| Library / Tipiṭaka / တိပိဋက • Tipiṭaka / အပဒာန-အဋ္ဌကထာ • Apadāna-aṭṭhakathā |
၃. ဝီထိသမ္မဇ္ဇကတ္ထေရအပဒာနဝဏ္ဏနာ
3. Vīthisammajjakattheraapadānavaṇṇanā
ဥဒေန္တံ သတရံသိံ ဝာတိအာဒိကံ အာယသ္မတော ဝီထိသမ္မဇ္ဇကတ္ထေရသ္သ အပဒာနံ။ အယမ္ပိ ပုရိမဗုဒ္ဓေသု ကတာဓိကာရော အနေကေသု ဇာတိသတေသု ကတပုညသဉ္စယော သိခိသ္သ ဘဂဝတော ကာလေ ကုလဂေဟေ နိဗ္ဗတ္တော ဃရာဝာသံ ဝသန္တော နဂရဝာသီဟိ သဒ္ဓိံ ဝီထိံ သဇ္ဇေတ္ဝာ နီယမာနံ ဘဂဝန္တံ ဒိသ္ဝာ ပသန္နမာနသော ဝီထိံ သမံ ကတ္ဝာ ဓဇံ တတ္ထ ဥသ္သာပေသိ။
Udentaṃsataraṃsiṃ vātiādikaṃ āyasmato vīthisammajjakattherassa apadānaṃ. Ayampi purimabuddhesu katādhikāro anekesu jātisatesu katapuññasañcayo sikhissa bhagavato kāle kulagehe nibbatto gharāvāsaṃ vasanto nagaravāsīhi saddhiṃ vīthiṃ sajjetvā nīyamānaṃ bhagavantaṃ disvā pasannamānaso vīthiṃ samaṃ katvā dhajaṃ tattha ussāpesi.
၁၅. သော တေနေဝ ပုညေန ဒေဝမနုသ္သေသု သံသရန္တော ဥဘယသမ္ပတ္တိယော အနုဘဝိတ္ဝာ ဣမသ္မိံ ဗုဒ္ဓုပ္ပာဒေ ဧကသ္မိံ ကုလေ နိဗ္ဗတ္တော ဝိညုတံ ပတ္ဝာ သတ္ထု ဓမ္မဒေသနံ သုတ္ဝာ ပဋိလဒ္ဓသဒ္ဓော ဗဟုမာနဟဒယော ပဗ္ဗဇိတ္ဝာ လဒ္ဓူပသမ္ပဒော နစိရသ္သေဝ အရဟာ ဟုတ္ဝာ အတ္တနော ပုဗ္ဗကမ္မံ အနုသ္သရန္တော ပစ္စက္ခတော ဇာနိတ္ဝာ ပုဗ္ဗစရိတာပဒာနံ ပကာသေန္တော ဥဒေန္တံ သတရံသိံ ဝာတိအာဒိမာဟ။ တတ္ထ ဥဒေန္တံ ဥဂ္ဂစ္ဆန္တံ သတရံသိံ သတပဘံ။ သတရံသီတိ ဒေသနာသီသမတ္တံ, အနေကသတသဟသ္သပဘံ သူရိယံ ဣဝာတိ အတ္ထော။ ပီတရံသိံဝ ဘာဏုမန္တိ ပီတရံသိံ သံကုစိတပဘံ ဘာဏုမံ ပဘာဝန္တံ စန္ဒမဏ္ဍလံ ဣဝ သမ္ဗုဒ္ဓံ ဒိသ္ဝာတိ အတ္ထော။ သေသံ သုဝိညေယ္ယမေဝာတိ။
15. So teneva puññena devamanussesu saṃsaranto ubhayasampattiyo anubhavitvā imasmiṃ buddhuppāde ekasmiṃ kule nibbatto viññutaṃ patvā satthu dhammadesanaṃ sutvā paṭiladdhasaddho bahumānahadayo pabbajitvā laddhūpasampado nacirasseva arahā hutvā attano pubbakammaṃ anussaranto paccakkhato jānitvā pubbacaritāpadānaṃ pakāsento udentaṃ sataraṃsiṃ vātiādimāha. Tattha udentaṃ uggacchantaṃ sataraṃsiṃ satapabhaṃ. Sataraṃsīti desanāsīsamattaṃ, anekasatasahassapabhaṃ sūriyaṃ ivāti attho. Pītaraṃsiṃva bhāṇumanti pītaraṃsiṃ saṃkucitapabhaṃ bhāṇumaṃ pabhāvantaṃ candamaṇḍalaṃ iva sambuddhaṃ disvāti attho. Sesaṃ suviññeyyamevāti.
ဝီထိသမ္မဇ္ဇကတ္ထေရအပဒာနဝဏ္ဏနာ သမတ္တာ။
Vīthisammajjakattheraapadānavaṇṇanā samattā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / ခုဒ္ဒကနိကာယ • Khuddakanikāya / အပဒာနပာဠိ • Apadānapāḷi / ၃. ဝီထိသမ္မဇ္ဇကတ္ထေရအပဒာနံ • 3. Vīthisammajjakattheraapadānaṃ
