| Library / Tipiṭaka / តិបិដក • Tipiṭaka / បញ្ចបករណ-អដ្ឋកថា • Pañcapakaraṇa-aṭṭhakathā |
៨. វិតក្កវិប្ផារសទ្ទកថាវណ្ណនា
8. Vitakkavipphārasaddakathāvaṇṇanā
៥៦៣. ឥទានិ វិតក្កវិប្ផារសទ្ទកថា នាម ហោតិ។ តត្ថ យស្មា ‘‘វិតក្កវិចារា វចីសង្ខារា’’តិ វុត្តា, តស្មា សព្ពសោ វិតក្កយតោ វិចារយតោ អន្តមសោ មនោធាតុបវត្តិកាលេបិ វិតក្កវិប្ផារោ សទ្ទោយេវាតិ យេសំ លទ្ធិ, សេយ្យថាបិ បុព្ពសេលិយានំ; តេ សន្ធាយ សព្ពសោតិ បុច្ឆា សកវាទិស្ស បដិញ្ញា ឥតរស្ស។ អថ នំ យទិ វិតក្កវិប្ផារមត្តំ សទ្ទោ, ផស្សាទិវិប្ផារោបិ សទ្ទោ ភវេយ្យាតិ ចោទេតុំ សព្ពសោ ផុសយតោតិអាទិមាហ។ ឥតរោ តាទិសំ សុត្តលេសំ អបស្សន្តោ បដិក្ខិបតិ។ វិតក្កវិប្ផារោ សទ្ទោ សោតវិញ្ញេយ្យោតិ វិតក្កស្ស វិប្ផារមត្តមេវ សទ្ទោតិ កត្វា បុច្ឆតិ, ន វិតក្កវិប្ផារសមុដ្ឋិតំ សុត្តបមត្តានំ សទ្ទំ, ឥតរោ បដិក្ខិបតិ។ ននុ វិតក្កវិប្ផារសទ្ទោ ន សោតវិញ្ញេយ្យោតិ ឥទំ តស្សេវ លទ្ធិយា ទស្សេតិ។ សោ ហិ វិតក្កវិប្ផារមត្តមេវ សទ្ទំ វទតិ, សោ ន សោតវិញ្ញេយ្យោតិ។ ឥតរោ បន ‘‘វិតក្កវិប្ផារសទ្ទំ សុត្វា អាទិសតី’’ តិ (ទី. និ. ៣.១៤៨) វចនតោ សោតវិញ្ញេយ្យោវាតិ វទតិ។
563. Idāni vitakkavipphārasaddakathā nāma hoti. Tattha yasmā ‘‘vitakkavicārā vacīsaṅkhārā’’ti vuttā, tasmā sabbaso vitakkayato vicārayato antamaso manodhātupavattikālepi vitakkavipphāro saddoyevāti yesaṃ laddhi, seyyathāpi pubbaseliyānaṃ; te sandhāya sabbasoti pucchā sakavādissa paṭiññā itarassa. Atha naṃ yadi vitakkavipphāramattaṃ saddo, phassādivipphāropi saddo bhaveyyāti codetuṃ sabbaso phusayatotiādimāha. Itaro tādisaṃ suttalesaṃ apassanto paṭikkhipati. Vitakkavipphāro saddo sotaviññeyyoti vitakkassa vipphāramattameva saddoti katvā pucchati, na vitakkavipphārasamuṭṭhitaṃ suttapamattānaṃ saddaṃ, itaro paṭikkhipati. Nanu vitakkavipphārasaddo na sotaviññeyyoti idaṃ tasseva laddhiyā dasseti. So hi vitakkavipphāramattameva saddaṃ vadati, so na sotaviññeyyoti. Itaro pana ‘‘vitakkavipphārasaddaṃ sutvā ādisatī’’ ti (dī. ni. 3.148) vacanato sotaviññeyyovāti vadati.
វិតក្កវិប្ផារសទ្ទកថាវណ្ណនា។
Vitakkavipphārasaddakathāvaṇṇanā.
Related texts:
តិបិដក (មូល) • Tipiṭaka (Mūla) / អភិធម្មបិដក • Abhidhammapiṭaka / កថាវត្ថុបាឡិ • Kathāvatthupāḷi / (៩១) ៨. វិតក្កវិប្ផារសទ្ទកថា • (91) 8. Vitakkavipphārasaddakathā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-មូលដីកា • Pañcapakaraṇa-mūlaṭīkā / ៨. វិតក្កវិប្ផារសទ្ទកថាវណ្ណនា • 8. Vitakkavipphārasaddakathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-អនុដីកា • Pañcapakaraṇa-anuṭīkā / ៨. វិតក្កវិប្ផារសទ្ទកថាវណ្ណនា • 8. Vitakkavipphārasaddakathāvaṇṇanā
