| Library / Tipiṭaka / တိပိဋက • Tipiṭaka / ကထာဝတ္ထုပာဠိ • Kathāvatthupāḷi |
၉. နဝမဝဂ္ဂော
9. Navamavaggo
(၉၁) ၈. ဝိတက္ကဝိပ္ဖာရသဒ္ဒကထာ
(91) 8. Vitakkavipphārasaddakathā
၅၆၃. သဗ္ဗသော ဝိတက္ကယတော ဝိစာရယတော ဝိတက္ကဝိပ္ဖာရော သဒ္ဒောတိ? အာမန္တာ။ သဗ္ဗသော ဖုသယတော ဖသ္သဝိပ္ဖာရော သဒ္ဒော, သဗ္ဗသော ဝေဒယတော ဝေဒနာဝိပ္ဖာရော သဒ္ဒော, သဗ္ဗသော သဉ္ဇာနတော သညာဝိပ္ဖာရော သဒ္ဒော, သဗ္ဗသော စေတယတော စေတနာဝိပ္ဖာရော သဒ္ဒော, သဗ္ဗသော စိန္တယတော စိတ္တဝိပ္ဖာရော သဒ္ဒော, သဗ္ဗသော သရတော သတိဝိပ္ဖာရော သဒ္ဒော, သဗ္ဗသော ပဇာနတော ပညာဝိပ္ဖာရော သဒ္ဒောတိ? န ဟေဝံ ဝတ္တဗ္ဗေ။ပေ.။။
563. Sabbaso vitakkayato vicārayato vitakkavipphāro saddoti? Āmantā. Sabbaso phusayato phassavipphāro saddo, sabbaso vedayato vedanāvipphāro saddo, sabbaso sañjānato saññāvipphāro saddo, sabbaso cetayato cetanāvipphāro saddo, sabbaso cintayato cittavipphāro saddo, sabbaso sarato sativipphāro saddo, sabbaso pajānato paññāvipphāro saddoti? Na hevaṃ vattabbe…pe….
သဗ္ဗသော ဝိတက္ကယတော ဝိစာရယတော ဝိတက္ကဝိပ္ဖာရော သဒ္ဒောတိ? အာမန္တာ။ ဝိတက္ကဝိပ္ဖာရော သဒ္ဒော သောတဝိညေယ္ယော သောတသ္မိံ ပဋိဟညတိ သောတသ္သ အာပာထံ အာဂစ္ဆတီတိ? န ဟေဝံ ဝတ္တဗ္ဗေ။ပေ.။။ နနု ဝိတက္ကဝိပ္ဖာရော သဒ္ဒော န သောတဝိညေယ္ယော န သောတသ္မိံ ပဋိဟညတိ န သောတသ္သ အာပာထံ အာဂစ္ဆတီတိ? အာမန္တာ။ ဟဉ္စိ ဝိတက္ကဝိပ္ဖာရော သဒ္ဒော န သောတဝိညေယ္ယော န သောတသ္မိံ ပဋိဟညတိ န သောတသ္သ အာပာထံ အာဂစ္ဆတိ, နော စ ဝတ ရေ ဝတ္တဗ္ဗေ – ‘‘သဗ္ဗသော ဝိတက္ကယတော ဝိစာရယတော ဝိတက္ကဝိပ္ဖာရော သဒ္ဒော’’တိ။
Sabbaso vitakkayato vicārayato vitakkavipphāro saddoti? Āmantā. Vitakkavipphāro saddo sotaviññeyyo sotasmiṃ paṭihaññati sotassa āpāthaṃ āgacchatīti? Na hevaṃ vattabbe…pe…. Nanu vitakkavipphāro saddo na sotaviññeyyo na sotasmiṃ paṭihaññati na sotassa āpāthaṃ āgacchatīti? Āmantā. Hañci vitakkavipphāro saddo na sotaviññeyyo na sotasmiṃ paṭihaññati na sotassa āpāthaṃ āgacchati, no ca vata re vattabbe – ‘‘sabbaso vitakkayato vicārayato vitakkavipphāro saddo’’ti.
ဝိတက္ကဝိပ္ဖာရသဒ္ဒကထာ နိဋ္ဌိတာ။
Vitakkavipphārasaddakathā niṭṭhitā.
Related texts:
အဋ္ဌကထာ • Aṭṭhakathā / အဘိဓမ္မပိဋက (အဋ္ဌကထာ) • Abhidhammapiṭaka (aṭṭhakathā) / ပဉ္စပကရဏ-အဋ္ဌကထာ • Pañcapakaraṇa-aṭṭhakathā / ၈. ဝိတက္ကဝိပ္ဖာရသဒ္ဒကထာဝဏ္ဏနာ • 8. Vitakkavipphārasaddakathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-မူလဋီကာ • Pañcapakaraṇa-mūlaṭīkā / ၈. ဝိတက္ကဝိပ္ဖာရသဒ္ဒကထာဝဏ္ဏနာ • 8. Vitakkavipphārasaddakathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-အနုဋီကာ • Pañcapakaraṇa-anuṭīkā / ၈. ဝိတက္ကဝိပ္ဖာရသဒ္ဒကထာဝဏ္ဏနာ • 8. Vitakkavipphārasaddakathāvaṇṇanā
