| Library / Tipiṭaka / တိပိဋက • Tipiṭaka / ပဉ္စပကရဏ-အဋ္ဌကထာ • Pañcapakaraṇa-aṭṭhakathā |
၈. ဝိတက္ကဝိပ္ဖာရသဒ္ဒကထာဝဏ္ဏနာ
8. Vitakkavipphārasaddakathāvaṇṇanā
၅၆၃. ဣဒာနိ ဝိတက္ကဝိပ္ဖာရသဒ္ဒကထာ နာမ ဟောတိ။ တတ္ထ ယသ္မာ ‘‘ဝိတက္ကဝိစာရာ ဝစီသင္ခာရာ’’တိ ဝုတ္တာ, တသ္မာ သဗ္ဗသော ဝိတက္ကယတော ဝိစာရယတော အန္တမသော မနောဓာတုပဝတ္တိကာလေပိ ဝိတက္ကဝိပ္ဖာရော သဒ္ဒောယေဝာတိ ယေသံ လဒ္ဓိ, သေယ္ယထာပိ ပုဗ္ဗသေလိယာနံ; တေ သန္ဓာယ သဗ္ဗသောတိ ပုစ္ဆာ သကဝာဒိသ္သ ပဋိညာ ဣတရသ္သ။ အထ နံ ယဒိ ဝိတက္ကဝိပ္ဖာရမတ္တံ သဒ္ဒော, ဖသ္သာဒိဝိပ္ဖာရောပိ သဒ္ဒော ဘဝေယ္ယာတိ စောဒေတုံ သဗ္ဗသော ဖုသယတောတိအာဒိမာဟ။ ဣတရော တာဒိသံ သုတ္တလေသံ အပသ္သန္တော ပဋိက္ခိပတိ။ ဝိတက္ကဝိပ္ဖာရော သဒ္ဒော သောတဝိညေယ္ယောတိ ဝိတက္ကသ္သ ဝိပ္ဖာရမတ္တမေဝ သဒ္ဒောတိ ကတ္ဝာ ပုစ္ဆတိ, န ဝိတက္ကဝိပ္ဖာရသမုဋ္ဌိတံ သုတ္တပမတ္တာနံ သဒ္ဒံ, ဣတရော ပဋိက္ခိပတိ။ နနု ဝိတက္ကဝိပ္ဖာရသဒ္ဒော န သောတဝိညေယ္ယောတိ ဣဒံ တသ္သေဝ လဒ္ဓိယာ ဒသ္သေတိ။ သော ဟိ ဝိတက္ကဝိပ္ဖာရမတ္တမေဝ သဒ္ဒံ ဝဒတိ, သော န သောတဝိညေယ္ယောတိ။ ဣတရော ပန ‘‘ဝိတက္ကဝိပ္ဖာရသဒ္ဒံ သုတ္ဝာ အာဒိသတီ’’ တိ (ဒီ. နိ. ၃.၁၄၈) ဝစနတော သောတဝိညေယ္ယောဝာတိ ဝဒတိ။
563. Idāni vitakkavipphārasaddakathā nāma hoti. Tattha yasmā ‘‘vitakkavicārā vacīsaṅkhārā’’ti vuttā, tasmā sabbaso vitakkayato vicārayato antamaso manodhātupavattikālepi vitakkavipphāro saddoyevāti yesaṃ laddhi, seyyathāpi pubbaseliyānaṃ; te sandhāya sabbasoti pucchā sakavādissa paṭiññā itarassa. Atha naṃ yadi vitakkavipphāramattaṃ saddo, phassādivipphāropi saddo bhaveyyāti codetuṃ sabbaso phusayatotiādimāha. Itaro tādisaṃ suttalesaṃ apassanto paṭikkhipati. Vitakkavipphāro saddo sotaviññeyyoti vitakkassa vipphāramattameva saddoti katvā pucchati, na vitakkavipphārasamuṭṭhitaṃ suttapamattānaṃ saddaṃ, itaro paṭikkhipati. Nanu vitakkavipphārasaddo na sotaviññeyyoti idaṃ tasseva laddhiyā dasseti. So hi vitakkavipphāramattameva saddaṃ vadati, so na sotaviññeyyoti. Itaro pana ‘‘vitakkavipphārasaddaṃ sutvā ādisatī’’ ti (dī. ni. 3.148) vacanato sotaviññeyyovāti vadati.
ဝိတက္ကဝိပ္ဖာရသဒ္ဒကထာဝဏ္ဏနာ။
Vitakkavipphārasaddakathāvaṇṇanā.
Related texts:
တိပိဋက (မူလ) • Tipiṭaka (Mūla) / အဘိဓမ္မပိဋက • Abhidhammapiṭaka / ကထာဝတ္ထုပာဠိ • Kathāvatthupāḷi / (၉၁) ၈. ဝိတက္ကဝိပ္ဖာရသဒ္ဒကထာ • (91) 8. Vitakkavipphārasaddakathā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-မူလဋီကာ • Pañcapakaraṇa-mūlaṭīkā / ၈. ဝိတက္ကဝိပ္ဖာရသဒ္ဒကထာဝဏ္ဏနာ • 8. Vitakkavipphārasaddakathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-အနုဋီကာ • Pañcapakaraṇa-anuṭīkā / ၈. ဝိတက္ကဝိပ္ဖာရသဒ္ဒကထာဝဏ္ဏနာ • 8. Vitakkavipphārasaddakathāvaṇṇanā
