| Library / Tipiṭaka / திபிடக • Tipiṭaka / பஞ்சபகரண-மூலடீகா • Pañcapakaraṇa-mūlaṭīkā |
6. விதக்கத்திகவண்ணனா
6. Vitakkattikavaṇṇanā
22. விதக்கத்திகே படிச்சவாரானுலோமே அதி⁴பதியா தேவீஸாதி ஸத்தஸு மூலகேஸு யதா²க்கமங் ஸத்த பஞ்ச தீணி ஏகங் தீணி தீணி ஏகந்தி ஏவங் தேவீஸ, அஞ்ஞமஞ்ஞே அட்ட²வீஸ ஸத்த பஞ்ச பஞ்ச தீணி சத்தாரி தீணி ஏகந்தி ஏவங், புரேஜாதே ஏகாத³ஸ தீணி சத்தாரி த்³வே து³தியததியது³மூலகேஸு ஏகங் ஏகந்தி ஏவங், ததா² ஆஸேவனே. அஞ்ஞானி க³ணனானி ஹேதுஆரம்மணஸதி³ஸானி.
22. Vitakkattike paṭiccavārānulome adhipatiyā tevīsāti sattasu mūlakesu yathākkamaṃ satta pañca tīṇi ekaṃ tīṇi tīṇi ekanti evaṃ tevīsa, aññamaññe aṭṭhavīsa satta pañca pañca tīṇi cattāri tīṇi ekanti evaṃ, purejāte ekādasa tīṇi cattāri dve dutiyatatiyadumūlakesu ekaṃ ekanti evaṃ, tathā āsevane. Aññāni gaṇanāni hetuārammaṇasadisāni.
31. பச்சனீயே நாதி⁴பதிபச்சயே பட²மபஞ்ஹே ‘‘அவிதக்கவிசாரமத்தே க²ந்தே⁴ படிச்ச அவிதக்கவிசாரமத்தா அதி⁴பதீ’’தி வத்வா புன ‘‘விபாகங் அவிதக்கவிசாரமத்தங் ஏகங் க²ந்த⁴ங் படிச்சா’’திஆதி³னா விஸ்ஸஜ்ஜனங் கதங், ந பன அவிஸேஸேன. கஸ்மா? விபாகவஜ்ஜானங் அவிதக்கவிசாரமத்தக்க²ந்தா⁴னங் ஏகந்தேன ஸாதி⁴பதிபா⁴வதோ . விபாகானங் பன லோகுத்தரானமேவ ஸாதி⁴பதிபா⁴வோ, ந இதரேஸந்தி தே விஸுங் நித்³தா⁴ரெத்வா வுத்தா. லோகுத்தரவிபாகாதி⁴பதிஸ்ஸ செத்த² புரிமகொட்டா²ஸேயேவ ஸங்க³ஹோ வேதி³தப்³போ³.
31. Paccanīye nādhipatipaccaye paṭhamapañhe ‘‘avitakkavicāramatte khandhe paṭicca avitakkavicāramattā adhipatī’’ti vatvā puna ‘‘vipākaṃ avitakkavicāramattaṃ ekaṃ khandhaṃ paṭiccā’’tiādinā vissajjanaṃ kataṃ, na pana avisesena. Kasmā? Vipākavajjānaṃ avitakkavicāramattakkhandhānaṃ ekantena sādhipatibhāvato . Vipākānaṃ pana lokuttarānameva sādhipatibhāvo, na itaresanti te visuṃ niddhāretvā vuttā. Lokuttaravipākādhipatissa cettha purimakoṭṭhāseyeva saṅgaho veditabbo.
38. நாஸேவனமூலகே அவிதக்கவிசாரமத்தங் விபாகேன ஸஹ க³ச்ச²ந்தேனாதி ஏதங் மூலங் அவிதக்கவிசாரமத்தஅவிதக்கவிசாரபதே³ஹி அவிதக்கேஹி ஸஹ யோஜெந்தேன நபுரேஜாதஸதி³ஸங் பாளிக³மனங் காதப்³ப³ந்தி வுத்தங் ஹோதி. ஸதி³ஸதா செத்த² யேபு⁴ய்யேன விஸதி³ஸதா ச த³ட்ட²ப்³பா³. தத்த² ஹி ஆருப்பே அவிதக்கவிசாரமத்தங் இத⁴ விபாகங் அவிதக்கவிசாரமத்தந்திஆதி³ யோஜேதப்³ப³ந்தி அயமெத்த² விஸேஸோ. இத³ஞ்ச நாஸேவனவிப⁴ங்கா³னந்தரங் லிகி²தப்³ப³ங், ந ஜா²னானந்தரங், கேஸுசி பொத்த²கேஸு லிகி²தங்.
38. Nāsevanamūlake avitakkavicāramattaṃ vipākena saha gacchantenāti etaṃ mūlaṃ avitakkavicāramattaavitakkavicārapadehi avitakkehi saha yojentena napurejātasadisaṃ pāḷigamanaṃ kātabbanti vuttaṃ hoti. Sadisatā cettha yebhuyyena visadisatā ca daṭṭhabbā. Tattha hi āruppe avitakkavicāramattaṃ idha vipākaṃ avitakkavicāramattantiādi yojetabbanti ayamettha viseso. Idañca nāsevanavibhaṅgānantaraṃ likhitabbaṃ, na jhānānantaraṃ, kesuci potthakesu likhitaṃ.
பச்சயவாரே பட²மக⁴டனே பவத்திபடிஸந்தி⁴யோதி து³மூலகேஸு பட²மே ஸத்தஸுபி பஞ்ஹேஸு பவத்திஞ்ச படிஸந்தி⁴ஞ்ச யோஜெத்வாதி வுத்தங் ஹோதி.
Paccayavāre paṭhamaghaṭane pavattipaṭisandhiyoti dumūlakesu paṭhame sattasupi pañhesu pavattiñca paṭisandhiñca yojetvāti vuttaṃ hoti.
49. பச்சனீயே ஸத்தஸு டா²னேஸு ஸத்த மோஹா உத்³த⁴ரிதப்³பா³ மூலபதே³ஸு ஏவாதி ஸவிதக்கஸவிசாராதி³பதே³ஸு மூலபத³மேவ அவஸானபா⁴வேன யேஸு பஞ்ஹேஸு யோஜிதங், தேஸு ஸத்தஸு பஞ்ஹேஸு ஸத்த மோஹா உத்³த⁴ரிதப்³பா³தி அத்தோ².
49. Paccanīye sattasu ṭhānesu satta mohā uddharitabbā mūlapadesu evāti savitakkasavicārādipadesu mūlapadameva avasānabhāvena yesu pañhesu yojitaṃ, tesu sattasu pañhesu satta mohā uddharitabbāti attho.
பஞ்ஹாவாரபச்சனீயே ‘‘அவிதக்கவிசாரமத்தோ த⁴ம்மோ அவிதக்கவிசாரமத்தஸ்ஸ த⁴ம்மஸ்ஸ ஆரம்மணஸஹஜாதஉபனிஸ்ஸயகம்மபச்சயேன பச்சயோ’’தி கேஸுசி பொத்த²கேஸு பாடோ² தி³ஸ்ஸதி, உபனிஸ்ஸயேன பன ஸங்க³ஹிதத்தா ‘‘கம்மபச்சயேன பச்சயோ’’தி ந ஸக்கா வத்துங். உபாதி³ன்னத்திகபஞ்ஹாவாரபச்சனீயே ஹி ‘‘அனுபாதி³ன்னஅனுபாதா³னியோ த⁴ம்மோ அனுபாதி³ன்னஅனுபாதா³னியஸ்ஸ த⁴ம்மஸ்ஸ ஸஹஜாதஉபனிஸ்ஸயபச்சயேன பச்சயோ’’தி (பட்டா²॰ 1.4.58, 62) எத்தகமேவ வுத்தங். பரித்தத்திகபஞ்ஹாவாரபச்சனீயே ச ‘‘மஹக்³க³தோ த⁴ம்மோ மஹக்³க³தஸ்ஸ த⁴ம்மஸ்ஸ ஆரம்மணஸஹஜாதஉபனிஸ்ஸயபச்சயேன பச்சயோ’’தி (பட்டா²॰ 2.12.57, 65, 73) எத்தகமேவ வுத்தந்தி. எத்தகமேவ ச அவிதக்கவிசாரமத்தங் கம்மங் அப்பமாணங் மஹக்³க³தஞ்ச, தஞ்ச து³ப்³ப³லங் ந ஹோதீதி ஏதேஹியேவ வசனேஹி விஞ்ஞாயதீதி.
Pañhāvārapaccanīye ‘‘avitakkavicāramatto dhammo avitakkavicāramattassa dhammassa ārammaṇasahajātaupanissayakammapaccayena paccayo’’ti kesuci potthakesu pāṭho dissati, upanissayena pana saṅgahitattā ‘‘kammapaccayena paccayo’’ti na sakkā vattuṃ. Upādinnattikapañhāvārapaccanīye hi ‘‘anupādinnaanupādāniyo dhammo anupādinnaanupādāniyassa dhammassa sahajātaupanissayapaccayena paccayo’’ti (paṭṭhā. 1.4.58, 62) ettakameva vuttaṃ. Parittattikapañhāvārapaccanīye ca ‘‘mahaggato dhammo mahaggatassa dhammassa ārammaṇasahajātaupanissayapaccayena paccayo’’ti (paṭṭhā. 2.12.57, 65, 73) ettakameva vuttanti. Ettakameva ca avitakkavicāramattaṃ kammaṃ appamāṇaṃ mahaggatañca, tañca dubbalaṃ na hotīti etehiyeva vacanehi viññāyatīti.
விதக்கத்திகவண்ணனா நிட்டி²தா.
Vitakkattikavaṇṇanā niṭṭhitā.
Related texts:
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 6. விதக்கத்திகவண்ணனா • 6. Vitakkattikavaṇṇanā
