| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
3. වීථිසම්‌මජ්‌ජකත්‌ථෙරඅපදානවණ්‌ණනා
3. Vīthisammajjakattheraapadānavaṇṇanā
උදෙන්‌තං සතරංසිං වාතිආදිකං ආයස්‌මතො වීථිසම්‌මජ්‌ජකත්‌ථෙරස්‌ස අපදානං. අයම්‌පි පුරිමබුද්‌ධෙසු කතාධිකාරො අනෙකෙසු ජාතිසතෙසු කතපුඤ්‌ඤසඤ්‌චයො සිඛිස්‌ස භගවතො කාලෙ කුලගෙහෙ නිබ්‌බත්‌තො ඝරාවාසං වසන්‌තො නගරවාසීහි සද්‌ධිං වීථිං සජ්‌ජෙත්‌වා නීයමානං භගවන්‌තං දිස්‌වා පසන්‌නමානසො වීථිං සමං කත්‌වා ධජං තත්‌ථ උස්‌සාපෙසි.
Udentaṃsataraṃsiṃ vātiādikaṃ āyasmato vīthisammajjakattherassa apadānaṃ. Ayampi purimabuddhesu katādhikāro anekesu jātisatesu katapuññasañcayo sikhissa bhagavato kāle kulagehe nibbatto gharāvāsaṃ vasanto nagaravāsīhi saddhiṃ vīthiṃ sajjetvā nīyamānaṃ bhagavantaṃ disvā pasannamānaso vīthiṃ samaṃ katvā dhajaṃ tattha ussāpesi.
15. සො තෙනෙව පුඤ්‌ඤෙන දෙවමනුස්‌සෙසු සංසරන්‌තො උභයසම්‌පත්‌තියො අනුභවිත්‌වා ඉමස්‌මිං බුද්‌ධුප්‌පාදෙ එකස්‌මිං කුලෙ නිබ්‌බත්‌තො විඤ්‌ඤුතං පත්‌වා සත්‌ථු ධම්‌මදෙසනං සුත්‌වා පටිලද්‌ධසද්‌ධො බහුමානහදයො පබ්‌බජිත්‌වා ලද්‌ධූපසම්‌පදො නචිරස්‌සෙව අරහා හුත්‌වා අත්‌තනො පුබ්‌බකම්‌මං අනුස්‌සරන්‌තො පච්‌චක්‌ඛතො ජානිත්‌වා පුබ්‌බචරිතාපදානං පකාසෙන්‌තො උදෙන්‌තං සතරංසිං වාතිආදිමාහ. තත්‌ථ උදෙන්‌තං උග්‌ගච්‌ඡන්‌තං සතරංසිං සතපභං. සතරංසීති දෙසනාසීසමත්‌තං, අනෙකසතසහස්‌සපභං සූරියං ඉවාති අත්‌ථො. පීතරංසිංව භාණුමන්‌ති පීතරංසිං සංකුචිතපභං භාණුමං පභාවන්‌තං චන්‌දමණ්‌ඩලං ඉව සම්‌බුද්‌ධං දිස්‌වාති අත්‌ථො. සෙසං සුවිඤ්‌ඤෙය්‍යමෙවාති.
15. So teneva puññena devamanussesu saṃsaranto ubhayasampattiyo anubhavitvā imasmiṃ buddhuppāde ekasmiṃ kule nibbatto viññutaṃ patvā satthu dhammadesanaṃ sutvā paṭiladdhasaddho bahumānahadayo pabbajitvā laddhūpasampado nacirasseva arahā hutvā attano pubbakammaṃ anussaranto paccakkhato jānitvā pubbacaritāpadānaṃ pakāsento udentaṃ sataraṃsiṃ vātiādimāha. Tattha udentaṃ uggacchantaṃ sataraṃsiṃ satapabhaṃ. Sataraṃsīti desanāsīsamattaṃ, anekasatasahassapabhaṃ sūriyaṃ ivāti attho. Pītaraṃsiṃva bhāṇumanti pītaraṃsiṃ saṃkucitapabhaṃ bhāṇumaṃ pabhāvantaṃ candamaṇḍalaṃ iva sambuddhaṃ disvāti attho. Sesaṃ suviññeyyamevāti.
වීථිසම්‌මජ්‌ජකත්‌ථෙරඅපදානවණ්‌ණනා සමත්‌තා.
Vīthisammajjakattheraapadānavaṇṇanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi / 3. වීථිසම්‌මජ්‌ජකත්‌ථෙරඅපදානං • 3. Vīthisammajjakattheraapadānaṃ
