̇иаад̣̇инаа наязна д̇хаад̇уманасигаарам̣ гаронд̇асса д̣̇осо бахийяад̇и. д̇знасса д̇хаад̇уманасигааро ан̃н̃ам̣ нимид̇д̇ам̣ наама ход̇и.
Pattacīvarādīsu saṅkhāresu lobhe uppanne dvīhākārehi saṅkhāramajjhattataṃ samuṭṭhāpetīti satipaṭṭhānavaṇṇanāyaṃ vuttanayena assāmikatāvakālikabhāvavasena manasikaroto so pahīyati. Tenassa aniccato manasikāro aññaṃ nimittaṃ nāma hoti. Sattesu dose uppanne pana āghātavinayakakacopamovādādīnaṃ vasena mettā bhāvetabbā, taṃ bhāvayato doso pahīyati, tenassa mettābhāvanā aññaṃ nimittaṃ nāma hoti. Khāṇukaṇṭakatiṇapaṇṇādīsu pana dose uppanne tvaṃ kassa kuppasi, kiṃ pathavīdhātuyā, udāhu āpodhātuyā, ko vā panāyaṃ kuppati nāma, kiṃ pathavīdhātu udāhu āpodhātūtiādinā nayena dhātumanasikāraṃ karontassa doso pahīyati. Tenassa dhātumanasikāro aññaṃ nimittaṃ nāma hoti.
мохз бана яад̇т̇а гад̇т̇ажи уббаннз –
Mohe pana yattha katthaci uppanne –
‘‘г̇аруусам̣ваасо уд̣̇д̣̇зсо, уд̣̇д̣̇идтабарибужчанам̣;
‘‘Garūsaṃvāso uddeso, uddiṭṭhaparipucchanaṃ;
гаалзна д̇хаммассаванам̣, таанаадтаанавинижчаяо;
Kālena dhammassavanaṃ, ṭhānāṭṭhānavinicchayo;
бан̃жа д̇хаммуубаниссааяа, мохад̇хаад̇у бахийяад̇ий’’д̇и. –
Pañca dhammūpanissāya, mohadhātu pahīyatī’’ti. –
имз бан̃жа д̇хаммаа убаниссид̇аб̣б̣аа. г̇арум̣ убаниссааяа вихаранд̇о хи бхигку – ‘‘аажарияо г̇аамаббавзсанам̣ анаабужчанд̇асса бад̇д̇агаалз вад̇д̇ам̣ агаронд̇асса гхадасад̇ауд̣̇агаахаран̣аад̣̇ид̣̇ан̣д̣агаммам̣ гарод̇ий’’д̇и яад̇д̇аббадияад̇д̇о ход̇и, ат̇асса мохо бахийяад̇и. уд̣̇д̣̇зсам̣ г̇ан̣ханд̇оби – ‘‘аажарияо уд̣̇д̣̇зсагаалз уд̣̇д̣̇зсам̣ аг̇г̇ан̣ханд̇асса асаад̇хугам̣ саж̇жхааяанд̇асса жа д̣̇ан̣д̣агаммам̣ гарод̇ий’’д̇и яад̇д̇аббадияад̇д̇о ход̇и, звамбисса мохо бахийяад̇и. г̇арубхааванийяз бхигкуу убасам̣гамид̇ваа ‘‘ид̣̇ам̣ бханд̇з гат̇ам̣ имасса го ад̇т̇о’’д̇и барибужчанд̇о гам̣кам̣ винод̣̇зд̇и, звамбисса мохо бахийяад̇и. гаалзна д̇хаммасаванадтаанам̣ г̇анд̇ваа саггажжам̣ д̇хаммам̣ сун̣анд̇ассааби д̇зсу д̇зсу таанзсу ад̇т̇о баагадо ход̇и. звамбисса мохо бахийяад̇и. ид̣̇амасса гааран̣ам̣, ид̣̇ам̣ на гааран̣анд̇и таанаадтаанавинижчаяз чзго ход̇и, звамбисса мохо бахийяад̇и. д̇знасса бан̃жад̇хаммуубаниссаяо ан̃н̃ам̣ нимид̇д̇ам̣ наама ход̇и.
Ime pañca dhammā upanissitabbā. Garuṃ upanissāya viharanto hi bhikkhu – ‘‘ācariyo gāmappavesanaṃ anāpucchantassa pattakāle vattaṃ akarontassa ghaṭasataudakāharaṇādidaṇḍakammaṃ karotī’’ti yattappaṭiyatto hoti, athassa moho pahīyati. Uddesaṃ gaṇhantopi – ‘‘ācariyo uddesakāle uddesaṃ aggaṇhantassa asādhukaṃ sajjhāyantassa ca daṇḍakammaṃ karotī’’ti yattappaṭiyatto hoti, evampissa moho pahīyati. Garubhāvanīye bhikkhū upasaṃkamitvā ‘‘idaṃ bhante kathaṃ imassa ko attho’’ti paripucchanto kaṃkhaṃ vinodeti, evampissa moho pahīyati. Kālena dhammasavanaṭṭhānaṃ gantvā sakkaccaṃ dhammaṃ suṇantassāpi tesu tesu ṭhānesu attho pākaṭo hoti. Evampissa moho pahīyati. Idamassa kāraṇaṃ, idaṃ na kāraṇanti ṭhānāṭṭhānavinicchaye cheko hoti, evampissa moho pahīyati. Tenassa pañcadhammūpanissayo aññaṃ nimittaṃ nāma hoti.
абижа адтад̇им̣сааяа аарамман̣зсу яам̣гин̃жи бхаавзнд̇ассааби имз вид̇аггаа бахийяанд̇и зва. имаани бана нимид̇д̇аани уж̇увибажжанийгаани бадибагкабхууд̇аани. имзхи бахийнаа рааг̇аад̣̇аяо суббахийнаа хонд̇и. яат̇аа хи аг̇г̇им̣ аллагадтзхиби бам̣суухиби саакаад̣̇ийхиби бот̇зд̇ваа ниб̣б̣аабзнд̇иязва, уд̣̇агам̣ бана аг̇г̇исса уж̇увибажжанийгам̣, д̇зна ниб̣б̣уд̇о суниб̣б̣уд̇о ход̇и, звамимзхи нимид̇д̇зхи бахийнаа рааг̇аад̣̇аяо суббахийнаа хонд̇и. д̇асмаа зд̇аани гат̇ид̇аанийд̇и взд̣̇ид̇аб̣б̣аани.
Apica aṭṭhatiṃsāya ārammaṇesu yaṃkiñci bhāventassāpi ime vitakkā pahīyanti eva. Imāni pana nimittāni ujuvipaccanīkāni paṭipakkhabhūtāni. Imehi pahīnā rāgādayo suppahīnā honti. Yathā hi aggiṃ allakaṭṭhehipi paṃsūhipi sākhādīhipi pothetvā nibbāpentiyeva, udakaṃ pana aggissa ujuvipaccanīkaṃ, tena nibbuto sunibbuto hoti, evamimehi nimittehi pahīnā rāgādayo suppahīnā honti. Tasmā etāni kathitānīti veditabbāni.
гусалуубасам̣хид̇анд̇и гусаланиссид̇ам̣ гусаласса бажжаяабхууд̇ам̣. аж̇жхад̇д̇амзваад̇и г̇ожараж̇жхад̇д̇ам̣язва. балаг̇ан̣д̣од̇и вад̣дхагий. сукумааяа аан̣ияаад̇и яам̣ аан̣им̣ нийхарид̇угаамо ход̇и, д̇ад̇о сукумад̇арааяа саарад̣̇ааруаан̣ияаа. ол̣ааригам̣ аан̣инд̇и жанд̣̇апалагз ваа саарапалагз ваа аагодид̇ам̣ висамаан̣им̣. абхиниханзяяаад̇и муг̇г̇арзна аагодзнд̇о ханзяяа. абхинийхарзяяаад̇и звам̣ абхинихананд̇о палагад̇о нийхарзяяа. абхинивасзяяаад̇и ид̣̇аани б̣аху нигканд̇аад̇и н̃ад̇ваа хад̇т̇зна жаалзд̇ваа ниггад̣дхзяяа . д̇ад̇т̇а палагам̣ вияа жид̇д̇ам̣, палагз висамаан̣ий вияа агусалавид̇аггаа, сукумаан̣ий вияа ан̃н̃ам̣ асубхабхааванаад̣̇игусаланимид̇д̇ам̣, сукумаан̣ияаа ол̣ааригаан̣инийхаран̣ам̣ вияа асубхабхааванаад̣̇ийхи гусаланимид̇д̇зхи д̇зсам̣ вид̇аггаанам̣ нийхаран̣ам̣.
Kusalūpasaṃhitanti kusalanissitaṃ kusalassa paccayabhūtaṃ. Ajjhattamevāti gocarajjhattaṃyeva. Palagaṇḍoti vaḍḍhakī. Sukhumāya āṇiyāti yaṃ āṇiṃ nīharitukāmo hoti, tato sukhumatarāya sāradāruāṇiyā. Oḷārikaṃ āṇinti candaphalake vā sāraphalake vā ākoṭitaṃ visamāṇiṃ. Abhinihaneyyāti muggarena ākoṭento haneyya. Abhinīhareyyāti evaṃ abhinihananto phalakato nīhareyya. Abhinivaseyyāti idāni bahu nikkhantāti ñatvā hatthena cāletvā nikkaḍḍheyya . Tattha phalakaṃ viya cittaṃ, phalake visamāṇī viya akusalavitakkā, sukhumāṇī viya aññaṃ asubhabhāvanādikusalanimittaṃ, sukhumāṇiyā oḷārikāṇinīharaṇaṃ viya asubhabhāvanādīhi kusalanimittehi tesaṃ vitakkānaṃ nīharaṇaṃ.
217. ахигун̣абзнаад̇иаад̣̇и ад̇иж̇зг̇ужчабадигуулагун̣абад̣̇ассанад̇т̇ам̣ вуд̇д̇ам̣. ган̣тз аасад̇д̇знаад̇и гзнажид̣̇зва бажжад̇т̇игзна аанзд̇ваа ган̣тз б̣ад̣̇д̇хзна бадимуггзна. аддиязяяаад̇и аддо д̣̇угкид̇о бхавзяяа. харааязяяаад̇и лаж̇ж̇зяяа. ж̇иг̇ужчзяяаад̇и сан̃ж̇аад̇аж̇иг̇ужчо бхавзяяа.
217.Ahikuṇapenātiādi atijegucchapaṭikūlakuṇapadassanatthaṃ vuttaṃ. Kaṇṭhe āsattenāti kenacideva paccatthikena ānetvā kaṇṭhe baddhena paṭimukkena. Aṭṭiyeyyāti aṭṭo dukkhito bhaveyya. Harāyeyyāti lajjeyya. Jiguccheyyāti sañjātajiguccho bhaveyya.
бахийяанд̇ийд̇и звам̣ иминааби гааран̣зна зд̇з агусалаа д̇хаммаа сааваж̇ж̇аа д̣̇угкавибаагаад̇и ад̇д̇ано бан̃н̃ааб̣алзна убабаригкад̇о ахигун̣абаад̣̇ийни вияа ж̇иг̇ужчанд̇асса бахийяанд̇и. яо бана ад̇д̇ано бан̃н̃ааб̣алзна убабаригкид̇ум̣ на саггод̇и, д̇зна аажарияам̣ ваа убаж̇жхааяам̣ ваа ан̃н̃ад̇арам̣ ваа г̇арудтаанияам̣ саб̣рахмажаарим̣ сан̇гхад̇т̇зрам̣ ваа убасан̇гамид̇ваа гхан̣д̣им̣ бахарид̇ваа бхигкусан̇гхамзва ваа саннибаад̇зд̇ваа аарожзд̇аб̣б̣ам̣, б̣ахунан̃хи саннибаад̇з бхависсад̇зва зго бан̣д̣ид̇амануссо, свааяам̣ звам̣ зд̇зсу аад̣̇ийнаво д̣̇адтаб̣б̣од̇и гат̇зссад̇и, гааяавижчинд̣̇анийяагат̇аад̣̇ийхи ваа бана д̇з вид̇аггз ниг̇г̇ан̣хиссад̇ийд̇и.
Pahīyantīti evaṃ imināpi kāraṇena ete akusalā dhammā sāvajjā dukkhavipākāti attano paññābalena upaparikkhato ahikuṇapādīni viya jigucchantassa pahīyanti. Yo pana attano paññābalena upaparikkhituṃ na sakkoti, tena ācariyaṃ vā upajjhāyaṃ vā aññataraṃ vā garuṭṭhāniyaṃ sabrahmacāriṃ saṅghattheraṃ vā upasaṅkamitvā ghaṇḍiṃ paharitvā bhikkhusaṅghameva vā sannipātetvā ārocetabbaṃ, bahunañhi sannipāte bhavissateva eko paṇḍitamanusso, svāyaṃ evaṃ etesu ādīnavo daṭṭhabboti kathessati, kāyavicchindanīyakathādīhi vā pana te vitakke niggaṇhissatīti.
218. асад̇иаманасигааро аабаж̇ж̇ид̇аб̣б̣од̇и нзва со вид̇агго сарид̇аб̣б̣о на манасигаад̇аб̣б̣о, ан̃н̃авихид̇агзна бхавид̇аб̣б̣ам̣. яат̇аа хи руубам̣ абассид̇угаамо бурисо агкийни нимийлзяяа, звамзва муулагаммадтаанам̣ г̇ахзд̇ваа нисиннзна бхигкунаа жид̇д̇амхи вид̇аггз уббаннз ан̃н̃авихид̇агзна бхавид̇аб̣б̣ам̣. звамасса со вид̇агго бахийяад̇и, д̇асмим̣ бахийнз буна гаммадтаанам̣ г̇ахзд̇ваа нисийд̣̇ид̇аб̣б̣ам̣.
218.Asatiamanasikāro āpajjitabboti neva so vitakko saritabbo na manasikātabbo, aññavihitakena bhavitabbaṃ. Yathā hi rūpaṃ apassitukāmo puriso akkhīni nimīleyya, evameva mūlakammaṭṭhānaṃ gahetvā nisinnena bhikkhunā cittamhi vitakke uppanne aññavihitakena bhavitabbaṃ. Evamassa so vitakko pahīyati, tasmiṃ pahīne puna kammaṭṭhānaṃ gahetvā nisīditabbaṃ.
сажз на бахийяад̇и, уг̇г̇ахид̇о д̇хаммагат̇аабаб̣анд̇хо ход̇и, со махаасад̣̇д̣̇зна саж̇жхааяид̇аб̣б̣о. звамби жз ан̃н̃авихид̇агасса сад̇о со на бахийяад̇и. т̇авигааяа мудтибод̇т̇аго ход̇и, яад̇т̇а жа б̣уд̣̇д̇хаван̣н̣ааби д̇хаммаван̣н̣ааби ликид̇аа хонд̇и, д̇ам̣ нийхарид̇ваа ваажзнд̇зна ан̃н̃авихид̇агзна бхавид̇аб̣б̣ам̣. звамби жз на бахийяад̇и, т̇авигад̇о аран̣исахид̇аани нийхарид̇ваа ‘‘аяам̣ уд̇д̇арааран̣ий аяам̣ ад̇харааран̣ий’’д̇и ааваж̇ж̇знд̇зна ан̃н̃авихид̇агзна бхавид̇аб̣б̣ам̣. звамби жз на бахийяад̇и, сибаадигам̣ нийхарид̇ваа ‘‘ид̣̇ам̣ аараган̣дагам̣ наама, аяам̣ бибпалаго наама, ид̣̇ам̣ накажчзд̣̇анам̣ наама, аяам̣ суужи наамаа’’д̇и баригкаарам̣ саманнаанзнд̇зна ан̃н̃авихид̇агзна бхавид̇аб̣б̣ам̣. звамби жз на бахийяад̇и, суужим̣ г̇ахзд̇ваа жийварз ж̇ин̣н̣адтаанам̣ сиб̣б̣анд̇зна ан̃н̃авихид̇агзна бхавид̇аб̣б̣ам̣. звам̣ яаава на бахийяад̇и, д̇аава д̇ам̣ д̇ам̣ гусалагаммам̣ гаронд̇зна ан̃н̃авихид̇агзна бхавид̇аб̣б̣ам̣. бахийнз буна муулагаммадтаанам̣ г̇ахзд̇ваа нисийд̣̇ид̇аб̣б̣ам̣, навагаммам̣ бана на бадтабзд̇аб̣б̣ам̣. гасмаа? вид̇аггз бажчиннз гаммадтаанаманасигаарасса огаасо на ход̇и.
Sace na pahīyati, uggahito dhammakathāpabandho hoti, so mahāsaddena sajjhāyitabbo. Evampi ce aññavihitakassa sato so na pahīyati. Thavikāya muṭṭhipotthako hoti, yattha ca buddhavaṇṇāpi dhammavaṇṇāpi likhitā honti, taṃ nīharitvā vācentena aññavihitakena bhavitabbaṃ. Evampi ce na pahīyati, thavikato araṇisahitāni nīharitvā ‘‘ayaṃ uttarāraṇī ayaṃ adharāraṇī’’ti āvajjentena aññavihitakena bhavitabbaṃ. Evampi ce na pahīyati, sipāṭikaṃ nīharitvā ‘‘idaṃ ārakaṇṭakaṃ nāma, ayaṃ pipphalako nāma, idaṃ nakhacchedanaṃ nāma, ayaṃ sūci nāmā’’ti parikkhāraṃ samannānentena aññavihitakena bhavitabbaṃ. Evampi ce na pahīyati, sūciṃ gahetvā cīvare jiṇṇaṭṭhānaṃ sibbantena aññavihitakena bhavitabbaṃ. Evaṃ yāva na pahīyati, tāva taṃ taṃ kusalakammaṃ karontena aññavihitakena bhavitabbaṃ. Pahīne puna mūlakammaṭṭhānaṃ gahetvā nisīditabbaṃ, navakammaṃ pana na paṭṭhapetabbaṃ. Kasmā? Vitakke pacchinne kammaṭṭhānamanasikārassa okāso na hoti.
бораан̣агабан̣д̣ид̇аа бана навагаммам̣ гад̇вааби вид̇аггам̣ бажчинд̣̇им̣су. д̇ад̇рид̣̇ам̣ вад̇т̇у – д̇иссасааман̣зрасса гира убаж̇жхааяо д̇иссамахаавихаарз васад̇и. д̇иссасааман̣зро ‘‘бханд̇з угган̣тид̇омхий’’д̇и ааха. ат̇а нам̣ т̇зро ‘‘имасмим̣ вихаарз нхаанауд̣̇агам̣ д̣̇уллабхам̣, мам̣ г̇ахзд̇ваа жид̇д̇алабаб̣б̣ад̇ам̣ г̇ажчаахий’’д̇и ааха. со д̇ат̇аа агааси. д̇ад̇т̇а нам̣ т̇зро ааха ‘‘аяам̣ вихааро ажжанд̇асан̇гхиго, згам̣ буг̇г̇алигадтаанам̣ гарохий’’д̇и. со саад̇ху бханд̇зд̇и аад̣̇ид̇о бадтааяа сам̣яуд̇д̇анигааяам̣ баб̣бхаарасод̇ханам̣ д̇зж̇од̇хаад̇угасин̣абаригамманд̇и д̇ийн̣ийби згад̇о аарабхид̇ваа гаммадтаанам̣ аббанам̣ баабзси, сам̣яуд̇д̇анигааяам̣ барияосаабзси, лзн̣агаммам̣ нидтаабзси, саб̣б̣ам̣ гад̇ваа убаж̇жхааяасса сан̃н̃ам̣ ад̣̇ааси. убаж̇жхааяо ‘‘д̣̇угкзна д̇з сааман̣зра гад̇ам̣, аж̇ж̇а д̇аава д̇вам̣язва васаахий’’д̇и ааха. со д̇ам̣ рад̇д̇им̣ лзн̣з васанд̇о уд̇усаббааяам̣ лабхид̇ваа вибассанам̣ вад̣дхзд̇ваа арахад̇д̇ам̣ бад̇ваа д̇ад̇т̇зва бариниб̣б̣ааяи. д̇асса д̇хаад̇уяо г̇ахзд̇ваа жзд̇ияам̣ агам̣су. аж̇ж̇ааби д̇иссад̇т̇зражзд̇ияанд̇и бан̃н̃ааяад̇и. ид̣̇ам̣ баб̣б̣ам̣ асад̇ибаб̣б̣ам̣ наама.
Porāṇakapaṇḍitā pana navakammaṃ katvāpi vitakkaṃ pacchindiṃsu. Tatridaṃ vatthu – tissasāmaṇerassa kira upajjhāyo tissamahāvihāre vasati. Tissasāmaṇero ‘‘bhante ukkaṇṭhitomhī’’ti āha. Atha naṃ thero ‘‘imasmiṃ vihāre nhānaudakaṃ dullabhaṃ, maṃ gahetvā cittalapabbataṃ gacchāhī’’ti āha. So tathā akāsi. Tattha naṃ thero āha ‘‘ayaṃ vihāro accantasaṅghiko, ekaṃ puggalikaṭṭhānaṃ karohī’’ti. So sādhu bhanteti ādito paṭṭhāya saṃyuttanikāyaṃ pabbhārasodhanaṃ tejodhātukasiṇaparikammanti tīṇīpi ekato ārabhitvā kammaṭṭhānaṃ appanaṃ pāpesi, saṃyuttanikāyaṃ pariyosāpesi, leṇakammaṃ niṭṭhāpesi, sabbaṃ katvā upajjhāyassa saññaṃ adāsi. Upajjhāyo ‘‘dukkhena te sāmaṇera kataṃ, ajja tāva tvaṃyeva vasāhī’’ti āha. So taṃ rattiṃ leṇe vasanto utusappāyaṃ labhitvā vipassanaṃ vaḍḍhetvā arahattaṃ patvā tattheva parinibbāyi. Tassa dhātuyo gahetvā cetiyaṃ akaṃsu. Ajjāpi tissattheracetiyanti paññāyati. Idaṃ pabbaṃ asatipabbaṃ nāma.
219. имасмим̣ тад̇ваа вид̇аггз ниг̇г̇ан̣хид̇ум̣ асаггонд̇о ид̇ха тад̇ваа ниг̇г̇ан̣хиссад̇ийд̇и вид̇аггамуулабхзд̣̇ам̣ баб̣б̣ам̣ д̣̇ассзнд̇о буна д̇асса жз бхигкавзд̇иаад̣̇имааха. д̇ад̇т̇а вид̇аггасан̇каарасан̣таанам̣ манасигаад̇аб̣б̣анд̇и сан̇карод̇ийд̇и сан̇кааро, бажжаяо, гааран̣ам̣ мууланд̇и ад̇т̇о. санд̇идтад̇и зд̇т̇аад̇и сан̣таанам̣, вид̇аггасан̇каарасса сан̣таанам̣ вид̇аггасан̇каарасан̣таанам̣, д̇ам̣ манасигаад̇аб̣б̣анд̇и. ид̣̇ам̣ вуд̇д̇ам̣ ход̇и, аяам̣ вид̇агго гим̣ хзд̇у гим̣ бажжаяаа гим̣ гааран̣аа уббаннод̇и вид̇аггаанам̣ муулан̃жа мууламуулан̃жа манасигаад̇аб̣б̣анд̇и. гим̣ ну ко ахам̣ сийгхам̣ г̇ажчаамийд̇и гзна ну ко гааран̣зна ахам̣ сийгхам̣ г̇ажчаами? яам̣нуунаахам̣ сан̣игам̣ г̇ажчзяяанд̇и гим̣ мз иминаа сийгхаг̇аманзна, сан̣игам̣ г̇ажчиссаамийд̇и жинд̇зси. со сан̣игам̣ г̇ажчзяяаад̇и со звам̣ жинд̇зд̇ваа сан̣игам̣ г̇ажчзяяа. зса наяо саб̣б̣ад̇т̇а.
219. Imasmiṃ ṭhatvā vitakke niggaṇhituṃ asakkonto idha ṭhatvā niggaṇhissatīti vitakkamūlabhedaṃ pabbaṃ dassento puna tassa ce bhikkhavetiādimāha. Tattha vitakkasaṅkhārasaṇṭhānaṃ manasikātabbanti saṅkharotīti saṅkhāro, paccayo, kāraṇaṃ mūlanti attho. Santiṭṭhati etthāti saṇṭhānaṃ, vitakkasaṅkhārassa saṇṭhānaṃ vitakkasaṅkhārasaṇṭhānaṃ, taṃ manasikātabbanti. Idaṃ vuttaṃ hoti, ayaṃ vitakko kiṃ hetu kiṃ paccayā kiṃ kāraṇā uppannoti vitakkānaṃ mūlañca mūlamūlañca manasikātabbanti. Kiṃ nu kho ahaṃ sīghaṃgacchāmīti kena nu kho kāraṇena ahaṃ sīghaṃ gacchāmi? Yaṃnūnāhaṃ saṇikaṃ gaccheyyanti kiṃ me iminā sīghagamanena, saṇikaṃ gacchissāmīti cintesi. So saṇikaṃ gaccheyyāti so evaṃ cintetvā saṇikaṃ gaccheyya. Esa nayo sabbattha.
д̇ад̇т̇а д̇асса бурисасса сийгхаг̇аманагаало вияа имасса бхигкуно вид̇аггасамаарул̣хагаало. д̇асса сан̣игаг̇аманагаало вияа имасса вид̇аггажаарабажчзд̣̇анагаало. д̇асса тид̇агаало вияа имасса вид̇аггажаарз бажчиннз муулагаммадтаанам̣ жид̇д̇од̇аран̣агаало. д̇асса нисиннагаало вияа имасса вибассанам̣ вад̣дхзд̇ваа арахад̇д̇аббад̇д̇агаало. д̇асса нибаннагаало вияа имасса ниб̣б̣аанаарамман̣ааяа паласамаабад̇д̇ияаа д̣̇ивасам̣ вийд̇ивад̇д̇анагаало. д̇ад̇т̇а имз вид̇аггаа гим̣ хзд̇угаа гим̣ бажжаяаад̇и вид̇аггаанам̣ мууламуулам̣ г̇ажчанд̇асса вид̇аггажааро сит̇ило ход̇и. д̇асмим̣ сит̇илийбхууд̇з мад̇т̇агам̣ г̇ажчанд̇з вид̇аггаа саб̣б̣асо нируж̇жханд̇и. аяамад̇т̇о д̣̇уд̣̇д̣̇убхаж̇аад̇агзнаби д̣̇ийбзд̇аб̣б̣о –
Tattha tassa purisassa sīghagamanakālo viya imassa bhikkhuno vitakkasamāruḷhakālo. Tassa saṇikagamanakālo viya imassa vitakkacārapacchedanakālo. Tassa ṭhitakālo viya imassa vitakkacāre pacchinne mūlakammaṭṭhānaṃ cittotaraṇakālo. Tassa nisinnakālo viya imassa vipassanaṃ vaḍḍhetvā arahattappattakālo. Tassa nipannakālo viya imassa nibbānārammaṇāya phalasamāpattiyā divasaṃ vītivattanakālo. Tattha ime vitakkā kiṃ hetukā kiṃ paccayāti vitakkānaṃ mūlamūlaṃ gacchantassa vitakkacāro sithilo hoti. Tasmiṃ sithilībhūte matthakaṃ gacchante vitakkā sabbaso nirujjhanti. Ayamattho duddubhajātakenapi dīpetabbo –
сасагасса гира б̣злуваругкамуулз нид̣̇д̣̇ааяанд̇асса б̣злувабаггам̣ ван̣дад̇о чиж̇ж̇ид̇ваа ган̣н̣амуулз бад̇ид̇ам̣. со д̇асса сад̣̇д̣̇зна ‘‘бат̇авий бхиж̇ж̇ад̇ий’’д̇и сан̃н̃ааяа удтахид̇ваа взг̇зна балааяи. д̇ам̣ д̣̇исваа бурад̇о ан̃н̃зби жад̇уббад̣̇аа балааяим̣су. д̇ад̣̇аа б̣од̇хисад̇д̇о сийхо ход̇и. со жинд̇зси – ‘‘аяам̣ бат̇авий наама габбавинаасз бхиж̇ж̇ад̇и, анд̇араа бат̇авийбхзд̣̇о наама над̇т̇и, яам̣нуунаахам̣ мууламуулам̣ г̇анд̇ваа анувиж̇ж̇зяяа’’нд̇и. со хад̇т̇инааг̇ад̇о бадтааяа яаава сасагам̣ бужчи ‘‘д̇аяаа, д̇аад̇а, бат̇авий бхиж̇ж̇амаанаа д̣̇идтаа’’д̇и. сасо ‘‘аама д̣̇зваа’’д̇и ааха. сийхо ‘‘зхи, бхо, д̣̇ассзхий’’д̇и. сасо ‘‘на саггоми саамий’’д̇и. ‘‘зхи, рз, маа бхааяий’’д̇и сан̣хамуд̣̇угзна г̇ахзд̇ваа г̇ад̇о сасо ругкасса авид̣̇уурз тад̇ваа –
Sasakassa kira beluvarukkhamūle niddāyantassa beluvapakkaṃ vaṇṭato chijjitvā kaṇṇamūle patitaṃ. So tassa saddena ‘‘pathavī bhijjatī’’ti saññāya uṭṭhahitvā vegena palāyi. Taṃ disvā purato aññepi catuppadā palāyiṃsu. Tadā bodhisatto sīho hoti. So cintesi – ‘‘ayaṃ pathavī nāma kappavināse bhijjati, antarā pathavībhedo nāma natthi, yaṃnūnāhaṃ mūlamūlaṃ gantvā anuvijjeyya’’nti. So hatthināgato paṭṭhāya yāva sasakaṃ pucchi ‘‘tayā, tāta, pathavī bhijjamānā diṭṭhā’’ti. Saso ‘‘āma devā’’ti āha. Sīho ‘‘ehi, bho, dassehī’’ti. Saso ‘‘na sakkomi sāmī’’ti. ‘‘Ehi, re, mā bhāyī’’ti saṇhamudukena gahetvā gato saso rukkhassa avidūre ṭhatvā –
‘‘д̣̇уд̣̇д̣̇убхааяад̇и бхад̣̇д̣̇анд̇з, яасмим̣ д̣̇зсз васаамахам̣;
‘‘Duddubhāyati bhaddante, yasmiṃ dese vasāmahaṃ;
ахамбзд̇ам̣ на ж̇аанаами, гимзд̇ам̣ д̣̇уд̣̇д̣̇убхааяад̇ий’’д̇и. (ж̇аа. 1.4.85) –
Ahampetaṃ na jānāmi, kimetaṃ duddubhāyatī’’ti. (jā. 1.4.85) –
г̇аат̇амааха. б̣од̇хисад̇д̇о ‘‘д̇вам̣ зд̇т̇зва д̇идтаа’’д̇и ругкамуулам̣ г̇анд̇ваа сасагасса нибаннадтаанам̣ ад̣̇д̣̇аса, б̣злувабаггам̣ ад̣̇д̣̇аса, уд̣̇д̇хам̣ олзгзд̇ваа ван̣дам̣ ад̣̇д̣̇аса, д̣̇исваа ‘‘аяам̣ сасо зд̇т̇а нибанно, нид̣̇д̣̇ааяамаано имасса ган̣н̣амуулз бад̇ид̇асса сад̣̇д̣̇зна ‘бат̇авий бхиж̇ж̇ад̇ий’д̇и звам̣сан̃н̃ий худ̇ваа балааяий’’д̇и н̃ад̇ваа д̇ам̣ гааран̣ам̣ сасам̣ бужчи. сасо ‘‘аама, д̣̇зваа’’д̇и ааха. б̣од̇хисад̇д̇о имам̣ г̇аат̇амааха –
Gāthamāha. Bodhisatto ‘‘tvaṃ ettheva tiṭṭhā’’ti rukkhamūlaṃ gantvā sasakassa nipannaṭṭhānaṃ addasa, beluvapakkaṃ addasa, uddhaṃ oleketvā vaṇṭaṃ addasa, disvā ‘‘ayaṃ saso ettha nipanno, niddāyamāno imassa kaṇṇamūle patitassa saddena ‘pathavī bhijjatī’ti evaṃsaññī hutvā palāyī’’ti ñatvā taṃ kāraṇaṃ sasaṃ pucchi. Saso ‘‘āma, devā’’ti āha. Bodhisatto imaṃ gāthamāha –
‘‘б̣злува бад̇ид̇ам̣ суд̇ваа, д̣̇уд̣̇д̣̇убханд̇и сасо ж̇ави;
‘‘Beluva patitaṃ sutvā, duddubhanti saso javi;
сасасса важанам̣ суд̇ваа, санд̇ад̇д̇аа миг̇аваахиний’’д̇и. (ж̇аа. 1.4.86);
Sasassa vacanaṃ sutvā, santattā migavāhinī’’ti. (jā. 1.4.86);
д̇ад̇о б̣од̇хисад̇д̇о ‘‘маа бхааяат̇аа’’д̇и миг̇аг̇ан̣з ассаасзси. звам̣ вид̇аггаанам̣ мууламуулам̣ г̇ажчанд̇асса вид̇аггаа бахийяанд̇и.
Tato bodhisatto ‘‘mā bhāyathā’’ti migagaṇe assāsesi. Evaṃ vitakkānaṃ mūlamūlaṃ gacchantassa vitakkā pahīyanti.
220. имасмим̣ вид̇аггамуулабхзд̣̇абаб̣б̣з тад̇ваа вид̇аггз ниг̇г̇ан̣хид̇ум̣ асаггонд̇зна бана звам̣ ниг̇г̇ан̣хид̇аб̣б̣аад̇и абарамби гааран̣ам̣ д̣̇ассзнд̇о буна д̇асса жз, бхигкавзд̇иаад̣̇имааха.
220. Imasmiṃ vitakkamūlabhedapabbe ṭhatvā vitakke niggaṇhituṃ asakkontena pana evaṃ niggaṇhitabbāti aparampi kāraṇaṃ dassento puna tassa ce, bhikkhavetiādimāha.
д̣̇анд̇збхид̣̇анд̇амаад̇хааяаад̇и хздтаад̣̇анд̇з убарид̣̇анд̇ам̣ табзд̇ваа. жзд̇асаа жид̇д̇анд̇и гусалажид̇д̇зна агусалажид̇д̇ам̣ абхиниг̇г̇ан̣хид̇аб̣б̣ам̣. б̣алаваа бурисод̇и яат̇аа т̇аамасамбанно махааб̣ало бурисо д̣̇уб̣б̣алам̣ бурисам̣ сийсз ваа г̇алз ваа канд̇хз ваа г̇ахзд̇ваа абхиниг̇г̇ан̣хзяяа абхиниббийл̣зяяа абхисанд̇аабзяяа санд̇ад̇д̇ам̣ гиланд̇ам̣ мужчаабарзд̇ам̣ вияа гарзяяа, звамзва бхигкунаа вид̇аггзхи сад̣̇д̇хим̣ бадималлзна худ̇ваа ‘‘гз жа д̇умхз го жааха’’нд̇и абхибхавид̇ваа – ‘‘гаамам̣ д̇ажо жа нхаару жа адти жа авасиссад̇у сарийрз убасуссад̇у мам̣салохид̇а’’нд̇и (а. ни. 2.5) звам̣ махаавийрияам̣ баг̇г̇аяха вид̇аггаа ниг̇г̇ан̣хид̇аб̣б̣аад̇и д̣̇ассзнд̇о има ад̇т̇ад̣̇ийбигам̣ убамам̣ аахари.
Dantebhidantamādhāyāti heṭṭhādante uparidantaṃ ṭhapetvā. Cetasā cittanti kusalacittena akusalacittaṃ abhiniggaṇhitabbaṃ. Balavā purisoti yathā thāmasampanno mahābalo puriso dubbalaṃ purisaṃ sīse vā gale vā khandhe vā gahetvā abhiniggaṇheyya abhinippīḷeyya abhisantāpeyya santattaṃ kilantaṃ mucchāparetaṃ viya kareyya, evameva bhikkhunā vitakkehi saddhiṃ paṭimallena hutvā ‘‘ke ca tumhe ko cāha’’nti abhibhavitvā – ‘‘kāmaṃ taco ca nhāru ca aṭṭhi ca avasissatu sarīre upasussatu maṃsalohita’’nti (a. ni. 2.5) evaṃ mahāvīriyaṃ paggayha vitakkā niggaṇhitabbāti dassento ima atthadīpikaṃ upamaṃ āhari.
221. яад̇о ко, бхигкавзд̇и ид̣̇ам̣ барияаад̣̇аанабхааж̇анияам̣ наама, д̇ам̣ уд̇д̇аанад̇т̇амзва. яат̇аа бана сад̇т̇аажарияо д̇ирорадтаа ааг̇ад̇ам̣ рааж̇абуд̇д̇ам̣ бан̃жаавуд̇хасиббам̣ уг̇г̇ан̣хаабзд̇ваа ‘‘г̇ажча, ад̇д̇ано радтз раж̇ж̇ам̣ г̇ан̣ха. сажз д̇з анд̇араамаг̇г̇з жораа удтаханд̇и, д̇ханунаа гаммам̣ гад̇ваа г̇ажча. сажз д̇з д̇хану нассад̇и ваа бхиж̇ж̇ад̇и ваа сад̇д̇ияаа асинаа’’д̇и звам̣ бан̃жахиби аавуд̇хзхи гад̇д̇аб̣б̣ам̣ д̣̇ассзд̇ваа уяяож̇зд̇и. со д̇ат̇аа гад̇ваа сагарадтам̣ г̇анд̇ваа раж̇ж̇ам̣ г̇ахзд̇ваа раж̇ж̇асирим̣ анубход̇и. звамзвам̣ бхаг̇аваа ад̇хижид̇д̇амануяуд̇д̇ам̣ бхигкум̣ арахад̇д̇аг̇ахан̣ад̇т̇ааяа уяяож̇знд̇о – ‘‘сажасса анд̇араа агусалавид̇аггаа уббаж̇ж̇анд̇и, ан̃н̃анимид̇д̇абаб̣б̣з тад̇ваа д̇з ниг̇г̇ан̣хид̇ваа вибассанам̣ вад̣дхзд̇ваа арахад̇д̇ам̣ баабун̣иссад̇и. д̇ад̇т̇а асаггонд̇о аад̣̇ийнавабаб̣б̣з тад̇ваа, д̇ад̇рааби асаггонд̇о асад̇ибаб̣б̣з тад̇ваа, д̇ад̇рааби асаггонд̇о вид̇аггамуулабхзд̣̇абаб̣б̣з тад̇ваа, д̇ад̇рааби асаггонд̇о абхиниг̇г̇ан̣ханабаб̣б̣з тад̇ваа вид̇аггз ниг̇г̇ан̣хид̇ваа вибассанам̣ вад̣дхзд̇ваа арахад̇д̇ам̣ баабун̣иссад̇ий’’д̇и имаани бан̃жа баб̣б̣аани д̣̇зсзси.
221.Yato kho, bhikkhaveti idaṃ pariyādānabhājaniyaṃ nāma, taṃ uttānatthameva. Yathā pana satthācariyo tiroraṭṭhā āgataṃ rājaputtaṃ pañcāvudhasippaṃ uggaṇhāpetvā ‘‘gaccha, attano raṭṭhe rajjaṃ gaṇha. Sace te antarāmagge corā uṭṭhahanti, dhanunā kammaṃ katvā gaccha. Sace te dhanu nassati vā bhijjati vā sattiyā asinā’’ti evaṃ pañcahipi āvudhehi kattabbaṃ dassetvā uyyojeti. So tathā katvā sakaraṭṭhaṃ gantvā rajjaṃ gahetvā rajjasiriṃ anubhoti. Evamevaṃ bhagavā adhicittamanuyuttaṃ bhikkhuṃ arahattagahaṇatthāya uyyojento – ‘‘sacassa antarā akusalavitakkā uppajjanti, aññanimittapabbe ṭhatvā te niggaṇhitvā vipassanaṃ vaḍḍhetvā arahattaṃ pāpuṇissati. Tattha asakkonto ādīnavapabbe ṭhatvā, tatrāpi asakkonto asatipabbe ṭhatvā, tatrāpi asakkonto vitakkamūlabhedapabbe ṭhatvā, tatrāpi asakkonto abhiniggaṇhanapabbe ṭhatvā vitakke niggaṇhitvā vipassanaṃ vaḍḍhetvā arahattaṃ pāpuṇissatī’’ti imāni pañca pabbāni desesi.
васий вид̇аггабарияааяабат̇зсууд̇и вид̇аггажаарабат̇зсу жин̣н̣авасий баг̇ун̣авасийд̇и вужжад̇и. яам̣ вид̇аггам̣ ааган̇киссад̇ийд̇и ид̣̇ам̣ асса васийбхааваагаарад̣̇ассанад̇т̇ам̣ вуд̇д̇ам̣. аяан̃хи буб̣б̣з яам̣ вид̇аггам̣ вид̇аггзд̇угаамо ход̇и, д̇ам̣ на вид̇аггзд̇и. яам̣ на вид̇аггзд̇угаамо ход̇и, д̇ам̣ вид̇аггзд̇и. ид̣̇аани бана васийбхууд̇ад̇д̇аа яам̣ вид̇аггам̣ вид̇аггзд̇угаамо ход̇и, д̇ам̣язва вид̇аггзд̇и. яам̣ на вид̇аггзд̇угаамо, на д̇ам̣ вид̇аггзд̇и. д̇зна вуд̇д̇ам̣ ‘‘яам̣ вид̇аггам̣ ааган̇киссад̇и, д̇ам̣ вид̇аггам̣ вид̇аггзссад̇и. яам̣ вид̇аггам̣ нааган̇киссад̇и, на д̇ам̣ вид̇аггам̣ вид̇агкзссад̇ий’’д̇и. ажчзжчи д̇ан̣ханд̇иаад̣̇и саб̣б̣аасавасуд̇д̇з вуд̇д̇амзваад̇и.
Vasī vitakkapariyāyapathesūti vitakkacārapathesu ciṇṇavasī paguṇavasīti vuccati. Yaṃ vitakkaṃ ākaṅkhissatīti idaṃ assa vasībhāvākāradassanatthaṃ vuttaṃ. Ayañhi pubbe yaṃ vitakkaṃ vitakketukāmo hoti, taṃ na vitakketi. Yaṃ na vitakketukāmo hoti, taṃ vitakketi. Idāni pana vasībhūtattā yaṃ vitakkaṃ vitakketukāmo hoti, taṃyeva vitakketi. Yaṃ na vitakketukāmo, na taṃ vitakketi. Tena vuttaṃ ‘‘yaṃ vitakkaṃ ākaṅkhissati, taṃ vitakkaṃ vitakkessati. Yaṃ vitakkaṃ nākaṅkhissati, na taṃ vitakkaṃ vitakkhessatī’’ti. Acchecchi taṇhantiādi sabbāsavasutte vuttamevāti.
бабан̃жасууд̣̇анияаа маж̇жхиманигааяадтагат̇ааяа
Papañcasūdaniyā majjhimanikāyaṭṭhakathāya
вид̇аггасан̣таанасуд̇д̇аван̣н̣анаа нидтид̇аа.
Vitakkasaṇṭhānasuttavaṇṇanā niṭṭhitā.
д̣̇уд̇ияаваг̇г̇аван̣н̣анаа нидтид̇аа.
Dutiyavaggavaṇṇanā niṭṭhitā.
муулабан̣н̣аасадтагат̇ааяа батамо бхааг̇о нидтид̇о.
Mūlapaṇṇāsaṭṭhakathāya paṭhamo bhāgo niṭṭhito.
намо д̇асса бхаг̇авад̇о арахад̇о саммаасамб̣уд̣̇д̇хасса
Namo tassa bhagavato arahato sammāsambuddhassa
маж̇жхиманигааяз
Majjhimanikāye
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / маж̇жхиманигааяа • Majjhimanikāya / 10. вид̇аггасан̣таанасуд̇д̇ам̣ • 10. Vitakkasaṇṭhānasuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / маж̇жхиманигааяа (дийгаа) • Majjhimanikāya (ṭīkā) / 10. вид̇аггасан̣таанасуд̇д̇аван̣н̣анаа • 10. Vitakkasaṇṭhānasuttavaṇṇanā
