| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
7. විතක්‌කසුත්‌තං
7. Vitakkasuttaṃ
1077. ‘‘මා, භික්‌ඛවෙ, පාපකෙ අකුසලෙ විතක්‌කෙ විතක්‌කෙය්‍යාථ 1, සෙය්‍යථිදං – කාමවිතක්‌කං, බ්‍යාපාදවිතක්‌කං, විහිංසාවිතක්‌කං. තං කිස්‌ස හෙතු? නෙතෙ, භික්‌ඛවෙ, විතක්‌කා අත්‌ථසංහිතා නාදිබ්‍රහ්‌මචරියකා න නිබ්‌බිදාය න විරාගාය න නිරොධාය න උපසමාය න අභිඤ්‌ඤාය න සම්‌බොධාය න නිබ්‌බානාය සංවත්‌තන්‌ති.
1077. ‘‘Mā, bhikkhave, pāpake akusale vitakke vitakkeyyātha 2, seyyathidaṃ – kāmavitakkaṃ, byāpādavitakkaṃ, vihiṃsāvitakkaṃ. Taṃ kissa hetu? Nete, bhikkhave, vitakkā atthasaṃhitā nādibrahmacariyakā na nibbidāya na virāgāya na nirodhāya na upasamāya na abhiññāya na sambodhāya na nibbānāya saṃvattanti.
‘‘විතක්‌කෙන්‌තා ච ඛො තුම්‌හෙ, භික්‌ඛවෙ, ‘ඉදං දුක්‌ඛ’න්‌ති විතක්‌කෙය්‍යාථ, ‘අයං දුක්‌ඛසමුදයො’ති විතක්‌කෙය්‍යාථ, ‘අයං දුක්‌ඛනිරොධො’ති විතක්‌කෙය්‍යාථ, ‘අයං දුක්‌ඛනිරොධගාමිනී පටිපදා’ති විතක්‌කෙය්‍යාථ. තං කිස්‌ස හෙතු? එතෙ, භික්‌ඛවෙ, විතක්‌කා අත්‌ථසංහිතා එතෙ ආදිබ්‍රහ්‌මචරියකා එතෙ නිබ්‌බිදාය විරාගාය නිරොධාය උපසමාය අභිඤ්‌ඤාය සම්‌බොධාය නිබ්‌බානාය සංවත්‌තන්‌ති.
‘‘Vitakkentā ca kho tumhe, bhikkhave, ‘idaṃ dukkha’nti vitakkeyyātha, ‘ayaṃ dukkhasamudayo’ti vitakkeyyātha, ‘ayaṃ dukkhanirodho’ti vitakkeyyātha, ‘ayaṃ dukkhanirodhagāminī paṭipadā’ti vitakkeyyātha. Taṃ kissa hetu? Ete, bhikkhave, vitakkā atthasaṃhitā ete ādibrahmacariyakā ete nibbidāya virāgāya nirodhāya upasamāya abhiññāya sambodhāya nibbānāya saṃvattanti.
‘‘තස්‌මාතිහ, භික්‌ඛවෙ, ‘ඉදං දුක්‌ඛ’න්‌ති යොගො කරණීයො…පෙ.… ‘අයං දුක්‌ඛනිරොධගාමිනී පටිපදා’ති යොගො කරණීයො’’ති. සත්‌තමං.
‘‘Tasmātiha, bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Sattamaṃ.
Footnotes:
