| Library / Tipiṭaka / ཏིཔིཊཀ • Tipiṭaka / ཀཐཱཝཏྠུཔཱལི༹ • Kathāvatthupāḷi |
༩. ནཝམཝགྒོ
9. Navamavaggo
(༩༡) ༨. ཝིཏཀྐཝིཔྥཱརསདྡཀཐཱ
(91) 8. Vitakkavipphārasaddakathā
༥༦༣. སབྦསོ ཝིཏཀྐཡཏོ ཝིཙཱརཡཏོ ཝིཏཀྐཝིཔྥཱརོ སདྡོཏི? ཨཱམནྟཱ། སབྦསོ ཕུསཡཏོ ཕསྶཝིཔྥཱརོ སདྡོ, སབྦསོ ཝེདཡཏོ ཝེདནཱཝིཔྥཱརོ སདྡོ, སབྦསོ སཉྫཱནཏོ སཉྙཱཝིཔྥཱརོ སདྡོ, སབྦསོ ཙེཏཡཏོ ཙེཏནཱཝིཔྥཱརོ སདྡོ, སབྦསོ ཙིནྟཡཏོ ཙིཏྟཝིཔྥཱརོ སདྡོ, སབྦསོ སརཏོ སཏིཝིཔྥཱརོ སདྡོ, སབྦསོ པཛཱནཏོ པཉྙཱཝིཔྥཱརོ སདྡོཏི? ན ཧེཝཾ ཝཏྟབྦེ…པེ॰…།
563. Sabbaso vitakkayato vicārayato vitakkavipphāro saddoti? Āmantā. Sabbaso phusayato phassavipphāro saddo, sabbaso vedayato vedanāvipphāro saddo, sabbaso sañjānato saññāvipphāro saddo, sabbaso cetayato cetanāvipphāro saddo, sabbaso cintayato cittavipphāro saddo, sabbaso sarato sativipphāro saddo, sabbaso pajānato paññāvipphāro saddoti? Na hevaṃ vattabbe…pe….
སབྦསོ ཝིཏཀྐཡཏོ ཝིཙཱརཡཏོ ཝིཏཀྐཝིཔྥཱརོ སདྡོཏི? ཨཱམནྟཱ། ཝིཏཀྐཝིཔྥཱརོ སདྡོ སོཏཝིཉྙེཡྻོ སོཏསྨིཾ པཊིཧཉྙཏི སོཏསྶ ཨཱཔཱཐཾ ཨཱགཙྪཏཱིཏི? ན ཧེཝཾ ཝཏྟབྦེ…པེ॰…། ནནུ ཝིཏཀྐཝིཔྥཱརོ སདྡོ ན སོཏཝིཉྙེཡྻོ ན སོཏསྨིཾ པཊིཧཉྙཏི ན སོཏསྶ ཨཱཔཱཐཾ ཨཱགཙྪཏཱིཏི? ཨཱམནྟཱ། ཧཉྩི ཝིཏཀྐཝིཔྥཱརོ སདྡོ ན སོཏཝིཉྙེཡྻོ ན སོཏསྨིཾ པཊིཧཉྙཏི ན སོཏསྶ ཨཱཔཱཐཾ ཨཱགཙྪཏི, ནོ ཙ ཝཏ རེ ཝཏྟབྦེ – ‘‘སབྦསོ ཝིཏཀྐཡཏོ ཝིཙཱརཡཏོ ཝིཏཀྐཝིཔྥཱརོ སདྡོ’’ཏི།
Sabbaso vitakkayato vicārayato vitakkavipphāro saddoti? Āmantā. Vitakkavipphāro saddo sotaviññeyyo sotasmiṃ paṭihaññati sotassa āpāthaṃ āgacchatīti? Na hevaṃ vattabbe…pe…. Nanu vitakkavipphāro saddo na sotaviññeyyo na sotasmiṃ paṭihaññati na sotassa āpāthaṃ āgacchatīti? Āmantā. Hañci vitakkavipphāro saddo na sotaviññeyyo na sotasmiṃ paṭihaññati na sotassa āpāthaṃ āgacchati, no ca vata re vattabbe – ‘‘sabbaso vitakkayato vicārayato vitakkavipphāro saddo’’ti.
ཝིཏཀྐཝིཔྥཱརསདྡཀཐཱ ནིཊྛིཏཱ།
Vitakkavipphārasaddakathā niṭṭhitā.
Related texts:
ཨཊྛཀཐཱ • Aṭṭhakathā / ཨབྷིདྷམྨཔིཊཀ (ཨཊྛཀཐཱ) • Abhidhammapiṭaka (aṭṭhakathā) / པཉྩཔཀརཎ-ཨཊྛཀཐཱ • Pañcapakaraṇa-aṭṭhakathā / ༨. ཝིཏཀྐཝིཔྥཱརསདྡཀཐཱཝཎྞནཱ • 8. Vitakkavipphārasaddakathāvaṇṇanā
ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / པཉྩཔཀརཎ-མཱུལཊཱིཀཱ • Pañcapakaraṇa-mūlaṭīkā / ༨. ཝིཏཀྐཝིཔྥཱརསདྡཀཐཱཝཎྞནཱ • 8. Vitakkavipphārasaddakathāvaṇṇanā
ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / པཉྩཔཀརཎ-ཨནུཊཱིཀཱ • Pañcapakaraṇa-anuṭīkā / ༨. ཝིཏཀྐཝིཔྥཱརསདྡཀཐཱཝཎྞནཱ • 8. Vitakkavipphārasaddakathāvaṇṇanā
