| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
3. வித்தஸுத்தவண்ணனா
3. Vittasuttavaṇṇanā
73. ததியே ஸத்³தீ⁴த⁴ வித்தந்தி யஸ்மா ஸத்³தோ⁴ ஸத்³தா⁴ய முத்தமணிஆதீ³னிபி வித்தானி லப⁴தி, திஸ்ஸோபி குலஸம்பதா³, ச² காமஸக்³கா³னி, நவ ப்³ரஹ்மலோகே பத்வா பரியோஸானே அமதமஹானிப்³பா³னத³ஸ்ஸனம்பி லப⁴தி, தஸ்மா மணிமுத்தாதீ³ஹி வித்தேஹி ஸத்³தா⁴வித்தமேவ ஸெட்ட²ங். த⁴ம்மோதி த³ஸகுஸலகம்மபதோ². ஸுக²மாவஹதீதி ஸப்³ப³ம்பி ஸாஸவானாஸவங் அஸங்கிலிட்ட²ஸுக²ங் ஆவஹதி. ஸாது³தரந்தி லோகஸ்மிங் லோணம்பி³லாதீ³னங் ஸப்³ப³ரஸானங் ஸச்சமேவ மது⁴ரதரங். ஸச்சஸ்மிங் ஹி டி²தா ஸீக⁴வேக³ங் நதி³ம்பி நிவத்தெந்தி, விஸம்பி நிம்மத்³தெ³ந்தி, அக்³கி³ம்பி படிபா³ஹந்தி, தே³வம்பி வஸ்ஸாபெந்தி, தஸ்மா தங் ஸப்³ப³ரஸானங் மது⁴ரதரந்தி வுத்தங். பஞ்ஞாஜீவிங் ஜீவிதமாஹு ஸெட்ட²ந்தி யோ பஞ்ஞாஜீவீ க³ஹட்டோ² ஸமானோ பஞ்சஸு ஸீலேஸு பதிட்டா²ய ஸலாகப⁴த்தாதீ³னி பட்ட²பெத்வா பஞ்ஞாய ஜீவதி, பப்³ப³ஜிதோ வா பன த⁴ம்மேன உப்பன்னே பச்சயே ‘‘இத³மத்த²’’ந்தி பச்சவெக்கி²த்வா பரிபு⁴ஞ்ஜந்தோ கம்மட்டா²னங் ஆதா³ய விபஸ்ஸனங் பட்ட²பெத்வா அரியப²லாதி⁴க³மவஸேன பஞ்ஞாய ஜீவதி, தங் பஞ்ஞாஜீவிங் புக்³க³லங் ஸெட்ட²ங் ஜீவிதங் ஜீவதீதி ஆஹு. ததியங்.
73. Tatiye saddhīdha vittanti yasmā saddho saddhāya muttamaṇiādīnipi vittāni labhati, tissopi kulasampadā, cha kāmasaggāni, nava brahmaloke patvā pariyosāne amatamahānibbānadassanampi labhati, tasmā maṇimuttādīhi vittehi saddhāvittameva seṭṭhaṃ. Dhammoti dasakusalakammapatho. Sukhamāvahatīti sabbampi sāsavānāsavaṃ asaṃkiliṭṭhasukhaṃ āvahati. Sādutaranti lokasmiṃ loṇambilādīnaṃ sabbarasānaṃ saccameva madhurataraṃ. Saccasmiṃ hi ṭhitā sīghavegaṃ nadimpi nivattenti, visampi nimmaddenti, aggimpi paṭibāhanti, devampi vassāpenti, tasmā taṃ sabbarasānaṃ madhurataranti vuttaṃ. Paññājīviṃ jīvitamāhu seṭṭhanti yo paññājīvī gahaṭṭho samāno pañcasu sīlesu patiṭṭhāya salākabhattādīni paṭṭhapetvā paññāya jīvati, pabbajito vā pana dhammena uppanne paccaye ‘‘idamattha’’nti paccavekkhitvā paribhuñjanto kammaṭṭhānaṃ ādāya vipassanaṃ paṭṭhapetvā ariyaphalādhigamavasena paññāya jīvati, taṃ paññājīviṃ puggalaṃ seṭṭhaṃ jīvitaṃ jīvatīti āhu. Tatiyaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 3. வித்தஸுத்தங் • 3. Vittasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 3. வித்தஸுத்தவண்ணனா • 3. Vittasuttavaṇṇanā
