| Library / Tipiṭaka / তিপিটক • Tipiṭaka / ইতিৰুত্তকপাল়ি • Itivuttakapāḷi |
২. দুতিযৰগ্গো
2. Dutiyavaggo
১. ৰিতক্কসুত্তং
1. Vitakkasuttaṃ
৩৮. ৰুত্তঞ্হেতং ভগৰতা, ৰুত্তমরহতাতি মে সুতং –
38. Vuttañhetaṃ bhagavatā, vuttamarahatāti me sutaṃ –
‘‘তথাগতং, ভিক্খৰে, অরহন্তং সম্মাসম্বুদ্ধং দ্ৰে ৰিতক্কা বহুলং সমুদাচরন্তি – খেমো চ ৰিতক্কো, পৰিৰেকো চ 1। অব্যাপজ্ঝারামো 2, ভিক্খৰে, তথাগতো অব্যাপজ্ঝরতো। তমেনং, ভিক্খৰে, তথাগতং অব্যাপজ্ঝারামং অব্যাপজ্ঝরতং এসেৰ ৰিতক্কো বহুলং সমুদাচরতি – ‘ইমাযাহং ইরিযায ন কিঞ্চি ব্যাবাধেমি তসং ৰা থাৰরং ৰা’তি।
‘‘Tathāgataṃ, bhikkhave, arahantaṃ sammāsambuddhaṃ dve vitakkā bahulaṃ samudācaranti – khemo ca vitakko, paviveko ca 3. Abyāpajjhārāmo 4, bhikkhave, tathāgato abyāpajjharato. Tamenaṃ, bhikkhave, tathāgataṃ abyāpajjhārāmaṃ abyāpajjharataṃ eseva vitakko bahulaṃ samudācarati – ‘imāyāhaṃ iriyāya na kiñci byābādhemi tasaṃ vā thāvaraṃ vā’ti.
‘‘পৰিৰেকারামো , ভিক্খৰে, তথাগতো পৰিৰেকরতো। তমেনং, ভিক্খৰে, তথাগতং পৰিৰেকারামং পৰিৰেকরতং এসেৰ ৰিতক্কো বহুলং সমুদাচরতি – ‘যং অকুসলং তং পহীন’ন্তি।
‘‘Pavivekārāmo , bhikkhave, tathāgato pavivekarato. Tamenaṃ, bhikkhave, tathāgataṃ pavivekārāmaṃ pavivekarataṃ eseva vitakko bahulaṃ samudācarati – ‘yaṃ akusalaṃ taṃ pahīna’nti.
‘‘তস্মাতিহ, ভিক্খৰে, তুম্হেপি অব্যাপজ্ঝারামা ৰিহরথ অব্যাপজ্ঝরতা। তেসং ৰো, ভিক্খৰে, তুম্হাকং অব্যাপজ্ঝারামানং ৰিহরতং অব্যাপজ্ঝরতানং এসেৰ ৰিতক্কো বহুলং সমুদাচরিস্সতি – ‘ইমায মযং ইরিযায ন কিঞ্চি ব্যাবাধেম তসং ৰা থাৰরং ৰা’তি।
‘‘Tasmātiha, bhikkhave, tumhepi abyāpajjhārāmā viharatha abyāpajjharatā. Tesaṃ vo, bhikkhave, tumhākaṃ abyāpajjhārāmānaṃ viharataṃ abyāpajjharatānaṃ eseva vitakko bahulaṃ samudācarissati – ‘imāya mayaṃ iriyāya na kiñci byābādhema tasaṃ vā thāvaraṃ vā’ti.
‘‘পৰিৰেকারামা, ভিক্খৰে, ৰিহরথ পৰিৰেকরতা। তেসং ৰো, ভিক্খৰে, তুম্হাকং পৰিৰেকারামানং ৰিহরতং পৰিৰেকরতানং এসেৰ ৰিতক্কো বহুলং সমুদাচরিস্সতি – ‘কিং অকুসলং, কিং অপ্পহীনং, কিং পজহামা’’’তি। এতমত্থং ভগৰা অৰোচ। তত্থেতং ইতি ৰুচ্চতি –
‘‘Pavivekārāmā, bhikkhave, viharatha pavivekaratā. Tesaṃ vo, bhikkhave, tumhākaṃ pavivekārāmānaṃ viharataṃ pavivekaratānaṃ eseva vitakko bahulaṃ samudācarissati – ‘kiṃ akusalaṃ, kiṃ appahīnaṃ, kiṃ pajahāmā’’’ti. Etamatthaṃ bhagavā avoca. Tatthetaṃ iti vuccati –
‘‘তথাগতং বুদ্ধমসয্হসাহিনং, দুৰে ৰিতক্কা সমুদাচরন্তি নং।
‘‘Tathāgataṃ buddhamasayhasāhinaṃ, duve vitakkā samudācaranti naṃ;
খেমো ৰিতক্কো পঠমো উদীরিতো, ততো ৰিৰেকো দুতিযো পকাসিতো॥
Khemo vitakko paṭhamo udīrito, tato viveko dutiyo pakāsito.
‘‘তমোনুদং পারগতং মহেসিং, তং পত্তিপত্তং ৰসিমং অনাসৰং।
‘‘Tamonudaṃ pāragataṃ mahesiṃ, taṃ pattipattaṃ vasimaṃ anāsavaṃ;
ৰিসন্তরং 5 তণ্হক্খযে ৰিমুত্তং, তং ৰে মুনিং অন্তিমদেহধারিং।
Visantaraṃ 6 taṇhakkhaye vimuttaṃ, taṃ ve muniṃ antimadehadhāriṃ;
‘‘সেলে যথা পব্বতমুদ্ধনিট্ঠিতো, যথাপি পস্সে জনতং সমন্ততো।
‘‘Sele yathā pabbatamuddhaniṭṭhito, yathāpi passe janataṃ samantato;
তথূপমং ধম্মমযং সুমেধো, পাসাদমারুয্হ সমন্তচক্খু।
Tathūpamaṃ dhammamayaṃ sumedho, pāsādamāruyha samantacakkhu;
সোকাৰতিণ্ণং জনতমপেতসোকো, অৰেক্খতি জাতিজরাভিভূত’’ন্তি॥
Sokāvatiṇṇaṃ janatamapetasoko, avekkhati jātijarābhibhūta’’nti.
অযম্পি অত্থো ৰুত্তো ভগৰতা, ইতি মে সুতন্তি। পঠমং।
Ayampi attho vutto bhagavatā, iti me sutanti. Paṭhamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / ইতিৰুত্তক-অট্ঠকথা • Itivuttaka-aṭṭhakathā / ১. ৰিতক্কসুত্তৰণ্ণনা • 1. Vitakkasuttavaṇṇanā
