| Library / Tipiṭaka / ติปิฎก • Tipiṭaka / อปทาน-อฎฺฐกถา • Apadāna-aṭṭhakathā |
๓. วีถิสมฺมชฺชกเตฺถรอปทานวณฺณนา
3. Vīthisammajjakattheraapadānavaṇṇanā
อุเทนฺตํ สตรํสิํ วาติอาทิกํ อายสฺมโต วีถิสมฺมชฺชกเตฺถรสฺส อปทานํฯ อยมฺปิ ปุริมพุเทฺธสุ กตาธิกาโร อเนเกสุ ชาติสเตสุ กตปุญฺญสญฺจโย สิขิสฺส ภควโต กาเล กุลเคเห นิพฺพโตฺต ฆราวาสํ วสโนฺต นครวาสีหิ สทฺธิํ วีถิํ สเชฺชตฺวา นียมานํ ภควนฺตํ ทิสฺวา ปสนฺนมานโส วีถิํ สมํ กตฺวา ธชํ ตตฺถ อุสฺสาเปสิฯ
Udentaṃsataraṃsiṃ vātiādikaṃ āyasmato vīthisammajjakattherassa apadānaṃ. Ayampi purimabuddhesu katādhikāro anekesu jātisatesu katapuññasañcayo sikhissa bhagavato kāle kulagehe nibbatto gharāvāsaṃ vasanto nagaravāsīhi saddhiṃ vīthiṃ sajjetvā nīyamānaṃ bhagavantaṃ disvā pasannamānaso vīthiṃ samaṃ katvā dhajaṃ tattha ussāpesi.
๑๕. โส เตเนว ปุเญฺญน เทวมนุเสฺสสุ สํสรโนฺต อุภยสมฺปตฺติโย อนุภวิตฺวา อิมสฺมิํ พุทฺธุปฺปาเท เอกสฺมิํ กุเล นิพฺพโตฺต วิญฺญุตํ ปตฺวา สตฺถุ ธมฺมเทสนํ สุตฺวา ปฎิลทฺธสโทฺธ พหุมานหทโย ปพฺพชิตฺวา ลทฺธูปสมฺปโท นจิรเสฺสว อรหา หุตฺวา อตฺตโน ปุพฺพกมฺมํ อนุสฺสรโนฺต ปจฺจกฺขโต ชานิตฺวา ปุพฺพจริตาปทานํ ปกาเสโนฺต อุเทนฺตํ สตรํสิํ วาติอาทิมาหฯ ตตฺถ อุเทนฺตํ อุคฺคจฺฉนฺตํ สตรํสิํ สตปภํฯ สตรํสีติ เทสนาสีสมตฺตํ, อเนกสตสหสฺสปภํ สูริยํ อิวาติ อโตฺถฯ ปีตรํสิํว ภาณุมนฺติ ปีตรํสิํ สํกุจิตปภํ ภาณุมํ ปภาวนฺตํ จนฺทมณฺฑลํ อิว สมฺพุทฺธํ ทิสฺวาติ อโตฺถฯ เสสํ สุวิเญฺญยฺยเมวาติฯ
15. So teneva puññena devamanussesu saṃsaranto ubhayasampattiyo anubhavitvā imasmiṃ buddhuppāde ekasmiṃ kule nibbatto viññutaṃ patvā satthu dhammadesanaṃ sutvā paṭiladdhasaddho bahumānahadayo pabbajitvā laddhūpasampado nacirasseva arahā hutvā attano pubbakammaṃ anussaranto paccakkhato jānitvā pubbacaritāpadānaṃ pakāsento udentaṃ sataraṃsiṃ vātiādimāha. Tattha udentaṃ uggacchantaṃ sataraṃsiṃ satapabhaṃ. Sataraṃsīti desanāsīsamattaṃ, anekasatasahassapabhaṃ sūriyaṃ ivāti attho. Pītaraṃsiṃva bhāṇumanti pītaraṃsiṃ saṃkucitapabhaṃ bhāṇumaṃ pabhāvantaṃ candamaṇḍalaṃ iva sambuddhaṃ disvāti attho. Sesaṃ suviññeyyamevāti.
วีถิสมฺมชฺชกเตฺถรอปทานวณฺณนา สมตฺตาฯ
Vīthisammajjakattheraapadānavaṇṇanā samattā.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / ขุทฺทกนิกาย • Khuddakanikāya / อปทานปาฬิ • Apadānapāḷi / ๓. วีถิสมฺมชฺชกเตฺถรอปทานํ • 3. Vīthisammajjakattheraapadānaṃ
